Pregunta di Lector

Yehova a permiti poligamia entre e Israelitanan, su sirbidonan di antiguedad, pero awendia e no ta permiti esei mas. Acaso su norma por cambia?

Yehova no a cambia su punto di bista tocante poligamia. (Salmo 19:7; Malakias 3:6) Poligamia no tawata parti di Yehova su areglo pa hende na principio, y aworaki tampoco. Ora el a crea Eva como esposa pa Adam, Yehova a declara cu e norma dibino ta un esposa pa un esposo. “Pesei un homber lo bandona su tata y su mama y lo uni cu su esposa. Y nan lo bira un carni.”—Genesis 2:24.

Ora Hesucristo tawata riba tera el a bolbe declara e norma aki ora el a contesta esnan cu a hacie pregunta tocante diborcia y casa di nobo. El a bisa: “Boso no a lesa cu Esun cu a crea hende for di principio ‘a traha nan homber y mohe’, y a bisa: ‘Pa e motibo aki un homber lo bandona su tata y mama y lo uni cu su esposa; y nan dos lo bira un carni’? Asina anto nan no ta dos mas, sino un carni.” Hesus a agrega: “Ken cu diborcia su esposa, si no ta pa motibo di inmoralidad sexual, y casa cu otro mohe, ta comete adulterio.” (Mateo 19:4-6, 9) For di e declaracion aki ta bisto cu un homber cu tin mas cu un esposa tambe ta comete adulterio.

Pakico anto poligamia a ser permiti den tempo di antiguedad? Corda cu no ta Yehova a inicia e practica aki. E prome persona cu Bijbel ta menciona cu tawatin mas cu un esposa ta Lamec, un desendiente di Cain. (Genesis 4:19-24) Ora cu Yehova a trece e Dilubio den tempo di Noe, tanto Noe como su tres yiu hombernan cada un tawatin solamente un esposa. Tur hende poligamo a ser destrui den e Dilubio.

Siglonan despues ora Yehova a scohe e Israelitanan como su pueblo, nan tawata practica poligamia caba, aunke aparentemente tawata mas comun pa un homber tin solamente un esposa. Dios no a exigi pa kibra famianan cu tawatin mas cu un esposa. En bes di esei, el a pone reglamento stricto pa e practica ei.—Exodo 21:10, 11; Deuteronomio 21:15-17.

Yehova a tolera poligamia temporalmente. Nos por ripara esaki no solamente for di loke Hesus a bisa encuanto Yehova su norma original pa matrimonio, sino tambe for di loke apostel Pablo a skirbi bou di inspiracion di e spirito santo di Dios. El a bisa: “Laga cada homber tin su mes esposa, y laga cada mohe tin su mes esposo.” (1 Corintionan 7:2) Tambe Pablo a ser inspira pa skirbi cu tur homber casa nombra como superintendente of sirbido ministerial den e congregacion cristian mester ta “esposo di un esposa.”—1 Timoteo 3:2, 12; Tito 1:6.

Pues, ora e congregacion cristian a ser forma mas o menos 2.000 aña pasa, Yehova no a tolera poligamia mas. E tempo ei, e norma pa matrimonio a bolbe bira loke e tawata na principio ora Dios a crea homber y mohe: un esposa pa un esposo. Esaki ta e norma cu e pueblo di Dios ta sigui awe rond mundo.—Marco 10:11, 12; 1 Corintionan 6:9, 10.