Adoracion Berdadero Ta Uni un Famia

MARIA tawatin 13 aña ora un famia di dje a papia cu ne y su ruman mohe mas chikito, Lucy, tocante Yehova. E famia aki a splica nan tambe tocante e speransa di Paradijs riba tera. Nan a bira curioso y a bai Salon di Reino di Testigonan di Yehova cu ne. Maria a keda impresiona cu e siñansa bon cla cu el a tende einan. E tawata hopi diferente for di misa, caminda e ceremonia a consisti casi di cantamento so! No a tarda hopi cu nan a cuminsa studia Bijbel cu un Testigo di Yehova.

Hugo, nan ruman homber grandi, tawata interesa den filosofia y evolucion. E tawata yama su mes un ateo. Pero ora e tawata den dienst, el a lesa e buki Bida—Con El A Presenta? Door di Evolucion of Creacion?  * El a haya contesta pa preguntanan cu ningun otro religion por a dun’e. Ora el a termina su sirbishi militar, el a cuminsa fortalece su fe nobo den Dios door di studia Bijbel y bai reunion cu su ruman mohenan. Maria cu Lucy a batisa na 1992. Esei tawata dos aña despues cu nan a tende e berdad pa prome bes. Nan ruman homber a batisa dos aña despues di nan.

Entre tanto nan mayornan cu tawata catolico del alma y pega na tradicion, a mustra masha poco interes den e berdad. Nan tawata haya cu Testigonan di Yehova ta fastidia hende, maske nan tawata admira nan bon manera y e bisti decente di e Testigonan hoben ora nan tawata bin bishita nan. Tambe, ora di come, e muchanan tawata papia riba e cosnan cu nan a siña na reunion y esei a lanta e curiosidad di nan mayornan.

Pero ambos mayor tawata meti den bruheria. E tata tawata un burache cu tawata maltrata e mama. E famia tawata serca di kibra. Un biaha e tata a comport’e malo ora e tawata burachi, y pesei el a bai sera dos siman. Anto ora e tawata den prizon el a cuminsa lesa Bijbel. Segun cu e tawata lesa, el a topa cu loke Hesus a bisa tocante e señal di e ultimo dianan. Awor, tanto e mama como e tata tawata yen di pregunta. Nan a bai Salon di Reino y a acepta un studio di Bijbel. Segun cu nan tawata siña e berdad, nan a deshaci di tur nan bukinan di bruheria y a haya alivio for di atakenan di demoño door di invoca e nomber di Yehova. Nan a cuminsa haci cambionan grandi den nan personalidad.

Na un congreso di districto na Bolivia na aña 1999, Hugo a batisa su mayornan. Bo por imagina bo con emociona Maria cu Lucy tawata ora nan a mira esaki? Nuebe aña a pasa desde e dia cu Maria cu Lucy a tende tocante Yehova y su promesanan pa prome bes. Awor nan ta hunto cu Hugo den e sirbishi di tempo completo. Esta contento nan ta cu adoracion berdadero a uni nan famia!

[Nota]