Bo Ta Busca Yehova cu Empeño?

UN HOMBER cristian tawata ansioso pa papia tocante e bon nobo di Bijbel cu e pasaheronan den trein. (Marco 13:10) Pero miedo a paralis’e. El a stop di purba? No, el a haci oracion ferviente tocante e asunto y a haci su best pa haya mas maneranan pa cuminsa combersacionnan. Yehova Dios a contesta e oracion di e ruman aki y a dun’e forsa pa predica.

Tal empeño ta masha importante ora nos ta busca Yehova y su aprobacion. Apostel Pablo a bisa: “Esun cu ta acudi na Dios mester kere cu e ta existi y cu e ta bira e recompensador di esnan cu ta busc’e cu empeño.” (Hebreonan 11:6, NW) Ta necesario pa haci mas cu djis busca Yehova superficialmente. E verbo Griego ‘busca cu empeño’ ta traduci di tal manera cu e ta transmiti intensidad y esfuerso vigoroso. Esaki ta encera henter bo curason, mente, alma y forsa di bida. Si nos ta busca Yehova cu empeño, nos lo no ta indeferente, indispuesto pa haci esfuerso ni floho. Mas bien, nos lo mustra berdadero celo ora nos ta busc’e.—Echonan 15:17.

Personanan Cu A Busca Yehova cu Empeño

E Scritura tin masha hopi ehempel di personanan cu a haci tur nan esfuerso pa busca Yehova. Yacob tawata un di nan. El a lucha cu tur su forsa cu un angel di Dios cu a tuma curpa di carni, te ora di dia a habri. Como resultado, Yacob a wordo yama Israel (Esun cu a persevera cu Dios) pasobra el a “lucha”, persisti of persevera cu Dios. E angel a bendicion’e pa su esfuerso vigoroso.—Genesis 32:24-30.

Tambe tin e ehempel di un señora di Galilea kende su nomber no ta ser menciona den Bijbel. Pa 12 aña largo e tawatin un derame di sanger cu a pon’e “sufri masha.” Eigenlijk, e no tawatin mag di mishi cu otro hende debi na su condicion. Sinembargo, el a tuma un curashi y a sali bai topa cu Hesus. El a sigui bisa den su mes: “Si mi djis mishi cu su paña, lo mi bira bon.” Purba visualisa cuanto esfuerso el a haci pa e pasa entre ‘un multitud grandi cu tawata sigui [Hesus] y tawata push’e di tur banda.’ Asina cu el a mishi cu Hesus su paña, el a sinti cu “su derame di sanger a stop”, esta, cu su malesa cronico a cura! Ora Hesus a puntra, “Ta ken a mishi cu mi paña?” e señora a spanta. Pero Hesus cariñosamente a bis’e: “Mi yiu, bo fe a salba bo; bai na pas y sea cura di bo afliccion.” Su esfuersonan a wordo recompensa.—Marco 5:24-34; Levitico 15:25-27.

Un otro ehempel tawata di un señora di Fenicia. El a roga Hesus di curason pa cura su yiu  mohe. Hesus a contesta cu no ta corecto pa duna cacho pan di e yiunan. Loke e tawata kiermen ta cu e no por a atende necesidadnan di esnan cu no ta Israelita a costo di e Hudiunan merecedor. Maske e señora a compronde su ilustracion, toch el a suplic’e: “Si, Señor; ma asta e cachonan ta come e garnachinan cu ta cai for di mesa di nan shon.” Su fe fuerte y sinseridad a conmove Hesus pa bisa: “O mohe, bo fe ta grandi; laga sosode cu bo manera bo ta desea.”—Mateo 15:22-28.

Kico lo a pasa cu e personanan aki si nan no a sigui persisti? Nan lo a ricibi e bendicionnan si nan a hala atras ora nan a haya nan prome obstaculo of rechaso? No! E ehempelnan aki ta mustra bon cla loke Hesus kier a siña, esta cu “persistencia tribi” ta na su luga y asta esencial, ora di busca Yehova.—Lucas 11:5-13, NW.

Na Harmonia cu Su Boluntad

Papiando di e personanan cu a ricibi curacion milagroso den e relatonan ya menciona, nos por bisa cu empeño no tawata e unico rekisito pa nan haya curacion. Nan peticionnan mester tawata na harmonia cu e boluntad di Dios tambe. Hesus a haya poder pa haci milager pa duna evidencia remarcabel cu e ta Yiu di Dios, e Mesias priminti. (Huan 6:14; 9:33; Echonan 2:22) Ademas, e milagernan cu Hesus a haci ta duna hende un idea di e gran bendicionnan terenal cu Yehova lo bai drama riba humanidad durante e Gobernacion di Mil Aña di Cristo.—Revelacion 21:4; 22:2.

No ta Dios su boluntad mas pa esnan cu ta practica e religion berdadero tin podernan milagroso, manera e habilidad di cura hende y papia den lenga. (1 Corintionan 13:8, 13) Su boluntad pa nos dia ta, entre otro, pa e bon nobo di e Reino wordo declara den henter e tera pa ‘tur hende yega na conocemento di e berdad.’ (1 Timoteo 2:4; Mateo 24:14; 28:19, 20) Dios su sirbidonan por spera cu e ta tende nan oracionnan y aproba e oracionnan aki si nan haci esfuerso sinsero na harmonia cu su boluntad.

Algun ruman kisas ta puntra nan mes: ‘Pakico haci esfuerso siendo cu di tur manera Dios su proposito lo cumpli?’ Maske ta berdad cu Yehova lo logra su proposito sin esfuerso di hende, e ta keda contento ora hende ta envolvi den cumplimento di su boluntad. Yehova por ser compara cu un homber cu ta construi un cas. E constructor tin un mapa cu ta spesifica ki material mester ser uza pa e proyecto, pero toch e ta scohe material di construccion cu tin disponibel localmente. Di igual manera, Yehova tin cu cumpli cu un proyecto awe y ta keda contento pa uza su sirbidonan, cu  ta ofrece nan mes boluntariamente.—Salmo 110:3; 1 Corintionan 9:16, 17.

Ban wak e experencia di un hoben cu yama Toshio. Ora el a bai scol secundario, e kier a duna testimonio di un manera mas cabal posibel den su teritorio unico. Tur ora bai e tawatin su Bijbel na man y concientemente el a haci un esfuerso pa ta un cristian ehemplar. Na fin di e aña escolar el a haya un oportunidad pa duna un spreekbeurt dilanti su klas. Toshio a pidi Yehova den oracion pa yud’e, y e tawata contento pa mira henter e klas scucha cu masha atencion na su spreekbeurt titula “Mi Meta pa Haci e Trabou di Pionero un Carera.” El a splica cu e kier a bira un minister di tempo completo di Testigonan di Yehova. Un di e alumnonan a acepta pa studia Bijbel cu ne y a progresa te na bautismo. Toshio su esfuerso vigoroso na harmonia cu su oracionnan a wordo recompensa ricamente.

Cuanto Esfuerso Abo Ta Haci?

Tin masha hopi manera cu bo por mustra cu bo ta busca Yehova y su bendicionnan cu empeño. Na prome luga tin cosnan basico cu bo por haci, manera prepara bon pa reunionnan cristian. Door di duna comentarionan bon prepara, partinan motivador y demostracionnan eficas, bo ta indica cu cuanto empeño of esfuerso bo ta busca Yehova. Tambe bo por mustra bo empeño door di mehora e calidad di bo sirbishi. Pakico bo no ta purba di ta mas amigabel ora bo ta papia cu un doño di cas y uza introduccionnan eficas cu ta cuadra mas miho cu bo teritorio? (Colosensenan 3:23) Door di ta completamente dedica, un homber cristian kisas por acepta asignacionnan den congregacion, manera sirbi como un sirbido ministerial of anciano. (1 Timoteo 3:1, 2, 12, 13) Door di pone bo mes disponibel, lo bo por sinti e goso di duna. Kisas bo por aplica pa yuda cu un proyecto di construccion di sucursal of pa traha na un oficina di sucursal di Testigonan di Yehova. Si bo ta un ruman homber soltero cu ta cualifica, kisas lo bo kier asisti na e Scol di Entrenamento Ministerial cu ta yuda hombernan spiritual pastorea e tou bon. Si bo ta casa, sirbishi di misionero lo por ta un manera pa mustra bo deseo cu empeño pa sirbi Yehova mas. Muda bai caminda tin necesidad pa mas predicado di Reino kisas por ta algo pa bo.—1 Corintionan 16:9.

Loke ta mas importante ta bo actitud ora bo ta cumpli cu un asignacion. Sea cual sea e responsabilidad cu bo haya, cumpli cu ne cu empeño, cu tur bo forsa y cu  “sinseridad di curason.” (Echonan 2:46; Romanonan 12:8) Ta bon pa bo mira cada asignacion cu bo haya como un oportunidad pa demostra bo empeño pa duna alabansa na Yehova. Pidi Yehova yudansa constantemente den oracion, anto haci bo esfuerso. E ora ei lo bo haya recompensa na abundancia.

Esfuerso cu Empeño Ta Trece Recompensa

Bo ta corda e homber cristian cu a resa pa e vence su temor di predica na e pasaheronan den trein? Yehova a bendiciona su deseo sinsero. E ruman aki a haci esfuerso pa prepara introduccionnan mas agradabel, door di scohe diferente topico pa cuminsa combersacion. E por a uza Bijbel di un manera eficas pa papia cu un homber cu tawata precupa tocante relacionnan tenso cu tin entre hende. Despues di varios rebishita riba trein, e homber a acepta un studio di Bijbel na cas. No tin duda cu Yehova a bendicion’e pa su esfuerso cu empeño!

Abo tambe por haya resultadonan similar si bo sigui busca Yehova cu empeño. Si bo persevera humildemente y hinca henter bo alma den cualkier asignacion teocratico cu bo tin, Yehova lo uza bo na harmonia cu su propositonan y lo bo haya recompensa na abundancia.

[Plachi na pagina 26]

Kico lo a pasa cu e señora aki si e no a persisti?

[Plachi na pagina 27]

Bo ta persisti den roga Yehova pa su bendicion?

[Plachi na pagina 28]

Con bo por mustra cu bo ta busca Yehova cu empeño?