Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Den ki maneranan Rut tawata un ehempel excelente?

Rut tawata un bon ehempel den su amor pa Yehova y su amor leal pa Noemi. Tambe e tawata humilde y diligente. Cu rason e pueblo a haya cu e tawata “un mohe excelente.” (Rut 3:11)—15/4, pagina 23-6.

• Con nos por sa cu Yehova tin interes den hende comun y coriente?

El a bisa e Israelitanan cu a haya un trato cruel na Egipto, pa no maltrata hende pober. (Exodo 22:21-24) Hesus, kende a imita su Tata, a mustra berdadero interes den hende comun y coriente, y el a scohe como su apostelnan ‘hombernan cu no tawata educa ni siña.’ (Echonan 4:13; Mateo 9:36) Nos por imita Dios door di mustra interes den, por ehempel, hobennan.—15/4, pagina 28-31.

• Dicon nos por tin sigur cu Yehova ta ripara loke nos ta haci?

Relatonan biblico ta mustra cu Yehova ta ripara hazañanan di hende. El a mira e sacrificio cu Abel a ofrece, y ta mira nos ‘sacrificionan di alabansa, esta, e fruta di lipnan.’ (Hebreonan 13:15, NW) Yehova tawata conciente cu Enok a haci esfuerso pa agrad’e door di hiba un bida moralmente limpi. Y Dios a ripara con un biuda di Sarepta cu no tawata Israelita, a parti e poco cu e tawatin cu profeta Elias. Yehova ta ripara nos obranan di fe tambe.—1/5, pagina 28-31.

• Pakico nos por bisa cu despues di Pentecoste di aña 33 di nos era, Hudiu cu a bira cristian mester a haci un dedicacion personal na Dios?

Na 1513 prome cu nos era, e Israelitanan di antiguedad a cuminsa un relacion den cua nan tawata dedica na Yehova. (Exodo 19:3-8) Despues di esei, Hudiunan a nace den e nacion dedica ei, bou di e pacto of aliansa di Lei. Pero Yehova a kita e aliansa di Lei, mediante e morto di Cristo na aña 33 di nos era. (Colosensenan 2:14) Anto despues, Hudiunan cu kier a sirbi Dios na un manera aceptabel mester a haci un dedicacion na dje y batisa den nomber di Hesucristo.—15/5, pagina 30-1.

• Kimamento di sencia ta parti di adoracion berdadero?

Den Israel di antiguedad, kimamento di sencia tawata parti di adoracion berdadero. (Exodo 30:37, 38; Levitico 16:12, 13) Pero e aliansa di Lei, incluso kimamento di sencia, a termina ora Cristo a muri. Cristiannan por dicidi pa nan mes si nan kier kima sencia pa propositonan cu no ta religioso, pero e no ta un parti di adoracion berdadero awe. Tambe nos mester tene cuenta cu sintimento di otro hende pa nos no pone nan trompica.—1/6, pagina 28-30.

• Cua noticia resien tocante un descubrimento a pone hopi hende presta mas atencion na e echo cu Hesus a existi?

A duna masha publicidad na un cahita (osario) cu nan a haya na Israel. Ta parce cu e ta di prome siglo, y tin un inscripcion riba dje cu ta bisa: “Santiago, yiu di Hose, ruman di Hesus.” Algun hende ta bisa cu “fuera di Bijbel, esaki ta e prueba arkeologico mas antiguo” di Hesus su existencia.—15/6, pagina 3-4.

• Con un hende ta siña stima?

Hende ta siña stima na prome luga door di e ehempel y educacion di nan mayornan. Ora esposo y esposa ta stima otro y ta respeta otro, e yiunan por siña stima. (Efesionan 5:28; Tito 2:4) Asta si un hende a lanta den un famia sin amor, e por siña stima door di acepta Yehova su guia amoroso, ricibi yudansa di spirito santo y beneficia di e sosten caluroso di e hermandad cristian.—1/7, pagina 4-7.

• Ken Eusebio tawata, y kico nos por siña for di su bida?

Eusebio tawata un historiado di antiguedad kende a termina e obra literario di dies volumen titula Historia di e Iglesia Cristian na aña 324 di nos era. Maske el a kere cu e Tata a existi prome cu e Yiu, Eusebio a acepta un punto di bista diferente na e consilio di Nicea. Aparentemente el a ignora e rekisito di Hesus pa Su siguidonan ‘no ta parti di mundo.’ (Huan 17:16)—15/7, pagina 29-31.

• Yehova a cambia su punto di bista tocante poligamia?

No, Yehova no a cambia su punto di bista tocante poligamia. (Malakias 3:6) Dios su areglo pa e prome homber tawata pa e “uni cu su esposa” y bira un carni. (Genesis 2:24) Hesus a bisa cu ken cu diborcia si no ta pa motibo di fornicacion y casa bek, ta comete adulterio. (Mateo 19:4-6, 9) Ora e congregacion cristian a ser forma, Yehova no a tolera poligamia mas.—1/8, pagina 28.