El A Stima Bondad

DIASABRA 22 di maart 2003, Milton G. Henschel, kende tawata un miembro di Cuerpo Gobernante di Testigonan di Yehova pa hopi aña, a termina su bida riba tera. E tawatin 82 aña di edad.

Ora Milton Henschel tawata hoben el a cuminsa traha na e sede mundial di Testigonan di Yehova y a sirbi fielmente pa mas cu 60 aña. No a tarda hopi cu el a bira conoci pa su bon huicio y interes sinsero den e trabou di predica e Reino. Na 1939 el a bira secretario di N. H. Knorr, kende e tempo ei tawata superintendente di e imprenta di Testigonan di Yehova na Brooklyn. Na 1942, ora cu Ruman Knorr a cuminsa dirigi e trabou di e Testigonan rond mundo, Ruman Henschel a keda como su asistent. Ruman Henschel a casa cu Lucille Bennett na 1956, y hunto nan a pasa den e gosonan y desafionan di bida.

Ruman Henschel a traha estrechamente cu Ruman Knorr te ora Ruman Knorr a muri na 1977. Hunto cu Ruman Knorr, Ruman Henschel a bai mas cu 150 pais pa bishita y anima Testigonan di Yehova rond mundo, specialmente misioneronan y esnan den oficinanan di sucursal. Tin bes e biahenan ei tawata pisa y asta peligroso. Mientras Ruman Henschel tawata di bishita na Liberia pa un congreso na 1963, el a bira victima di un persecucion cruel pasobra el a nenga di participa den un ceremonia patriotico. * Sin laga esei strob’e, djis un par di luna despues Ruman Henschel a bai Liberia atrobe pa e topa cu e presidente di e pais ei pa purba haya mas libertad di adoracion pa Testigonan di Yehova einan.

Ruman Henschel tawatin e reputacion di ta un hende flexibel y rasonabel y tawatin un manera masha practico di trata cu problema- y desafionan. Specialmente su coleganan tawata aprecia masha su manera organisa di traha, su modestia y su bon sentido di humor. E tawatin masha bon memoria. Hopi misionero rond mundo tawata gusta masha ora e tawata corda nan nomber bon, bisa un of dos frase den e idioma local y haci wega di palabra; tur esaki cu un briyo den su wowo.

Mikeas 6:8 [NW] ta recorda nos cu Yehova Dios kier pa nos “stima bondad.” Milton Henschel lo ser recorda como un bon ehempel den e aspecto aki. Apesar di su responsabilidad pisa, el a keda un hende acercabel, amabel y bondadoso. E tawata gusta bisa cu ora bo no sa kico pa haci, e miho cos ta: mustra bondad. Maske nos ta sinti duele cu nos a perde e ruman stima aki, nos ta contento cu el a keda fiel te na morto y nos tin sigur cu e ta ricibi su recompensa, “e corona di bida.”—Revelacion 2:10.

[Nota]

[Plachi na pagina 31]

M. G. Henschel hunto cu N. H. Knorr

[Plachi na pagina 31]

Hunto cu su casa, Lucille