Ki Clase di Nomber Bo Ta Trahando?

BO A yega di lesa un noticia di morto compaña pa un biografia cortico den un corant local? Of bo a yega di mira un relato extenso di e bida y logronan di un persona cu a fayece? Bo a puntra bo mes: ‘Kico hende lo bisa di mi?’ Cuanto hende ta pensa mes riba con nan lo wordo recorda despues di nan morto? Pues, puntra bo mes francamente: Kico hende lo bisa di bo awe si bo a muri ayera? Ki clase di reputacion bo ta trahando? Con lo bo kier pa Dios y esnan cu a conoce bo recorda bo?

E escritor sabi di e buki biblico di Eclesiastes a bisa: “Un bon nomber ta miho cu un bon enguente, y e dia di un hende su morto ta miho cu e dia di su nacemento.” (Eclesiastes 7:1) Pakico e dia di bo morto ta miho cu e dia cu bo a nace? Esei ta pasobra bo no ta nace cu un cierto reputacion. Bo no tin un registro di bida ainda. Ta e manera cu bo ta hiba bo bida lo resulta den sea un bon of un mal reputacion. Pa esnan cu den transcurso di añanan a traha un bon nomber, e dia di nan morto den e sentido ei en berdad ta miho cu e dia di nacemento.

Nos tin un escoho pa haci anto. Por cierto, tur dia nos tin cu haci hopi escoho cu lo determina e reputacion cu nos lo keda cu ne dia nos muri, specialmente con Dios lo recorda nos. Pesei mes, e mesun Hebreo sabi a skirbi: “Recuerdo di e husto ta bendiciona, ma nomber di e malbado lo putri.” (Proverbionan 10:7) Cu otro palabra, Dios ta recorda bo pa e bendiciona bo. Esei si ta un honor!

Si nos ta sabi, nos lo pone meta pa agrada Dios door di biba na harmonia cu su normanan. Esei ta nifica sigui e principionan basico cu Cristo a expresa: “‘Stima SEÑOR bo Dios cu henter bo curason, y cu henter bo alma, y cu henter bo mente.’ Esaki ta e gran mandamento y e di prome. Y e di dos ta semehante: ‘Stima bo prohimo manera bo mes.’ Riba e dos mandamentonan aki henter e Lei y e Profetanan ta basa.”—Mateo 22:37-40.

Algun hende ta wordo recorda pa nan obranan di caridad y riba tereno social, como defensor di derecho civil, of pa nan logronan den comercio, ciencia, medicina of otro actividadnan. Pero con abo lo kier wordo recorda?

E poeta Escoces Robert Burns (1759-96) a bisa cu e tawatin gana pa un poder duna nos e don di mira nos mes manera otro hende ta mira nos. Abo por mira bo mes na un manera obhetivo y bisa cu bo tin un bon reputacion den bista di Dios y di otro hende? Riba termino largo nos relacionnan cu otro hende sigur  ta mas importante cu cualkier cos cu nos lo por logra riba termino cortico den e mundo di deporte of negoshi. Pesei e pregunta ta: Ki efecto nos trato cu otro hende—nos combersacion, nos manera, nos body language—tin riba nan? Nan ta mira nos como hende acercabel of como hende seco? Como amabel of bruto? Como flexibel of mucho stricto? Como cariñoso y suave of antipatico y indeferente? Como un persona cu ta critica pa desanima otro of como un consehero edificante? Laga nos analisa algun ehempel for di pasado y di tempo moderno pa mira kico nos por siña.

[Plachi na pagina 3]

Robert Burns tawatin gana pa un poder duna nos e don di mira nos mes manera otro hende ta mira nos

[ReconocEmento]

For di e buki A History of England