Kico Yehova Ta Spera di Nos?

“Kico Yehova ta pidi bek di bo sino di eherce husticia y stima bondad y sea modesto canando cu bo Dios?”—MIKEAS 6:8, NW.

1, 2. Dicon algun sirbido di Yehova lo por sinti nan desanima, pero kico lo yuda nan sigur?

VERA ta un cristian fiel di mas o menos 75 aña di edad y tin problema cu salu. E ta bisa: “Tin biaha, mi ta wak for di bentana y mira mi rumannan cristian predica di cas pa cas. Mi wowo ta yena cu awa pasobra mi kier ta hunto cu nan, pero enfermedad ta stroba mi di sirbi Yehova.”

2 Abo a yega di sinti bo asina? Claro cu tur hende cu ta stima Yehova kier cana den su nomber y cumpli cu su rekisitonan. Pero, kico si nos salu ta bayendo atras, of nos ta hende di edad avansa of nos tin responsabilidadnan di famia? Nos lo por sinti nos un poco desanima pasobra cosnan asina ta stroba nos di haci tur loke nos curason ta desea di haci den Dios su sirbishi. Si nos ta den un situacion asina, sigur un analisis di Mikeas capitulo 6 y 7 lo anima nos hopi. E capitulonan aki ta mustra bon cla cu loke Yehova ta spera di nos ta rasonabel y na nos alcanse.

Con Dios Ta Trata Su Pueblo

3. Con Yehova ta trata e Israelitanan rebelde?

3 Prome, laga nos wak Mikeas 6:3-5 y mira con Yehova ta trata su pueblo. Corda cu den tempo di Mikeas, e Israelitanan tawata rebelde. Apesar di esei, Yehova ta dirigi su mes na nan cu compasion, yamando nan “mi pueblo.” Na versiculo 5, un traduccion literal di e palabranan Hebreo ta mustra cu Yehova ta suplica nan, bisando: “Mi pueblo, corda, por fabor.” En bes di acusa nan na moda bruto, e ta purba alcansa nan curason door di puntra nan: ‘Kico mi a haci boso?’ Asta e ta anima nan pa ‘contest’e.’

4. Ki efecto e ehempel di Dios di mustra compasion mester tin riba nos?

4 Dios ta pone un bunita ehempel pa nos tur! Cu compasion el a yama asta e pueblo rebelde di Israel y Huda di Mikeas su tempo “mi pueblo”, y el a roga nan. Esei ta duna nos motibo anto pa mustra compasion y bondad cristian den nos trato cu e miembronan di  congregacion. Ta berdad cu tin biaha nos no ta bai bon cu cierto ruman, of kisas nan ta spiritualmente suak. Pero si nan ta stima Yehova, nos kier yuda nan y mustra compasion na nan.

5. Ki punto basico Mikeas 6:6 y 7 ta trece dilanti?

5 Awor, laga nos bai na Mikeas 6:6 y 7. Mikeas ta haci un serie di pregunta: “Cu kico mi mester bini serca SEÑOR y buig te na suela dilanti dje Dios haltisimo? Mi mester bini serca dje cu ofrenda kima, cu bishe di un aña? SEÑOR tin delicia den miles di carne chubato, den dies mil riu di azeta? Mi mester presenta mi primogenito pa mi echonan di rebeldia, e fruta di mi curpa pa e pica di mi alma?” No, nos no por agrada Yehova ni cu ‘miles di carne chubato, ni cu dies mil riu di azeta.’ Pero tin algo cu si ta agrad’e. Kico esei ta?

Nos Tin Cu Eherce Husticia

6. Segun Mikeas 6:8, kico ta e tres cosnan cu Yehova ta spera di nos?

6 Na Mikeas 6:8 [NW] nos ta lesa kico Yehova ta spera di nos. Mikeas ta puntra: “Kico Yehova ta pidi bek di bo sino di eherce husticia y stima bondad y sea modesto canando cu bo Dios?” E tres rekisitonan aki tin di aber cu nos sintimento-, pensamento- y accionnan. Nos tin cu sinti nos inclina pa demostra e cualidadnan aki, pensa riba con nos por manifesta nan y tuma accion pa desplega nan. Laga nos analisa e tres rekisitonan aki un pa un.

7, 8. (a) Kico kiermen “eherce husticia”? (b) Ki inhusticia ta reina den tempo di Mikeas?

7 “Eherce husticia” kiermen haci loke ta corecto. Dios su manera di haci cosnan ta e norma di husticia. Pero e hendenan den tempo di Mikeas no ta eherce husticia, sino mas bien inhusticia. Kico nan ta haci? Wak Mikeas 6:10. Na final di e versiculo ei e ta papia di comerciantenan cu ta uza “un midi scars”, esta, un midi mucho chikito. Versiculo 11 ta agrega cu nan ta uza “peso engañoso.” Y segun versiculo 12, “nan lenga ta engañoso.” Pues, midi falso, peso falso y lenga falso ta domina e mundo comercial den tempo di Mikeas.

8 Sinembargo, no ta na plasa so tin inhusticia, sino den corte tambe. Mikeas 7:3 ta mustra cu ‘e prins ta exigi regalo, y e hues ta acepta placa pasa bou di mesa.’ Hues ta ricibi cen bou di mesa pa nan dicta sentencia inhusto contra hende inocente. “E homber poderoso”, esta, un ciudadano cu hopi influencia, ta nan complice den crimen. De echo, Mikeas ta bisa cu prins, hues y homber poderoso ta “conspira hunto” den nan maldadnan.

9. Con e inhusticianan cu e malbadonan a practica a afecta hende den Huda y Israel?

9 E inhusticianan cu e lidernan malbado ta comete ta afecta tur hende den Huda y Israel. Mikeas 7:5 ta menciona cu e falta di husticia a hiba na desconfiansa entre colega, amigo di confiansa y asta entre pareha casa. Versiculo 6 ta bisa cu esei a desbarata e bida social. Tata y yiu homber, mama y yiu mohe—famia asina pega—ta trata otro cu menosprecio.

10. Den e ambiente actual di inhusticia aki, con cristiannan ta comporta nan mes?

10 Kico nos ta mira awe? No ta e mesun cosnan? Mescos cu den tempo di Mikeas, tur caminda tin inhusticia, un ambiente di desconfiansa, y desintegracion di bida social y di famia. Pero como sirbido di Dios cu ta biba den e mundo di inhusticia aki, nos no ta laga e spirito inhusto di mundo penetra den e congregacion cristian. Mas bien nos ta mantene e principionan di honestidad y integridad na halto door di desplega nan den nos asuntonan di tur dia. En berdad, nos ta “comporta nos mes den tur cos na un manera honorabel.” (Hebreonan 13:18) Bo no ta haya cu door cu nos ta practica husticia nos ta gosa di hopi bendicion como parti di un hermandad cu ta manifesta berdadero confiansa?

Con Hende Ta Tende “e Bos” di Yehova?

11. Con Mikeas 7:12 ta hayando su cumplimento?

11 Mikeas ta profetisa cu apesar di e inhusticia cu ta reina, husticia lo alcansa tur sorto di  hende. E profeta ta bisa cu hende lo ser reuni “di lama pa lama y di sero pa sero” pa nan bira adorado di Yehova. (Mikeas 7:12) Awe cu e profecia aki ta haya su cumplimento final, no ta un cierto nacion, sino hende for di tur nacion ta sacando beneficio di e husticia imparcial di Dios. (Isaias 42:1) Con asina?

12. Con “e bos” di Yehova ta wordo tendi awe?

12 Pa haya un contesta, analisa e palabranan anterior di Mikeas. Mikeas 6:9 ta bisa: “E bos di SEÑOR lo yama na e stad—y ta sabiduria sano pa tin temor pa bo nomber.” Con hende di tur nacion ta tende “e bos” di Yehova, y kico esaki tin di aber cu e echo cu nos ta practica husticia? Claro cu no ta literalmente hende ta tende e bos di Dios. Pero pa medio di nos trabou di predica rond mundo, hende di tur rasa y gremio social ta tendiendo e bos di Yehova. Door di esei, esnan cu scucha lo ‘teme Dios su nomber’, y nan lo haya un gran respet p’e. Ora nos ta sirbi como proclamadonan celoso di e Reino, nos sigur ta actua na un manera husto y amoroso. Door di duna tur hende di conoce e nomber di Dios, sin haci distincion di persona, nos ta “eherce husticia.”

Nos Tin Cu Stima Bondad

13. Kico ta e diferencia entre bondad amoroso y amor?

13 Awor, laga nos trata e di dos rekisito menciona na Mikeas 6:8. Yehova kier pa nos “stima bondad.” Segun e Traduccion di Mundo  Nobo (Cu Referencia) na Ingles, e palabra Hebreo traduci aki como “bondad” por ser traduci tambe como “bondad amoroso” of “amor leal.” Mustra bondad amoroso ta encera mustra atencion pa otro hende, of un interes compasivo den nan. Tin un diferencia entre bondad amoroso y e cualidad di amor. Unda e diferencia ta sinta? Amor tin un nificacion mas amplio. Bo por sinti amor asta pa un cos of pa un concepto. Por ehempel, Bijbel ta papia di un persona cu ta “stima placa” y tambe di hende cu ta “stima sabiduria.” (Eclesiastes 5:10; Proverbionan 29:3) Pero bondad amoroso semper tin di aber cu hende, principalmente hende cu ta sirbi Dios. Ta pesei Mikeas 7:20 di e Traduccion di Mundo Nobo ta papia di “e bondad amoroso duna na Abraham”, un homber cu a sirbi Yehova Dios.

14, 15. Con Yehova su sirbidonan ta demostra bondad amoroso, y ki prueba di esei nos ta haya?

14 Na Mikeas 7:18 [NW] e profeta ta bisa cu Dios “tin deleite den bondad amoroso.” Mikeas 6:8 [NW] ta bisa cu nos mester haci mas cu djis mustra “bondad amoroso.” Nos tin cu stima e cualidad ei. Kico nos ta siña for di e textonan aki? Nos ta mustra bondad amoroso di buena gana y generosamente door cu nos kier despleg’e. Mescos cu Yehova, pa nos tambe ta un placer pa mustra bondad amoroso na hende den necesidad.

15 Awe, bondad amoroso ta un caracteristica di e pueblo di Dios. Wak djis un ehempel so: Na juni di aña 2001, un tormenta tropical a ocasiona inundacionnan grandi na Texas, Merca. Miles di cas a sufri daño, incluso cientos di cas di Testigonan di Yehova. Rond di 10.000 Testigo a ofrece nan tempo y energia boluntariamente pa yuda nan rumannan cristian den necesidad. E boluntarionan aki a traha incansablemente pa mas cu mita aña, dedicando nan dianan, anochinan y weekendnan pa yuda reconstrui 8 Salon di Reino y mas cu 700 cas pa nan rumannan cristian. Esnan cu no por a contribui cu trabou a contribui cu cuminda, material y cen. Dicon tur e miles di Testigonan aki a bai yuda nan rumannan? Pasobra nan “stima bondad.” Y esta dushi ta pa sa cu ta rond mundo nos rumannan ta haci e tipo di actonan di bondad amoroso ei! Si, e rekisito di “stima bondad” no ta un carga, sino un goso!

Cana cu Dios cu Modestia

16. Ki ilustracion ta yuda enfatisa e necesidad pa cana cu Dios cu modestia?

16 E di tres rekisito na Mikeas 6:8 [NW] ta pa “sea modesto canando cu bo Dios.” Esei kiermen reconoce nos limitacionnan y depende riba Dios. Nos por ilustra esaki di e siguiente manera: Djis imagina un rato un mucha mohe chikito cu tin e man di su tata bon teni mientras nan ta canando den un tormenta. E mucha sa bon bon cu e no ta mucho fuerte, pero e tin confiansa den su tata. Mescos cu e mucha ei, nos tambe mester ta conciente di nos limitacionnan. Pero nos tin confiansa den nos Tata celestial. Con nos por mantene e confiansa ei? Un manera pa logra esei ta door di tene na mente pakico ta sabi pa nos mantene un amistad intimo cu Dios. Mikeas ta haci nos corda tres motibo: Yehova ta nos Libertador, nos Guia y nos Protector.

17. Con Yehova a libra, guia y proteha su pueblo di antiguedad?

17 Segun Mikeas 6:4 y 5, Dios ta bisa: “Mi a saca bo for di tera di Egipto.” Si, ta Yehova tawata e Libertador di Israel. Yehova ta sigui bisa: “Mi a manda Moises, Aron y Miriam bo dilanti.” Dios a uza Moises cu Aron pa guia e nacion, y Miriam a guia e hende mohenan di Israel den un baile di victoria. (Exodo 7:1, 2; 15:1, 19-21; Deuteronomio 34:10) Pues, Yehova a percura guia pa medio di su sirbidonan. Na versiculo 5, Yehova ta recorda e nacion di Israel cu el a proteha nan contra Balak y Balam, y cu el a duna e Israelitanan proteccion durante e ultimo parti di nan biahe for di Sitim, cu ta na Moab, te na Gilgal den e Tera Priminti.

18. Con Dios ta actua como nos Libertador, Guia y Protector awe?

 18 Segun cu nos ta cana cu Dios, e ta libra nos tambe for di e mundo di Satanas, e ta guia nos pa medio di su Palabra y su organisacion, y e ta proteha nos como grupo ora nos ta bou di atake di opositornan. Pesei nos tin tur motibo pa tene duro na e man di nos Tata celestial segun cu nos ta cana pasa cu ne door di e ultimo parti turbulento di nos biahe, rumbo pa algo hopi mas grandioso cu e Tera Priminti di pasado: e husto mundo nobo di Dios.

19. Kico modestia tin di aber cu nos limitacionnan?

19 Si nos ta cana cu Dios cu modestia, esei lo yuda nos haya un punto di bista realistico di nos circunstancia. Esei ta pasobra modestia ta encera ser conciente di nos limitacionnan. Problema cu salu of edad avansa por limita un poco loke nos por haci den Yehova su sirbishi. Pero en bes di laga esaki desanima nos, ta bon pa corda cu Dios ta acepta nos esfuerso- y sacrificionan ‘segun loke nos tin, no segun loke nos no tin.’ (2 Corintionan 8:12) Si, Yehova ta spera pa nos sirbie cu henter nos alma, haciendo tur loke nos circunstancia ta permiti. (Colosensenan 3:23) Ora nos ta haci tur loke nos por den su sirbishi cu celo y cu henter nos  curason, Dios ta bendiciona nos ricamente.—Proverbionan 10:22.

Un Actitud di Spera Ta Trece Bendicion

20. Ki echonan lo yuda nos desplega e actitud di spera cu Mikeas tawatin?

20 E bendicionnan di Dios cu nos ta ricibi ta motiva nos pa imita e actitud di Mikeas, kende a bisa: “Lo mi spera riba e Dios di mi salbacion.” (Mikeas 7:7) Kico e palabranan aki tin di aber cu cana cu Dios cu modestia? Si nos tin pasenshi, of un actitud di spera, esei por yuda nos pa no keda decepciona cu e dia di Yehova no a yega ainda. (Proverbionan 13:12) Francamente bisa, ta nos tur ta anhela pa e fin di e mundo malbado aki yega. Sinembargo, e echo cu tur siman tin miles di hende ta cuminsa cana cu Dios ta duna nos un bon motibo pa sigui spera. En conexion cu esaki, un Testigo cu a sirbi Yehova pa hopi tempo a bisa: “Ora mi wak bek y mira e 55 añanan cu mi tin den e trabou di predica, mi ta combenci cu mi no a perde nada door di spera riba Yehova. Al contrario, mi a scapa di hopi dolor di curason.” Abo tambe ta sinti mescos?

21, 22. Con Mikeas 7:14 ta cumpliendo den nos tempo?

21 No cabe duda, cana cu Yehova ta beneficia nos. Manera nos ta lesa na Mikeas 7:14, Mikeas ta compara e pueblo di Dios cu carne cu ta biba den siguridad serca nan wardado. Awe, den e cumplimento mayor di e profecia aki, tanto e resto di Israel spiritual como e “otro carnenan” ta haya siguridad serca e Wardador di confiansa, Yehova. Nan ta biba “den mondi-sera, meimei di un cunucu fertil”, aparta den sentido spiritual for di e mundo aki cu ta mas y mas problematico y peligroso.—Huan 10:16; Deuteronomio 33:28; Yeremias 49:31; Galationan 6:16.

22 Mikeas 7:14 a profetisa tambe cu Yehova su pueblo ta gosa di prosperidad. Papiando di Dios su carnenan, esta, su pueblo, Mikeas a declara: “Laga nan come na Basan y Galad.” Mescos cu carnenan na Basan y Galad a come bon yerba y gorda, Yehova su pueblo awe ta gosa di prosperidad spiritual. Esei ta un otro bendicion mas pa esnan cu ta cana cu Dios cu modestia.—Numbernan 32:1; Deuteronomio 32:14.

23. Ki les nos por siña for di Mikeas 7:18 y 19?

23 Na Mikeas 7:18 y 19 e profeta ta enfatisa Yehova su deseo pa pordona esnan cu repenti. Versiculo 18 ta declara cu Yehova ta “pordona inikidad” y ta ‘pasa e acto di rebeldia voorbij.’ Segun versiculo 19, e ta bai “tira tur nan picanan den e profundidadnan di lama.” Ki les nos por saca di esaki? Ta bon pa nos puntra nos mes si nos ta imita Yehova den e aspecto aki. Nos ta pordona e erornan cu hende ta comete contra nos? Ora un hende repenti y purba drecha asunto cu nos, ta bon pa nos imita Yehova su disposicion pa pordona di un manera completo y permanente.

24. Con bo a beneficia di e profecia di Mikeas?

24 Con nos a beneficia for di e analisis aki di e profecia di Mikeas? El a recorda nos cu Yehova ta duna berdadero speransa na esnan cu ta hala serca dje. (Mikeas 2:1-13) El a anima nos pa haci tur loke nos por pa e adelanto di adoracion berdadero, pa asina nos por cana den e nomber di Dios pa semper. (Mikeas 4:1-5) Ademas, el a duna nos e siguransa cu nos por cumpli cu Yehova su rekisitonan, sin importa den ki circunstancia nos ta. Si, e profecia di Mikeas ta fortalece nos di berdad pa cana den e nomber di Yehova.

Con Lo Bo Contesta?

• Segun Mikeas 6:8, kico Yehova ta spera di nos?

• Kico ta necesario si nos kier “eherce husticia”?

• Con nos por mustra cu nos ta “stima bondad”?

• Kico ta encera ‘cana cu Dios cu modestia’?

[Preguntanan di Estudio]

[Plachi na pagina 21]

Apesar di e maldad cu a reina den tempo di Mikeas, el a cumpli cu e rekisitonan di Yehova. Abo tambe por

[Plachi na pagina 23]

Eherce husticia door di duna testimonio na hende di tur gremio social

[Plachi na pagina 23]

Mustra cu bo ta stima bondad door di satisface e necesidadnan di otro hende

[Plachi na pagina 23]

Haci tur loke bo por mientras bo ta reconoce bo limitacionnan cu modestia