Alaba Yehova ‘Meimei di e Congregacion’
Alaba Yehova ‘Meimei di e Congregacion’
YEHOVA a percura reunionnan cristian pa mantene su pueblo fuerte den sentido spiritual. Door di asisti regularmente na reunion, nos ta mustra aprecio pa loke Yehova ta percura. Ademas, nan ta duna nos oportunidad pa “stimula [nos rumannan] pa stima y haci bon obra”, locual ta un manera importante pa demostra amor pa otro. (Hebreonan 10:24; Huan 13:35) Pero, con nos por stimula nos rumannan na reunion?
Expresa Bo Mes den Publico
Rei David a skirbi tocante su mes: “Lo mi anuncia bo nomber na mi rumannan; meimei di e [“congregacion”, NW] lo mi alaba bo. For di bo mi alabansa ta bini den e gran [“congregacion”, NW].” “Lo mi duna bo gradicimento den e congregacion grandi; lo mi alaba bo meimei di un multitud enorme.” “Mi a proclama bon nobo di husticia den e congregacion grandi; ata, lo mi no frena mi lipnan.”—Salmo 22:22, 25; 35:18; 40:9.
Den tempo di apostel Pablo, ora cristiannan tawata bin hunto pa adora, nan tambe tawata expresa nan fe den Yehova y papia di su gloria. Den e manera aki nan a anima otro y stimula otro pa mustra amor y haci bon obra. Den nos tempo, hopi siglo despues di David y Pablo, di berdad nos “ta mira cu e dia [di Yehova] ta yegando serca.” Hebreonan 10:24, 25) E mundo di Satanas ta tambaliando rumbo pa su destruccion, y problemanan ta sigui aumenta. Awe mas cu nunca, nos “tin mester di perseverancia.” (Hebreonan 10:36) Y si no ta nos rumannan, ta ken otro por anima nos pa persevera?
(Awe tambe, mescos cu den pasado, cada ruman individual ta haya chens di expresa su fe ‘meimei di e congregacion.’ Un oportunidad cu ta habri pa tur hende ta di duna comentario riba preguntanan cu ta wordo haci na e auditorio na reunionnan di congregacion. Nunca balota e beneficionan cu esaki por trece cu ne. Por ehempel, comentarionan cu ta demostra con pa vence of evita problema ta fortalece e determinacion di nos rumannan pa sigui principionan di Bijbel. Comentarionan cu ta splica textonan menciona pero no cita of cu ta trece puntonan cu nos a topa den nos investigacion personal lo por anima otro rumannan pa desaroya miho custumbernan di studio.
E echo cu nos sa cu tanto nos como otro personanan lo beneficia si nos comenta na reunion mester motiva tur Testigo di Yehova pa vence timides. Ta specialmente importante pa ancianonan y sirbidonan ministerial duna comentario na reunion, ya cu ta spera di nan cu nan ta hiba delantera den asisti y participa den nan. Pero con bo por mehora si bo ta haya cu e aspecto particular aki di bo actividad cristian no ta asina facil?
Sugerencianan pa Mehora
Corda cu dunamento di comentario ta parti di nos adoracion na Yehova. Un ruman mohe cristian cu ta biba na Alemania a splica con e ta mira su comentarionan. “Nan ta mi manera di contesta Satanas su intentonan pa stroba sirbidonan di Dios di expresa nan fe.” Un ruman homber resien batisa di e mesun congregacion ta bisa: “Mi ta haci hopi oracion pa por duna comentario.”
Prepara bon. Si bo no studia e informacion adelanta, lo bo ripara cu ta dificil pa comenta y bo comentarionan lo no ta asina efectivo. Pagina 70 di e buki Beneficiá di e Skol di Ministerio Teokrátiko ta duna sugerencia con pa comenta na reunionnan di congregacion. *
Pone meta pa duna por lo menos un comentario na cada reunion. Esaki ta nifica prepara varios contesta, ya cu mas bo hisa bo man, mas chens bo tin di haya beurt. For di antemano bo por bisa e ruman cu ta dirigi ki preguntanan bo a prepara pa contesta. Esaki ta un bon yudansa specialmente si ta awor bo ta cuminsa duna comentario. Kisas bo tin un tiki miedo di hisa man “den e congregacion grandi”, pero e echo cu bo sa cu esaki ta bo paragraf y cu e ruman cu ta dirigi e reunion lo ta pendiente di bo man lo anima bo pa duna comentario.
Duna comentario for di cuminsamento. Un tarea dificil no ta bira mas facil door di pospon’e. Algo cu por yuda ta di duna comentario
for di den cuminsamento. Lo bo keda sorprendi cuanto mas facil ta pa comenta un di dos of di tres biaha unabes bo a surpasa e obstaculo di duna e prome comentario ei.Wak un bon luga di sinta. Algun hende ta haya ta mas facil pa duna comentario ora nan ta sinta mas dilanti den Salon di Reino. Tin menos distraicion, y e conductor tin menos chens di keda sin mira nan man. Si bo purba esaki, corda papia suficiente duro pa tur hende tende, specialmente si e congregacion no ta uza microfon pa duna contesta.
Scucha atentamente. Esaki lo yuda bo evita di ripiti loke un otro hende a caba di bisa. Ademas, e comentarionan cu otro personanan ta duna por laga bo corda riba un texto of un punto cu por amplia riba e pensamento cu bo a caba di tende. De bes en cuando un experencia breve por ilustra e punto cu ta ser trata. E comentarionan ei ta hopi edificante.
Siña contesta den bo mes palabra. Un comentario lesa for di e informacion cu ta ser studia lo por indica cu bo a haya e contesta corecto, y lo e por ta un bon manera pa cuminsa comenta. Pero ora bo progresa y ta contesta den bo mes palabra, bo ta mustra cu bo ta compronde e punto. No tin nodi cita nos publicacionnan palabra pa palabra. Testigonan di Yehova no ta djis ripiti loke nan publicacionnan ta bisa.
Pega na e tema. Comentarionan cu no tin nada di aber cu e tema of cu ta desvia for di e pensamentonan principal cu ta ser trata no ta apropiado. Esaki ta nifica cu bo comentarionan mester ta relaciona cu e tema cu ta wordo analisa. E ora ei nan lo contribui na un consideracion spiritualmente edificante di e tema cu ta ser desaroya.
Bo meta mester ta pa anima. Siendo cu un di e motibonan importante pa duna comentario ta pa anima otro, nos mester purba evita di bisa cosnan cu lo por desanima nan. No comenta tampoco riba delaster un punto di e paragraf sin laga nada of casi nada pa otronan. Contestanan largo of complica lo por tapa e nificacion. En cambio, contestanan cortico di djis un par di palabra por ta hopi eficas, y esakinan lo anima esnan nobo pa duna e comentarionan cortico cu nan a prepara.
E Papel di Esnan Cu Ta Dirigi Reunion
E ruman cu ta dirigi un reunion tin un responsabilidad di peso; e tin cu anima e auditorio. E ta mustra cu e ta realmente interesa den cada comentario door di scucha atentamente y door di wak esun cu ta comenta den su cara na un manera amigabel, en bes di ocupa su mes cu otro cos. Lo ta masha inapropiado si e no scucha cu atencion y, door di esei, ta ripiti innecesariamente loke a caba di wordo bisa of ta haci un pregunta cu a caba di ser contesta!
Otro cos cu lo desanima e auditorio ta ora cu cada bes e conductor ta ripiti cu palabra un poco diferente un comentario cu a caba di wordo duna, como si fuera e comentario no tawata mucho bon. Di otro banda, comentarionan cu ta contribui na un consideracion mas profundo di un punto importante ta masha edificante. Preguntanan manera, ‘Con nos por aplica esaki den nos congregacion?’ of, ‘Ki texto den e paragraf ta apoya loke nos a
caba di tende?’ ta anima comentarionan positivo, loke ta duna un contribucion balioso na reunion.Claro cu mester elogia specialmente esnan nobo of timido ora nan duna un comentario. Por haci esaki riba un base personal despues di e studio pa evita di brongosa nan. A la bes, esaki ta duna e conductor un oportunidad pa duna sugerencia ora ta apropiado.
Den combersacion di tur dia, un persona cu ta monopolisa of domina un combersacion ta desanima otronan pa papia. Esnan cu ta scuch’e no ta sinti e necesidad pa expresa nan mes. Si nan conforma nan mes cu scucha so, ta cu mita horea nan ta scucha. Algo similar por sosode ora esun cu ta dirigi un reunion ta monopolisa e consideracion door di papia mucho. Esaki no ta kita si, cu de bes en cuando e conductor por invita e auditorio pa duna comentario y stimula nan pensamento riba e tema door di haci pregunta adicional. Un cos si, mester limita e preguntanan ei.
E conductor no necesariamente lo duna e prome persona cu hisa man beurt. Esaki lo por desanima esnan cu mester di poco tempo pa formula nan pensamentonan. Door di warda djis un rato, lo e duna un persona cu no a comenta ainda e chens pa haci esei. Tambe lo e mustra discernimento door di no duna mucha chikito beurt pa contesta pregunta riba un punto cu ta fuera di nan capasidad pa compronde.
Kico e conductor mester haci ora un contesta ta incorecto? E mester evita di brongosa e persona cu a duna e contesta. Asta ora un comentario ta incorecto, hopi bes e ta contene algun cos cu si ta cuadra. Door di uza tacto y selecta e parti cu si ta corecto, door di formula e pregunta di un otro manera of door di haci un pregunta adicional, e conductor por rectifica e punto sin laga esun cu a dun’e sintie hopi malo.
Pa anima e auditorio pa comenta, e ruman cu ta dirigi un reunion mester evita preguntanan general, manera ‘Ken mas tin comentario?’ E pregunta, ‘Ken no a comenta ainda? Esaki ta bo ultimo chens!’ por tin bon intencion su tras, pero definitivamente lo no anima un persona pa expresa su mes abiertamente. Rumannan no mester sinti nan culpabel cu nan no a comenta mas prome den e studio. Mas bien, mester anima nan pa comparti loke nan sa pasobra dunamento ta un expresion di amor. Ademas, despues cu e conductor duna un persona beurt pa comenta, no ta bon pa e bisa: “Despues di dje, nos lo tende e comentario di ruman tal y tal anto caba ruman tal y tal.” E conductor mester scucha e comentario prome y despues determina si un comentario adicional ta necesario.
Ta un Privilegio di Por Duna Comentario
Asistencia na reunionnan cristian ta un rekisito spiritual; dunamento di comentario durante nan ta un privilegio. Na e grado cu nos ta participa den e manera unico aki di alaba Yehova ‘meimei di e congregacion’, na e mesun grado ei nos ta siguiendo e ehempel di David y ta tuma na serio e conseho di Pablo. Nos participacion den e reunionnan ta duna prueba cu nos ta stima nos rumannan y cu nos ta parti di Yehova su congregacion grandi. Segun cu bo “ta mira cu e dia ta yegando serca”, lo bo no kier ta ningun otro caminda!—Hebreonan 10:25.
[Nota]
^ par. 10 Publica door di Testigonan di Yehova.
[Plachi na pagina 20]
Ta importante pa scucha y tambe duna comentario na reunionnan cristian
[Plachi na pagina 21]
E conductor ta mustra cu e ta realmente interesa den cada comentario