Berdadero Yudansa pa Hende Pober

ORA Hesucristo, e Yiu di Dios, tawata riba tera, el a mustra berdadero interes den yuda hende pober. Relaciona cu Hesus su ministerio, un hende cu a mir’e personalmente a bisa: “E ciegonan ta mira, e lamnan ta cana, e leprosonan ta wordo haci limpi, y e sordonan ta tende, e mortonan ta wordo lanta y na e pobernan e evangelio [of, bon noticia] ta wordo predica.” (Mateo 11:5) Pero kico di e miyones y miyones di hendenan pober djawe? Tin un bon noticia pa nan? Si, tin un mensahe di speransa!

Maske hopi bes mundo en general ta pasa por halto di hende pober y ta ignora nan, e Palabra di Dios ta priminti: “Esun den necesidad lo no keda lubida pa semper; tampoco e speransa di esnan aflihi lo no perece pa semper.” (Salmo 9:18) E palabranan di consuelo aki lo haya nan cumplimento ora e Reino di Dios, un berdadero gobierno den shelo, remplasa tur gobierno humano. (Daniel 2:44) Como Rei di e gobierno celestial ei, Hesus “lo tin compasion di e pober y di esun den necesidad, y e lo salba bida di esnan den necesidad. E lo rescata nan bida for di opresion y violencia; y nan sanger lo ta precioso den su bista.”—Salmo 72:13, 14.

Den ki condicion hende lo biba ora Cristo ta goberna e tera? Esnan cu ta bai biba bou di Cristo su gobernacion lo beneficia di e trabou cu nan ta haci. Bijbel ta bisa na Mikeas 4:3 y 4: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan, pasobra e boca di e SEÑOR di ehersitonan a papia.” E Reino di Dios lo elimina malesa y morto. (Isaias 25:8) Esei si lo ta un mundo diferente! Nos por kere e promesanan biblico aki, pasobra nan ta inspira pa Dios mes.

Ademas di duna un mensahe di speransa, Bijbel ta yuda nos trata problema cu exito. Por ehempel e ta yuda hende vence falta di respet propio cu kisas pobresa a causa. Cristiannan cu ta den necesidad a siña for di Bijbel cu nan ta mes precioso den bista di Dios cu cristiannan rico. E buki biblico di Job ta bisa cu Dios “no ta duna preferencia na prinsnan, ni ta duna e rico mas atencion cu e pober, pasobra nan tur ta obra di su mannan.” (Job 34:19) Dios ta stima ambos mes hopi.—Echonan 10:34, 35.