Haci Yehova Bo Confiansa

“Bo ta mi speransa; o Señor DIOS, bo ta mi confiansa for di mi hubentud.” —Salmo 71:5.

1. Ki reto David, e hoben wardado di carne, a enfrenta?

GOLIAT tawata midi casi tres meter. Pesei no ta nada straño cu tur e soldanan di e ehersito di Israel tawatin miedo di enfrent’e! Pa simannan largo, tur mainta y tur anochi, e gigante Filisteo tawata desafia e ehersito di Israel, retando nan pa manda un guerero pa bringa contra dje. Porfin, un hende a acepta e reto. Pero no tawata un solda, sino un simpel hoben. David, e hoben wardado di carne, a parce un enano banda di su oponente. Figura bo, kisas el a pisa menos cu Goliat su bisti di guera y su armanan! Pero toch e hoben a enfrenta e gigante y te awe e ta un simbolo famoso di curashi.—1 Samuel 17:1-51.

2, 3. (a) Con bin David por a enfrenta Goliat cu tanto confiansa? (b) Cua ta e dos pasonan cu nos lo considera pa por haci Yehova nos confiansa?

2 Kico a duna David asina tanto curashi? Tuma nota di e siguiente palabranan cu David evidentemente a skirbi mas despues den su bida: “Bo ta mi speransa; o Señor DIOS, bo ta mi confiansa for di mi hubentud.” (Salmo 71:5) Si, como un hoben, David a confia completamente den Yehova. El a enfrenta Goliat cu e palabranan: “Bo ta bini riba mi cu spada, cu lansa y cu jabalina, ma ami ta bini riba bo den e nomber di e SEÑOR di ehersitonan, e Dios di e ehersitonan di Israel, kende bo a reta.” (1 Samuel 17:45) Mientras cu Goliat a pone su confiansa den su gran forsa y den su armanan, David su confiansa tawata den Yehova. Cu e Señor Soberano di universo na su banda, David no tawatin motibo di tin miedo di un simpel hende, pa con grandi y bon arma e hende ei kisas tawata.

 3 Ora bo ta lesa tocante David, bo sa desea cu bo confiansa den Yehova tawata mas fuerte? Hopi di nos probablemente ta desea esaki. Pesei, laga nos analisa dos paso cu nos por tuma pa haci Yehova nos confiansa. Na prome luga, nos tin cu vence un obstaculo cu hopi biaha ta stroba nos di tin tal confiansa, y sigui manten’e bou di control. Na di dos luga, nos tin cu haya sa kico confia den Yehova ta encera spesificamente.

Venciendo un Obstaculo Comun pa Confiansa den Yehova

4, 5. Dicon hopi hende ta haya cu ta dificil pa nan pone confiansa den Dios?

4 Kico ta stroba hende di pone nan confiansa den Dios? Hopi bes, ta pasobra algun di nan ta confundi tocante e motibo pakico cos malo ta pasa. Mayoria di nan a wordo siña cu ta Dios ta responsabel pa sufrimento. Ora tragedia tuma luga, pastonan kisas ta bisa cu ta Dios “a tuma” e victimanan pa nan ta hunto cu ne den shelo. Ademas, tin hopi lider religioso ta siña hende cu for di hopi tempo Dios a predestina tur suseso—incluso tur tragedia y maldad—cu ta tuma luga riba e mundo aki. Ta dificil pa pone bo confiansa den un Dios sin heful asina. Satanas, kende ta ciega mente di esnan cu no ta kere, ta ansioso pa promove tur e tiponan ei di ‘doctrina di demoño.’—1 Timoteo 4:1; 2 Corintionan 4:4.

5 Satanas kier pa hende perde confiansa den Yehova. E enemigo ei di Dios no kier pa nos haya sa kico realmente ta e causa di sufrimento humano. Y asta si nos a yega di siña e motibonan cu Bijbel ta duna como causa di sufrimento, Satanas lo kier pa nos lubida nan. Pesei ta bon pa tempo tempo nos repasa tres motibo basico pakico tin sufrimento na mundo. Door di haci esei, nos por sigura nos curason cu Yehova no ta responsabel pa e problemanan cu nos ta confronta den bida.—Filipensenan 1:9, 10.

6. Con 1 Pedro 5:8 ta indica un motibo pakico hende ta sufri?

6 Un motibo pakico hende ta sufri ta cu Satanas kier kibra e integridad di e pueblo fiel di Yehova. El a purba kibra Job su integridad. Den e caso ei Satanas a fracasa, pero e no a entrega. Como gobernante di e mundo aki, e ta purba “devora” e sirbidonan fiel di Yehova. (1 Pedro 5:8) Esei ta inclui cada un di nos! Satanas kier pone nos stop di sirbi Yehova. Pesei hopi bes e ta instiga persecucion. Pa doloroso cu e sufrimento ei por ta, nos tin bon motibo pa soport’e. Door di persevera nos ta yuda duna prueba cu Satanas ta un mentiroso, y asina ta haci Yehova contento. (Job 2:4; Proverbionan 27:11) Segun cu Yehova ta fortalece nos pa soporta persecucion, nos confiansa den dje ta bira mas grandi.—Salmo 9:9, 10.

7. Cua motibo di sufrimento Galationan 6:7 ta yuda nos reconoce?

7 Un di dos motibo pakico tin sufrimento nos ta haya den e principio: “Loke un hende sembra, esaki tambe e lo cosecha.” (Galationan 6:7) Tin biaha hende ta sembra door di tuma mal decision y como consecuencia di esei nan ta cosecha un midi di sufrimento. Kisas nan ta scohe pa core auto na un manera descabeya, y esei ta resulta den accidente. Hopi hende ta scohe pa huma sigaria, y esei ta hiba na malesa di curason of cancer di pulmon. Esnan cu ta scohe pa practica relacion sexual inmoral ta core e riesgo di daña nan relacionnan familiar, di perde respet propio, di sufri di malesa transmiti sexualmente y di haya nan cu embaraso indeseabel. Talbes hende ta purba culpa Dios pa tal sufrimento, pero en realidad nan ta victima di e mal decisionnan cu nan mes a tuma.—Proverbionan 19:3.

8. Segun Eclesiastes 9:11, dicon hende ta sufri?

8 Un di tres motibo pakico tin sufrimento nos ta lesa na Eclesiastes 9:11. E versiculo ei ta bisa: “Atrobe mi a mira bou di solo: cu e careda no ta pa esun mas lihe, y e bataya no ta pa e guereronan, ni pan no ta pa e sabinan, ni rikesa pa esnan cu tin discernimento, ni fabor pa e hendenan cu habilidad; pasobra tempo y suerte [“suseso imprevisto”, NW] ta alcansa nan tur.” Tin biaha, simplemente hende ta na un  mal luga na un mal momento. Sin importa nos puntonan fuerte of debil, sufrimento y morto por alcansa cualkier un di nos na cualkier momento inespera. Por ehempel, den tempo di Hesus un toren na Herusalem a cai y mata 18 hende. Hesus a mustra cu no ta Dios a castiga nan pa picanan cu nan a haci. (Lucas 13:4) No, Yehova no ta esun cu nos mester culpa pa tal sufrimento.

9. Kico hopi hende no ta compronde tocante sufrimento?

9 Ta importante pa compronde algun di e motibonan pakico hende ta sufri. Sinembargo, tin un aspecto di e asunto cu hopi hende ta haya dificil pa compronde. Ta lo siguiente: Pakico Yehova Dios ta permiti sufrimento?

Pakico Yehova Ta Permiti Sufrimento?

10, 11. (a) Segun Romanonan 8:19-22, kico a pasa cu “henter e creacion”? (b) Con nos por saca afo ta ken ta esun cu a somete creacion na banidad?

10 Un pasashi den e carta di apostel Pablo na e Romanonan ta aclara e topico importante aki. Pablo a skirbi: “E creacion ta spera cu gran anticipacion riba e revelacion di e yiunan di Dios. Pasobra e creacion a wordo someti na banidad, no di su mes boluntad, ma pa motibo di esun cu a somet’e, den speransa cu e creacion mes tambe lo wordo libra for di su sclabitud na corupcion pa drenta den e libertad glorioso di e yiunan di Dios. Pasobra nos sa cu henter e creacion ta keha y ta sufri e dolornan di parto hunto, te awor.”—Romanonan 8:19-22.

11 Pa nos capta e punto di e versiculonan aki, nos tin cu haya contesta prome riba algun pregunta clave. Por ehempel: Ken a somete e creacion na banidad? Tin hende ta bisa cu ta Satanas; otronan ta bisa cu ta Adam. Pero ningun di dos no por a haci esei. Dicon no? Pasobra esun cu a somete e creacion na banidad a haci esei “den speransa.” Si, e ta ofrece speransa na esnan fiel cu na e debido tempo lo wordo ‘libra for di sclabitud na corupcion.’ Ni Adam ni Satanas no por a ofrece tal speransa. Ta Yehova so tawata por. Pues ta bisto anto, cu e tawata esun cu a somete creacion na banidad.

12. Ki confusion tin pa cu e identidad di “henter e creacion”, y con nos por aclara esei?

12 Pero kico ta “henter e creacion” cu e pasashi aki ta papia di dje? Tin hende ta bisa cu e ta referi na henter e mundo di naturalesa, incluyendo bestia y mata. Pero bestia y mata tin speransa di alcansa “e libertad glorioso di e yiunan di Dios”? No. (2 Pedro 2:12) Pues, “henter e creacion” por ta referi solamente na humanidad. Esaki ta e creacion cu debi na e rebelion den Eden a ser afecta door di pica y morto y cu  tin gran necesidad di speransa.—Romanonan 5:12.

13. Kico e rebelion den Eden a haci cu humanidad?

13 Pero kico precis e rebelion ei a haci cu humanidad? Pablo ta describi e resultado di e rebelion ei cu un solo palabra: banidad. Segun un buki di referencia, e palabra aki ta describi “e banidad [of, inutilidad] di un obheto cu no ta funciona segun e proposito pa cua el a wordo diseña.” Hende a ser diseña pa biba pa semper, y pa traha unidamente como un famia perfecto pa cuida un tera paradisico. Pero na luga di esei, nan ta hiba un bida cortico, doloroso y hopi bes frustrante. Ta manera Job a expres’e: “Hende cu a nace di mohe ta biba poco dia y ta yen di problema.” (Job 14:1) Esei si ta banidad!

14, 15. (a) Ki evidencia di husticia nos ta haya den e sentencia cu Yehova a dicta riba humanidad? (b) Dicon Pablo a bisa cu creacion a wordo someti na banidad “no di su mes boluntad”?

14 Awor nos ta yega na e pregunta principal: Pakico “e Hues di henter mundo” a somete humanidad na e bida doloroso y frustrante aki? (Genesis 18:25) Tawata husto di su parti pa haci esei? Wel, corda kico nos prome mayornan a haci. Ora nan a rebeldia contra Dios, nan a tuma parti pa Satanas, kende a lanta un desafio formal contra Yehova su derecho di goberna. Cu nan accion, nan a apoya e afirmacion cu hende su bida lo bai mas miho sin Yehova mientras cu nan ta goberna nan mes bou di guia di un criatura spiritual rebelde. Eigenlijk, ora Yehova a sentencia e rebeldenan el a duna nan loke nan a pidi. El a permiti hende goberna nan mes bou di e influencia di Satanas. Den e circunstancianan ei, ki decision lo por tawata mas husto cu somete humanidad na banidad, pero cu un speransa?

15 Claro cu esaki no tawata e creacion “su mes boluntad.” Nos no tin otro opcion. Nos ta nace catibo di pica y corupcion. Pero Yehova den su misericordia a permiti Adam cu Eva biba e resto di nan bida y haya yiu. Aunke nos como nan desendencia ta someti na e banidad di pica y morto, nos tin e oportunidad di haci loke Adam cu Eva no a haci. Nos por scucha Yehova y siña cu su gobernacion supremo ta husto y perfecto, mientras cu gobernacion humano separa for di Yehova ta trece solamente dolor, frustracion y banidad. (Yeremias 10:23; Revelacion 4:11) Ademas, e influencia di Satanas ta solamente empeora e situacion. Historia di humanidad ta duna prueba di e berdadnan aki.—Eclesiastes 8:9.

16. (a) Dicon nos por tin sigur cu Yehova no ta responsabel pa e sufrimento cu nos ta mira na mundo awe? (b) Ki speransa Yehova amorosamente a percura pa hende fiel?

16 Pues, claramente Yehova tawatin motibonan valido pa somete humanidad na banidad. Pero esei ta nifica cu ta Yehova ta e causa di e banidad y sufrimento cu ta aflihi nos cada un awe? Wel, compara e situacion cu esun di un hues cu ta dicta un sentencia husto riba un criminal. E criminal kisas ta sufri bastante mientras cu e ta sinta su castigo, pero e tin derecho di culpa e hues di ta e causa di su sufrimento? Di ningun manera! Ademas, Yehova nunca no ta e fuente di maldad. Santiago 1:13 ta bisa: “Dios no por wordo tenta door di maldad, y e mes no ta tenta ningun hende.” Corda tambe cu Yehova a dicta e sentencia aki “den speransa.” Amorosamente el a haci areglo pa desendientenan fiel di Adam cu Eva por mira e fin di banidad y alegra den e “libertad glorioso di e yiunan di Dios.” Pa eternidad, fiel humanidad lo no tin nodi precupa cu henter creacion lo bolbe cai den e estado doloroso di banidad. E manera husto cu Yehova a atende e situacion lo a establece unabes pa semper cu su gobernacion supremo ta legitimo.—Isaias 25:8.

17. Ora nos repasa e motibonan pakico hende ta sufri den e mundo djawe, ki efecto esei mester tin riba nos?

17 Segun cu nos a repasa e motibonan aki pakico hende ta sufri, nos ta mira cualkier base pa culpa Yehova pa maldad of pa perde nos confiansa den dje? Al contrario, e analisis aki a duna nos motibo pa ta di acuerdo cu e palabranan di Moises: “E Baranca! Su obra ta perfecto, pasobra tur su camindanan ta husto; un Dios  di fieldad y sin inhusticia, husto y recto e ta.” (Deuteronomio 32:4) De bes en cuando laga nos refresca nos comprondemento di e cosnan aki door di medita riba nan. Di e manera ei, ora nos ta confronta prueba nos lo resisti e intentonan di Satanas pa sembra duda den nos mente. Pero kico di e di dos paso cu nos a menciona na cuminsamento? Kico confia den Yehova ta encera?

Loke Confia den Yehova Ta Nifica

18, 19. Cu ki palabranan Bijbel ta anima nos pa confia den Yehova, pero ki ideanan kiboca algun hende tin relaciona cu esei?

18 E Palabra di Dios ta urgi nos: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” (Proverbionan 3:5, 6) E palabranan aki ta bunita y trankilisante. Un cos ta sigur, den henter universo no por tin ningun persona mas confiabel cu nos kerido Tata celestial. No obstante, pa lesa e palabranan ei den Proverbionan ta facil. Pa pone nan na practica kisas ta mas dificil.

19 Hopi hende tin ideanan kiboca tocante loke ta nifica confia den Yehova. Algun ta pensa cu e confiansa ei ta djis un sintimento, un tipo di emocion di felicidad cu mester lanta spontaneamente den nos curason. Otro hende ta kere cu confia den Dios ta nifica cu nos por spera cu e ta proteha nos di tur dificultad, ta resolve tur nos problemanan, ta laga tur reto cu nos ta enfrenta diariamente sali precis manera nos ta spera, anto mesora! Pero e pensamentonan ei ta infunda. Confiansa ta hopi mas cu djis un sintimento, y e no ta irealistico. Serca hende adulto, confiansa ta encera tuma decisionnan conciente y bon pensa.

20, 21. Kico confia den Yehova ta encera? Duna un ehempel.

20 Tuma nota atrobe di loke Proverbionan 3:5 ta bisa. E ta haci un contraste entre confia den Yehova y depende riba nos mes comprondemento, y ta indica cu nos no por haci tur dos. Esaki kiermen cu nos no mag uza nos capasidad di compronde? No, no ta esei e kiermen, pasobra Yehova, kende a duna nos e capasidad ei, ta spera cu nos ta uz’e ora nos ta sirbie. Pero e punto ta, riba kico nos ta depende ora di tuma decision? Si nos manera di pensa no ta harmonisa cu esun di Yehova, nos ta acepta su sabiduria toch ya cu e ta infinitamente mas superior cu esun di nos? (Isaias 55:8, 9) Confia den Yehova ta nifica laga su manera di pensa guia nos manera di pensa.

21 Considera un ehempel: Pensa riba un mucha chikito sinta den stul patras den auto, anto su mayornan ta sinta dilanti. Su tata ta stuur. Ora surgi dificultad durante e biahe—kisas un pregunta tocante cua ta e ruta cu mester sigui of podise un problema cu mal tempo of cu e condicion di e caminda—con un yiu obediente y cu ta confia su mayornan ta reacciona? E ta sinta grita instruccion for di patras, bisando su tata con e mester core? E ta cuestiona e decisionnan cu su mayornan ta tuma of e ta resisti ora nan ta cord’e pa keda sinta cu su faha mara? No, di naturalesa e ta confia cu su mayornan lo atende e asuntonan ei, pa imperfecto cu nan ta. Den caso di Yehova, nos tin un Tata perfecto. Nos no mester confi’e completamente, specialmente ora nos ta confronta situacionnan dificil?—Isaias 30:21.

22, 23. (a) Dicon nos mester pone nos confiansa den Yehova ora nos ta confronta problema, y con nos por haci esei? (b) Kico nos lo trata den e siguiente articulo?

22 Sinembargo, Proverbionan 3:6 ta indica  cu nos mester ‘reconoce Yehova den tur nos camindanan’, no solamente ora nos ta confronta situacionnan dificil. Pesei e decisionnan cu nos ta tuma den nos bida diario mester refleha nos confiansa den Yehova. Ora surgi problema, nos no mester desespera, drenta den panico of resisti Yehova su guia relaciona cu e miho manera pa atende asuntonan. Nos tin cu mira e pruebanan cu nos ta pasa aden como oportunidadnan pa apoya Yehova su gobernacion supremo, pa yuda demostra cu Satanas ta un mentiroso y pa cultiva obediencia y otro cualidadnan cu ta agrada Yehova.—Hebreonan 5:7, 8.

23 Nos por demostra nos confiansa den Yehova sin importa ki obstaculo tin nos dilanti. Nos ta demostra esei na nos oracionnan y na e manera cu nos ta acudi na Yehova su Palabra y na su organisacion pa haya guia. Pero con spesificamente nos por desplega confiansa den Yehova ora nos ta confronta e problemanan cu ta surgi den e mundo djawe? Nos siguiente articulo lo trata e topico ei.

Con Lo Bo Contesta?

• Con David a demostra cu el a haci Yehova su confiansa?

• Menciona tres motibo pakico hende ta sufri awe. Y dicon ta bon pa repasa nan de bes en cuando?

• Ki sentencia Yehova a dicta riba humanidad, y dicon e tawata un sentencia husto?

• Kico confia den Yehova ta encera?

[Preguntanan di Estudio]

[Plachi na pagina 8]

David a haci Yehova su confiansa

[Plachi na pagina 10]

Hesus a mustra cu ora un cierto toren a cai na Herusalem, no ta Yehova tawata responsabel pa esei