Nos Rumannan di Edad Ta Balioso pa Abo?

ORA e Israelitanan di antiguedad tawata den un pacto cu Dios, e mandato tawata: “Lanta para pa esun cu tin cabei blanco, honra e anciano y teme bo Dios.” (Levitico 19:32) Pues respet pa hende grandi tawata un deber sagrado, estrechamente liga cu sumision na Dios. Maske cristiannan djawe no ta bou di e Lei di Moises mas, e lei aki ta recorda nos cu Yehova ta sigui considera hende grandi cu ta sirbie mes balioso y precioso cu e tempo aya. (Proverbionan 16:31; Hebreonan 7:18) Nos tin Yehova su punto di bista? Nos ta balora nos rumannan hende grandi?

Elias A Balora Su Amigo di Edad

Den e buki biblico di Segundo Reinan tin un relato cu ta mustra nos con importante respet pa hende grandi ta. E ta describi con profeta Eliseo, cu tawata mas jong, a bira susesor di profeta Elias. Ban wak kico a pasa riba Elias su ultimo dia como profeta den e reino di dies tribu di Israel.

Riba e dia ei, Yehova a bisa e profeta di edad aki pa e bai di Gilgal pa Bet-el, y di Bet-el pa Yerico, y for di Yerico pa Riu Yordan. (2 Reinan 2:1, 2, 4, 6) Durante e biahe ei di casi 50 kilometer, tres biaha Elias a suplica Eliseo pa stop di siguie. Pero, mescos cu e hoben Rut kende siglonan prome a nenga rotundamente di bai laga Noemi, asina Eliseo a nenga di bai laga e profeta di edad. (Rut 1:16, 17) Tres bes Eliseo a bisa: “Manera SEÑOR ta biba y manera abo mes ta biba, lo mi no laga bo.” (2 Reinan 2:2, 4, 6) Pa e tempo ei, Eliseo a yuda Elias pa alrededor di seis aña caba. Pero toch e tawata desea di sirbi Yehova hunto cu Elias mas tanto tempo posibel. Si, e relato ta sigui bisa: “Anto a sosode cu mientras nan tawata cana ta papia, mira, . . . Elias a subi bai.” (Versiculo 11) Elias cu Eliseo a keda papia cu otro te na e ultimo momento di Elias su ministerio den Israel. Aparentemente e profeta jong tawata ansioso pa absorba mas tanto instruccion y animacion posibel for di e profeta mas grandi y mas experencia. Claramente, el a balora su amigo di edad.

‘Manera Tata cu Mama’

No ta dificil pa compronde dicon Eliseo a stima e profeta di edad como amigo, y asta como un tata spiritual. (2 Reinan 2:12) Un  poco prome cu Elias su asignacion na Israel a termina, el a bisa Eliseo: “Pidi loke bo kier pa mi haci pa bo prome cu mi wordo kita for di bo.” (Versiculo 9) Pues te na final, Elias a mustra interes den e bienestar spiritual di su susesor y tambe pa e trabou di Dios sigui.

Awe, ta masha conmovedor pa mira cu nos rumannan cristian di edad ta mustra e mesun spirito di ‘tata cu mama’ ora nan ta comparti nan conocemento y sabiduria generosamente cu esnan mas jong. Por ehempel, boluntarionan cu tin hopi tempo ta sirbi na oficinanan di sucursal di Testigonan di Yehova, cu mucho gusto ta yuda miembronan nobo di e famia di Betel pa nan bira capas den nan trabou. Superintendentenan biahero cu nan esposanan cu a bishita congregacionnan pa hopi aña tambe ta contento pa comparti e experencia cu nan a acumula, cu esnan cu ta haya entrenamento pa sirbi como superintendente biahero. Ademas, den congregacionnan di Testigonan di Yehova rond mundo, tin rumannan grandi cu a sirbi Yehova fielmente pa decadanan y cu buena gana ta comparti nan sabiduria sano y experencia cu miembronan nobo di e congregacion.—Proverbionan 2:7; Filipensenan 3:17; Tito 2:3-5.

E interes sinsero cu e rumannan stima di edad aki ta mustra ta pone cu ta un berdadero placer pa mustra respet pa nan. Pues, nos kier imita Eliseo su ehempel y mustra aprecio di curason pa nos rumannan di edad. Manera apostel Pablo ta recorda nos, laga nos sigui trata ‘un homber bieu manera un tata’ y “mohenan mas bieu manera mama.” (1 Timoteo 5:1, 2) Ora nos haci esei, berdaderamente nos ta contribui pa tur cos den e congregacion cristian rond mundo cana bon y nos ta yuda e congregacionnan progresa.

[Plachi na pagina 30]

Eliseo a desea di sirbi Yehova hunto cu Elias mas tanto tempo posibel

[Plachi na pagina 31]

Esnan mas hoben por beneficia masha hopi for di cristiannan di edad