Pregunta di Lector

Ta un custumber na hopi parti di mundo pa duna regalo di casamento. Cua principionan biblico nos mester tuma na cuenta ora di duna of haya e regalonan ei?

Bijbel ta aproba dunamento di regalo ora esei ta wordo haci cu e motibo corecto y na e ocasion apropiado. Relaciona cu e asunto di dunamento, Bijbel ta anima cristiannan berdadero pa imita nan Percurador generoso, Yehova. (Santiago 1:17) Apostel Pablo a urgi cristiannan: “No laga di haci bon y di comparti cu otro; pasobra sorto di sacrificionan asina ta agrada Dios.” Pues cristiannan ta wordo anima pa ta generoso.—Hebreonan 13:16; Lucas 6:38.

Pero kico di mesa di regalo, conoci como bruidstafel, cu ta un practica comun den diferente pais? Den algun pais ta normal pa e pareha cu ta bai casa bishita un establecimento comercial pa mira kico nan kier como regalo, y reserva e articulonan aki. Despues ta informa famia y amigonan di e pareha ta na cua establecimento nan por cumpra un di e articulonan. Esaki por zona practico door cu e cumprado no tin nodi perde tempo pa busca un regalo, y e pareha no ta hay’e ta debolbe articulonan indeseabel.

Si un pareha ta desea di tin un mesa di regalo of no, ta un asunto personal. Sinembargo, un cristian lo kier tene cuidou pa evita cualkier practica cu ta viola principionan biblico. Por ehempel, kico lo pasa si un pareha cu ta comprometi pa casa ta scohe articulonan cu ta hopi costoso? Den e caso ei, esnan cu no tin hopi moda kisas lo no por duna un regalo, of nan por sinti cu ta miho pa nan no acepta e invitacion pa no pasa den e berguensa di a trece un regalo barata. Un señora cristian a skirbi: “Dunamento di regalo pa casamento a para bira un carga. Mi tawata purba di ta generoso, pero ultimamente mi no ta sinti e felicidad di duna cu mi tawata sinti antes.” Lo ta hopi tristo si un casamento para bira un fuente di desanimacion!

Definitivamente, e dunado no mester sinti cu pa e regalo por ta aceptabel, e mester cumpr’e na un cierto establecimento of cu e mester gasta un cierto suma di placa. Al fin y al cabo, Hesucristo a indica cu loke ta mas balioso den Dios su bista ta e actitud di curason di e dunado y no cuanto e regalo ta costa. (Lucas 21:1-4) Mescos tambe, tocante dunamento di regalonan na esnan den necesidad, apostel Pablo a skirbi: “Laga cada un haci manera el a propone den su curason; no contra su gusto of obliga; pasobra Dios ta stima esun cu ta duna cu alegria.”—2 Corintionan 9:7.

Biblicamente no tin nada malo den identifica bo mes como e dunado di un regalo, kisas door di pone un nota hunto cu ne. Sinembargo, na algun luga, ta un custumber pa bisa dilanti di tur esnan presente kico cada hende a duna. E custumber aki por hiba na problema. Esnan cu a duna un regalo kisas no kier pa otro hende haya sa kico nan a duna, pa evita di hala indebido atencion na nan mes. Personanan asina ta actua na harmonia cu e principio haya na Mateo 6:3 [Beibel na papiamentu koriente], caminda Hesus a bisa: “Ma abo, ora bo ta duna esnan cu ta den necesidad algo, no laga bo man robes sa kico bo man drechi ta haci.” Otro hende ta sinti cu dunamento di regalo ta algo personal y mester keda entre e dunado y esun cu ta haya e regalo. Ademas, identificando e dunado dilanti tur presente por pone cu hende ta cuminsa compara e regalonan cu otro y asina ‘instiga competencia.’ (Galationan 5:26, NW) Sin duda cristiannan lo kier evita di pone hende sinti nan mes incomodo of haya berguensa door di anuncia publicamente e nombernan di e dunadonan di regalo.—1 Pedro 3:8.

Si, door di actua na harmonia cu e principionan cu tin den e Palabra di Dios, dunamento di regalo lo sigui ser un fuente di goso.—Echonan 20:35.