Ta un ‘Iglesia Berdadero’ So Tin?

MESCOS cu tin un solo Cristo, asina tin un solo curpa di Cristo, un solo Bruid di Cristo: ‘un solo Iglesia Catolico y apostolico.’”​—Dominus Iesus.

Asina e cardinal catolico Romano, Joseph Ratzinger, a splica e siñansa di su iglesia cu ta un iglesia berdadero so por tin. El a bisa cu e iglesia ei ta “un solo Iglesia di Cristo, y esei ta Iglesia Catolico.”

“No Ta Iglesia den e Sentido Exacto di Palabra”

Aunke Papa Juan Pablo II a insisti cu den e documento Dominus Iesus no tin nada di “arogancia pa cu otro religion, of falta di respet pa nan”, lidernan di iglesia protestant si a reacciona fuertemente riba dje. Por ehempel, na e Asamblea General Presbiteriano na Belfast, Nort Irlanda, na juni 2001, un minister a bisa cu e documento ta producto di “un grupo poderoso den Iglesia Catolico Romano . . . cu ta spanta pa e actitud mucho habri cu Vaticano II a asumi.”

Robin Eames, arsobispo di Iglesia di Irlanda, a bisa cu lo e keda “sumamente desapunta” si e documento ta boga pa Iglesia Catolico “bai bek na su sistema di pensa prome cu Vaticano II.” Den su comentario riba e declaracion di Vaticano cu e iglesianan cu ta rechasa cierto doctrinanan catolico “no ta iglesia den e sentido exacto di palabra”, Eames a bisa: “Esei lo por ta un insulto pa mi.”

Kico a motiva Ratzinger pa skirbi su Dominus Iesus? Ta parce cu e asina yama relativismo religioso a molestia e Curia Catolico Romano. Segun The Irish Times, “e surgimento di un teologia pluralista—cu basicamente ta bisa cu tur religion ta mes bon . . . a bin ta precupa Cardinal Ratzinger mas y mas.” Aparentemente ta e punto di bista aki a proboca su comentarionan tocante un solo iglesia berdadero.

Ta Importa na Cua Iglesia Bo Ta Pertenece?

Claro cu pa algun hende, “relativismo religioso” of “teologia pluralista” ta mucho mas rasonabel y atractivo cu cualkier idea cu ta un iglesia berdadero so por tin. Pa nan, religion mester ta puramente un cuestion di preferencia personal. Nan ta bisa cu ‘al fin y al cabo no ta importa masha na cua iglesia bo ta pertenece.’

Esei por parce e punto di bista mas tolerante—aunke el a causa division den religion door di cua a lanta un gran cantidad di diferente denominacion. Hopi ta bisa cu ‘e diversidad ei den religion ta djis un expresion saludabel di libertad individual.’ Sinembargo, segun e escritor Steve Bruce, eigenlijk, e “tolerancia religioso” ei no ta nada mas cu “indeferencia religioso.”​—A House Divided: Protestantism, Schism, and Secularization.

Kico ta e punto di bista corecto anto? Ta un iglesia berdadero so tin? Acaso Iglesia Catolico Romano ta e unico iglesia berdadero? Otro iglesianan tambe ta aceptabel pa Dios? Siendo cu e preguntanan aki tin di aber cu nos relacion cu nos Creador, sigur ta importante pa haya sa su punto di bista riba e asunto aki. Con nos por haya sa esei? Door di wak den Bijbel, e Palabra inspira di Dios. (Echonan 17:11; 2 Timoteo 3:​16, 17) Laga nos analisa loke e ta bisa riba e topico aki di un solo iglesia berdadero.

 [Reconocemento pa Potret na pagina 2]

COVER: Mark Gibson/Index Stock Photography