Un Solo Berdadero Fe Cristian Ta un Realidad

HESUCRISTO a establece un solo iglesia, of congregacion. E congregacion ei tawata un curpa spiritual, of un famia spiritual, es decir, un grupo di hende cu a bin hunto y cu Dios a scohe pa medio di su spirito. Dios ta reconoce nan tur como su “yiunan.”—Romanonan 8:16, 17; Galationan 3:26.

Hesus a siña cu ta un medio so Dios a uza pa dirigi hende na e berdad y na bida. Pa ilustra e berdad importante ei, Hesus a compara e medio cu ta hiba na bida eterno cu un caminda. El a bisa: “Drenta door di e porta smal, pasobra hancho ta e porta y espacioso e caminda cu ta hiba na destruccion, y hopi ta esnan cu ta drenta door di dje. Pasobra chikito ta e porta y smal e caminda cu ta hiba na bida, y poco ta esnan cu ta hay’e.”—Mateo 7:13, 14; Huan 14:6; Echonan 4:11, 12.

Un Congregacion Uni

Nos no mester kere cu e congregacion di prome siglo tawata “un sosiedad mundial, universal y organisa manera nos kiermen awendia ora nos ta papia tocante iglesia catolico”, segun The New Dictionary of Theology. Pakico no? E ta bisa: “Pa e simpel motibo cu un sosiedad universal organisa asina no a existi.”

Niun hende lo por echt nenga e echo cu e congregacion cristian di prome siglo no tawata parce na nada e iglesianan institucionalisa cu nos ta mira awe. Pero e tawata organisa si. E congregacionnan individual no a funciona independiente di otro. Nan tur a reconoce e autoridad di un cuerpo gobernante den Herusalem. E cuerpo ei, cu a consisti di e apostelnan y ancianonan di e congregacion di Herusalem, a yuda conserva e unidad di e congregacion como e “solo curpa” [NW] di Cristo.—Efesionan 4:4, 11-16; Echonan 15:22-31; 16:4, 5.

 Kico a sosode cu e unico congregacion berdadero ei? Acaso ta e a bira e poderoso Iglesia Catolico? Ta e a desaroya den e varios denominacionnan dividi di Iglesia Protestant cu nos ta mira awe? Of ta algo otro a sosode?

“Trigo” y “Yerba Shimaron”

Pa haya e contestanan, laga nos analisa cuidadosamente kico Hesucristo mes a bisa cu lo a pasa. Kisas lo bo keda sorprendi pa haya sa cu Hesus a anticipa cu su congregacion lo a disparce for di esena y cu lo el a permiti e situacion lamentabel ei continua pa hopi siglo.

Hesus a conecta su congregacion cu “e reino di shelo”, y den e contexto ei el a bisa: “E reino di shelo por wordo compara cu un hende cu a sembra bon simiña den su cunucu. Ma mientras cu hende tawata drumi, su enemigo a bin, a sembra simiña di yerba shimaron den e trigo y a cohe su caminda bai. Y ora cu e trigo a spruit y a forma tapushi, e yerba shimaron tambe a keda bisto. Y e esclabonan di e doño di cunucu a bin bis’e: ‘Señor, no ta bon simiña bo a sembra den bo cunucu? Di con anto tin yerba shimaron aden?’ Y el a bisa nan: ‘Ta un enemigo a haci esaki!’ Y e esclabonan a puntr’e: ‘Bo kier anto pa nos bai y recohe nan?’ Ma el a contesta: ‘No, pa no sosode cu mientras boso ta recohe e yerba shimaron, boso ranca e trigo tambe hunto cu ne. Laga tur dos crece hunto te na cosecha; y na tempo di cosecha lo mi bisa e cosechadonan: Recohe e yerba shimaron prome y mara nan na boshi pa kima nan; ma recohe e trigo warda den mi mangasina.’”—Mateo 13:24-30.

Hesus a splica cu “esun cu [a] sembra” tawata e mes y cu “e bon simiña” a representa su berdadero disipelnan. Su “enemigo” tawata Satanas e Diabel. “E yerba shimaron” tawata cristiannan falso cu pocopoco pero sigur a bin forma parti di e congregacion cristian di prome siglo. El a bisa cu lo e laga “e trigo” y “e yerba shimaron” crece hunto te na “cosecha”, cu lo yega na “fin di mundo.” (Mateo 13:37-43) Kico tur esaki a nifica?

E Congregacion Cristian A Ser Corumpi

Un poco despues di morto di e apostelnan, maestronan apostata di den e congregacion a cuminsa tuma control di esaki. Nan tawata papia “cosnan perverso, pa desvia e disipelnan y haci nan bai nan tras.” (Echonan 20:29, 30) Esei a pone hopi cristian “cai for di fe.” Nan a bai tras di “fabula.”—1 Timoteo 4:1-3; 2 Timoteo 4:3, 4.

 The New Dictionary of Theology ta bisa cu pa siglo 4 di nos era “cristianismo catolico a bira e religion oficial . . . di e Imperio Romano.” Nan a forma un “coalicion di un sosiedad eclesiastico y civil”—un mescla di Iglesia y Estado cu tawata totalmente contrario na e creencianan di e prome cristiannan. (Huan 17:16; Santiago 4:4) E mesun fuente ta declara cu den transcurso di tempo, henter e structura y caracteristica di e iglesia, y tambe hopi di su creencianan fundamental, a cambia radicalmente “bou di influencia di un combinacion straño y completamente insaludabel di T[estament] B[ieu] y modelonan neoplatonico.” Manera Hesucristo a pronostica, segun cu cristiannan falso a florece, su berdadero disipelnan a perde for di bista.

Hesus su oyentenan tawata sa con dificil ta pa distingui berdadero trigo for di yerba shimaron manera e yerba venenoso di e famia Lolium temulentum, cu durante e temporada cu e ta crece parce trigo hopi. Pues Hesus tawata ilustrando cu pa un tempo lo tawata dificil pa distingui e cristiannan berdadero for di e variedad di cristiannan falso. Esaki no ta nifica cu e congregacion cristian a stop di existi, pasobra Hesus a priminti di sigui guia su rumannan spiritual “te na fin di mundo.” (Mateo 28:20) Hesus a bisa cu e trigo lo a sigui crece. Sinembargo, atrabes di siglonan, cristiannan berdadero—tanto individual of como grupo—sigur a haci nan best pa pega na e siñansanan di Cristo. Pero ya nan no tawata forma un cuerpo of organisacion visibel mas cu bo por a identifica claramente. Un cos si ta sigur: nan no tawata manera e sistema religioso apostata cu atrabes di historia a trece solamente berguensa y deshonor riba e nomber di Hesucristo.—2 Pedro 2:1, 2.

‘E Homber di Pica Ta Keda Manifesta’

Apostel Pablo a profetisa algo mas cu lo caracterisa religion falso. El a skirbi: “No laga ni un hende gaña boso di ningun manera, pasobra e dia [di Yehova] lo no bin prome cu e caimento for di fe yega y e homber di pica keda manifesta.” (2 Tesalonicensenan 2:2-4) E “homber di pica” aki no ta nada menos cu e clase di clero cu a halsa su mes den un posicion di autoridad riba e congregacion “cristian.” *

E apostasia a cuminsa den tempo di apostel Pablo. Ora e apostelnan a muri, mas y mas hende a cai for di fe pasobra ya no tawatin e influencia di e apostelnan cu por a frena e apostasia. Pablo a bisa cu esaki lo tawata bisto na “e actividad di Satanas, cu tur poder y señalnan y maraviyanan falso, y cu tur e engaño.” (2 Tesalonicensenan 2:6-12) Esei ta un descripcion exacto di e actividadnan di masha hopi lider religioso atrabes di historia!

Pa respalda nan pretencion cu Catolicismo Romano ta e unico iglesia berdadero, lidernan catolico ta bisa cu nan obisponan a “hereda nan apostolado for di e apostelnan original pa medio di un liña di sucesion cu ta bai bek te na cuminsamento [di cristianismo].” En realidad, e pretencion aki di sucesion apostolico no tin base historico ni biblico. No tin ningun evidencia combencente cu spirito santo di Dios a yega di dirigi e iglesia cu a surgi despues di morto di e apostelnan di Hesus.—Romanonan 8:9; Galationan 5:19-21.

I kico di e otro iglesianan cu a lanta manera paddestoel despues di e asina yama Reformacion? Nan a sigui e modelo di e congregacion cristian di prome siglo? Nan a reestablece e puresa di e congregacion cristian original? Ta berdad cu despues di e Reformacion, Bijbel a bira disponibel pa hopi hende di pueblo comun den nan propio idioma. Sinembargo, historia ta mustra cu e iglesianan aki a sigui siña doctrinanan eroneo. *—Mateo 15:7-9.

Pero tuma nota di esaki. Hesucristo definitivamente  a profetisa cu su unico congregacion berdadero lo a ser reestablece durante loke el a yama e conclusion di un sistema di cosnan. (Mateo 13:30, 39, NW) Profecia di Bijbel cu ta cumpliendo ta mustra cu actualmente nos ta bibando den e tempo ei. (Mateo 24:3-35) Siendo cu esei ta e caso, nos cada un tin cu puntra: ‘Unda e unico iglesia berdadero ei ta?’ Lo mester bira mas y mas facil pa identific’e.

Kisas bo ta pensa cu bo a haya e iglesia of congregacion ei caba. Ta importante pa bo haci sigur. Pakico? Pasobra mescos cu den e prome siglo, ta un iglesia berdadero so por tin. Bo a tuma e tempo pa haci sigur cu bo iglesia ta sigui estrechamente e modelo cu e congregacion cristian di prome siglo a establece y cu e ta pega lealmente na e siñansanan di Hesucristo? Pakico no analisa esaki awor? Testigonan di Yehova lo ta contento pa yuda bo haci netamente esei.—Echonan 17:11.

[Nota]

[Plachi na pagina 5]

Kico e ilustracion di Hesus di e trigo y e yerba shimaron ta siña nos tocante e congregacion berdadero?

[Plachi na pagina 7]

Bo iglesia ta refleha e modelo cu e cristiannan di prome siglo a establece den predica y studia?