Combersacion Spiritual Ta Edifica

“No laga ningun palabra dañino sali for di boso boca, sino solamente palabra cu ta bon pa edificacion, conforme e necesidad di e momento, pa esaki por duna gracia na esnan cu ta tende.”—Efesionan 4:29.

1, 2. (a) Con balioso abla humano ta? (b) Con sirbidonan di Yehova kier uza nan lenga?

“ABLA humano ta un secreto; e ta un regalo di Dios, un milager.” Asina e lexicografo Ludwig Koehler a skirbi. Podise nos no ta considera e regalo precioso aki di Dios como gran cos. (Santiago 1:17) Pero pensa riba e gran perdida cu nos ta sinti ora un atake celebral pone cu un ser keri no por expresa su mes na un manera comprendibel mas. Joan, kende su casa resientemente a sufri un atake celebral, a bisa: “Nos tawatin un comunicacion excelente cu a haci nos hopi pega cu otro. Mi ta sinti hopi falta di nos combersacionnan.”

2 Combersacion por fortalece amistad, drecha un mal comprondemento, anima esnan deprimi, haci fe firme y enrikece bida; pero e no ta bai automaticamente. Rei sabi Salomon a bisa: “Tin hende ta papia sin pensa, manera hinca di spada, ma lenga di hende sabi ta trece curamento.” (Proverbionan 12:18) Como sirbido di Yehova, nos kier pa nos combersacionnan restaura y edifica otro hende en bes di hurt nan y caba cu nan. Tambe nos kier uza nos lenga pa alaba Yehova, tanto den nos sirbishi publico como den nos combersacionnan priva. E salmista a canta: “Nos a duna gloria na Dios tur ora bai y nos kier alaba bo nomber sin fin.”—Salmo 44:8, BPK.

3, 4. (a) Ki problema nos tur ta enfrenta relaciona cu nos abla? (b) Dicon loke nos ta papia ta importante?

3 Disipel Santiago a spierta: “Ma lenga ningun hende no por mansa.” Anto el a recorda nos: “Nos tur ta trompica na hopi manera. Si un hende no ta trompica den loke e ta bisa, e ta un hende perfecto, capas pa frena henter e curpa tambe.” (Santiago 3:2, 8) Ningun di nos no ta perfecto. Pesei, apesar cu di berdad nos lo kier uza nos abla bon, no ta semper e ta edifica otro hende ni duna alabansa na nos Creador. Pues anto, nos tin cu siña paga tino kico nos ta papia. Ademas, Hesus a bisa: “Hende lo duna cuenta riba e dia di huicio di cada palabra vano cu nan papia. Pasobra segun bo palabranan lo bo wordo hustifica, y segun bo palabranan lo bo wordo condena.” (Mateo 12:36, 37) Si, e Dios berdadero ta tene nos responsabel pa nos palabranan.

4 Un di e miho maneranan pa evita abla perhudicial ta door di desaroya e custumber di participa den combersacionnan spiritual. E articulo aki lo trata con nos por haci esei, ki sorto di tema nos por papia riba dje, y ki beneficionan nos por saca for di abla edificante.

Wak Kico Tin den Bo Curason

5. Con nos curason ta hunga un papel importante den promove combersacion edificante?

5 Pa nos cultiva e custumber di participa den combersacionnan edificante, nos tin cu reconoce prome cu nos abla ta refleha loke tin den nos curason. Hesus a bisa: “For di abundancia di curason boca ta papia.” (Mateo 12:34) Simpel bisa, nos ta papia tocante cosnan cu nos ta  haya importante. Pesei nos tin cu puntra nos mes: ‘Kico mi combersacionnan ta revela tocante loke tin den mi curason? Ora mi ta cu mi famia of cu mi rumannan den fe, mi combersacion ta enfoca riba asuntonan spiritual of casi semper e ta bai riba deporte, paña, pelicula, cuminda, cosnan cu mi a caba di cumpra of cualkier cos di menos importancia?’ Podise sin cu nos a ripara, nos bida y nos pensamentonan awor ta drei rond di asuntonan secundario. Door di ahusta nos prioridadnan, nos lo mehora tanto nos combersacion como nos bida.—Filipensenan 1:10, NW.

6. Ki papel meditacion ta hunga den nos combersacionnan?

6 Un otro manera pa mehora e calidad di loke nos ta papia ta door di medita cu un proposito. Si concientemente nos ta haci esfuerso pa pensa riba asuntonan spiritual, nos lo ripara cu di mes nos lo combersa riba asuntonan spiritual. Rei David a mira e conexion aki. El a canta: “Laga e palabranan di mi boca y e meditacion di mi curason ta aceptabel den bo bista, o SEÑOR.” (Salmo 19:14) Y e salmista Asaf a bisa: “Lo mi medita riba tur bo [Dios su] obranan, y keda pensa riba bo echonan.” (Salmo 77:12) Un curason y mente cu ta enfoca riba e berdadnan di e Palabra di Dios, di mes lo brota cu abla digno di alabansa. Yeremias no por a keda sin papia tocante e cosnan cu Yehova a siñ’e. (Yeremias 20:9) Asina tambe lo por pasa cu nos si regularmente nos ta reflexiona riba asuntonan spiritual.—1 Timoteo 4:15, NW.

7, 8. Ki topiconan ta bon pa combersacion edificante?

7 Un bon rutina spiritual ta duna nos cantidad di tema pa combersacion edificante. (Filipensenan 3:16, NW) Asambleanan, congresonan, reunionnan di congregacion, publicacionnan actual y e texto di dia cu su comentario, tur ta duna nos hoyanan spiritual cu nos por comparti. (Mateo 13:52) Y experencianan cu nos tin den sirbishi cristian por ta un gran estimulo spiritual!

⁸ Rei Salomon tawata fasina cu e gran variedad di palo, bestia, parha y pisca cu el a observa den Israel. (1 Reinan 4:33) El a gusta combersa tocante Dios su obranan di creacion. Nos por haci mescos. Yehova su sirbidonan gusta papia tocante un variedad di tema, pero semper bo ta haya topiconan spiritual den combersacion di hende cu tin inclinacion pa cosnan spiritual.—1 Corintionan 2:13.

“Laga Esakinan Ocupa Boso Mente”

9. Ki instruccion Pablo a duna e Filipensenan?

9 Sea cual sea e topico, nos combersacionnan lo edifica otro hende si nan ta na harmonia cu e instruccion cu apostel Pablo a duna e congregacion di Filipos. El a skirbi: “Tur loke ta berdadero, tur loke ta honorabel, tur loke ta husto, tur loke ta puro, tur loke ta bunita, tur loke ta di bon fama, si tin algun birtud y si tin algo digno di alabansa, laga esakinan ocupa boso mente.” (Filipensenan 4:8) E cosnan cu Pablo a menciona ta asina importante cu el a bisa pa “laga esakinan ocupa boso mente.” Nos mester yena nos mente y curason cu nan. Pesei laga nos wak con door di presta atencion na cada un di e ocho cosnan cu Pablo a menciona, nos por mehora nos combersacionnan.

10. Con nos combersacionnan por encera cosnan cu ta berdadero?

10 Loke ta berdadero ta encera mas cu solamente informacion cu ta corecto y no falso. E ta referi na algo cu ta recto y digno di confiansa, manera por ehempel e berdad di e Palabra di Dios. Pesei, ora nos ta papia cu hende tocante e berdadnan biblico cu a impresiona nos, of discursonan cu a anima nos of conseho biblico cu a yuda nos, nos ta ocupando nos mente cu loke ta berdadero. Di otro banda, nos ta rechasa “loke falsamente ta wordo yama ‘conocemento’”, esta, cosnan cu solamente tin un aparencia di ta berdad. (1 Timoteo 6:20) Y nos ta evita di conta redo of experencianan dudoso cu no por ser confirma.

11. Cua ta algun topico honorabel cu nos por inclui den nos combersacionnan?

11 Loke ta honorabel [of, “di consideracion  serio”, NW] ta topiconan cu ta expresa dignidad y cu ta importante, no co’i kens of cos insignificante. Nan ta inclui aspectonan di nos sirbishi cristian, e tempo trabahoso den cua nos ta biba, y e necesidad pa nos mantene bon conducta. Ora nos ta papia tocante asuntonan serio asina, nos ta reforsa nos determinacion pa keda spiritualmente lanta, mantene nos integridad y sigui predica e bon nobo. Si, nos experencianan interesante den sirbishi y susesonan actual cu ta recorda nos cu nos ta bibando den e ultimo dianan, ta duna nos un variedad di informacion cu nos por uza pa combersacionnan stimulante.—Echonan 14:27; 2 Timoteo 3:1-5.

12. En bista di Pablo su conseho pa ocupa nos mente cu cosnan cu ta husto y puro, kico nos mester evita?

12 E palabra husto ta nifica ser corecto den bista di Dios, cumpliendo cu su normanan. Puro ta transmiti e idea di puresa den pensamento y conducta. Den nos combersacionnan no tin luga pa calumnia, chistenan sushi of pa cosnan di dobel sentido. (Efesionan 5:3; Colosensenan  3:8) Sea ta na trabou of na scol, cristiannan sabi ta aleha nan mes ora cu combersacionnan cuminsa bai den e direccion ei.

13. Duna algun ehempel di combersacionnan cu ta enfoca riba cosnan bunita y di bon fama.

13 Ora Pablo ta recomenda pa nos pensa riba cosnan bunita [literalmente, cosnan cu ta stimula cariño], e ta referi na cosnan cu ta agradabel of cu ta inspira amor, contrario na loke ta proboca odio, amargura of pleito. Loke ta di bon fama ta inclui relatonan di bida di rumannan fiel, cu ta sali publica regularmente den e revistanan Toren di Vigilancia y Spierta! Despues cu bo caba di lesa e articulonan fortalecedor di fe aki, dicon bo no ta comparti loke bo a siña cu otro hende? Y ta masha animante pa tende di e logronan spiritual di otro hende. E tipo di combersacionnan ei lo promove amor y union den e congregacion.

14. (a) Pa nos desplega birtud, kico nos mester haci? (b) Con nos abla por inclui cosnan digno di alabansa?

14 Pablo ta papia di “si tin algun birtud.” Birtud ta referi na bondad of excelencia moral. Nos mester haci esfuerso pa nos lipnan ser guia door di principionan biblico y pa nan no desvia for di loke ta husto, puro y birtuoso. Algo cu ta digno di alabansa ta un cos cu ta merece elogio. Si bo tende un bon discurso of ta nota un fiel ehempel den congregacion, papia tocante dje, tanto cu e persona conserni como cu otro hende. Apostel Pablo cu frecuencia a elogia e bon cualidadnan di su rumannan den fe. (Romanonan 16:12; Filipensenan 2:19-22; Filemon 4-7) Y claro cu e obranan di creacion di nos Creador ta realmente digno di alabansa. Den nan nos ta haya un abundancia di topico pa combersacion edificante.—Proverbionan 6:6-8; 20:12; 26:2.

Participa den Combersacion Edificante

15. Cua mandamento biblico ta obliga mayornan tene combersacionnan significativo cu nan yiunan?

15 Deuteronomio 6:6 i 7 ta bisa: “E palabranan aki, cu mi ta ordena bo awe, mester ta riba bo curason. Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” Ta bisto cu e mandamento aki ta exigi pa mayornan tene combersacionnan significativo y spiritual cu nan yiunan.

16, 17. Kico mayornan cristian por siña for di e ehempel di Yehova y Abraham?

16 Nos por imagina e combersacionnan largo cu Hesus lo mester tawatin cu su Tata celestial ora nan tawata papia tocante su asignacion riba tera. Hesus a bisa su disipelnan: “E Tata cu a manda mi a duna mi mandamento, kico pa bisa y kico pa papia.” (Huan 12:49; Deuteronomio 18:18) E patriarca Abraham tambe lo mester a pasa hopi tempo papiando cu su yiu Isaak tocante con Yehova a bendiciona nan y nan antepasadonan. E combersacionnan ei siguramente a yuda tanto Hesus como Isaak pa somete nan mes humildemente na e boluntad di Dios.—Genesis 22:7-9; Mateo 26:39.

17 Nos yiunan tambe tin mester di combersacion edificante. Mayornan tin cu traha tempo den nan programa druk pa papia cu nan yiunan. Si ta posibel, pakico no haci areglo pa  come hunto como famia por lo menos un biaha pa dia? Durante y despues di tal ora di come, boso tin chens pa tene combersacionnan edificante cu por resulta sumamente balioso pa e bienestar spiritual di e famia.

18. Conta un experencia cu ta mustra e beneficionan di bon comunicacion entre mayor y yiu.

18 Alejandro, un pionero di binti y pico aña, ta corda e dudanan cu e tawatin como hoben di 14 aña. El a conta: “Debi na e influencia di compañeronan di scol y docentenan, mi a cuminsa duda cu Dios ta existi of cu Bijbel ta autentico. Mi mayornan a tuma hopi tempo pa rasona cu mi cu pasenshi. E combersacionnan aki a yuda mi vence no solamente mi dudanan durante e periodo dificil aki, sino tambe a yuda mi tuma bon decision den mi bida.” Y kico di awor? Alejandro ta sigui conta: “Ainda mi ta biba na cas. Pero nos programa ta asina yen cu ta dificil pa ami cu mi tata papia privadamente. Pesei nos dos ta come hunto un biaha pa siman na su trabou. Di berdad mi ta aprecia e combersacionnan aki.”

19. Dicon nos tur tin mester di combersacionnan spiritual?

19 Nos no ta aprecia tambe e oportunidadnan cu nos tin pa disfruta di combersacion spiritual cu nos rumannan den fe? Nos ta haya e oportunidadnan aki na reunion, den sirbishi di veld y na reunionnan social y ora nos bai di biahe. Pablo a spera cu anhelo p’e por a papia cu e cristiannan na Roma. El a skirbi nan: “Mi ta anhela di mira boso, . . . pa mi por wordo curasha hunto cu boso, mientras cu mi ta serca boso, cada un di nos door di fe di e otro, tanto e fe di boso como e fe di mi.” (Romanonan 1:11, 12) Johannes, un anciano cristian, a remarca: “Combersacionnan spiritual cu rumannan cristian ta satisface un necesidad importante. Esei ta laga bo sinti bon y ta alivia e carganan di tur dia. Hopi bes mi ta pidi rumannan di edad avansa pa nan conta mi tocante nan bida y tocante loke a yuda nan keda fiel. Atrabes di añanan, mi a papia cu hopi di nan, y cada un a duna mi un poco sabiduria of iluminacion cu a enrikece mi bida.”

20. Kico nos por haci si nos topa un persona cu ta timido?

20 Kico si un persona ta parce indiferente ora bo ta purba papia di un tema spiritual? No entrega. Podise bo por haya un tempo mas oportuno despues. Salomon a bisa: “Un palabra papia na ora apropiado ta manera un apel di oro den montura di plata.” (Proverbionan 25:11) Mustra comprension na esnan cu ta timido. “Un plan den curason di un hende ta manera awa hundo, ma un hende di comprondemento ta saca esaki afo.” * (Proverbionan 20:5) Mas cu tur cos, nunca laga e actitud di otro hende stroba bo di papia tocante e cosnan cu ta conmove bo curason.

Combersacionnan Spiritual Ta Duna Recompensa

21, 22. Ki beneficionan nos ta saca door di participa den combersacionnan spiritual?

21 Pablo a conseha: “No laga ningun palabra dañino sali for di boso boca, sino solamente palabra cu ta bon pa edificacion, conforme e necesidad di e momento, pa esaki por duna gracia na esnan cu ta tende.” (Efesionan 4:29; Romanonan 10:10) Kisas nos mester haci esfuerso  pa dirigi combersacionnan den e direccion corecto, pero e recompensanan ta hopi. Combersacionnan spiritual ta yuda nos comparti nos fe cu otro hende y edifica nos hermandad.

22 Pues anto, laga nos uza e don di papia pa anima otronan y alaba Dios. E tipo di combersacionnan ei lo ta un fuente di satisfaccion pa nos y un animacion pa otro hende. Mas cu tur cos, nan lo haci Yehova su curason contento pasobra e ta presta atencion na nos combersacionnan y ta alegra ora nos ta uza nos lenga na e manera corecto. (Salmo 139:4; Proverbionan 27:11) Ora nos combersacionnan ta spiritual, nos por tin sigur cu Yehova lo no lubida nos. Referiendo na e hendenan cu ta sirbi Yehova den nos tempo, Bijbel ta declara: “E ora ei esnan cu a teme SEÑOR a papia cu otro, y SEÑOR a presta atencion y a tende esaki, y un buki di memoria a wordo skirbi su dilanti pa esnan cu ta teme SEÑOR y cu ta honra su nomber.” (Malakias 3:16; 4:5) Ta masha importante anto pa nos combersacionnan ta spiritualmente edificante!

[Nota]

Con Lo Bo Contesta?

• Kico nos combersacionnan ta revela tocante nos?

• Kico ta e cosnan edificante cu nos por papia tocante dje?

• Ki papel importante combersacion ta hunga den famia y den e congregacion cristian?

• Cua ta e beneficionan di combersacion edificante?

[Preguntanan di Estudio]

[Plachinan na pagina 12]

Combersacionnan edificante ta enfoca riba . . .

“tur loke ta berdadero”

“tur loke ta honorabel”

“tur loke ta di bon fama”

“algo digno di alabansa”

[Reconocemento]

Kaft di video, Stalin: U.S. Army photo; Kaft di buki Creador, Eagle Nebula: J. Hester and P. Scowen (AZ State Univ.), NASA

[Plachi na pagina 13]

Ora di come ta un bon oportunidad pa tene combersacionnan spiritual