Con pa Fortalece Bo Matrimonio

IMAGINA bo un cas tur decai. E ferf ta casca, dak ta daña, y asta e cura ta tur descuida. Ta bisto cu atrabes di añanan e cas aki a pasa door di algun tormenta pisa, y tambe el a wordo neglisha. Mester bash’e abou? No necesariamente. Si e fundeshi ta fuerte y e structura ta stabil, probablemente por drecha e cas bek.

E cas ei ta laga bo corda riba bo matrimonio? Atrabes di añanan tormenta pisa, na moda di papia, kisas a afecta boso relacion matrimonial. Podise tawatin un cierto grado di negligencia tambe di parti di un di boso of di boso tur dos. Talbes bo ta sinti manera Sandy. Despues di 15 aña casa, el a declara: “E unico cos cu nos tawatin en comun ta cu nos tawata casa cu otro. Y esei no tawata suficiente.”

Asta si bo matrimonio ta manera esun ei, bo no tin cu core conclui cu mester pone un fin na dje. Probablemente bo matrimonio por drecha. Pa gran parti esei ta depende di boso sentido di compromiso pa cu e matrimonio, es decir, con determina abo cu bo casa ta pa drecha y conserva boso matrimonio. E determinacion y deseo ei por yuda duna un matrimonio stabilidad durante tempo di prueba. Pero kico compromiso ta encera? Con Bijbel por yuda bo fortalece e determinacion y deseo aki?

Compromiso Ta Encera Obligacion

Compromiso ta referi na ora bo ta sinti cu bo tin e deber of ta emocionalmente obliga pa cumpli cu un promesa. Tin biaha nan ta aplica e palabra na algo impersonal, manera un acuerdo di negoshi. Por ehempel, un contratista por sintie obliga na cumpli cu e demandanan di un contract cu el a firma pa traha un cas. Kisas e mes no conoce e persona cu a dun’e trabou. Pero toch e ta sintie obliga na cumpli cu loke el a priminti den e contract.

Aunke matrimonio no ta djis manera un contract di negoshi, e compromiso pa cu matrimonio ta encera obligacion. Abo cu bo casa probablemente a priminti solemnemente dilanti Dios y hende cu boso lo keda hunto, pase loke pase. Hesus a declara: “Esun cu a crea hende for di principio ‘a traha nan homber y mohe’, y a bisa: ‘Pa e motibo aki un homber lo bandona su tata y mama y lo uni cu su esposa.’ ” Anto Hesus a agrega: “Loke Dios a uni, no laga ningun hende separa.” (Mateo 19:4-6) Pesei ora surgi problema, abo cu bo casa mester ta firmemente determina pa cumpli cu loke boso a priminti otro. * Un esposa a bisa: “Tawata te ora cu nos a stop di considera diborcio como un opcion, cu cos a cuminsa drecha.”

Sinembargo, e compromiso pa conserva un matrimonio no ta simplemente un sentido di deber of obligacion. Kico mas e ta encera?

Traha Como Team Ta Fortalece e Compromiso pa cu Matrimonio

Compromiso pa cu e matrimonio no ta nifica cu parehanan casa nunca lo no tin desacuerdo. Ora surgi un conflicto, nan mester tin e deseo sinsero pa soluciona e asunto no solamente pasobra priminti ta debe, sino tambe debi na e laso emocional cu nan tin cu otro. Hesus a bisa tocante esposo y esposa: “Nan no ta dos mas, sino un carni.”

Kico kiermen cu abo cu bo casa ta “un carni”? Apostel Pablo a skirbi cu ‘esposonan mester stima nan esposa manera nan mes curpa.’ (Efesionan 5:28, 29) Ser “un carni” ta nifica entre otro cu bo ta mes interesa y precupa pa e bienestar di bo casa cu bo ta pa bo propio bienestar. Hende casa tin cu cambia nan manera di pensa for di “di mi” pa “di nos”, y for di “ami” pa “nos.” Un consehero a skirbi: “Ambos casa mester stop di ta soltero den nan curason, y bira persona casa den nan curason.”

Abo y bo partner ta ‘casa den boso curason’? Ta posibel cu boso ta hunto pa hopi aña y toch ainda no ta “un carni” den e sentido ei. Si, esei por sosode, pero e buki Giving Time a Chance (Duna Tempo un Chens) ta bisa: “Matrimonio ta nifica comparti un bida; y mas tanto cos dos hende comparti, mas nan bida casa lo prospera.”

Algun pareha infelis ta keda hunto djis pa motibo di e muchanan of pa siguridad financiero. Otronan ta keda pasobra diborcio ta contra nan principionan moral of pasobra nan tin miedo di kico hende lo pensa si nan kibra cu otro. Aunke ta digno di elogio cu e matrimonionan aki ta dura, corda cu bo meta mester ta pa boso relacion ta uno den cua tin amor, no djis un relacion cu ta dura.

Obranan sin Egoismo Ta Promove e Compromiso pa cu Matrimonio

Bijbel a predeci cu durante “e ultimo dianan”, hende lo ta “stimado di nan mes.”  (2 Timoteo 3:1, 2) Y manera e profecia ei a predeci, ta parce cu awe hende ta adora principalmente nan mes. Den hopi matrimonio e parehanan ta considera cu ora bo ta duna di bo mes sin e garantia di haya mescos bek, esei ta un señal di debilidad. Sinembargo, den un matrimonio sano, ambos casa ta demostra un spirito di sacrificio propio. Con abo por haci esei?

En bes di keda pensa riba e pregunta: ‘Kico mi ta gana cu e relacion aki?’ puntra bo mes: ‘Kico ami personalmente ta haciendo pa fortalece mi matrimonio?’ Bijbel ta bisa cu cristiannan ‘no mester busca nan interes personal so, ma busca tambe interes di otronan.’ (Filipensenan 2:4) Segun cu bo ta medita riba e principio biblico aki, analisa loke bo a haci durante e ultimo siman aki. Cuanto biaha bo a haci un acto di bondad exclusivamente pa beneficia bo casa? Bo a scucha bo casa ora cu e kier a combersa, maske abo no tawatin masha gana e ora ei? Den cuanto actividad bo a participa cu ta interesa bo casa mas cu nan ta interesa abo?

Segun cu bo ta evalua e preguntanan ei, no precupa cu bo casa lo no tuma nota ni recompensa bo bon obranan. Un buki di referencia ta bisa: “Den mayoria relacion, comportacion positivo ta pone otro hende reacciona cu comportacion positivo. Pesei haci bo best pa stimula bo partner pa haci cos positivo door di abo mes haci mas cos positivo.” Obranan cu ta refleha sacrificio propio ta fortalece bo matrimonio pasobra nan ta demostra cu bo matrimonio ta importante pa bo y cu bo kier conserv’e.

Ta Importante pa Mira Matrimonio Como un Union Permanente

Pa Yehova Dios, fieldad ta balioso. Bijbel ta asta bisa: “[Yehova] ta fiel pa esun cu ta fiel.” (2 Samuel 22:26, Beibel na papiamentu koriente) Keda fiel na Dios ta encera keda fiel na e areglo di matrimonio cu el a institui.—Genesis 2:24.

Si abo cu bo casa ta fiel na otro, boso por disfruta di e dushi sintimento cu boso union ta permanente. Ora boso ta pensa riba e lunanan, añanan y decadanan cu tin boso dilanti, boso ta mira boso mes hunto ainda. Boso no ta ni pensa mes cu un dia boso lo no ta casa mas cu otro; y e punto di bista ei ta duna boso relacion un sintimento di siguridad. Un esposa a bisa: “Asta ora cu mi ta hopi rabia cu [mi casa] y masha molestia pa loke ta pasando cu nos, mi no ta precupa cu nos matrimonio lo caba. Mi ta precupa tocante con nos lo bai bek na e manera cu nos tawata cu otro prome. Ningun ora so mi no ta duda cu nos lo bira bon atrobe, simplemente na e momento ei mi no por mira con pa logr’e.”

Mira bo matrimonio como un union permanente ta un parti importante di bo compromiso cu bo casa. Pero lamentablemente esei ta loke ta haci falta den hopi matrimonio.  Den su rabia, un casa kisas ta bula bisa: “Mi ta bai laga bo!” of, “Mi ta bai busca un hende cu si ta aprecia mi!” Ta berdad cu hopi bes nan no ta men e palabranan ei literalmente. Pero toch Bijbel ta bisa cu lenga por ta “yen di veneno mortal.” (Santiago 3:8) Menasa y ultimatum ta mescos cu bisa: ‘Mi no ta mira nos matrimonio como algo permanente. Mi por bula afo un ora pa otro.’ E mensahe indirecto ei por ta destructivo pa un matrimonio.

Ora bo ta considera bo matrimonio como permanente, bo ta spera di keda cu bo casa den bon y malo. Esaki tin un beneficio adicional. Ta bira hopi mas facil pa abo y bo casa acepta otro su debilidad y eror y sigui soporta otro y pordona otro libremente. (Colosensenan 3:13) Un buki di instruccion ta bisa: “Den un bon matrimonio, tin luga pa boso tur dos faya y pa e matrimonio keda existi apesar di e fayonan.”

E dia cu bo a casa, bo a sera un compromiso, no cu e areglo di matrimonio, sino cu un persona bibo: bo casa. E echo aki mester tin un efecto profundo riba e manera cu bo ta pensa y actua como persona casa. Bo no ta di acuerdo cu bo mester keda cu bo casa no solamente pasobra bo ta kere firmemente den e santidad di matrimonio, sino tambe pasobra bo ta stima e persona cu bo a casa cu ne?

[Nota]

[Cuadro/Plachi na pagina 5]

Loke Bo Por Haci Awor

Con ta para cu bo compromiso pa cu bo matrimonio? Kisas bo ta mira cu e por mehora. Pa haci bo determinacion mas firme, purba lo siguiente:

● Examina bo mes. Puntra bo mes: ‘Di berdad mi ta sinti cu mi ta casa den mi curason, of ainda mi ta pensa y actua manera un hende soltero?’ Puntra bo casa con e ta haya cu bo ta den esei.

● Lesa e articulo aki hunto cu bo casa. Anto den un manera calmo, combersa tocante con boso por haci boso compromiso pa cu e matrimonio mas fuerte.

● Participa hunto cu bo casa den actividadnan cu ta fortalece boso determinacion. Algun ehempel: Wak potret di boso casamento y di otro susesonan memorabel. Haci cosnan cu boso tawata gusta haci durante boso enamoracion of na principio di boso matrimonio. Boso dos hunto studia articulonan basa riba Bijbel cu a sali den E Toren di Vigilancia y Spierta! tocante matrimonio.

[Cuadro/Plachi na pagina 6]

Ser Determina pa Conserva Bo Matrimonio Ta Encera . . .

● Obligacion “Cumpli cu loke bo ta priminti! Ta miho bo no priminti, cu priminti y keda sin cumpli.”—Eclesiastes 5:4, 5.

● Traha Como Team “Dos ta miho cu un . . . Pasobra si un di nan cai, esun lo lanta su compañero.”—Eclesiastes 4:9, 10.

● Sacrificio Propio “Ta mas bendiciona pa duna cu pa ricibi.”—Echonan 20:35.

● Consider’e Como Union Permanente ‘Amor ta soporta tur cos.’—1 Corintionan 13:4, 7.

[Plachinan na pagina 7]

Bo ta scucha bo casa ora cu e kier combersa?