Ora Cu Tur Promesa Lo Ta un Garantia

HISTORIA ta yen di promesa cu nunca a cumpli. Hopi bes nacionnan no a tene nan mes na e pactonan solem cu nan a sera pa evita agresion. Esaki a hiba nan pueblo na gueranan teribel. Napoleon a yega di remarca: “Gobiernonan ta tene nan mes na promesanan solamente ora nan haya nan forsa pa hacie, of ora ta cumbini nan.”

Kico di promesanan cu hende individual ta haci? Ta hopi decepcionante ora un hende no tene su mes na su promesa. Esaki ta asina specialmente si ta trata di un hende cu bo conoce y ta confia. Claro cu bo por haya hende cu sea no ta capas of no ta dispuesto pa cumpli cu nan promesanan.

Esta un diferencia grandi tin entre promesanan di hende y promesanan di Dios! Bo por confia e promesanan di Dios plenamente. Cualkier promesa cu Yehova Dios haci ta un garantia riba su mes. Nan lo cumpli sigur. Referiendo na Dios su palabra confiabel, Isaias 55:11 ta bisa: “Asina mi palabra cu ta sali for di mi boca lo ta; e lo no bolbe bashi serca mi, sin cumpli cu loke mi ta desea, y sin alcansa e proposito cu cual mi a mand’e.”

Pues anto, con nos mester mira e promesanan di Dios skirbi den Bijbel? Di berdad nos por confia den nan. Por ehempel, apostel Huan a skirbi: “Mira, e tabernakel di Dios ta meimei di hende, y e lo biba meimei di nan, y nan lo ta su pueblo, y Dios mes lo ta meimei di nan, y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.” (Revelacion 21:3, 4) Bo por gosa di e bendicionnan ei si bo actua na harmonia cu e palabranan di Hesus: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.”—Huan 17:3.