Pakico Nos Mester Haci Oracion sin Stop?

“Haci oracion sin stop; sea gradicido den tur cos.”—1 Tesalonicensenan 5:17, 18.

1, 2. Con Daniel a demostra cu el a aprecia e privilegio di por haci oracion, y ki efecto esaki tawatin riba su relacion cu Dios?

PROFETA Daniel tawatin e custumber di resa na Dios tres biaha pa dia. E tawata hinca rudia den su camber ariba dilanti di e bentananan cu tawata cara pa e stad di Herusalem, y haci su oracionnan. (1 Reinan 8:46-49; Daniel 6:10) Asta ora un decreto real a prohibi oracion na cualkier otro persona cu no ta Dario, e Rei Medo, Daniel no a duda ni un rato si e mester a sigui haci esei of no. Sea cu esei a pone su bida na peliger of no, e homber di oracion aki a sigui roga Yehova sin stop.

2 Kico Yehova a pensa di Daniel? Ora angel Gabriel a bin pa contesta un di Daniel su oracionnan, el a describi e profeta como “masha stima.” (Daniel 9:20-23) Den e profecia di Ezekiel, Yehova a referi na Daniel como un homber husto. (Ezekiel 14:14, 20) Atrabes di añanan, Daniel su oracionnan evidentemente a resulta den un relacion intimo cu su Dios, un echo cu asta Dario a reconoce.—Daniel 6:16.

3. Con oracion por yuda nos mantene integridad, manera e experencia di un misionero ta mustra?

3 Oracion regular tambe por yuda nos enfrenta pruebanan severo. Por ehempel, considera e caso di Harold King, un misionero na China cu a ser sentencia na cinco aña di encarselacion solitario. Ruman King a bisa relaciona cu su experencia: “Kisas mi tawata isola di mi prohimo, pero ningun hende no por a isola mi for di Dios. . . . Pesei, abiertamente den bista di ken cu por a pasa dilanti mi cel, mi tawata hinca rudia den mi cel tres biaha pa dia y resa na bos  halto, cordando riba Daniel, di ken Bijbel ta papia. . . . A parce mi cu na e ocasionnan ei e spirito di Dios tawata guia mi mente na e asuntonan di mas probechoso y calma mi. Oracion a duna mi hopi fortalesa spiritual y consuelo!”

4. Ki preguntanan relaciona cu oracion nos lo analisa den e articulo aki?

4 Bijbel ta declara: “Haci oracion sin stop; sea gradicido den tur cos.” (1 Tesalonicensenan 5:17, 18) En bista di e conseho aki, laga nos considera e siguiente preguntanan: Dicon nos mester presta atencion na nos oracionnan? Ki motibonan nos tin pa acerca Yehova constantemente? Y kico nos mester haci si nos ta sinti cu nos no ta digno di resa na Dios debi na nos fayonan?

Cultiva Amistad via Oracion

5. Ki amistad unico oracion ta yuda nos disfruta di dje?

5 Lo bo kier pa Yehova considera bo su amigo? El a papia di patriarca Abraham como su amigo. (Isaias 41:8; Santiago 2:23) Yehova kier pa nos desaroya e clase di relacion ei cu ne. Eigenlijk, e ta invita nos pa hala serca dje. (Santiago 4:8) E invitacion ei mester pone nos reflexiona riba e percuracion unico di oracion. Ta masha dificil pa nos haya un afspraak cu un funcionario importante di gobierno, ban corda bira su amigo! Sinembargo, e Creador di universo ta anima nos pa acerc’e libremente den oracion, ki ora cu nos kier of ki ora cu nos mester. (Salmo 37:5) Nos oracionnan sin stop lo yuda nos tin un amistad sera cu Yehova.

6. Con Hesus su ehempel ta siña nos cu ta necesario pa “haci oracion continuamente”?

6 Sinembargo, ta masha facil pa nos neglisha oracion! Djis trata cu e presionnan di tur dia por absorba nos atencion asina tanto, cu nos no ta haci un esfuerso pa papia cu Dios. Hesus a anima su disipelnan pa “haci oracion continuamente”, y e mes tambe a haci esei. (Mateo 26:41, NW) Aunke casi semper e tawata ocupa for di mainta te anochi, el a aparta tempo pa papia cu su Tata celestial. Tawatin biaha cu Hesus a lanta “mainta tempran, ora tawata scur ainda”, pa e por a haci oracion. (Marco 1:35) Na otro ocasionnan, el a bai na un luga solitario na fin di dia pa e por a papia cu Yehova. (Mateo 14:23) Hesus semper a traha tempo pa haci oracion, y nos tambe mester hacie.—1 Pedro 2:21.

7. Ki circunstancianan mester motiva nos pa papia cu nos Tata celestial diariamente?

 7 Tur dia ta surgi momentonan apropiado pa haci oracion priva, segun cu nos tin cu tuma decision, ta confronta problema y tentacion. (Efesionan 6:18) Ora nos ta busca e guia di Dios den tur aspecto di bida, nos amistad cu ne sigur lo crece. Ora dos amigo ta enfrenta problemanan hunto, esei no ta haci nan amistad mas fuerte? (Proverbionan 17:17) Asina tambe lo pasa cu nos ora nos ta depende riba Yehova y ta experencia su yudansa.—2 Cronicanan 14:11.

8. For di e ehempelnan di Nehemias, Hesus y Ana, kico nos ta siña tocante con largo nos oracionnan personal por ta?

8 Nos por ta hopi contento cu Dios no ta pone limite na con largo of cuanto biaha nos por papia cu ne den oracion! Nehemias a haci un oracion lihe y silencioso prome cu el a haci un peticion na e rei di Persia. (Nehemias 2:4, 5) Hesus tambe a haci un oracion cortico ora el a pidi Yehova dun’e poder pa resusita Lazaro. (Huan 11:41, 42) Di otro banda, Ana a “sigui haci oracion” dilanti di Yehova ora cu e tawata desahoga su curason na dje. (1 Samuel 1:12, 15, 16) Nos oracionnan personal por ta cortico of largo, segun e necesidad y e circunstancia.

9. Dicon nos oracionnan mester inclui alabansa y gradicimento pa tur loke Yehova ta haci pa nos?

9 Hopi di e oracionnan den Bijbel ta expresa aprecio sinsero pa Yehova su posicion supremo y su obranan maraviyoso. (Exodo 15:1-19; 1 Cronicanan 16:7-36; Salmo 145) Den un vision apostel Huan a mira e 24 ancianonan—e cantidad completo di cristiannan ungi den nan posicion celestial—ta alaba Yehova. Nan tawata bisa: “Digno bo ta, nos Señor y nos Dios, pa ricibi gloria y honor y poder; pasobra abo a crea tur cos, y pa motibo di bo boluntad nan tawata existi, y a wordo crea.” (Revelacion 4:10, 11) Nos tambe tin motibo pa alaba e Creador regularmente. Mayornan ta sinti nan hopi contento ora cu nan yiu gradici nan di curason pa algo cu nan a haci p’e. Reflexionando cu aprecio riba e bondadnan di Yehova y expresando nos gratitud sinsero pa nan, ta un bon manera pa mehora e calidad di nos oracionnan.

Pakico “Haci Oracion sin Stop”?

10. Ki papel oracion ta hunga den fortalece nos fe?

10 Oracion regular ta esencial pa nos fe. Despues di a conta un comparacion pa mustra cu nos “mester haci oracion tur ora bai y no desmaya”, Hesus a puntra: “Ora cu e Yiu di hende bini, lo e haya fe riba mundo?” (Lucas  18:1-8) Oracion significativo y di curason ta edifica fe. Ora cu patriarca Abraham tawata birando bieu sin cu el a produci un desendiente ainda, el a papia cu Dios tocante e asunto. Como contesta, na prome luga, Yehova a pidie hisa cara wak shelo y conta e streyanan, si e por a conta nan. Anto Dios a garantisa Abraham: “Asina bo desendientenan lo ta.” E resultado? Abraham “a kere [“pone fe”, NW] den SEÑOR, y el a conta esaki como husticia p’e.” (Genesis 15:5, 6) Si nos desahoga nos curason na Yehova den oracion, acepta su garantia for di Bijbel, y obedec’e, lo e fortalece nos fe.

11. Con oracion por yuda nos trata cu problema?

11 Tambe oracion por yuda nos maneha problema. Nos bida diario ta yen di carga y e circunstancianan cu nos ta confronta ta dificil pa soporta? Bijbel ta bisa nos: “Tira bo carga riba SEÑOR, y e lo sostene bo; nunca e lo no permiti pa e husto wordo movi.” (Salmo 55:22) Ora nos ta confronta decisionnan dificil, nos por imita e ehempel di Hesus. El a pasa henter un anochi haciendo oracion priva prome cu el a nombra su 12 apostelnan. (Lucas 6:12-16) Y durante e anochi prome cu el a muri, Hesus a haci oracion asina intenso cu “su sodo a bira manera gotanan di sanger cu tawata cai abou na suela.” (Lucas 22:44) E resultado? “El a wordo tendi pa motibo di su piedad.” (Hebreonan 5:7) Oracion cu fervor y sin stop lo yuda nos trata cu situacionnan yen di tension y pruebanan dificil.

12. Con e privilegio di oracion ta ilustra Yehova su interes personal den nos?

12 Un otro motibo pa hala mas serca Yehova mediante oracion ta cu e, na su turno, lo hala mas serca nos. (Santiago 4:8) Ora nos ta desahoga nos curason na Yehova den oracion, nos no ta sinti cu e ta interesa den nos necesidadnan y tiernamente ta percura pa nos? Nos ta experencia Dios su amor den un manera masha personal. Yehova no a duna ningun otro persona e responsabilidad di scucha delaster un oracion cu su sirbidonan ta dirigi na dje como nan Tata celestial. (Salmo 66:19, 20; Lucas 11:2) Y e ta invita nos pa ‘tira tur nos precupacionnan riba dje, pasobra e ta percura pa nos.’—1 Pedro 5:6, 7.

13, 14. Ki motibonan nos tin pa haci oracion sin stop?

13 Oracion por duna nos mas celo pa e sirbishi publico y fortalece nos ora cu indiferencia  of oposicion den sirbishi lo por duna nos gana di stop. (Echonan 4:23-31) Tambe oracion por proteha nos contra “e trampanan di Diabel.” (Efesionan 6:11, 17, 18) Ora nos ta lucha pa trata cu pruebanan diario, nos por pidi Dios constantemente pa fortalece nos. Hesus su oracion modelo ta inclui e peticion pa Yehova “libra nos for di e malbado”, Satanas e Diabel.—Mateo 6:13.

14 Si nos sigui pidi yudansa den oracion pa controla nos inclinacionnan pecaminoso, nos lo mira con Yehova ta duna nos un man. Nos tin e garantia aki: “Dios ta fiel, kende lo no permiti pa boso wordo tenta mas cu boso por soporta, ma hunto cu e tentacion e lo provee salida tambe, pa boso por soporta.” (1 Corintionan 10:13) Apostel Pablo mes a experencia Yehova su cuido cu a fortalec’e den tur tipo di circunstancia. El a bisa: “Pa tur cos mi tin e forsa den birtud di esun cu ta duna mi poder.”—Filipensenan 4:13, NW; 2 Corintionan 11:23-29.

Persevera den Oracion Apesar di Nos Fayonan

15. Kico por pasa ora cu nos conducta no ta na harmonia cu e normanan di Dios?

15 Pa Yehova scucha nos oracionnan cu aprobacion, nos no mester rechasa e conseho di su Palabra. Apostel Huan a skirbi: “Kico cu nos pidi nos ta ricibi for di dje, pasobra nos ta warda su mandamentonan y ta haci e cosnan cu ta agradabel den su bista.” (1 Huan 3:22) Pero kico lo por pasa si nos conducta no ta na harmonia cu e normanan di Dios? Adam cu Eva a sconde nan mes despues di nan pica den e hofi di Eden. Nos tambe kisas ta sinti nos mes inclina na sconde “pa e presencia di SEÑOR” y stop di haci oracion. (Genesis 3:8) Klaus, un superintendente biahero cu experencia, a remarca: “Mi a ripara cu casi semper e prome eror cu esnan cu ta aparta for di e caminda di Yehova y di su organisacion ta comete, ta cu nan ta stop di haci oracion.” (Hebreonan 2:1) Esaki tawata e caso cu José Ángel. El a bisa: “Pa casi ocho aña, apenas mi tawata haci oracion na Yehova. Mi tawata sinti cu mi no ta digno di papia cu ne, aunke ainda mi a consider’e mi Tata celestial.”

16, 17. Duna algun ehempel pa mustra con oracion regular por yuda nos vence debilidad spiritual.

16 Algun di nos kisas ta sinti cu nos no ta digno di haci oracion debi na debilidad spiritual of debi cu nos a comete malecho. Pero ta net e ora ei nos tin cu saca pleno probecho di e percuracion di oracion. Yonas a hui for di su asignacion. Pero ‘den su angustia, Yonas a sclama na Yehova, y El a contest’e. For di e profundidad di Seol, Yonas a sclama pa yudansa, y Yehova a tende su bos.’ (Yonas 2:2) Yonas a haci oracion, Yehova a contesta su oracion, y Yonas a recupera spiritualmente.

17 José Ángel tambe cu fervor a pidi yudansa den oracion. El a bisa: “Mi a desahoga mi curason y a roga Dios pa pordon. Y el a yuda mi. Mi no ta kere cu lo mi a bolbe na e berdad sin yudansa di oracion. Awor mi ta haci oracion cu regularidad tur dia, y mi ta anhela e momentonan ei.” Semper nos mester sinti nos mes liber pa papia cu Dios abiertamente tocante nos erornan y humildemente pidie pordon. Ora Rei David a confesa su transgresionnan, Yehova a pordona su picanan. (Salmo 32:3-5) Yehova kier yuda nos, no condena  nos. (1 Huan 3:19, 20) Y e oracionnan di e ancianonan di congregacion por yuda nos spiritualmente, pasobra nan oracionnan “por logra hopi.”—Santiago 5:13-16.

18. Ki confiansa sirbidonan di Dios por tin sin importa con leu nan por a dual?

18 Ta cua tata lo rechasa un yiu cu humildemente ta acudi na dje pa haya yudansa y conseho despues di a comete un eror? E comparacion di e yiu perdi ta mustra cu sin importa con leu nos por a dual, nos Tata celestial ta alegra ora nos bolbe bek na dje. (Lucas 15:21, 22, 32) Yehova ta urgi tur esnan cu a dual pa yam’e, “pasobra e lo pordona abundantemente.” (Isaias 55:6, 7) Aunke David a comete varios pica grave, el a sclama na Yehova, bisando: “Scucha mi oracion, o Dios, y no sconde bo mes pa mi suplica.” Tambe e di: “Atardi, mainta y merdia lo mi keha y grita yora, y [Yehova] lo tende mi bos.” (Salmo 55:1, 17) Esaki ta hopi alentador!

19. Dicon nos no mester conclui cu oracionnan cu aparentemente Dios no contesta ta un prueba cu e ta malcontento cu nos?

19 Kico si nos no haya un reaccion mesora riba nos peticion? Anto nos tin cu haci sigur cu nos peticion ta na harmonia cu e boluntad di Yehova y cu el a ser pidi den nomber di Hesus. (Huan 16:23; 1 Huan 5:14) Disipel Santiago a referi na algun cristian kende nan oracionnan no a haya contesta pasobra nan tawata “pidi cu motibo robes.” (Santiago 4:3) Di otro banda, nos no mester ta mucho lihe pa conclui semper cu oracionnan cu aparentemente Dios no a contesta ta un prueba cu e ta malcontento cu nos. Tin biaha Yehova ta permiti adoradonan fiel sigui resa tocante un asunto pa un tempo prome cu ta bisto kico ta su contesta. Hesus a bisa: “Sigui pidi, y lo duna na boso.” (Mateo 7:7, NW) Pues, nos tin cu “persevera den oracion.”—Romanonan 12:12, NW.

Haci Oracion Regularmente

20, 21. (a) Dicon nos tin cu haci oracion sin stop den e “ultimo dianan” aki? (b) Kico nos lo ricibi ora diariamente nos ta acerca Yehova su trono di gracia?

20 Presionnan y problemanan ta sigui multiplica den e “ultimo dianan” aki marca pa “temponan trabahoso.” (2 Timoteo 3:1) Y pruebanan facilmente por ocupa nos mente. Sinembargo haciendo oracion sin stop lo yuda nos mantene nos bida riba un rumbo spiritual apesar di problema, tentacion y desanimacion persistente. Nos oracionnan diario na Yehova por percura e sosten tan vital cu nos mester.

21 Yehova, Esun “cu ta scucha oracion”, nunca no ta mucho druk pa scucha nos. (Salmo 65:2) Laga nos nunca ta mucho druk pa papia cu ne. Nos amistad cu Dios ta e pocesion mas precioso cu nos tin. Laga nos nunca consider’e como di menos importancia. “Pesei, laga nos acerca e trono di gracia cu confiansa, pa nos ricibi misericordia y haya gracia pa yuda den tempo di necesidad.”—Hebreonan 4:16.

Con Lo Bo Contesta?

• Kico nos ta siña for di profeta Daniel tocante e balor di oracion?

• Con nos por fortalece nos amistad cu Yehova?

• Pakico nos mester haci oracion sin stop?

• Dicon nos no mester laga e sintimento di cu nos no ta digno stroba nos di resa na Yehova?

[Preguntanan di Estudio]

[Plachi na pagina 16]

Nehemias a haci un oracion cortico y silencioso prome cu el a papia cu e rei

[Plachi na pagina 17]

Ana “a sigui haci oracion” dilanti di Yehova

[Plachinan na pagina 18]

Hesus a haci oracion henter anochi prome cu el a nombra su 12 apostelnan

[Plachi na pagina 20]

Henter dia ta surgi oportunidadnan pa haci oracion