Pregunta di Lector

Kico kiermen cu un persona tin “bida den su mes”?

Bijbel ta bisa di Hesucristo cu e tin “bida den su mes” y di su siguidonan cu nan ‘tin bida den nan.’ (Huan 5:26; 6:53) Sinembargo, e dos textonan biblico aki no tin e mesun nificacion.

Hesus a declara: “Mescos cu e Tata tin bida den su mes, asina el a duna e Yiu tambe pa tin bida den su mes.” Prome cu Hesus a haci e declaracion remarcabel aki, el a bisa: “Di berdad, di berdad, mi ta bisa boso, esun cu tende mi palabra y kere esun cu a manda mi, tin bida eterno . . . E ora lo yega y ta awor, cu e mortonan lo tende e bos di e Yiu di Dios, y esnan cu tende lo biba.” Aki Hesus tawata referi na un poder extraordinario cu e Tata a dun’e: e capasidad di duna hende un posicion aproba dilanti di Dios. Ademas, Hesus tin poder pa resusita esnan cu ta drumi den morto y duna nan bida. Den caso di Hesus, e echo cu e tin “bida den su mes” ta nifica cu el a ricibi e podernan aki. Mescos cu e Tata, e Yiu tambe tin ‘den su mes e don di bida’, cu ta un otro manera cu por traduci e palabranan aki. (Huan 5:24-26) Kico di su siguidonan?

Rond di un aña despues, Hesus a bisa su oyentenan lo siguiente: “Di berdad, di berdad, mi ta bisa boso, si boso no come e carni di e Yiu di hende y bebe su sanger, boso no tin bida den boso. Esun cu come mi carni y bebe mi sanger tin bida eterno, y lo mi lant’e den e ultimo dia.” (Huan 6:53, 54) Aki Hesus a mustra cu e expresion “tin bida den boso”, ta igual cu haya “bida eterno.” Den otro partinan di e Scritura Griego nos ta haya mas expresion cu tin e mesun construccion gramatical cu esun di “bida den boso.” Dos ehempel ta: “Percura pa tin salu den boso mes” y “ricibi den nan mes persona e castigo mereci.” (Marco 9:50; Romanonan 1:27) Den e casonan aki, e frase no kiermen e poder pa duna salu of duna castigo mereci na otro hende. Mas bien, e ta referi na e echo cu e persona ta completo di paden. Pues e expresion “bida den boso mes” uza na Huan  6:53 simplemente ta nifica haya bida den su forma completo.

Ora Hesus a referi na e echo cu su siguidonan tin bida den nan mes, el a menciona su carni y su sanger. Despues, ora el a institui e Cena di Señor, Hesus a bolbe papia tocante su carni y su sanger y a manda su siguidonan cu lo ta den e pacto nobo pa nan tuma di e emblemanan, esta, e pan sin zuurdeeg y biña. Pero esaki kiermen cu ta solamente cristiannan ungi, cu ta den e pacto nobo cu Yehova Dios, ta haya bida den su forma completo? No. E dos susesonan menciona aki a tuma luga un aña despues di otro. Esnan cu a tende e palabranan di Hesus cu ta skirbi na Huan 6:53 y 54 no tawata sa di un celebracion anual cu emblemanan cu a representa e carni y sanger di Cristo.

Segun Huan capitulo 6, na prome instante Hesus a compara su carni cu mana, bisando: “Boso tatanan a come mana den desierto y nan a muri. Esaki ta e pan cu ta baha for di shelo, pa un hende por come di dje y no muri. Ami ta e pan bibo cu a baha for di shelo; si un hende come di e pan aki, e lo biba pa semper.” Hesus su carni, hunto cu su sanger, tawata mas grandi cu e mana literal. Den ki sentido? Den e sentido cu su carni a ser duna pa “bida di e mundo”, y asina a haci bida eterno posibel. * Pesei, e declaracion tocante tin “bida den boso” na Huan 6:53 ta aplica na tur hende cu ta haya bida eterno, sea den shelo of riba tera.—Huan 6:48-51.

Na ki tempo e siguidonan di Cristo ta haya bida den nan mes, es decir, ta haya e plenitud di bida? Pa e herederonan ungi di Reino, esaki ta sosode ora nan resusita pa bida celestial como criaturanan spiritual inmortal. (1 Corintionan 15:52, 53; 1 Huan 3:2) Hesus su “otro carnenan” ta haya e plenitud di bida despues cu Hesus su Reino di Mil Aña termina. Pa e tempo ei, nan lo a wordo poni na prueba, haya fiel y declara husto pa bida eterno den Paradijs riba tera.—Huan 10:16; Revelacion 20:5, 7-10.

[Nota]

[Plachinan na pagina 31]

Tur cristian berdadero por tin ‘bida den nan mes’