Intervencion di Dios—Kico Nos Por Spera?

DEN siglo 8 prome cu nos era, tempo cu Rei Ezekias di Huda tawatin 39 aña di edad, el a haya sa cu e tawatin un malesa fatal. Esei a laga Ezekias hopi kibra, pesei el a roga Dios den oracion pa cur’e. Dios a contest’e mediante su profeta: “Mi a tende bo oracion, mi a mira bo lagrimanan; mira, lo mi añadi diessinco aña mas na bo bida.”—Isaias 38:1-5.

Dicon Dios a interveni na e ocasion particular ei? Siglonan mas prome, Dios a priminti husto Rei David: “Bo cas y bo reino lo permanece mi dilanti pa semper; bo trono lo ta estableci pa semper.” Tambe Dios a revela cu e Mesias lo a bin di e liña di David. (2 Samuel 7:16; Salmo 89:20, 26-29; Isaias 11:1) Tempo cu Ezekias  a bira malo, ainda e no tawatin yiu homber, y door di esei e liña real di David lo por a caba einan. Pues e proposito spesifico pakico Dios a interveni den e caso di Ezekias tawata pa conserva e liña di desendencia cu a hiba na e Mesias.

Pa cumpli cu su promesanan, Yehova a hay’e ta interveni na varios ocasion na fabor di su pueblo durante e era precristian. En conexion cu e liberacion di Israel for di sclabitud na Egipto, Moises a declara: “Pasobra SEÑOR tawata stima boso y a warda e huramento cu el a hura na boso tatanan, pesei SEÑOR a saca boso pa medio di un man poderoso.”—Deuteronomio 7:8.

Den e prome siglo tambe Dios a interveni den asuntonan humano pa garantisa cu su proposito ta cumpli. Por ehempel, riba caminda pa Damasco, un Hudiu cu yama Saulo a ricibi un vision milagroso pa stop e di persigui e disipelnan di Cristo. E combertimento di e homber aki, kende a bira apostel Pablo, a hunga un papel vital den e plamamento di e bon nobo entre e nacionnan.—Echonan 9:1-16; Romanonan 11:13.

Ta Semper Dios A Interveni?

Ta semper Dios a interveni of ta na cierto ocasion so el a haci esei? E Scritura ta mustra claramente cu esaki sigur no tawata e norma. Aunke Dios a libra e tres hobennan Hebreo for di un morto sigur den un forno cayente y profeta Daniel for di e cueba di leon, e no a interveni pa scapa otro profetanan for di morto. (2 Cronicanan 24:20, 21; Daniel  3:21-27; 6:16-22; Hebreonan 11:37) Pedro a scapa milagrosamente for di e prizon caminda Herodes Agripa I a laga ser’e. Toch, e mesun rei aki a laga mata apostel Santiago, y Dios no a interveni pa preveni e crimen aki. (Echonan 12:1-11) Aunke Dios a duna e apostelnan poder pa cura hende enfermo y asta lanta morto, e no a consenti pa elimina e “sumpiña den carni”—talbes un problema fisico—cu a tormenta apostel Pablo.—2 Corintionan 12:7-9; Echonan 9:32-41; 1 Corintionan 12:28.

Dios no a interveni pa evita un ola di persecucion cu e Emperado Romano Nero a instiga contra e disipelnan di Cristo. E cristiannan a wordo tortura, kima bibo y benta pa bestia salbahe. Sinembargo, e oposicion aki no a sorprende e prome cristiannan, y sigur e no a pone nan duda cu tin un Dios. Al fin y al cabo, Hesus a spierta su disipelnan cu nan lo wordo hiba dilanti corte y cu nan lo mester ta dispuesto pa sufri y asta muri pa nan fe.—Mateo 10:17-22.

Mescos cu Dios a haci den pasado, awe tambe sigur e por libra su sirbidonan for di situacionnan peligroso, y nos no mester critica esnan cu ta sinti cu nan a ricibi su proteccion. Sinembargo, ta dificil pa bisa cu Dios a interveni of laga di interveni den e casonan ei. Varios fiel sirbido di Yehova a sufri herida debi na un explosion na Toulouse, y miles di cristian fiel a muri den campamentonan Nazi y comunista of bou di otro circunstancianan tragico sin cu Dios a haci nada pa evita eseinan. Pakico Dios no ta interveni sistematicamente na fabor di tur esnan cu tin su aprobacion?—Daniel 3:17, 18.

“Tempo y Suseso Imprevisto”

Tur hende por ta victima di un catastrofe, y esei no necesariamente tin di aber cu fieldad na Dios. E explosion na Toulouse, for di cua Alain y Liliane a sali ileso, a causa morto di 30 hende y centenares di herido, aunke no tawata nan falta. Riba escala mayor, dies di miles di hende ta bira victima di crimen, coremento di auto descabeya of guera, y nos no por culpa Dios pa e calamidadnan ei. Bijbel ta recorda nos cu “tempo y suseso imprevisto ta cai riba” tur hende.—Eclesiastes 9:11, NW.

Es mas, hende ta someti na enfermedad, biehes y morto. Asta algun persona cu a pensa cu ta Dios a salba nan bida milagrosamente, of cu ta e boluntad di Dios cu nan a recupera inesperadamente di nan enfermedad, a bin muri toch despues. E tempo pa Dios elimina enfermedad y morto y “seca tur lagrima” mester bin ainda.—Revelacion 21:1-4.

Pa esei por tuma luga, algo mucho mas extenso y radical cu un intervencion incidental ta necesario. Bijbel ta papia di un suseso cu e ta yama “e gran dia di SEÑOR.” (Sofonias 1:14) Durante e intervencion na escala mayor aki, Dios lo elimina tur maldad. Humanidad lo haya e oportunidad di biba pa semper den condicionnan perfecto, den cua “e cosnan di antes lo no wordo recorda mas ni bini na memoria.” (Isaias 65:17) Asta e mortonan lo wordo resusita, y esaki lo elimina e efectonan di loke sin duda ta e mayor tragedia humano. (Huan 5:28, 29) Pa e tempo ei, den su gran bondad y amor sin limite, Dios lo a soluciona e problemanan di humanidad di unabes pa semper.

Con Dios Ta Interveni Awe

Sinembargo, esaki no ta nifica cu mientrastanto Dios ta simplemente wak su creacion sufri sin haci nada. Awe, Dios ta extendiendo na tur hende, sin importa nan  antecedencia etnico of social, e oportunidad pa conoc’e y pa desaroya un relacion personal cu ne. (1 Timoteo 2:3, 4) Hesus a describi e proceso aki den e siguiente palabranan: “Ni un hende no por bin serca mi, si no ta e Tata cu a manda mi a hal’e.” (Huan 6:44) Dios ta atrae hende di curason honrado na dje pa medio di e mensahe di Reino cu su sirbidonan ta proclama rond mundo.

Ademas, Dios tin influencia direct riba e bida di hende cu ta somete nan mes boluntariamente na su guia. Pa medio di su spirito santo, Dios ta ‘habri nan curason’ pa compronde su boluntad y pa pone na practica loke e ta rekeri. (Echonan 16:14) Si, door di duna nos e oportunidad di conoc’e, di siña su Palabra y sa kico ta su propositonan, Dios ta duna prueba di su interes amoroso den cada un di nos.—Huan 17:3.

Finalmente, Dios ta yuda su sirbidonan awe, no door di libra nan milagrosamente, sino door di duna nan su spirito santo y “e poder mas aya di loke ta normal” pa enfrenta cualkier situacion cu nan haya nan mes aden. (2 Corintionan 4:7, NW) Apostel Pablo a skirbi: “Pa tur cos mi tin e forsa den birtud di esun [Yehova Dios] cu ta duna mi poder.”—Filipensenan 4:13, NW.

Pues nos tin tur motibo pa gradici Dios tur dia pa e bida y pa e speransa cu el a duna nos di biba pa semper den un mundo liber di tur sufrimento. “Kico lo mi duna SEÑOR pa tur su beneficionan na mi?” e salmista a puntra. “Lo mi hisa e copa di salbacion, y invoca e nomber di SEÑOR.” (Salmo 116:12, 13) Door di lesa e revista aki regularmente, lo bo por compronde kico Dios a haci, kico e ta haciendo y kico lo e haci pronto cu lo por duna bo felicidad awor y un speransa solido pa futuro.—1 Timoteo 4:8.

[Comentario na pagina 6]

“E cosnan di antes lo no wordo recorda mas ni bini na memoria.”—Isaias 65:17

[Plachinan na pagina 5]

Den tempo di Bijbel, Yehova no a preveni e piedramento di Zacarias . . .

ni e masacre di mucha inocente na man di Herodes

[Plachi na pagina 7]

Fin di sufrimento ta hopi serca; asta e mortonan lo biba atrobe