Perseverancia bou di Prueba Ta Trece Alabansa pa Yehova

“Si ora boso haci loke ta corecto y cu pasenshi boso sufri pa e motibo ei, esaki ta haya aprobacion serca Dios.”—1 PEDRO 2:20.

1. Ya cu cristiannan berdadero ta ansioso pa cumpli cu nan dedicacion, ki pregunta nos mester contesta?

CRISTIANNAN ta dedica na Yehova y kier haci su boluntad. Pa cumpli cu nan dedicacion, nan ta haci nan maximo esfuerso pa duna testimonio di e berdad y pa sigui den e pasonan di Hesucristo, Esun cu a pone ehempel pa nan. (Mateo 16:24; Huan 18:37; 1 Pedro 2:21) Sinembargo, Hesus y otro sirbidonan fiel a sacrifica nan bida y a muri como martir pa nan fe. Esaki ta nifica cu tur cristian lo por haya nan ta muri pa nan fe?

2. Con cristiannan ta mira prueba y sufrimento?

² Como cristiannan, Bijbel ta urgi nos pa keda fiel te na morto, y no necesariamente nos tin cu muri pa nos fe. (2 Timoteo 4:7; Revelacion 2:10) Esaki ta nifica cu aunke nos ta dispuesto pa sufri—y, si ta necesario, muri mes—pa nos fe, nos no ta desea si pa yega asina leu. Nos no tin goso den sufrimento ni nos no tin ningun placer den dolor of humiliacion. Pero ya cu nos por haya nos cu prueba y persecucion, nos tin cu wak bon con nos ta reacciona ora eseinan bin riba nos.

Fiel bou di Prueba

3. Ki ehempel di personahenan biblico cu a enfrenta persecucion bo por menciona? (Mira e cuadro “Loke Nan A Haci Ora Nan A Ser Persigui”, riba e siguiente pagina.)

³ Den Bijbel, nos ta haya varios relato cu ta mustra con sirbidonan di Dios den pasado a reacciona ora nan a haya nan den situacionnan cu a pone nan bida na peliger. E diferente maneranan den cua nan a reacciona ta sirbi como guia pa cristiannan awe si un dia nan haya nan cu problemanan similar. Analisa e relatonan den e cuadro “Loke Nan A Haci Ora Nan A Ser Persigui”, y mira kico bo por siña di nan.

4. Kico nos por bisa di e manera cu Hesus y otro fiel sirbido a reacciona ora nan tawata bou di prueba?

⁴ Aunke Hesus y otro fiel sirbido di Dios a reacciona cada un na nan manera ora nan a ser persigui, dependiendo di e circunstancianan, sigur nan no a pone nan bida innecesariamente na peliger. Ora nan a haya nan mes den situacionnan peligroso, nan a mustra curashi pero a anda cu cautela. (Mateo 10:16, 23) Nan obhetivo tawata pa sigui cu e trabou di predica y mantene nan integridad na Yehova. Nan reaccion den varios situacion ta sirbi como ehempel pa e cristiannan cu awe ta enfrenta prueba y persecucion.

5. Ki persecucion a lanta na Malawi den añanan ’60 di siglo pasa, y con e Testigonan a reacciona?

⁵ Den e tempo actual, hopi bes sirbidonan di Yehova a haya nan mes den bastante dificultad y a perde tur nan pertenencianan pa motibo di guera, prohibicion riba nos obra y persecucion abierto. Por ehempel den añanan ’60 di siglo pasa, Testigonan di Yehova na Malawi a ser persigui cruelmente. Practicamente tur loke nan tawatin—Salon di Reino, cas, suministro di cuminda y negoshi—a ser destrui. Nan a ser maltrata y traumatisa den varios manera. Con e rumannan a reacciona? Miles tawatin cu hui di nan pueblitonan. Hopi a bai sconde den mondi, mientras otronan a bai den exilio temporalmente den e pais biciña Mozambique. Aunke hopi ruman fiel a perde nan bida, otronan a scohe pa hui for di e zona di peliger, loke aparentemente  tawata un decision rasonabel bou di e circunstancianan ei. Den esei e rumannan a sigui e ehempel di Hesus y Pablo.

6. Apesar di e persecucion cruel contra e Testigonan di Malawi, kico nan no a keda sin haci?

⁶ Apesar cu e rumannan di Malawi tawatin cu bandona nan luga of hui bai sconde, nan a busca y sigui direccion teocratico y a haci tur loke tawata na nan alcanse pa dal bai cu nan actividadnan cristian clandestinamente. Cu ki resultado? Un poco prome cu e prohibicion na 1967, nan a alcansa un maximo di 18.519 publicado di Reino. Aunke e prohibicion tawata na vigor ainda y hopi ruman a hui bai Mozambique, na 1972 tawatin un maximo nobo di 23.398 publicado. Nan a traha un promedio di mas cu 16 ora pa luna den e ministerio. Indudablemente nan accionnan a trece alabansa pa Yehova, y e bendicion di Yehova tawata riba e rumannan fiel aki atrabes di e tempo sumamente dificil ei. *

7, 8. Pa ki motibo algun ruman ta prefera di no hui, aunke oposicion ta causando problema?

 ⁷ Di otro banda, den paisnan caminda oposicion ta causando problema, algun ruman por dicidi pa no bandona nan luga, aunke nan ta den e posicion pa haci esei. Kisas nan ta resolve cierto problema door di muda bai, pero esei probablemente lo crea otro problemanan. Por ehempel, nan lo por keda den contacto cu e hermandad cristian y no haya nan isola spiritualmente? Nan lo por sigui cu nan rutina spiritual segun cu nan ta lucha pa establece nan mes otro caminda, talbes den un pais mas rico of den uno cu ta duna mas oportunidad pa bai dilanti den sentido material?—1 Timoteo 6:9.

⁸ Otronan ta opta pa no muda bai pasobra nan ta precupa pa e bienestar spiritual di nan rumannan. Nan ta prefera di keda y enfrenta e situacion pa por sigui predica den nan teritorio local y pa nan ta un fuente di estimulo pa nan compañeronan di fe. (Filipensenan 1:14) Door di haci un escohencia asina, algun por a contribui na victorianan legal den nan pais. *

9. Ki factornan un persona mester tene cuenta cu ne ora e ta dicidi si e ta keda of muda pa motibo di persecucion?

⁹ Ta keda na cada ken pa dicidi si e ta keda of muda. Claro cu ta despues cu nos busca Yehova su guia den oracion, nos tin cu tuma un decision asina. Pero sea cual sea nos decision, nos tin cu corda loke apostel Pablo a bisa: “Cada un di nos lo duna cuenta di su mes na Dios.” (Romanonan 14:12) Manera nos a mira anteriormente, loke Yehova ta rekeri si di cada un di su sirbidonan ta pa nan keda fiel bou di tur circunstancia. Algun di su sirbidonan ta enfrentando prueba y persecucion actualmente; kisas otronan ta pasa den esakinan mas despues. Nos tur lo wordo getest den un manera of otro; ningun di nos no mester pensa cu nos ta un excepcion. (Huan 15:19, 20) Como sirbidonan dedica  di Yehova, nos no por evita e cuestion universal cu tin di aber cu e santificacion di e nomber di Yehova y e vindicacion di su derecho di goberna.—Ezekiel 38:23; Mateo 6:9, 10.

“Nunca Paga Malo cu Malo na Ningun Hende”

10. Kico nos por siña for di e manera cu Hesus y e apostelnan a reacciona ora nan a haya nan cu presion y oposicion?

¹⁰ Un otro principio importante cu nos por siña for di e manera cu Hesus y e apostelnan a reacciona bou di presion ta pa nunca venga esnan cu ta persigui nos. Bijbel no ta duna ningun indicacion cu Hesus ni su siguidonan a organisa nan mes den un tipo di movemento di resistencia ni cu nan a recori na violencia pa lucha contra nan persiguidonan. Al contrario, apostel Pablo a conseha cristiannan pa “nunca paga malo cu malo na ningun hende.” “No venga boso mes, stimanan, ma laga luga pa e furia di Dios, pasobra ta para skirbi: ‘Ta di mi vengansa ta, ami lo paga bek’, Señor ta bisa.” Ademas, “no laga malo vence bo, ma mas bien vence malo cu bon.”—Romanonan 12:17-21; Salmo 37:1-4; Proverbionan 20:22.

11. Kico un historiado ta bisa tocante e actitud cu e prome cristiannan tawatin pa cu gobierno?

¹¹ E prome cristiannan a tuma e conseho ei masha na pecho. Den su buki The Early Church and the World (E Iglesia di Prome y e Mundo), historiado Cecil J. Cadoux ta describi e actitud cu e cristiannan ei tawatin pa cu gobierno durante e periodo di añanan 30 pa 70 di nos era. E ta skirbi: “Nos no tin ningun evidencia direct cu e cristiannan di e tempo aki a yega di haci esfuerso pa resisti e persecucion pa medio di violencia. Di mas leu cu nan ta yega ta di condena e gobernantenan fuertemente of confundi nan door di hui. Sinembargo, e manera cu generalmente e cristiannan a reacciona riba e persecucion tawata di nenga respetuosamente pero redondamente di obedece e ordonan di gobierno cu segun nan tawata na conflicto cu obediencia na Cristo.”

12. Pakico ta miho wanta sufrimento en bes di venga?

¹² Un actitud aparentemente pasivo asina ta realmente practico? E persona cu reacciona asina no ta bira un victima facil pa esnan cu ta determina pa caba cu ne? Lo no ta mas prudente pa bo defende bo mes? For di un punto di bista humano, esei por parce di ta e caso. Sinembargo, como sirbido di Yehova, nos tin e confiansa cu e proceder di mas sabi ta pa sigui e direccion di Yehova den tur asunto. Nos ta tene na mente e palabranan di Pedro: “Si ora boso haci loke ta corecto y cu pasenshi boso sufri pa e motibo ei, esaki ta haya aprobacion serca Dios.” (1 Pedro 2:20) Nos tin e confiansa cu Yehova ta bon conciente di e situacion y cu lo e no laga asuntonan sigui pa tempo indefini. Dicon nos por ta sigur di esei? Yehova a declara na su pueblo den cautiverio na Babilonia: “Esun cu mishi cu boso ta  mishi cu [mi] pret’i wowo.” (Zacarias 2:8) Pa cuanto tempo abo lo laga hende mishi cu bo pret’i wowo? Yehova lo percura alivio na e debido tempo. Di esei no por tin e minimo duda.—2 Tesalonicensenan 1:5-8.

13. Pakico Hesus, den un forma pasivo, a permiti su enemigonan arest’e?

¹³ Relaciona cu e punto aki nos por tuma Hesus como nos ehempel. Ora el a permiti su enemigonan arest’e den e hofi di Getsemani, no tawata pa motibo cu e no por a defende su mes. De echo, el a bisa un di su disipelnan: “Bo ta kere cu mi no por pidi mi Tata, y mesora e lo pone mas cu diesdos legion di angel na mi disposicion? Con anto e Scrituranan por wordo cumpli, cu ta bisa cu t’asina mester sosode?” (Mateo 26:53, 54) Loke tawata di primordial importancia pa Hesus tawata pa Yehova su boluntad cumpli, asta si esei a nifica cu e tawatin cu sufri. E tawatin pleno confiansa den e palabranan di e salmo profetico di David: “Lo bo no entrega mi alma na Seol, tampoco lo bo no permiti bo santo mira corupcion.” (Salmo 16:10) Añanan despues apostel Pablo a bisa di Hesus: “Pa motibo di e goso poni su dilanti, [el] a soporta e sufrimento di [“staca”, NW], sin haci caso di berguensa, y a sinta na man drechi di e trono di Dios.”—Hebreonan 12:2.

E Goso di Santifica e Nomber di Yehova

14. Kico tawata e goso cu a sostene Hesus pa e wanta tur su pruebanan?

¹⁴ Kico tawata e goso cu a sostene Hesus pa e wanta e prueba di mas severo cu nos por imagina? Di tur sirbido di Yehova, Hesus, e Yiu stima di Dios, tawata sigur e blanco mas importante di Satanas. Pues Hesus su integridad bou di prueba lo tawata e contesta decisivo pa e reproche di Satanas contra Yehova. (Proverbionan 27:11) Bo por imagina bo e goso y satisfaccion  cu Hesus lo mester a sinti ora el a ser resusita? Ki contento lo e mester tawata ora el a realisa cu el a cumpli cu e papel cu e mester a hunga como un homber perfecto den e vindicacion di Yehova su soberania y e santificacion di Su nomber! Ademas, e echo cu el a sinta “na man drechi di e trono di Dios” ta indudablemente un honor maraviyoso y e mayor fuente di goso pa Hesus.—Salmo 110:1, 2; 1 Timoteo 6:15, 16.

15, 16. Ki persecucion brutal e Testigonan na Sachsenhausen a soporta, y kico a duna nan e forsa pa haci esei?

¹⁵ Pa cristiannan tambe ta un goso cu nan por participa den e santificacion di e nomber di Yehova door di wanta prueba y persecucion, imitando Hesus. Un bon ehempel di esei tawata e experencia di e Testigonan cu a sufri den e notorio campo di consentracion Sachsenhausen y cu a sobrevivi e marcha di morto agotador na fin di Segundo Guera Mundial. Durante e marcha, miles di preso a muri di e teribel frialdad, enfermedad of hamber. Tambe tawatin esnan cu a ser ehecuta cruelmente cant’i caminda mes door di e soldanan S.S. Tur e 230 Testigonan a sobrevivi door di keda hunto y yuda otro aunke nan bida tawata na peliger.

¹⁶ Kico a duna e Testigonan e forsa pa soporta e persecucion brutal ei? Asina cu nan a yega nan destino sano y salvo, nan a expresa nan goso y gratitud na Yehova den un documento titula “E resolucion di 230 Testigo di Yehova procedente di seis nacionalidad, cu a bin hunto den un mondi banda di Schwerin na Mecklenburg.” Den dje nan a declara: “Nos ta laga atras un periodo largo y dificil di prueba y esnan cu a scapa, na moda di papia, ranca for di e forno cayente, no tin ni holo di candela riba nan. (Mira Daniel 3:27.) Al contrario, nan ta yen di forsa y poder cu nan a ricibi di Yehova y ta spera ansiosamente riba ordonan nobo di e Rei pa sigui promove interesnan Teocratico.” *

17. Ki tipo di prueba e pueblo di Dios ta enfrenta awe?

¹⁷ Mescos cu e 230 rumannan fiel ei, nos fe tambe por ser poni na prueba, aunke kisas nos “no a resisti ainda te na e punto di drama sanger.” (Hebreonan 12:4) Pero tin hopi diferente tipo di prueba. E por ta mofa di parti di compañero di klas, of e por ta presion di pareunan pa comete inmoralidad y otro malechonan. Ademas, e determinacion pa abstene di sanger, pa casa solamente den Señor, of pa lanta yiunan den fe den un cas dividi pa motibo di religion por resulta tin biaha den presion y prueba severo.—Echonan 15:29; 1 Corintionan 7:39; Efesionan 6:4; 1 Pedro 3:1, 2.

18. Ki siguransa nos tin cu nos por wanta asta e prueba di mas extraordinario?

¹⁸ Sinembargo, sea cual sea e prueba cu bin riba nos, nos sa cu nos ta sufri pasobra nos ta pone Yehova y su Reino na prome luga, y pa nos ta un berdadero privilegio y goso cu nos por haci esei. E siguiente palabranan trankilisante di Pedro ta duna nos curashi: “Si boso wordo reprocha pa e nomber di Cristo, boso ta bendiciona, pasobra e spirito di gloria y di Dios ta riba boso.” (1 Pedro 4:14) Den e poder di Yehova su spirito, nos tin e forsa pa wanta asta e pruebanan di mas dificil, y tur esaki ta trece gloria y alabansa p’e.—2 Corintionan 4:7; Efesionan 3:16; Filipensenan 4:13, NW.

[Nota]

Bo Por Splica?

• Con cristiannan ta mira sufrimento y persecucion?

• Kico nos por siña for di e manera cu Hesus y otro fiel sirbido di Yehova a reacciona ora nan tawata bou di prueba?

• Pakico no ta sabi pa tuma vengansa ora nos ta ser persigui?

• Ki goso a sostene Hesus atrabes di su pruebanan, y kico nos por siña for di esaki?

[Preguntanan di Estudio]

[Cuadro/Plachi na pagina 15]

Loke Nan A Haci Ora Nan A Ser Persigui

• Prome cu e soldanan di Herodes a yega Betlehem pa mata tur mucha homber bou di dos aña, Hose cu Maria a sigui instruccion di un angel y a hui bai Egipto cu e criatura Hesus.—Mateo 2:13-16.

• Varios bes durante e ministerio di Hesus, su enemigonan a busca moda di mat’e pa motibo di e testimonio poderoso cu e tawata duna. Na cada un di e ocasionnan ei Hesus a logra scapa di nan.—Mateo 21:45, 46; Lucas 4:28-30; Huan 8:57-59.

• Ora soldanan y oficialnan a bin na e hofi di Getsemani pa aresta Hesus, el a identifica su mes abiertamente, bisando nan dos biaha: “Ta ami t’e.” El a asta stroba su siguidonan di resisti contra su aresto y el a laga e multitud rabia bai cu ne.—Huan 18:3-12.

• Na Herusalem, nan a aresta Pedro y otro apostelnan, suta nan y ordena nan pa stop di papia tocante Hesus. Toch, ora a laga nan liber, “nan a bai . . . y tur dia, den tempel y di cas pa cas, nan tawata sigui siña hende y predica Hesus como e Cristo.”—Echonan 5:40-42.

• Ora Saulo, kende despues a bira apostel Pablo, a haya sa di e complot cu e Hudiunan na Damasco a traha pa mat’e, e rumannan a hinc’e den un macutu y anochi nan a bah’e door di un buraco den e muraya di e stad. Asina el a haya chens di scapa.—Echonan 9:22-25.

• Hopi aña despues, Pablo a haya ta bon pa e apela na Cesar, aunke ni Gobernado Festo ni Rei Agripa no a haya “nada cu merece morto” den dje.—Echonan 25:10-12, 24-27; 26:30-32.

[Plachinan na pagina 16, 17]

Apesar cu persecucion amargo a obliga miles di Testigo fiel hui for di Malawi, nan a sigui predica e Reino yen di goso

[Plachinan na pagina 17]

E goso di santifica e nomber di Yehova a sostene e rumannan fiel aki durante e marcha di morto y e camponan di consentracion di e Nazinan

[Reconocemento]

Marcha di morto: KZ-Gedenkstätte Dachau, cortesia di USHMM Photo Archives

[Plachi na pagina 18]

Prueba y persecucion por bin den hopi forma