Persigui pa Causa di Husticia

“Bendiciona ta esnan cu ta wordo persigui pa causa di husticia.”—Mateo 5:10.

1. Pakico Hesus tawata dilanti Poncio Pilato, y kico Hesus a bisa?

“PA ESAKI mi a nace y pa esaki mi a bini den mundo, pa duna testimonio di e berdad.” (Huan 18:37) Ora Hesus a bisa e palabranan ei, e tawata dilanti Poncio Pilato, gobernado Romano di Hudea. No ta Hesus mes tawata kier ta dilanti Pilato; no ta un invitacion el a haya tampoco. Mas bien, e tawata einan pasobra e lidernan religioso Hudiu a acus’e falsamente di ta un malechor cu merece morto.—Huan 18:29-31.

2. Kico Hesus a haci, y kico tawata resultado di esei?

² Hesus tawata bon conciente cu Pilato tawatin e autoridad di sea libr’e of laga mat’e. (Huan 19:10) Pero esei no a strob’e di papia cu curashi cu Pilato tocante e Reino. Aunke Hesus su bida tawata na peliger, el a probecha di e oportunidad pa duna testimonio na e autoridad gubernamental di mas halto di e region. Apesar di e testimonio ei, Hesus a ser condena y ehecuta, y el a muri un morto agonisante como martir riba un staca di tormento.—Mateo 27:24-26; Marco 15:15; Lucas 23:24, 25; Huan 19:13-16.

Testigo of Martir?

3. Kico e palabra “martir” a nifica den tempo di Bijbel, pero kico e ta nifica awe?

³ Pa hopi hende awe, un martir ta mas o menos ekivalente na un fanatico of un extremista. Hopi bes comunidad ta mira un persona cu ta dispuesto pa muri pa su creencianan, specialmente pa su creencianan religioso, como un posibel terorista of por lo menos como un menasa pa sosiedad. Sinembargo, e palabra martir ta bin di un palabra Griego (mártys) cu den epoca di Bijbel a nifica un “testigo”, esta, un persona cu ta duna testimonio di e berdad cu e ta kere. E por haci esaki, por ehempel, durante un audiencia hudicial. Ta despues numa e palabra a bin haya e nificacion di “un persona cu ta sacrifica su bida pa duna testimonio”, of asta duna testimonio door di sacrifica su bida.

4. Principalmente den ki sentido Hesus tawata un martir?

⁴ Hesus tawata un martir principalmente den e prome sentido di e palabra Griego. Manera el a bisa Pilato, el a bin pa “duna testimonio di e berdad.” Hende a reacciona den varios  manera riba su testimonio. Algun persona di pueblo comun a sinti nan profundamente conmovi pa loke nan a tende y mira, y nan a pone fe den Hesus. (Huan 2:23; 8:30) E multitudnan en general y e lidernan religioso en particular tambe a reacciona fuertemente, pero den un forma negativo. Hesus a bisa su mes rumannan incredulo: “Mundo no por odia boso; ma ami si e ta odia, pasobra mi ta testigua di dje, cu su obranan ta malo.” (Huan 7:7) Door cu Hesus a duna testimonio di e berdad, lidernan di e nacion a haya rabia riba dje, y esei a hiba na su morto. Di berdad e tawata “e testigo (mártys) fiel y berdadero.”—Revelacion 3:14.

“Hende Lo Odia Boso”

5. Kico Hesus a bisa na cuminsamento di su ministerio tocante persecucion?

⁵ Hesus no solamente a sufri di persecucion feros sino tambe el a spierta su disipelnan di antemano cu nan tambe lo haya nan cu persecucion. Na cuminsamento di su ministerio, Hesus a bisa su oyentenan den su Sermon Riba Sero: “Bendiciona ta esnan cu ta wordo persigui pa causa di husticia, pasobra di nan e reino di shelo ta. Bendiciona boso ta ora cu hende insulta boso y persigui boso, y ta gaña tur clase di maldad riba boso pa mi causa. Regociha y sea contento, pasobra boso recompensa den shelo ta grandi.”—Mateo 5:10-12.

6. Ki spiertamento Hesus a duna ora el a manda e 12 apostelnan bai predica?

⁶ Mas despues, ora Hesus a manda e 12 apostelnan bai predica, el a bisa nan: “Warda boso di hende, pasobra nan lo entrega boso na consilio y suta boso den nan snoanan [sinagoganan]; tambe boso lo wordo hiba dilanti di gobernantenan y reinan pa mi causa, como un testimonio pa nan y pa e paganonan.” Pero no ta autoridadnan religioso so lo persigui e disipelnan. Hesus a bisa tambe: “Ruman lo entrega ruman na morto, y un tata su yiu; y yiunan lo lanta contra mayornan, y  haci cu nan lo wordo mata. Y tur hende lo odia boso pa causa di mi nomber, ma ta esun cu a persevera te na fin lo ta salba.” (Mateo 10:17, 18, 21, 22) E historia di e cristiannan di prome siglo ta prueba cu e palabranan ei ta berdad.

Un Registro di Fiel Perseverancia

7. Kico a pone Esteban bira un martir?

⁷ Poco tempo despues cu Hesus a muri, Esteban a bira e prome cristian cu a muri pa motibo cu el a duna testimonio di e berdad. E tawata “yen di fe y poder, [y] tawata haci maraviyanan y milagernan grandi den e pueblo.” Su enemigonan religioso “no tawata por a resisti e sabiduria y e spirito pa medio di cua e tawata papia.” (Echonan 6:8, 10) Yen di envidia, nan a lastra Esteban sac’e for di Sanedrin, e corte supremo Hudiu, caminda el a enfrenta esnan cu a acus’e falsamente y a duna un testimonio poderoso. Sinembargo, na final, e enemigonan di Esteban a mata e testigo fiel aki.—Echonan 7:59, 60.

8. Con e disipelnan na Herusalem a reacciona ora nan a haya nan cu persecucion despues di e morto di Esteban?

⁸ Despues di e morto di Esteban, “a surgi un persecucion grandi contra e iglesia di Herusalem; y nan tur a wordo plama den e regionnan di Hudea y Samaria, cu excepcion di e apostelnan.” (Echonan 8:1) E persecucion a para e trabou di predica di e cristiannan? Al contrario, e relato ta bisa nos cu “esnan anto cu a wordo plama a bai tur caminda, predicando e palabra.” (Echonan 8:4) Nan lo mester tawatin e mesun sintimento cu apostel Pedro kende a declara mas prome: “Nos mester obedece Dios mas cu hende.” (Echonan 5:29) Apesar di e persecucion, e disipelnan fiel yen di curashi a persisti den e trabou di duna testimonio di e berdad, aunke nan tawata sa cu esaki lo a hiba na mas dificultad.—Echonan 11:19-21.

9. Ki persecucion a sigui bin riba e siguidonan di Hesus?

⁹ Si, apesar di e contratiempo, e disipelnan no a baha man den nan actividad. Na prome luga nos ta siña cu Saulo—e homber cu a para mira nan piedra Esteban y cu a consenti cu esaki—“ainda yen di menasa y gusto pa mata e disipelnan di Señor, a bai serca e sumo sacerdote, y a pidie cartanan pa e snoanan na Damasco, pa si e haya cualkier hende cu ta pertenece na e Caminda, tanto homber como mohe, e por trece nan mara na Herusalem.” (Echonan 9:1, 2) Anto, rond di aña 44 di nos era, “Rei Herodes a tira man riba algun hende di iglesia pa maltrata nan. Y el a laga mata Santiago, ruman di Huan, cu spada.”—Echonan 12:1, 2.

10. Ki registro di persecucion nos ta haya den Echonan y Revelacion?

¹⁰ E resto di e buki di Echonan ta contene un registro permanente di prueba, encarselacion y persecucion cu hombernan fiel mester a soporta. Den e grupo aki tawatin Pablo mes tambe, e expersiguido cu a bira apostel, y cu probablemente a muri como martir na man di e Emperador Romano Nero rond di aña 65 di nos era. (2 Corintionan 11:23-27; 2 Timoteo 4:6-8) Finalmente, den e buki di Revelacion, skirbi na fin di prome siglo, nos ta haya cu e biehito apostel Huan a wordo encarsela riba e isla penal di Patmos “pa motibo di e palabra di Dios y e testimonio di Hesus.” Tambe Revelacion ta haci referencia na “Antipas, mi testigo, esun cu ta fiel na mi, kende a wordo mata” na Pergamo.—Revelacion 1:9; 2:13.

11. Con e experencia di e prome cristiannan ta demostra cu loke Hesus a bisa relaciona cu persecucion a cumpli?

 ¹¹ Tur esaki ta demostra cu Hesus tawatin rason ora el a bisa su disipelnan: “Si nan a persigui mi, boso tambe nan lo persigui.” (Huan 15:20) E prome cristiannan fiel tawata dispuesto pa enfrenta e prueba supremo, esta morto—door di tortura, door di wordo tira pa bestia salbahe of den cualkier otro manera—pa nan por cumpli cu e encargo cu Señor Hesucristo a duna nan: “Boso lo ta mi testigonan na Herusalem y na henter Hudea y Samaria, y te na e parti mas aleha di mundo.”—Echonan 1:8.

12. Pakico no ta den pasado so cristiannan a wordo persigui?

¹² Esun cu pensa cu ta den pasado so Hesus su siguidonan a haya nan cu un trato cruel asina, ta completamente kiboca. Pablo, cu manera nos a mira mester a soporta hopi sufrimento, a skirbi: “Tur hende cu ta desea di hiba un bida santo den Cristo Hesus lo wordo persigui.” (2 Timoteo 3:12) Relaciona cu persecucion, Pedro a bisa: “Boso a wordo yama pa e proposito aki, como cu Cristo tambe a sufri pa boso, lagando un ehempel pa boso, pa boso sigui den su pasonan.” (1 Pedro 2:21) Djei padilanti te den e “ultimo dianan” di e sistema di cosnan aki, hende ta sigui odia y opone e pueblo di Yehova. (2 Timoteo 3:1) Den tur skina di tera, bou di tanto regimennan dictatorial como gobiernonan democratico, na un of otro tempo Testigonan di Yehova a sufri persecucion, tanto individualmente y como grupo.

Pakico Nan Ta Wordo Odia y Persigui?

13. Kico sirbidonan di Yehova di e tempo actual mester tene na mente relaciona cu persecucion?

¹³ Aunke mayoria di nos awe ta disfruta di un libertad relativo pa predica y reuni pacificamente, nos tin cu tuma na pecho e recordatorio di Bijbel cu “e esena di e mundo aki ta cambiando.” (1 Corintionan 7:31, NW) Cosnan por cambia asina rapido cu si nos no ta prepara mentalmente, emocionalmente y spiritualmente, nos por trompica facilmente. Kico nos por haci anto pa proteha nos mes? Un manera eficas pa proteha nos mes ta di tene bon cla na mente pakico hende ta odia y persigui cristiannan cu ta amante di pas y cu ta cumpli cu lei.

14. Kico segun Pedro tawata e motibo pakico cristiannan a ser persigui?

¹⁴ Apostel Pedro a comenta riba e asunto aki den su prome carta, cu el a skirbi rond di aña 62-64 di nos era, tempo cu cristiannan den henter e Imperio Romano tawata pasando prueba y persecucion. El a bisa: “Stimanan, no sea sorprendi pa motibo di e candela di prueba cu tin meimei di boso, cu ta bini riba boso pa boso wordo proba, como si fuera ta algo straño ta pasa cu boso.” Pa splica di kico e tawata papia, Pedro a continua: “No laga ningun di boso sufri como matado, of ladron of malechor, of un cu ta mete den asunto di otro; ma si un hende ta sufri como cristian, no lag’e sinti berguensa, ma den e nomber ei lag’e glorifica Dios.” Asina Pedro a mustra cu nan a sufri no pa motibo cu nan a comete ningun maldad, sino pa motibo cu nan tawata cristian. Si nan tawata anda den “e mesun dilubio di libertinahe” cu e hendenan rond di nan, esakinan lo a acepta e cristiannan cu brasa habri. Pero echo ta cu nan a sufri pasobra nan a haci esfuerso pa cumpli cu nan papel como siguido di Cristo. Mescos ta conta pa cristiannan berdadero awe.—1 Pedro 4:4, 12, 15, 16.

15. Ki contradiccion nos ta mira den e trato cu Testigonan di Yehova ta ricibi awe?

¹⁵ Den hopi parti di mundo, Testigonan di Yehova ta ricibi elogio publicamente pa e unidad y cooperacion cu nan ta desplega na nan congresonan y proyectonan di construccion, pa nan honestidad y diligencia, pa nan conducta moral y bida di famia ehemplar y asta pa nan aparencia sano. * Di otro banda, te na e  momento cu e articulo aki a ser skirbi, nan obra ta prohibi of restringi den no menos cu 28 pais, y hopi Testigo ta sufri di maltrato fisico pa motibo di nan fe. Pakico e aparente contradiccion ei? Y pakico Dios ta permitie?

16. Kico ta e motibo principal pakico Dios ta permiti su pueblo sufri persecucion?

¹⁶ Na prome luga nos tin cu corda e palabranan di Proverbionan 27:11: “Sea sabi, mi yiu, y haci mi curason contento, pa mi por contesta esun cu reprocha mi.” Si, ta pa motibo di un cuestion di hopi tempo pasa: e cuestion di soberania universal. Apesar di e gran cantidad di testimonio di tur esnan cu a duna prueba di nan integridad na Yehova atrabes di siglonan, Satanas no a stop di reprocha Yehova manera el a haci den e dianan di husto Job. (Job 1:9-11; 2:4, 5) Sin duda, Satanas a bira asta mas desespera den su ultimo intento pa proba su pretencion, awor cu e Reino di Dios ta firmemente estableci, cu subditonan leal y representantenan rond mundo. Esakinan lo keda leal na Dios apesar di ki contratiempo y dificultad nan haya nan cu ne? Esaki ta un pregunta cu cada sirbido di Yehova mester contesta personalmente.—Revelacion 12:12, 17.

17. Kico Hesus tawata kiermen cu e palabranan “esaki lo ta un oportunidad pa boso duna testimonio”?

¹⁷ Ora Hesus a informa su disipelnan tocante e susesonan cu lo tuma luga durante “e fin di tempo”, el a indica un otro motibo pakico Yehova ta permiti persecucion bin riba su sirbidonan. El a bisa nan: “Lo hiba boso dilanti di reinan y gobernadonan pa causa di mi nomber. Esaki lo ta un oportunidad pa boso duna testimonio.” (Mateo 24:3, 9; Lucas 21:12, 13) Hesus mes a duna testimonio dilanti Herodes y Poncio Pilato. Apostel Pablo tambe a ser ‘hiba dilanti rei y gobernado.’ Bou di direccion di Señor Hesucristo, Pablo a busca pa duna un testimonio na e gobernante di mas poderoso di su tempo ora el a declara: “Mi ta apela na Cesar!” (Echonan 23:11; 25:8-12) Awe ta mescos, hopi bes situacionnan dificil a resulta den un tremendo testimonio pa funcionarionan di gobierno y tambe pa publico. *

18, 19. (a) Ki beneficio nos por saca ora nos ta enfrenta prueba? (b) Ki preguntanan nos lo considera den e siguiente articulo?

¹⁸ Finalmente, ora nos ta enfrenta prueba y tribulacion nos por saca beneficionan personal. Den ki manera? Disipel Santiago a recorda su compañeronan cristian: “Considera esaki como puro goso, mi rumannan, ora boso haya boso mes den diferente pruebanan, sabiendo cu e prueba di boso fe ta produci perseverancia.” Si, persecucion por rafina nos fe y fortalece nos perseverancia. Pues nos no tin miedo di dje, ni nos no ta busca medionan cu no ta biblico pa evit’e of caba cu ne. Mas bien, nos ta haci caso di e spiertamento di Santiago: “Laga perseverancia tin su resultado perfecto, pa boso por ta perfecto y completo, sin falta di nada.”—Santiago 1:2-4.

¹⁹ Aunke e Palabra di Dios ta yuda nos compronde pakico fiel sirbidonan di Dios ta ser persigui y pakico Yehova ta permitie, esei no necesariamente ta haci persecucion facil pa wanta. Kico por fortifica nos pa soport’e? Kico nos por haci ora nos ta enfrenta persecucion? Nos lo considera e asuntonan importante aki den e siguiente articulo.

[Nota]

Bo Por Splica?

• Principalmente den ki sentido Hesus tawata un martir?

• Ki efecto persecucion tawatin riba e cristiannan di prome siglo?

• Segun e splicacion di Pedro, pakico e cristiannan di prome a ser persigui?

• Pa ki motibo Yehova ta permiti su sirbidonan pasa persecucion?

[Preguntanan di Estudio]

[Plachinan na pagina 10, 11]

E cristiannan di prome siglo a sufri, no pa motibo cu nan a comete niun maldad, sino pa motibo cu nan tawata cristian

PABLO

HUAN

ANTIPAS

SANTIAGO

ESTEBAN