Storia di Bida

Yehova Ta Atrae Hende Humilde na e Berdad

SEGUN E RELATO DI ASANO KOSHINO

Na 1949, solamente un par di aña despues di Segundo Guera Mundial, un stranhero halto y amabel a bishita e famia cu mi tawata traha p’e na e stad di Kobe. E tawata e prome misionero di Testigonan di Yehova cu a bin Hapon. Su bishita a habri caminda pa mi tende di e berdad di Bijbel. Pero laga mi conta bo prome di mi pasado.

MI A nace na aña 1926 den un pueblito den e parti nort di e Prefectura di Okayama. Nos tawata ocho ruman y ami ta esun di cinco. Papa tawata masha deboto na e dios di e tempel sintoista. Pesei como mucha nos tawata disfruta di celebracionnan y reunionnan di famia na festivalnan religioso durante henter aña.

Segun cu mi tawata crece, mi tawatin hopi pregunta tocante bida, pero loke tawata precupa mi mas tawata e condicion di e mortonan. Di acuerdo cu tradicion, un hende mester muri na cas y yiunan mester ta rond di e cama di morto. Mi tawata sumamente tristo ora mi wela a muri y ora mi ruman homber cu no tawatin ni un aña di edad ainda a muri. Mi no kier a pensa mes riba e dia cu mi mayornan lo mester muri. Mi tawatin masha gana di haya contesta riba e siguiente preguntanan: ‘Esaki ta tur loke tin? Bida lo por tin un otro proposito?’

Na 1937, ora mi tawata bai scol basico, guera entre e Chinesnan y e Haponesnan a cuminsa. Nan tawata manda yama e hende hombernan y manda nan bai campo di bataya na China. Muchanan di scol tawata yama nan tatanan y rumannan homber ayo, gritando “banzai!”, es  decir biba emperado. E hendenan tawata combenci cu Hapon lo gana e bataya ya cu segun nan Hapon ta goberna pa dios y emperado, un dios bibo.

No a tarda hopi cu famianan a cuminsa haya noticia di morto for di campo di bataya. E famianan cu a perde ser keri tawata completamente kibra. Nan a cuminsa haya odio, y tawata alegra ora e enemigonan tawata ser mata of herida. Pero na mes momento mi tawata pensa: ‘Sin duda e hendenan cu ta na banda di e enemigonan lo mester ta sufri mescos cu nos ora nan perde un ser keri.’ Ora mi a caba scol basico, guera a yega te den interior di China.

Encuentro cu un Stranhero

Nos tawata cunukeronan pober, anto Tata a permiti mi bai scol tanten cu nos no tawatin cu paga nada. Pues na 1941, mi a bai un scol di mucha mohe na Okayama, mas o menos 100 kilometer leu. E scol tawata specialmente pa siña mucha mohe bira bon casa y mama. Via e scol e alumnonan tawata wordo asigna pa biba cu famianan rico den e stad pa nan siña trabou di cas. Mainta e alumnonan tawata siña traha den e casnan aki, y traimerdia nan tawata bai scol.

Despues di e ceremonia di apertura, mi maestra cu tawata bisti cu un kimono a hiba mi na un cas grandi. Pero pa un motibo of otro e señora di e cas no a acepta mi. E maestra a puntra mi: “Bo kier pa nos bai na cas di Señora Koda anto?” El a hiba mi na un cas estilo Occidental y a primi bel. Despues di un rato, un señora halto cu cabei shinishi a bin na porta. Mi a keda sorprendi! E no tawata Hapones, y nunca di mi bida mi a yega di mira un hende di Occidente. E maestra a laga mi sera conoci cu Señora Maud Koda, anto a bai mesora. Mi tawata sinti mi nervioso na momento cu mi tawata drenta cu mi maletanan den e cas. Despues mi a bin haya sa cu Señora Maud Koda tawata un Mericano cu a casa cu un homber Hapones cu a studia na Merca. Señora Koda tawata duna les di Ingles na un scol di comercio.

E siguiente mainta mes mi bida druk a cuminsa. Señora Koda su esposo tawatin epilepsia, y ami tawatin cu yuda Señora Koda cuid’e. Door cu mi no tawata compronde ningun tiki Ingles, mi a bira un poco precupa. Mi a haya un alivio ora Señora Koda a papia Hapones cu mi. Tur dia mi tawata scucha ora nan tawata papia Ingles cu otro, y pocopoco mi a custumbra cu e idioma ei. Mi a gusta e ambiente agradabel den e cas.

Mi a keda impresiona pa Maud su dedicacion y lealtad na su esposo enfermo. Su esposo tawata gusta lesa Bijbel. Despues mi a haya sa cu e pareha a obtene e buki E Plan Dibino di Epocanan na Hapones na un libreria cu ta bende buki segunda mano y cu nan tawatin un abonament riba E Toren di Vigilancia na Ingles pa algun aña caba.

Un dia mi a haya un Bijbel regalo. Mi tawata contento pasobra esei tawata e prome bes den mi bida cu mi tawatin mi mes Bijbel. Mi tawata les’e riba caminda pa scol y riba caminda pa cas, pero mi no tawata compronde masha. Siendo cu mi a lanta como un sintoista Hapones, Hesucristo tawata desconoci pa mi. Mi no por a imagina mi mes cu esaki tawata e  principio di susesonan cu despues lo habri caminda pa mi acepta e berdad di Bijbel, cu lo bin contesta mi preguntanan tocante bida y morto.

Tres Suseso Tristo

E dos añanan di stage a pasa lihe, y mi mester a yama e famia ayo. Ora mi a caba scol, mi a join un brigada di mucha mohe boluntario y a yuda cose uniform pa marina. Merca a lansa un atake aereo cu e B-29’nan, y dia 6 di augustus 1945, nan a tira un bom nuclear riba Hiroshima. Un par di dia despues, mi a haya un telegram cu e noticia cu Mama tawata hopi malo. Mi a coi e prome trein cu mi por a haya pa bai cas. Mientras mi tawata baha for di trein, un famia a contra cu mi pa bisa mi cu Mama a bai sosega. El a muri riba 11 di augustus. Loke mi tawatin miedo di dje pa asina tanto aña a sosode! Nunca mas lo e papia cu mi ni hari cu mi.

Dia 15 di augustus, Hapon a wordo derota. Kiermen cu mi tawatin cu enfrenta tres suseso tristo, anto tur den un periodo cortico di dies dia: explosion di e prome bom nuclear, Mama su morto y e derota historico di Hapon. Por lo menos tawata un consuelo pa sa cu hende lo no muri mas den guera. Cu duele den mi curason, mi a bai laga mi trabou na e fabrica y a regresa cas.

Atrai na e Berdad

Ora mi tawata biba na Okayama, mi a haya un carta inesperadamente for di Maud Koda. El a puntra mi si mi por a bin yud’e cu e trabounan di cas, ya cu e tawata bai habri un scol di Ingles. Mi no tawata sa kico pa haci, pero toch mi a acepta su invitacion. Un par di aña despues, mi a bai biba na Kobe hunto cu famia Koda.

Na comienso di zomer di 1949, un cabayero halto y amabel a bishita famia Koda. Su nomber tawata Donald Haslett, y di Tokio el a biaha bin Kobe pa busca un cas pa e misioneronan. E tawata e prome misionero di Testigonan di Yehova cu a bin Hapon. El a logra haya un cas, y na november 1949 varios misionero a yega Kobe. Un dia, cinco di nan a bin bishita famia Koda. Dos di nan, Lloyd Barry y Percy Iszlaub, a papia na Ingles pa mas o menos dies minuut cada un cu esnan cu tawata presente den e cas. E misioneronan tawata yama Maud nan ruman cristian y ta parce cu e asociacion tawata un bon estimulo pa Maud. Tawata e tempo ei cu mi a bin sinti mi motiva pa siña Ingles.

Cu yudansa di misioneronan celoso, pocopoco mi a bin compronde berdadnan basico di Bijbel. Mi a haya contesta pa e preguntanan cu mi tawatin for di tempo cu mi tawata mucha. Si, Bijbel ta duna e speransa di bida pa semper den un paradijs riba tera y e promesa di un resureccion pa “tur cu ta den graf.” (Huan 5:28, 29; Revelacion 21:1, 4) Mi tawata gradicido na Yehova cu el pone e speransa ei bira posibel mediante e sacrificio di rescate di su Yiu, Hesucristo.

Actividadnan Teocratico Gososo

Di 30 di december 1949 pa prome di januari 1950, Testigonan di Yehova tawatin nan prome congreso na Hapon den e cas di misionero na Kobe. Mi a bai cu Maud. Anteriormente e cas grandi aki tawata di e Nazinan y for di einan tawatin un bista impresionante riba Binnenzee y e isla Awaji. Door cu mi no tawatin hopi conocemento di Bijbel, mi a compronde masha tiki cos. Sinembargo, e misioneronan a impresiona mi masha, ya cu nan tawata asocia libremente cu e Haponesnan. Tawatin un asistencia di 101 hende na e discurso publico di e congreso aki.

Despues di esei, no a tarda hopi cu mi a dicidi di cuminsa sali den sirbishi di veld. Mi tawatin mester di curashi pa bai di cas pa cas, ya cu mi tawata timido. Un mainta, Ruman Lloyd Barry a pasa busca mi pa nos bai sirbishi. El a cuminsa net na e biciña di Ruman Koda. Bo por bisa cu practicamente mi tawata sconde su tras mientras mi tawata scucha su presentacion. E di dos biaha cu mi a bai predica, mi a traha cu dos otro misionero. Un señora Hapones di edad a invita nos pa drenta paden, a scucha nos, y despues a duna cada un di nos un glas di lechi. El a acepta un studio di Bijbel y  despues el a bira un cristian batisa. Tawata un animacion pa mir’e progresa.

Na april di 1951, Ruman Nathan H. Knorr, di e sede na Brooklyn, a bishita Hapon pa prome bes. Alrededor di 700 hende a bin tende e discurso publico cu el a duna den e Auditorio di Kyoritsu na Kanda, Tokio. Na e reunion special aki, tur presente a bira contento ora cu E Toren di Vigilancia a ser presenta na Hapones. E siguiente luna, Ruman Knorr a bishita Kobe, y na e reunion special einan, mi a batisa como simbolo di mi dedicacion na Yehova.

Mas o menos un aña despues, mi a haya animacion pa drenta e ministerio di tempo completo, es decir, e sirbishi di pionero. E tempo ei tawatin djis algun pionero na Hapon, y mi tawata puntra mi mes ta con mi ta bai mantene mi mes. Tambe mi tawata pensa riba con grandi mi chens pa casa lo ta. Pero mi a bin realisa cu sirbi Yehova mester ta e cos mas importante den mi bida, anto na 1952 mi a bira pionero. Mi ta contento cu mi por a traha mita dia pa Ruman Koda ora mi tawata traha pionero.

Na e tempo ei, mi ruman homber, cu mi a kere a muri den guera, a bolbe cas bek cu su famia for di Taiwan. Nunca mi famia a mustra interes den cristianismo, pero door di e celo cu mi tawatin como pionero, mi a cuminsa manda revista y foyeto chikito pa nan. Cu tempo, mi ruman homber mester a bai biba na Kobe cu su famia pa motibo di trabou. Mi a puntra mi cuña: “Bo a lesa e revistanan?” Pa mi sorpresa el a contesta: “Nan ta interesante.” El a cuminsa studia Bijbel cu un di e misioneronan, y mi ruman mohe mas chikito cu ta biba cu nan tambe a join e studio. Cu tempo, nan tur dos a bira cristian batisa.

Impresiona pa e Hermandad Internacional

No hopi tempo despues, mi a keda pasma ora mi a haya un invitacion pa asisti na e di 22 klas di Scol Biblico di Galad. Ami cu Ruman Tsutomu Fukase tawata e promenan di Hapon cu a haya invitacion pa asisti na e scol. Na 1953, prome cu e scol a cuminsa, nos por a asisti na e Asamblea Sosiedad di Mundo Nobo cu a ser teni na Yankee Stadium, New York. E hermandad internacional di Yehova su pueblo a impresiona mi.

Riba e di cinco dia di e congreso, e delegadonan Hapones, mayoria di nan misionero, mester a bisti kimono. Door cu e kimono cu mi a manda cu barco no a yega na tempo, mi a fia uno cu Hermana Knorr tawatin. Durante e sesion awa a cuminsa yobe, y mi tawata precupa pa e kimono no muha. Na e momento ei, suavemente un hende a tapa mi cu un regenjas. Un ruman mohe para banda di mi a puntra mi: “Bo sa ken e ta?” Despues mi a haya sa cu tawata Ruman Frederick W. Franz, un miembro di Cuerpo Gobernante. Esta dushi ta pa sinti e amor di Yehova su organisacion!

E di 22 klas di Galad en berdad tawata un klas internacional; el a consisti di 120 studiante di 37 pais. Aunke tin bes idioma a forma un barera, nos a disfruta plenamente di e hermandad internacional. Na februari 1954, riba un dia cu hopi sneu a cai mi a gradua y a haya asignacion pa bai Hapon bek. Un compañera di klas Inger Brandt, un ruman mohe Sueco, a bira mi partner na e stad di Nagoya. Ei, nos a join un grupo di misionero cu a ser evacua for di Corea pa motibo di guera. E poco añanan cu  mi tawata den sirbishi di misionero tawata masha precioso pa mi.

Sirbishi Gososo Como Pareha

Na september 1957, mi a haya invitacion pa sirbi na Betel di Tokio. E tempo ei e oficina di sucursal na Hapon tawata un cas di palo di dos piso. Tawatin solamente cuater miembro di sucursal, incluyendo Ruman Barry, e cordinado di sucursal. E resto di e famia tawata misionero. Mi a haya asignacion pa haci trabou di traduci y proofreading, y tambe pa haci limpiesa, laba y strica paña, cushina, etcetera.

E obra na Hapon tawata expandiendo, y mas ruman homber a haya invitacion pa traha na Betel. Un di nan a bira un superintendente den e congregacion caminda ami tawata bai. Na 1966 ami cu e ruman homber ei cu yama Junji Koshino a casa. Ora nos a caba di casa, Junji a haya asignacion pa traha den e trabou di sircuito. Tawata masha dushi mes pa siña conoce asina tanto ruman tempo nos tawata bishita e diferente congregacionnan. Door cu mi tawata asigna pa traduci, mi tawata haci esaki na e cas caminda nos tawata keda pa un siman. Ora nos tawatin cu biaha, ademas di nos maletanan y otro ekipahe, nos tawatin cu carga diccionarionan pisa tambe.

Nos a disfruta di e trabou di sircuito pa mas cu cuater aña y a mira e organisacion sigui crece. E sucursal a muda bai Numazu, y añanan despues el a bai Ebina y actualmente e ta situa einan. Ami cu Junji a disfruta di e sirbishi di Betel pa hopi tempo; awor nos ta traha cu un famia di alrededor di 600 miembro. Na mei 2002, e rumannan na Betel a mustra bondad na mi y a celebra mi di 50 aniversario di sirbishi di tempo completo hunto cu mi.

Contento pa Mira Aumento

Ora mi a cuminsa sirbi Yehova na 1950, bo por a conta e publicadonan na Hapon riba bo dede. Awor tin mas cu 210.000 publicado di Reino. Si, miles di persona semehante di carne a ser atrai na Yehova, manera a sosode den mi caso tambe.

Tanto e cuater ruman hombernan misionero y e ruman mohe cu a bishita nos na cas di Ruman Koda na 1949, como Ruman Maud Koda, tur a muri fielmente; tambe mi ruman homber cu tawata un sirbido ministerial y mi cuña cu a disfruta di e sirbishi di pionero pa mas o menos 15 aña. Kico lo para di mi mayornan cu mi tawatin tanto miedo di perde tempo mi tawata mucha? Bijbel su promesa di resureccion ta duna mi speransa y consuelo.—Echonan 24:15.

Ora mi wak bek, mi ta sinti cu mi encuentro cu Maud na 1941 a trece un cambio total den mi bida. Si mi no a conoc’e e tempo ei y si mi no a acepta su invitacion pa traha p’e atrobe despues di guera, probablemente lo mi a keda biba den nos cunucu den e pueblito leu y lo mi no a haya contacto cu e misioneronan ora e trabou di predica a cuminsa na Hapon. Esta gradicido mi ta na Yehova cu el a atrae mi na e berdad mediante Maud y e prome misioneronan!

[Plachi na pagina 25]

Hunto cu Maud Koda y su casa. Ami ta dilanti na man robes

[Plachi na pagina 27]

Hunto cu misioneronan di Hapon na Yankee Stadium na 1953. Ami ta te na man robes

[Plachinan na pagina 28]

Na Betel cu mi esposo, Junji