E Bon Nobo Ta Duna Fruta  na São Tomé y Príncipe

MAYORIA hende probablemente nunca a tende di São Tomé y Príncipe. Normalmente nan no ta haci propaganda pa e islanan aki den foldernan pa facansi. Riba un mapa di mundo, nan ta keda manera cabes di feneta den Golfo di Guinea dilanti di e costa west di Africa. São Tomé ta situa casi riba evenaar y Príncipe ta keda un poco mas nortost. Nan tin un clima di hopi humedad y awasero cu a produci selvanan di yobida hopi berde cu ta cubri seronan cu ta mas cu 2.000 meter halto.

E islanan tropical aki, rondona pa awa blou y beachnan dorna cu palma, ta ser habita pa un pueblo amical y cariñoso, kende su desendencia mescla di Africano y Europeo a resulta den un combinacion agradabel di cultura. E 170.000 habitantenan ta biba di exportacion di e producto principal, cacou, of di agricultura y piscamento. Pero den añanan resien, tawata dificil pa nan haya asta nan pan di cada dia.

Sinembargo, den e ultimo decada di siglo 20 a sosode algo cu tawatin un efecto masha grandi den bida di un creciente cantidad di hende riba e islanan aki. Na juni 1993, Testigonan di Yehova a haya registracion legal serca e gobierno di São Tomé y Príncipe, y asina a yega un fin na un periodo largo y hopi bes dificil di e historia di Testigonan di Yehova riba e islanan aki.

Simiñanan Sembra den Situacion Dificil

Aparentemente, e prome Testigo di Yehova a yega na e pais aki na principio di decada di 1950 ora cu autoridadnan tawata manda presonan Africano di otro colonianan Portugues pa bin haci trabou forsa den plantacion riba e islanan. E Testigo Africano aki cu tawata un pionero of predicado di tempo completo, a ser deporta for di Mozambique pasobra el a predica e bon nobo di e Reino di Dios den e pais ei. Aunke e Testigo tawata su so, el a tene su mes ocupa, y denter di seis luna tawatin 13 hende ta participa den predicacion di e bon nobo. Despues, otro Testigonan den e mesun circunstancia a yega for di Angola. Durante nan deportacion, nan a probecha di tur oportunidad pa comparti e bon nobo cu e habitantenan local.

Pa aña 1966 tur e rumannan cu tawata traha den e plantacionnan di trabou forsa na São Tomé, a regresa e continente Africano. E grupo chikito di publicado di Reino cu a keda atras a sigui padilanti cu curashi. Nan a ser persigui, golpia y encarsela pasobra nan tawata reuni pa studia Bijbel, y no tawatin ningun hende pa bishita nan ni anima nan. E pais a haya independencia di Portugal na 1975, y pocopoco pero sigur e simiñanan di e berdad di Reino a cuminsa duna fruta.

Expansion y Construccion

Den e mesun luna di juni 1993 cu nan a haya registracion legal, nan tawatin un maximo di 100 publicado di Reino. E mesun aña ei, pioneronan special a bin for di Portugal. E esfuerso cu nan a haci pa siña Creol Portugues a pone e poblacion local haya masha cariño pa nan. Loke a bira un prioridad e ora ei tawata pa haya tereno pa un Salon di Reino. Ora cu un ruman cu yama Maria a tende di e necesidad aki, el a duna como contribucion mita di e tereno riba cua e tawatin su casita. E tereno tawata suficiente pa traha un Salon di Reino grandi. Maria no tawata sa cu como cu e no tawatin ningun otro famia mas na bida, desaroyadonan ambicioso di tereno tawatin bista riba e propiedad ei. Un dia un comerciante prominente a bin papia cu Maria.

“Loke mi ta tende di bo no ta bon!” el a spierta Maria. “Mi a tende cu bo a regala bo tereno. Bo no sa cu un tereno asina den stad ta bal hopi placa?”

Maria a puntr’e: “Si mi a ofrece abo e tereno, cuanto lo bo a paga mi?” Ora cu e homber  no a contesta, Maria a sigui bisa: “Ni maske bo a duna mi tur placa na mundo, lo e no ta basta, pasobra placa no por cumpra bida.”

“Bo no tin yiu, toch?” e homber a puntra.

Pa pone fin na e combersacion, Maria a bisa: “E tereno ta pertenece na Yehova. El a fia mi e pa asina tanto aña, y awor mi a dunele bek. Mi tin e speransa di biba pa semper.” Anto el a puntra e homber: “Of acaso bo ta ofrece bida eterno?” Sin bisa un pia di palabra, e homber a bira lomba cana bai.

E resultado tawata un bunita edificio di dos piso cu a ser construi cu yudansa di rumannan cualifica di Portugal. E tin un bodega cu ta abarca henter e espacio bou di e prome piso, un Salon di Reino espacioso y luga di alohamento. Tambe e tin varios sala pa tene scol pa ancianonan, pa sirbidonan ministerial y pioneronan. Awor tin dos congregacion ta tene nan reunionnan den e salon ei, y esei ta hacie un excelente centro educativo pa adoracion puro den e capital.

Na Mé-Zochi, tawatin un congregacion di 60 publicado celoso. Tawata bisto cu nan mester di un Salon di Reino apropiado, ya cu nan tawata tene reunion den un Salon di Reino improvisa situa meimei di un plantacion di bacoba. Nan a informa e autoridadnan local di esaki, y funcionarionan simpatico a ofrece nan un bon pida tereno den e caya principal. Den dos luna nan a traha un bunita Salon di Reino cu yudansa di rumannan di Portugal, uzando e metodo di construccion rapido. E hendenan local no por a kere nan wowo. Un ingeniero Sueco cu tawata traha riba un proyecto di construccion den stad a keda babuca ora el a mira e rumannan den accion. El a bisa: “E cos aki ta increibel! Testigonan di Yehova, aki na Mé-Zochi, uzando un metodo di construccion rapido! Ta asina nos mester a organisa nos proyecto.” E Salon di Reino a wordo dedica dia 12 di juni 1999, y tawatin 232 hende presente. E salon a bira un atraccion principal pa turistanan cu bishita e stad di Mé-Zochi.

Un Congreso Historico

Un evento historico pa Testigonan di Yehova na São Tomé y Príncipe tawata e Congreso di Districto di tres dia “Siñansa Dibino” na  januari 1994, e prome congreso na e islanan aki. Nan a ten’e den e miho sala aire acondiciona di e pais. Bo por imagina con contento e 116 publicadonan di Reino tawata? Tawatin un asistencia grandi di 405 hende y pa prome bes nan a mira presentacion di dramanan biblico y haya publicacionnan nobo di congreso! Un beach tropical tawata e sitio pa e bautismo di 20 persona dedica.

Un nobedad cu a acapara atencion di publico tawata e badgenan unico cu e delegadonan tawatin bisti. E presencia di 25 bishitante di Portugal y Angola a duna e congreso un toke internacional. No a tarda masha cu e rumannan a desaroya un laso caloroso di amor cristian entre nan, y hopi hende tawata cu awa na wowo durante e ultimo sesion ora a yega e momento di tuma despedida.—Huan 13:35.

Reporteronan di Radio Nacional a bin y a entrevista e superintendente di congreso. Tambe nan a transmiti porcionnan di varios discurso. En berdad esei tawata un ocasion historico, y pa e Testigonan fiel aki cu pa hopi tempo tawata aisla, e congreso a laga nan sinti como si fuera e organisacion visibel di Yehova ta hopi mas serca di nan.

Dunando Fruta pa e Alabansa di Yehova

Ora e mensahe di Reino ta duna fruta, e ta produci bon conducta cu ta trece alabansa y honor pa Yehova. (Tito 2:10) Un mucha mohe teenager a gusta loke e tawata siña for di su studio di Bijbel semanal. Sinembargo, su tata a prohibie di asisti na e reunionnan di congregacion. Ora cu el a splica e tata na un manera respetuoso di e importancia di e reunionnan cristian y di su deseo pa asisti, e tata a sac’e for di cas mesora. Aparentemente, el a pensa cu e yiu lo a haci loke hopi otro hoben ta haci: bai biba mesora cu un homber cu por cria nan. Ora e tata a haya sa cu e yiu ta hiba un bida cristian limpi y ehemplar, esei a conmov’e pa tum’e bek na cas y dun’e pleno libertad pa sirbi Yehova.

Un otro ehempel ta di un lider di un grupo musical. Su estilo di bida inmoral a lag’e desilusiona. Den su buskeda pa un proposito den bida, e Testigonan a haya contacto cu ne. Ora el a cuminsa biba segun e normanan moral di Bijbel, el a bira e topico di combersacion. No a tarda hopi cu el a mira cu ta necesario pa e kibra cu tur mal compania. (1 Corintionan 15:33) Anto el a tuma e paso importante di batisa como simbolo di su dedicacion na Yehova.

Tawatin un grupo di hoben en busca di e religion berdadero. Den nan buskeda nan tawata combersa cu pastonan di varios grupo evangelico, pero esei a resulta den mas confusion y desilusion. Consecuentemente, nan a bira bagamundonan violento y personanan cu ta haci bofon di tur loke ta religioso.

Un dia un Testigo di Yehova, un misionero, tawata riba caminda pa bai conduci un studio di Bijbel y el a pasa banda di e luga caminda e hobennan aki tawata. E grupo tawata kier pa e misionero contesta algun pregunta y nan a bai cu ne den cura di un cas, caminda nan a invit’e pa sinta riba un banki chikito. Nan a atac’e cu un avalancha di pregunta riba temanan manera alma, fierno di candela, bida den shelo y fin di mundo. E Testigo a contesta tur nan preguntanan for di e Bijbel cu e lider di e gang a fi’e. Un ora despues, e lider, cu yama Law, a bisa e misionero: “Ora nos a pidi bo pa bin y contesta pregunta, nos intencion tawata pa haci bofon di bo, manera nos a haci cu hende di otro religion. Nos tawata kere cu ningun hende lo por a contesta e preguntanan ei. Pero abo si a contesta nan, y bo a uza solamente e Bijbel! Bisa mi, con mi por siña mas tocante Bijbel?” E ruman a cuminsa un studio di Bijbel cu Law, y poco despues el a cuminsa asisti na reunion. Un poco despues di esei, el a bandona e grupo y a stop cu su estilo di bida violento. Denter di un aña, el a dedica su bida na Yehova y a batisa. Awor e ta sirbi como sirbido ministerial.

 Un custumber local cu ta fuertemente hancra ta cu parehanan ta biba compaña, pues sin ta casa legalmente. Hopi di nan a biba hunto pa añanan y tin yiu. Ta dificil pa nan acepta Dios su punto di bista di e asunto. Pesei ta alentador pa mira con e Palabra di Dios a yuda un persona vence e obstaculo aki.—2 Corintionan 10:4-6; Hebreonan 4:12.

Antonio a compronde cu e mester legalisa su matrimonio y a plania pa haci esei despues di e cosecha di maishi, ora cu lo e tin poco cen pa e fiesta di casamento. Un anochi, poco prome cu e cosecha, ladronnan a bin y a horta su cosecha. El a dicidi di warda pa e cosecha di e siguiente aña, y ladronnan a bolbe hort’e. Ora cu un otro intento pa haya placa pa su casamento a fracasa, Antonio a realisa ta ken tawata su berdadero opositor. El a bisa: “Satanas no ta nek mi mas. Den un luna y mei, nos lo casa, cu of sin fiesta!” Y asina a sosode. Pa nan sorpresa, nan amigonan a trece galiña, pato y un cabrito pa e fiesta di casamento. Despues di a legalisa nan matrimonio, Antonio cu su casa—hunto cu nan seis yiunan—a batisa como simbolo di nan dedicacion na Yehova.

Un Bista di Isla Príncipe

Den añanan resien e superintendente di sircuito y pioneronan di São Tomé de bes en cuando tawata bishita e 6.000 habitantenan di Príncipe. E habitantenan tawata masha hospitalario y ansioso pa tende loke e Testigonan tawatin di bisa. Despues cu un homber a lesa un tratado cu e pioneronan a dun’e, el a bai busca nan su siguiente dia y a ofrece pa yuda nan parti mas tratado. E pioneronan a splic’e cu ta nan mes mester haci e obra aki, pero e homber a insisti cu e mester compaña nan di cas pa cas ya asina e por introduci nan na e doñonan di cas y recomenda nan pa scucha bon. Finalmente e homber a bai laga nan, pero prome el a elogia e pioneronan pa e trabou importante cu nan tawata haci.

Na 1998 dos pionero di São Tomé a bai biba na Príncipe, y poco despues nan tawata conduci 17 studio di Bijbel. E obra a sigui expande, y no a tarda hopi cu e Studio di Buki di Congregacion tawatin un promedio di 16 hende presente, y mas cu 30 tawata asisti na e discurso publico. E rumannan a papia cu autoridadnan local tocante e necesidad di un luga pa reuni, y felismente, nan a duna un tereno pa traha un Salon di Reino. Rumannan di São Tomé boluntariamente a traha un Salon di Reino chikito cu tambe tin luga di biba pa dos pionero special.

Sin duda e bon nobo ta dunando hopi fruta y ta aumentando riba e islanan remoto aki. (Colosensenan 1:5, 6) Na januari 1990 tawatin 46 publicado na São Tomé y Príncipe. Durante e aña di sirbishi 2002 nan a alcansa un maximo di 388 proclamado di Reino! Mas cu 20 porshento di e publicadonan ta den sirbishi di tempo completo, y nan ta conduci alrededor di 1.400 studio di Bijbel. Na e Memorial di 2001 tawatin pa prome bes un asistencia di 1.907 hende. Si, riba e islanan tropical aki, e palabra di Yehova ta plamando rapidamente y ta ser glorifica.—2 Tesalonicensenan 3:1.

[Cuadro/Plachi na pagina 12]

Programanan Popular na Radio

Un buki cu ta wordo aprecia masha riba e islanan aki ta Loke hovenan sa puntra−Contesta práctica. * Cada dos siman, Radio Nacional ta transmiti un programa di 15 minuut cu tin e mesun tema ei. Ta masha emocionante pa tende e locutor puntra: “Hobennan, con boso por sa si loke boso ta sinti ta amor berdadero of un enamoracion pasahero?”, anto e ta cuminsa lesa un porcion di e buki! (Wak capitulo 31.) Un otro programa similar ta presenta partinan selecta for di e buki E Secreto pa Felicidad den Famia. *

[Nota]

[Plachi na pagina 9]

Prome Salon di Reino na São Tomé na 1994

[Plachinan na pagina 10]

1. Salon di Reino di construccion rapido na Mé-Zochi

2. Un congreso di districto historico a tuma luga akinan

3. Candidatonan pa bautismo felis na congreso

[Reconocemento pa Potret pagina 8]

Mundo: Mountain High Maps® Copyright © 1997 Digital Wisdom, Inc.