Hobennan, Cana Digno di Yehova

ALGUN hoben cristian a haya nan tin cu biba temporalmente leu for di nan famia y nan congregacion. Algun a haci esei pa nan por expande nan sirbishi. Otronan tawatin cu bandona nan cas debi na nan posicion neutral pa cu asuntonan di e mundo aki. (Isaias 2:4; Huan 17:16) Den cierto paisnan, “Cesar” a condena hobennan cu mantene nan integridad na un castigo di prizon of na un periodo di trabou pa comunidad. *—Marco 12:17; Tito 3:1, 2.

Ora cu e hobennan aki bai sinta nan castigo di prizon pa motibo di nan neutralidad, kisas nan ta haya nan mes sera pa periodonan largo hunto cu delincuentenan. Tin hobennan cu pa otro motibonan ta leu for di cas y cu tambe a haya nan obliga ta traha den un ambiente inmoral. Segun cu nan ta haci esfuerso pa sigui ‘cana na un manera digno di Dios’, con e hobennan cristian aki of otronan cu fuera di nan boluntad ta haya nan mes den un situacion asina, por trata cu exito cu e presion- y exigencianan cu nan ta confronta? (1 Tesalonicensenan 2:12) Con nan mayornan por yuda nan prepara pa nan por trata cu cualkier posibel circunstancia desagradabel?—Proverbionan 22:3.

Problemanan Special di e Hobennan Aki

Tákis di 21 aña, * kende a hay’e obliga na biba 37 luna for di cas, a bisa: “E echo cu mi tawata leu for di e cuido protector di mi mayornan y e supervision amoroso di ancianonan cu conoce mi bon, tawata masha dificil y a duna mi miedo.” El a agrega: “Tawatin biaha cu mi a sinti mi sumamente indefenso.” Pétros di 20 aña mester a biba for di cas pa mas cu 2 aña. El a admiti: “Pa prome bes den mi bida mi so mester a tuma decision tocante entretenimento y asociacion, y mi decisionnan no tawata semper sabi.” Anto el a remarca: “Tawatin biaha cu mi a sinti mi incomodo cu e mayor responsabilidad cu mas libertad ta trece cu ne.” Tássos, un anciano cristian cu regularmente ta bin den contacto cu hobennan cristian den tal situacion, a duna e siguiente observacion: “E abla sushi, e rebeldia y comportacion violento di otro hobennan incredulo por influencia hobennan indefenso y cu no ta alerta.”

Siendo cu nan ta biba y traha meimei di hende cu no tin respet pa principionan biblico, e hobennan cristian ei tin cu proteha nan mes contra e tentacion pa imita e manera di anda inmoral y cu Bijbel ta condena di nan pareunan. (Salmo 1:1; 26:4; 119:9) Podise ta parce dificil pa mantene un bon nivel of rutina di studio personal, asistencia na reunion y sirbishi di veld. (Filipensenan 3:16) Kisas tampoco no ta semper facil pa pone metanan spiritual y traha pa alcansa nan.

Un cos ta sigur, hobennan cristian fiel kier agrada Yehova cu nan conducta y abla. Lealmente nan ta purba haci caso di e invitacion atractivo di nan Tata celestial: “Sea sabi, mi yiu,  y haci mi curason contento, pa mi por contesta esun cu reprocha mi.” (Proverbionan 27:11) Nan sa cu nan aparencia y comportacion ta influencia e manera cu otro hende ta mira Yehova y su pueblo.—1 Pedro 2:12.

Ta di elogia cu mayoria di e hobennan ei ta haci nan best pa ta manera nan rumannan di prome siglo pa ken Pablo a pidi den oracion: “Cana na un manera digno di Señor, pa agrad’e den tur sentido, dunando fruta den tur bon obra . . . pa haya tur perseverancia y pasenshi, y cu goso.” (Colosensenan 1:9-11) Bijbel ta conta di varios hoben temeroso di Dios cu tawatin exito den cana digno di Dios meimei di un ambiente desconoci, inhospitalario y yen di adoracion falso.—Filipensenan 2:15.

Yehova Tawata cu Yosef

Na un edad hoben, Yosef (Hose), e yiu homber stima di Yacob y Raquel, a haya su mes leu for di e neishi protector di su tata temeroso di Dios. El a wordo bendi como catibo na Egipto. Yosef a pone un excelente ehempel como un yoncuman trahado, confiabel y di bon moral. Apesar cu e mester a traha como catibo pa Potifar—un persona cu no tawata un adorado di Yehova—Yosef tawata responsabel y diligente, di manera cu su shon cu tempo a laga tur asunto di cas na su encargo. (Genesis 39:2-6) Yosef a mantene su integridad na Yehova, y ora cu esei a pon’e bai sera, e no a conclui: “Pakico mi a molestia mi curpa pa keda fiel?” Asta den prizon el a desplega cualidadnan excelente, y den poco tempo e tawata encarga cu hopi detaye relaciona cu e funcionamento di e prizon. (Genesis 39:17-22) Dios a bendicion’e, y manera ta para skirbi na Genesis 39:23: “SEÑOR tawata cu ne.”

Unabes aisla for di su famia temeroso di Dios, lo por tawata masha facil pa Yosef cuminsa comporta su mes mescos cu e paganonan cu a biba tur rond di dje, imitando e estilo di bida inmoral di Egipto! En bes di esei, el a tene duro na e principionan di Dios y a mantene su mes limpi apesar di e tentacion di mas fuerte. Ora cu e casa di Potifar bes tras bes a pidie pa tene relacion cu ne, su contesta firme tawata: “Con . . . mi por haci e maldad grandi aki y peca contra Dios?”—Genesis 39:7-9.

Awe hobennan Testigo tin cu haci caso di e spiertamentonan basa riba Bijbel relaciona cu mal asociacion, dibirticion inmoral, pornografia y musica degrada. Nan ta realisa cu “e wowonan di SEÑOR ta tur caminda, vigilando malo y bon.”—Proverbionan 15:3.

Moises A Evita e ‘Placernan di Pica’

Moises a lanta den e palacio di Farao, un ambiente caminda idolatria y buscamento di  placer tawata reina. Bijbel ta bisa di Moises: “Pa medio di fe Moises . . . a nenga di wordo yama yiu di Farao su yiu mohe, scohiendo pa mas bien sufri maltrato hunto cu e pueblo di Dios, cu gosa di e placernan pasahero di pica.”—Hebreonan 11:24, 25.

Amistad cu mundo por resulta den cierto bentaha, pero nan ta di corto duracion. Di mas tanto, nan por dura solamente pa e tempo limita cu a keda e mundo aki. (1 Huan 2:15-17) Lo no ta mas miho pa sigui e ehempel di Moises? Bijbel ta bisa cu “el a keda firme, como si fuera e tawata mira Esun cu ta invisibel.” (Hebreonan 11:27) El a mantene su mente enfoca riba e herencia spiritual di su antepasadonan temeroso di Dios. El a haci e proposito di Yehova, su proposito den bida y su meta tawata: haci e boluntad di Dios.—Exodo 2:11; Echonan 7:23, 25.

Ora hobennan cu ta teme Dios haya nan mes den un ambiente malbado y inhospitalario, nan por fortalece nan relacion personal cu Yehova mediante studio personal, y asina siña conoce miho “Esun cu ta invisibel.” Un programa yen di actividad cristian, incluyendo asistencia regular na reunion y sirbishi di veld, lo yuda e hobennan aki mantene nan mente enfoca riba cosnan spiritual. (Salmo 63:6; 77:12) Nan lo mester haci esfuerso pa cultiva fe y speransa cu ta mes fuerte cu di Moises. Lo ta bon pa nan consentra nan pensamento y accionnan riba Yehova, contento di por ta su amigo.

El A Uza Su Lenga pa Alaba Dios

Un otro hoben cu a resulta ehemplar leu for di cas tawata e mucha mohe Israelita cu e Sirionan a captura den tempo di e profeta di Dios, Eliseo. E mucha a bira cria di e esposa di Naaman, un capitan di e ehersito Sirio cu tawatin lepra. E mucha mohe aki a bisa su señora: “Mara mi shon Naaman tawata serca e profeta cu ta na Samaria! E ora ei e lo a cur’e di su lepra.” Debi na e mucha su testimonio, Naaman a bai serca Eliseo na Israel y a wordo cura di su lepra. Ademas, Naaman a bira un adorado di Yehova.—2 Reinan 5:1-3, 13-19.

E ehempel di e mucha mohe aki ta enfatisa e necesidad pa hobennan uza nan lenga den un  manera cu ta honra Dios, asta ora nan no ta hunto cu nan mayornan. Si e mucha mohe ei tawatin e custumber di ‘papia co’i loco’ of haci “chansanan vulgar”, lo el a sinti su mes comodo pa uza su lenga asina bon manera el a haci ora e chens a presenta? (Efesionan 5:4; Proverbionan 15:2) Níkos, un yoncuman di 20 y pico aña cu tawata encarsela pa motibo di su posicion neutral, a conta: “Tempo cu mi tawata hunto cu algun otro ruman hoben na un prizon caminda nos tawatin cu traha den cunucu, leu for di e autoridad di mayornan y di e congregacion, mi a ripara cu e calidad di nos abla a bai atras. Definitivamente e no a trece alabansa pa Yehova.” Felismente, Níkos y otro hobennan a haya yudansa pa haci caso di Pablo su conseho encuanto e asunto aki: “No laga inmoralidad of cualkier sorto di impuresa of golosidad ni wordo menta mes meimei di boso, manera ta pas pa santonan.”—Efesionan 5:3.

Yehova Tawata Real pa Nan

E experencia di e tres compañeronan Hebreo di Daniel den antiguo Babilonia ta confirma e berdad di e principio declara pa Hesus: fieldad den cos chikito ta hiba na fieldad den cos grandi. (Lucas 16:10) Ora nan a confronta e problema di come cuminda cu e Lei di Moises a prohibi, nan por a hustifica nan mes bisando cu nan ta preso den un pais stranhero y pues nan no tawatin otro opcion. Pero ki un gran bendicion nan a haya pasobra nan a tuma na serio asta algo cu lo por a parce un cos chikito! Nan a resulta di ta mas saludabel y mas sabi cu tur e otro presonan cu a sigui come e miho cuminda di rei. Fieldad den e cosnan chikito aki sin duda a fortalece nan, di manera cu ora nan a confronta e prueba mas grandi di mester buig dilanti di un imagen di dios falso, nan a nenga di compromete.—Daniel 1:3-21; 3:1-30.

Yehova tawata masha real pa e tres hombernan hoben aki. Apesar cu nan tawata leu for di nan cas y for di e centro di Dios su adoracion, nan tawata dicidido pa keda sin mancha di mundo. (2 Pedro 3:14) Nan relacion cu Yehova tawata asina precioso pa nan cu nan tawata dispuesto pa sacrifica nan bida pa esei.

Yehova Lo No Bandona Bo

Ta di compronde cu hobennan por sinti nan insigur, cu duda y miedo ora nan ta biba leu for di nan hendenan cu nan ta stima y confia. Sinembargo,  nan por enfrenta nan test- y pruebanan cu e pleno confiansa cu Yehova “no ta bandona” nan. (Salmo 94:14) Si e hobennan ei ta “sufri pa motibo di husticia”, Yehova t’ei pa yuda nan sigui cana den “e caminda di husticia.”—1 Pedro 3:14; Proverbionan 8:20.

Yehova consistentemente a fortalece Yosef, Moises, e mucha mohe Israelita catibo y e tres fiel hobennan Hebreo, y tambe el a bendiciona nan ricamente. Awe e ta uza su spirito santo, su Palabra y su organisacion pa sostene esnan cu ta “lucha e bon lucha di fe”, poniendo nan dilanti e recompensa di “bida eterno.” (1 Timoteo 6:11, 12) Si, ta posibel pa cana digno di Yehova, y esei ta e cos sabi pa haci.—Proverbionan 23:15, 19.

[Nota]

[Cuadro na pagina 25]

MAYORNAN, PREPARA BOSO YIUNAN!

“Manera flecha den man di un guerero, asina ta e yiunan haya den un hende su hubentud.” (Salmo 127:4) Un flecha no ta alcansa su blanco pa casualidad. Bo mester mik e bon. Di igual manera, yiunan lo no ta prepara pa confronta e realidad di biba for di cas si nan no haya e guia apropiado di nan mayornan.—Proverbionan 22:6.

Hobennan ta cla pa actua impulsivamente of pa entrega na “pasionnan di hubentud.” (2 Timoteo 2:22) Bijbel ta spierta: “Bara y reprendemento ta duna sabiduria, ma un yiu laga pa su cuenta ta pone su mama na berguensa.” (Proverbionan 29:15) Ora mayornan no ta pone limite pa e comportacion di mucha, nan yiu lo no ta prepara pa enfrenta e presion- y exigencianan di un bida leu for di cas.

Den un manera cla y responsabel, mayornan cristian mester splica nan yiunan kico ta e dificultadnan, presionnan y realidadnan di bida den e mundo djawe. Sin zona pesimista of negativo, nan por describi e condicionnan desagradabel cu un hoben lo por confronta si e tin cu biba for di cas. E entrenamento aki, compaña pa e sabiduria cu Dios ta duna, lo por “haci esnan inexperto spierto, [y] duna un hoben conocemento y habilidad di pensa.”—Proverbionan 1:4, NW.

Mayornan cu inculca normanan cu ta agrada Dios y principionan moral den curason di nan yiunan, ta capasita nan pa por trata cu exito cu e problemanan di bida. Un studio di Bijbel riba un base regular como famia, un comunicacion habri y berdadero interes den e bienestar di nan yiunan, por ta loke ta haci e diferencia entre exito y fracaso. Mayornan mester percura un educacion basa riba principionan dibino den un manera balansa y toch positivo y rasonabel, preparando nan yiunan pa nan por para riba nan mes pia mas despues den bida. Mediante nan ehempel personal, mayornan por siña nan yiunan cu ta posibel pa ta den mundo y toch no ser parti di dje.—Huan 17:15, 16.

[Plachi na pagina 23]

Algun hoben cristian a haya nan obliga ta bandona nan cas

[Plachinan na pagina 24]

Door di resisti tentacion, hobennan por imita Yosef y keda moralmente limpi

[Plachinan na pagina 26]

Imita e mucha mohe Israelita catibo cu a uza su lenga pa trece gloria na Yehova