“No Uni Boso Mes den Yugo Desigual”

MANERA bo por mira riba e plachi ei, e camel y e toro cu ta ploeg hunto ta mustra masha incomodo. E yugo cu ta tene nan hunto ta pone nan tur dos sufri, ya cu e ta traha pa tene dos bestia di e mesun tamaño y forsa hunto. Precupa pa e bienestar di tal bestia di carga, Dios a bisa e Israelitanan: “No ploeg cu un buei y un burico hunto.” (Deuteronomio 22:10) E mesun principio lo ta aplicabel tambe den e caso di un toro y un camel.

Normalmente, un cunukero lo no laga su bestianan pasa den e sufrimento ei. Pero si e no tawatin dos toro, ta e dos bestianan cu e tawatin disponibel lo e mester a pone hunto bou di e mesun yugo. Aparentemente manera e plachi ta mustra, ta esei ta loke e cunukero di siglo 19 a dicidi di haci. Debi cu e bestianan no tawatin mesun tamaño ni peso, esun mas suak lo mester a haci hopi esfuerso pa cana mes duro cu e otro bestia, y esun mas fuerte lo mester a carga mas tanto peso.

Apostel Pablo a uza e ilustracion di un yugo desigual pa siña nos un les importante. “No uni boso mes den yugo desigual cu incredulonan”, el a skirbi. “Pasobra ki compañerismo husticia tin cu inhusticia, y ki comunion lus tin cu scuridad?” (2 Corintionan 6:14) Con un cristian lo por uni su mes bou di un yugo desigual?

Un manera ta si e scohe pa casa cu un hende cu no tin e mesun creencianan cu ne. Tal union lo ta incomodo pa nan tur dos, ya cu nan lo haya nan cu desacuerdonan riba asuntonan fundamental.

Ora Yehova a origina matrimonio, el a duna e esposa e papel di un ayudante “cu ta pas” cu e homber. (Genesis 2:18) Asina tambe, mediante profeta Malakias, Dios a referi na un esposa como un “compañera.” (Malakias 2:14) Nos Creador kier pa parehanan casa traha harmoniosamente den e mesun direccion spiritual, cargando e responsabilidadnan hunto, pa nan tur dos cosecha e mesun beneficionan.

Door di casa solamente “den Señor”, un cristian ta mustra respet pa e conseho di nos Tata cu ta den shelo. (1 Corintionan 7:39) Esaki ta pone un fundeshi pa un matrimonio uni, cu por trece alabansa y honor pa Dios mientras ambos partner ta sirbie como “compañero di yugo” den un sentido special.—Filipensenan 4:3, NW.

[Reconocemento pa Potret na pagina 32]

Camel y toro: Di e buki La Tierra Santa, Volumen 1, 1830