Pa Gana e Premio, Eherce Dominio Propio!

“Tur cu ta competi den e weganan ta eherce dominio propio den tur cos.”—1 CORINTIONAN 9:25.

1. Di acuerdo cu Efesionan 4:22-24, con miyones di hende a bisa si na Yehova?

SI BO a batisa como Testigo di Yehova, bo a duna di conoce publicamente cu bo ta dispuesto pa participa den un competencia cu tin bida eterno como premio. Bo a bisa si, of bai di acuerdo, pa haci e boluntad di Yehova. Prome cu hopi di nos a haci un dedicacion na Yehova, nos tawatin cu haci cambionan importante pa asina nos dedicacion por ta valido y aceptabel pa Dios. Nos a sigui e conseho cu apostel Pablo a duna cristiannan: “Pone un banda e hende bieu cu ta wordo corumpi conforme e pasionnan engañoso . . . Bisti e hende nobo, cu a wordo crea segun Dios den husticia y santidad berdadero.” (Efesionan 4:22-24) Cu otro palabra, prome cu nos a bisa si na nos dedicacion na Dios, nos tawatin cu bisa no na nos estilo di bida anterior inaceptabel.

2, 3. Con 1 Corintionan 6:9-12 ta indica cu hende mester haci dos tipo di cambio pa nan por haya e aprobacion di Dios?

² Cierto rasgonan di e personalidad bieu (“e hende bieu”) cu prospectivo Testigonan di Yehova mester pone un banda ta ser condena directamente den e Palabra di Dios. Pablo a menciona algun den su carta na e Corintionan, bisando: “Ni fornicado, ni adorado di dios falso, ni adultero, ni sodomita, ni homosexual, ni ladron, ni esnan golos pa placa, ni burache, ni blasfemado, ni estafado lo no hereda e reino di Dios.” Caba el a mustra cu e cristiannan di prome siglo a haci e cambionan necesario den nan personalidad door di agrega: “Y asina algun di boso tawata.” Tuma nota cu e no a bisa cu nan ta, sino cu nan tawata.—1 Corintionan 6:9-11.

³ Tambe Pablo a sugeri cu kisas mas cambio lo ta necesario, pasobra el a sigui bisa: “Tur cos  ta permiti pa mi, ma tur cos no ta cumbini.” (1 Corintionan 6:12) Pesei hopi hende awe cu ta desea di ta un Testigo di Yehova, ta mira cu ta necesario pa nan bisa no asta na cosnan cu aunke nan ta permiti, no ta cumbini of ta di poco balor duradero. Kisas e cosnan aki ta kita hopi tempo y lo por desvia nan di sigui tras di asuntonan di mayor importancia.

4. Riba ki punto cristiannan dedica ta di acuerdo cu Pablo?

⁴ Dedicacion na Dios ta ser haci boluntariamente, no di mala gana, como si fuera e ta un sacrificio inmenso. Cristiannan dedica ta di acuerdo cu Pablo, kende a bisa despues cu el a bira un siguido di Cristo: “Pa [Hesus] mi a sufri pierde di tur cos, y ta considera nan como basura, pa mi por gana Cristo.” (Filipensenan 3:8) Gustosamente Pablo a bisa no na cosnan di poco balor ya asina e por a sigui bisa si na Dios.

5. Den ki clase di careda Pablo a participa cu exito, y con nos por haci mescos?

⁵ Pablo a eherce dominio propio den su careda spiritual y na final e por a bisa: “Mi a lucha e bon lucha, mi a termina e careda, mi a warda e fe; den futuro ta warda pa mi e corona di husticia, cual Señor, e hues husto, lo duna mi riba e dia ei; y no na ami so, ma tambe na tur esnan cu a stima su binida.” (2 Timoteo 4:7, 8) Nos tambe lo por expresa mescos un dia? Nos lo por, si nos eherce fe cu dominio propio segun cu nos ta sigui den nos careda cristian sin stop te na final.

Dominio Propio Ta Necesario pa Haci Bon

6. Kico ta dominio propio, y cua ta e dos maneranan nos tin cu eherc’e?

⁶ E palabranan Hebreo y Griego traduci como “dominio propio” den Bijbel, literalmente ta indica cu un persona tin poder of control riba su mes. Hopi bes nan ta transmiti e idea di frena bo mes di haci malo. Pero ta bisto cu nos lo tin mester di un cierto grado di dominio propio tambe si nos kier uza nos curpa pa haci obra bon. E tendencia natural di hende imperfecto ta pa haci malo, pues nos tin dos lucha. (Eclesiastes 7:29; 8:11) Mientras nos ta frena nos mes pa no haci loke ta malo, nos tin cu forsa nos mes tambe pa haci loke ta bon. De echo, domina nos curpa pa e haci bon ta un di e miho maneranan pa evita di haci malo.

7. (a) Mescos cu David, kico nos mester pidi den oracion? (b) Kico nos mester medita riba dje pa yuda nos eherce mayor dominio propio?

⁷ Ta bisto anto cu dominio propio ta esencial pa nos por cumpli cu nos dedicacion na Dios. Mescos cu David, nos tin cu pidi den oracion: “Crea den mi un curason limpi, o Dios, y renoba un spirito recto den mi.” (Salmo 51:10) Nos por medita riba e beneficionan di evita cosnan cu ta moralmente malo of cu  fisicamente ta debilita nos. Pensa riba e daño cu nos por sufri si nos no evita e cosnan ei: problemanan serio di salu, problema den relacionnan personal, asta morto prematuro. Di otro banda, pensa riba e tantisimo beneficionan di sigui e estilo di bida cu Yehova ta prescribi. Sinembargo, nos mester ta realista y no lubida cu nos curason ta engañoso. (Yeremias 17:9) Pesei nos mester ta dicidido pa resisti e intentonan di nos curason pa purba minimisa e seriedad di pega na e normanan di Yehova.

8. Ki realidad nos sa di experencia? Duna un ehempel.

⁸ Mayoria di nos sa di experencia cu nos carni indispuesto hopi bes ta purba fria e celo di nos spirito dispuesto. Tuma por ehempel e predicacion di Reino. Yehova ta alegra ora cu hende di buena gana ta pone nan mes disponibel pa participa den e trabou aki cu ta duna bida. (Salmo 110:3; Mateo 24:14) Pa mayoria di nos, no tawata facil pa siña predica publicamente. Esei a rekeri—y kisas ainda ta rekeri—pa nos domina nos curpa, ‘golpi’e’ y ‘hacie esclabo’, en bes di permitie dicta e proceder di mas facil.—1 Corintionan 9:16, 27; 1 Tesalonicensenan 2:2.

“Den Tur Cos”?

9, 10. Kico eherce “dominio propio den tur cos” ta encera?

⁹ E conseho biblico pa eherce “dominio propio den tur cos” ta indica cu dominio propio ta encera mas cu simplemente domina nos mes pa no rabia lihe y evita conducta inmoral. Podise nos ta sinti cu nos a alcansa dominio propio riba e terenonan aki, y si ta asina, nos realmente por ta gradicido. Sinembargo, ke tal di otro tereno di bida caminda podise e necesidad di dominio propio no ta asina bisto? Por ehempel, supone cu nos ta biba den un pais relativamente rico cu tin un nivel halto di bida. Lo no ta sabi pa siña bisa no na gastamento innecesario di placa? Mayornan ta haci bon di siña nan yiunan pa no cumpra kico cu nan mira djis pasobra e ta disponibel, e ta bunita of nan tin e placa pa cumpr’e. Claro cu pa e instruccion ei ta efectivo, mayornan mes mester pone un bon ehempel.—Lucas 10:38-42.

¹⁰ Siña biba sin cierto cosnan cu kisas nos tin gana di dje, por duna nos mas determinacion of forsa di boluntad. Tambe esei por yuda nos haya mas aprecio pa e cosnan material cu nos tin y por haci nos mas comprensivo pa cu esnan cu tin cu biba sin cierto cosnan, no pasobra nan kier sino debi na necesidad. Ta berdad cu un estilo di bida modera ta net contrario di e actitudnan popular manera “trata bo mes bon” of “bo merece lo miho.” E mundo di propaganda ta stimula e deseo pa satisfaccion instantaneo, pero e ta haci esei pa yena su mes saco. E situacion aki lo por stroba nos esfuerso pa desplega dominio propio. Un revista di un pais prospero na Europa a menciona resientemente: “Si hende cu ta biba den e circunstancianan agonisante di pobresa extremo tin cu hiba un lucha interno pa mantene impulsonan indeseabel bou di control, anto esnan cu ta biba den e pais di abundancia di nos sosiedad rico djawe tin un lucha hopi mas fuerte!”

11. Dicon ta probechoso pa nos siña biba sin cierto cosnan, pero kico ta haci esaki dificil?

¹¹ Si nos tin dificultad pa distingui entre loke nos kier y loke realmente nos tin mester, lo por ta bon pa nos dal paso pa haci sigur cu nos no ta actua iresponsabel. Por ehempel, si nos ta desea di combati e inclinacion pa gasta placa pa loco, podise nos por dicidi pa no cumpra cos na credito, of ora nos ta bai haci compras, nos ta sali cu solamente un cantidad fiho di placa. Corda cu Pablo a bisa cu “santidad [“debocion na Dios”, NW] acompaña pa contentamento ta di gran ganashi.” El a rasona: “Nos no a trece nada den mundo, y nos no por hiba nada for di dje tampoco. Y si nos tin cuminda y paña pa bisti, cu esakinan nos mester ta contento.” (1 Timoteo 6:6-8) Nos ta contento cu loke nos tin? Pa nos siña hiba un bida simpel, liber di e carganan adicional di satisfaccion desenfrena di deseonan—sea cual sea e deseonan ei—ta exigi forsa di boluntad y dominio  propio. Sinembargo, e ta un les cu ta bale la pena pa nos siña.

12, 13. (a) Den ki manera reunionnan cristian tin di aber cu dominio propio? (b) Riba ki otro tereno nos tin cu cultiva dominio propio?

¹² Ora nos ta asisti na reunion-, asamblea- y congresonan cristian tambe nos tin mester di un cierto grado di dominio propio. Por ehempel, e cualidad ei ta necesario pa nos no laga nos mente dual durante e programa. (Proverbionan 1:5) Kisas nos mester di dominio propio pa nos no stroba otro hende door di sinta fluister cu esnan sinta banda di nos en bes di presta pleno atencion na e orado. Podise e ta exigi dominio propio tambe pa ahusta nos programa pa nos por yega na tempo. Ademas, nos lo por tin mester di dominio propio pa aparta tempo pa prepara pa reunion y despues participa den nan.

¹³ Eherciendo dominio propio den cosnan chikito ta duna nos mas forsa pa domina nos mes den cosnan grandi. (Lucas 16:10) Pesei, ta hopi bon pa nos disiplina nos mes pa lesa e Palabra di Dios y publicacionnan biblico riba un base regular, studia nan y medita riba loke nos ta siña. Tambe ta masha sabi di nos parti pa disiplina nos mes relaciona cu trabou-, amistad-, actitud- y custumbernan personal cu no ta bon, of disiplina nos mes pa bisa no na actividadnan cu lo por horta tempo precioso for di nos sirbishi di Dios. Kedando ocupa den e sirbishi di Yehova ta siguramente un bon proteccion contra cosnan cu lo por kita nos for di e paradijs spiritual di Yehova su congregacion mundial.

Bira Madura Mediante Dominio Propio

14. (a) Con mucha mester siña eherce dominio propio? (b) Kico por ta e beneficionan ora mucha ta siña eherce dominio propio for di tempran den bida?

¹⁴ Baby resien naci no ta famoso pa nan dominio propio. Un panfleta di expertonan den comportacion di mucha ta splica: “Un yiu no ta haya dominio propio automaticamente of diripiente. Baby y mucha chikito tin mester di e guia y apoyo di nan mayornan pa cuminsa cu e proceso di siña dominio propio. . . . Cu mayornan guiando e proceso, e yiu su dominio propio ta aumenta den transcurso di su añanan escolar.” Un estudio di muchanan di cuater aña a revela cu esnan cu a siña eherce un midi di dominio propio “por lo general a crece bira teenagernan miho balansa, mas popular, aventurero, cu confiansa propio y confiabel.” Esnan cu no a cuminsa siña e les aki  “tawatin mas chens di ta muchanan solitario, cabesura y cu ta frustra lihe. Nan tawata entrega bou di stress y a evita desafio.” Claramente anto, pa un mucha bira un adulto balansa, e mester siña eherce dominio propio.

15. Kico un falta di dominio propio ta indica, y esei ta na contraste cu cua meta cu ta ser describi den Bijbel?

¹⁵ Di igual manera, pa nos por bira cristiannan madura, nos tin cu siña desplega dominio propio. Un falta di esei ta indica cu ainda nos ta un baby spiritual. Bijbel ta curasha nos pa ‘madura den nos pensamento.’ (1 Corintionan 14:20) Nos meta ta pa “yega na e unidad di fe y di e conocemento di e Yiu di Dios, na bira un homber madura, na e midi di e estatura di e plenitud di Cristo.” Dicon? “Pa nos no ta mucha mas, tira p’aki p’aya door di olanan, y hiba door di tur biento di doctrina, door di triki di hende, door di astucia den trahamento di plan engañoso.” (Efesionan 4:13, 14) Claramente anto, siña eherce dominio propio ta esencial pa nos spiritualidad.

Cultivando Dominio Propio

16. Con Yehova ta percura yudansa?

¹⁶ Pa cultiva dominio propio, nos tin mester di yudansa dibino, y e ta disponibel. E Palabra di Dios, mescos cu un spiel perfecto, ta mustra nos na unda nos tin cu haci cambionan personal, y ta percura conseho con pa hacie. (Santiago 1:22-25) Tambe nos tin un hermandad amoroso cu ta cla pa duna un man. Ancianonan cristian ta mustra comprension door di ofrece yudansa personal. Yehova mes ta duna nos libremente di su spirito santo si nos pidi p’e den oracion. (Lucas 11:13; Romanonan 8:26) Pesei, laga nos uza e percuracionnan aki cu goso. E sugerencianan na pagina 21 lo por yuda.

17. Ki animacion Proverbionan 24:16 ta duna nos?

¹⁷ Ta un gran consuelo pa sa cu Yehova ta aprecia masha e esfuerso cu nos ta haci pa agrad’e! Esaki mester motiva nos pa sigui haci esfuerso pa haya mas dominio propio. Maske cuanto biaha nos trompica, nunca nos no mester stop di haci esfuerso. “Un hende husto ta cai shete bes, y ta lanta atrobe.” (Proverbionan 24:16) Cada biaha cu nos logra un victoria, nos tin motibo pa ta contento cu nos mes. Nos por tin sigur tambe cu Yehova ta contento cu nos. Un Testigo a conta cu prome cu el a dedica su bida na Yehova, cada biaha cu el a logra pasa un siman sin huma, e tawata recompensa su mes door di cumpra algo util cu e placa cu dominio propio a yud’e spar.

18. (a) Kico nos lucha pa haya dominio propio ta envolve? (b) Ki garantia Yehova ta duna?

18 Mas cu tur cos, nos mester corda cu dominio propio ta envolve nos mente y emocionnan. Nos por mira esaki na e palabra di Hesus: “Ken cu wak un mohe pa dese’e, ya caba el a comete adulterio cu ne den su curason.” (Mateo 5:28; Santiago 1:14, 15) Esun cu siña domina su mente y sintimentonan lo ripara cu ta bira mas facil pa e controla henter su curpa. Pesei laga nos fortalece nos determinacion pa no solamente evita di haci loke ta malo sino pa asta evita di pensa riba dje. Si mal deseo mester lanta, rechasa nan mesora. Nos por hui di tentacion door di haci oracion y mantene nos bista fiha riba Hesus. (1 Timoteo 6:11; 2 Timoteo 2:22; Hebreonan 4:15, 16) Segun cu nos ta haci nos best, nos lo ta siguiendo e conseho di Salmo 55:22: “Tira bo carga riba SEÑOR, y e lo sostene bo; nunca e lo no permiti pa e husto wordo movi.”

Bo Ta Corda?

• Cua te e dos maneranan cu nos tin cu eherce dominio propio?

• Kico kiermen eherce “dominio propio den tur cos”?

• Ki sugerencianan practico pa cultiva dominio propio bo a tuma nota special di dje durante nos studio?

• Na unda dominio propio ta cuminsa?

[Preguntanan di Estudio]

[Cuadro/Plachi na pagina 21]

Con pa Fortalece Dominio Propio

• Cultiv’e asta den cosnan chikito

• Medita riba su beneficionan actual y di futuro

• Remplasa loke Dios ta taha cu e cosnan cu e ta anima nos pa haci

• Rechasa mal pensamento mesora

• Yena bo mente cu pensamento spiritualmente edificante

• Acepta e yudansa cu rumannan cristian maduro por duna bo

• Evita situacionnan cu ta hinca bo den tentacion

• Resa pidi Dios su yudansa na momento di tentacion

[Plachi na pagina 18, 19]

Dominio propio ta motiva nos pa haci bon