Pregunta di Lector

Na ken Yehova a referi ora el a bisa “un di nos” na Genesis 3:22?

Ta parce cu Yehova Dios a referi na su mes y na su Yiu unigenito ora el a bisa: “E homber a bira manera un di nos, conociendo bon y malo.” (Genesis 3:22) Laga nos wak dicon.

Yehova a expresa e palabranan aki despues cu el a dicta sentencia pa e prome pareha humano. Algun hende a compronde cu e expresion “un di nos” ta un forma plural pa referi na mahestad. Un ehempel di esaki ta ora un rei humano bisa “nos no ta contento”, aunke e ta referi na su mes persona so. Sinembargo, relaciona cu Genesis 1:26 y 3:22, e experto di Bijbel Donald E. Gowan a bisa: “No tin ningun prueba den e T[estament] B[ieu] pa mayoria splicacion cu hende ta duna: ‘nos’ pa indica mahestad, . . . of pa indica cu tin mas cu un persona den un Dios. . . . Ningun di e splicacionnan aki no ta logico den caso di Genesis 3:22, ya cu aki e ta papia di ‘un di nos.’”

Ta posibel cu Yehova a referi na Satanas e Diabel, kende a cuminsa dicidi pa su mes kico ta “bon y malo”, y a influencia e prome humanonan pa haci e mesun cos? Esei no ta logico. Aki Yehova a uza e expresion “un di nos.” Satanas no tawata forma parti mas di e multitud di angelnan fiel di Yehova, pues lo e no por a wordo inclui entre esnan cu tawata na Yehova su banda.

Ta na e angelnan fiel Dios tawata referi? Nos no por bisa sigur sigur. Sinembargo, e similaridad entre e expresionnan na Genesis 1:26 y 3:22 ta duna nos un idea. Na Genesis 1:26, nos ta lesa cu Yehova a bisa: “Laga nos traha hende segun nos imagen, conforme nos semehansa.” Ta cu ken e tawata papia? Referiendo na e criatura spiritual cu a bira e homber perfecto Hesus, apostel Pablo a bisa: “E ta e imagen di e Dios invisibel, e primogenito di henter creacion. Pasobra pa medio di dje tur cos a wordo crea, tanto den e shelonan como riba tera.” (Colosensenan 1:15, 16) Si, ta parce logico cu na Genesis 1:26, Yehova tawata papia cu su Yiu unigenito, e “trahado experto”, cu tawata hunto cu ne durante creacion di shelo y tera. (Proverbionan 8:22-31) E similaridad den e expresion na Genesis 3:22 ta duna indicacion cu Yehova atrobe tawata papia cu esun cu tawatin un relacion mas intimo cu ne, su Yiu unigenito.

Aparentemente Dios su Yiu unigenito tawatin conocemento di “bon y malo.” Door cu el a pasa un periodo di tempo asina largo hunto cu Yehova y tawatin un relacion intimo cu ne, sigur e lo a siña bon bon ta cua ta e pensamento-, principio- y normanan di su Tata. Podise ta door cu Yehova tawata combenci cu su Yiu tawata na haltura di e cosnan aki y cu lo e keda leal na nan, Yehova a dun’e un cierto grado di libertad pa trata cu asuntonan sin cu Hesus mester a consulta directamente cu ne den cada situacion cu presenta. Pues te na e grado aki e Yiu lo tawatin autorisacion y capasidad pa determina kico ta bon y malo. Sinembargo, contrario na Satanas, Adam y Eva, Hesus si no a establece un norma cu ta na conflicto cu esun di Yehova.