Cultiva un Spirito di Duna

NIUN hende no ta nace cu un spirito di duna, un spirito generoso. E inclinacion natural di un baby ta pa satisface su propio deseo- y necesidadnan, sin precupa mes cu interes di esnan cu ta cuid’e. Pero cu tempo e mucha ta siña cu mundo no ta drei rond di dje so. Mester tene cuenta tambe cu otro hende, y e tin cu siña pa no tuma so, sino tambe pa duna y comparti. Un spirito di duna ta algo cu mester ser cultiva.

No ta tur hende cu ta duna—asta ora nan ta duna generosamente—tin e spirito di duna. Tin hende ta duna na un causa pa promove nan propio interesnan. Otronan kisas ta duna contribucion pa nan haya elogio di hende. Sinembargo, e dunamento cu cristiannan berdadero ta practica, ta distinto. Pues, cua ta e caracteristicanan di e dunamento cu e Palabra di Dios ta anima? Un consideracion breve di e dunamento cu cristiannan di prome siglo a practica lo contesta e pregunta ei.

Ehempelnan di Dunamento Cristian

Dunamento cristian, manera e ta wordo describi den Bijbel, por lo general tawata  consisti di ‘comparti cu otro hende’ cu tawata den berdadero necesidad. (Hebreonan 13:16; Romanonan 15:26) Esei no mester a wordo haci obliga. Apostel Pablo a skirbi: “Laga cada un haci manera el a propone den su curason; no contra su gusto of obliga; pasobra Dios ta stima esun cu ta duna cu alegria.” (2 Corintionan 9:7) Tampoco nan no tawata duna pa bista di hende. Ananias cu Safira a haci esei y el a costa nan nan bida.—Echonan 5:1-10.

E necesidad di duna a presenta ora cu hopi Hudiu y proselito di luganan leu a reuni na Herusalem pa e fiesta di Pentecoste na aña 33 di nos era. Ta einan e siguidonan di Hesus a wordo “yena cu spirito santo y a cuminsa papia den otro lenganan.” Un multitud grandi a reuni rond di nan y a tende Pedro su discurso emocionante tocante Hesucristo. Despues, e hendenan a mira con Pedro cu Huan a cura un homber lam na porta di tempel, y nan a bolbe tende Pedro papia tocante Hesus y e necesidad di repenti. Miles di nan a repenti y a ser batisa como siguido di Cristo.—Echonan, capitulo 2 y 3.

E personanan resien comberti aki kier a keda den Herusalem y ricibi mas siñansa for di e apostelnan di Hesus. Pero con e apostelnan por a atende necesidad di tur e bishitantenan ei? E relato di Bijbel ta conta nos: “Tur esnan cu tawata doño di tereno of casnan tawata bende esakinan y trece e placa di e cosnan cu nan a bende, y pone esaki na pia di e apostelnan; y e tawata wordo parti na cada un, segun su necesidad.” (Echonan 4:33-35) Di berdad e congregacion resien forma di Yerusalem tawatin un spirito di duna!

Mas despues, otro congregacionnan a demostra e mesun spirito di duna. Por ehempel, e cristiannan di Macedonia, aunke nan mes tawata pober, a duna mas di loke nan tawata por como contribucion pa nan rumannan den necesidad na Hudea. (Romanonan 15:26; 2 Corintionan 8:1-7) E congregacion di e Filipensenan a destaca den e manera cu nan a sostene Pablo su sirbishi. (Filipensenan 4:15, 16) E congregacion di Herusalem mes tawata parti cuminda tur dia pa biudanan den necesidad, y e apostelnan a apunta shete homber cualifica pa percura cu ningun biuda cu a merece yudansa a ser pasa por halto.—Echonan 6:1-6.

E congregacionnan cristian di prome siglo tawata cla pa yuda asta ora cu nan a anticipa un tempo di berans. Por ehempel, ora cu profeta Agabo a predeci cu lo bin un hamber grandi, e disipelnan den e congregacionnan di Antiokia di Siria “a determina cu, segun alcanse, cada un di nan lo a manda un contribucion como un sosten pa e rumannan cu tawata biba na Hudea.” (Echonan 11:28, 29) Ki un excelente spirito nan a demostra door di anticipa e necesidadnan di otro hende!

Kico a motiva e cristiannan di prome pa ta asina generoso y amoroso? Si, con un persona por adkiri un spirito di duna? Nos por siña hopi door di considera brevemente e ehempel di Rei David.

David Su Apoyo Generoso na Adoracion Berdadero

Pa casi 500 aña, e arca di aliansa (arca di pacto)—un caha sagrado cu a representa e presencia di Yehova—no tawatin un luga permanente di sosiego. Nan tawatin e den un tent, of tabernakel, cu nan a hiba di un luga pa otro durante e tempo cu Israel a dual den desierto y tambe despues ora nan a drenta den e Tera Priminti. Rei David tawatin masha gana di saca e arca for di e tent caminda nan a ten’e y traha un cas apropiado pa Yehova cu lo a contene e arca sagrado. Papiando cu profeta Natan, David a bisa: “Mira, ami ta biba den un cas di palo di seda, ma e arca di e aliansa di SEÑOR ta bou di cortina.”—1 Cronicanan 17:1.

Sinembargo, David tawata un homber di guera. Pesei Yehova a decreta cu ta su yiu Salomon ta esun cu, durante un reinado  pacifico, lo traha e tempel pa pone e arca di aliansa aden. (1 Cronicanan 22:7-10) Sinembargo, esaki no a frena David su spirito di duna. El a organisa un grupo grandi di trahado y a cuminsa percura pa e materialnan cu lo a wordo uza den construccion di e tempel. Despues el a bisa Salomon: “Mi a prepara pa e cas di SEÑOR shen mil talento di oro y un miyon talento di plata, y brons y hero cu no por wordo pisa, pasobra nan ta na cantidad grandi; tambe mi a prepara palo y piedra.” (1 Cronicanan 22:14) Pero David no tawata satisfecho cu esei, y for di su fortuna personal, el a contribui cu oro y plata cu awe lo a bal mas cu 1.200.000.000 dollar. E prinsnan tambe a contribui generosamente. (1 Cronicanan 29:3-9) David sigur a desplega un spirito generoso, un spirito di duna!

Kico a motiva David pa duna asina generosamente? El a realisa cu tur loke el a haya y logra tawata debi na e bendicion di Yehova. El a reconoce den oracion: “O SEÑOR nos Dios, tur e abundancia aki cu nos a provee pa traha un cas pa bo nomber santo ta bin for di bo man, y tur cos ta di bo. Como mi sa, o mi Dios,  cu bo ta scudriña curason y cu bo tin delicia den rectitud, ami, den e integridad di mi curason, a ofrece tur e cosnan aki boluntariamente. Y awor cu goso mi a mira bo pueblo, cu ta aki presente, duna nan ofrendanan boluntariamente na bo.” (1 Cronicanan 29:16, 17) David a considera su relacion cu Yehova como algo masha balioso. El a reconoce cu mester sirbi Dios ‘cu henter curason y cu un alma boluntario’, y el a haya goso haciendo esei. (1 Cronicanan 28:9) E mesun cualidadnan aki tambe a motiva e cristiannan di prome siglo pa desplega un spirito di duna.

Yehova Ta e Dunado di Mas Grandi

Yehova ta nos miho ehempel di dunamento. E ta asina amoroso y interesa den hende cu “e ta haci su solo sali riba mal hende y riba bon hende, y ta laga awa yobe riba hende husto y riba hende inhusto.” (Mateo 5:45) Na henter humanidad e ta duna “bida y rosea y tur cos. ” (Echonan 17:25) En berdad, manera disipel Santiago a señala, “tur bon regalo y tur don perfecto ta for di ariba, y ta baha bin for di e Tata di lusnan.”—Santiago 1:17.

E regalo di mas grandi cu Yehova a duna nos tawata di manda su “Yiu unigenito, pa  ken cu kere den dje no bai perdi, ma tin bida eterno.” (Huan 3:16) Ningun hende no por pretende cu nan ta merece un regalo asina, “pasobra tur a peca y ta falta e gloria di Dios.” (Romanonan 3:23, 24; 1 Huan 4:9, 10) Cristo su rescate ta e base y e medio pa Dios su “don inexplicabel”, esta, “e gracia sobreabundante di Dios.” (2 Corintionan 9:14, 15) Como cu Pablo tawata masha gradicido pa e regalo aki di Dios, el a haci e ‘dunamento di testimonio di e evangelio di e gracia di Dios’ e trabou principal den su bida. (Echonan 20:24) El a reconoce cu e boluntad di Dios tawata pa “tur [“clase di”, NW] hende wordo salba y yega na conocemento di e berdad.”—1 Timoteo 2:4.

Awe Dios su boluntad ta ser cumpli mediante e gran obra di predica y siña hende cu awor a extende te na 234 pais rond mundo. Hesus a predeci e expansion aki ora el a bisa: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14) Si, “e evangelio mester wordo predica prome na tur nacion.” (Marco 13:10) Aña pasa mas cu seis miyon proclamado di e bon nobo a dedica 1.202.381.302 ora na e trabou aki y a conduci mas cu 5.300.000 studio di Bijbel. Siendo cu bida di hende ta na peliger, e trabou aki di siña hende e bon nobo ta sumamente importante.—Romanonan 10:13-15; 1 Corintionan 1:21.

Miyones di publicacion—entre otro, Bijbel, buki y foyeto—ta ser imprimi tur aña pa yuda esnan cu tin hamber pa e berdadnan di Bijbel. Tambe mas cu mil miyon ehemplar di e revistanan Toren di Vigilancia y Spierta! ta ser produci. Segun cu hende ta reacciona riba e bon nobo, mas y mas Salon di Reino y Salon di Asamblea di Testigonan di Yehova, cu ta sirbi como centronan di educacion biblico, ta ser construi. Tur aña asambleanan di sircuito, dianan special di asamblea y tambe congresonan di districto, ta ser organisa. Ademas, continuamente tin e entrenamento di misionero, di superintendente biahero, di anciano y sirbido ministerial. Nos ta masha gradicido na Yehova cu e ta percura pa tur e areglonan aki via e “esclabo fiel y prudente.” (Mateo 24:45-47) Pesei cu amor nos ta expresa nos gratitud na dje!

Con pa Demostra Nos Gratitud na Yehova

Financiamento di tur e cosnan aki ta sosode completamente door di contribucionnan boluntario, mescos cu tawata e caso cu construccion di e tempel y ora cu nan a satisface e necesidadnan di e congregacionnan cristian di prome siglo. Sinembargo, nos mester corda cu ningun hende no por haci Yehova rico. E ta Doño di tur cos. (1 Cronicanan 29:14; Hageo 2:8) Pues anto, contribucion ta un prueba di nos amor pa Yehova y di nos deseo pa promove adoracion berdadero. E gestonan aki di generosidad, segun Pablo, ta produci “gradicimento na Dios.” (2 Corintionan 9:8-13) Yehova ta anima tal dunamento pasobra esei ta demostra cu nos tin e spirito di duna y un bon curason pa cu Yehova. Hende generoso cu ta depende riba Yehova lo haya su bendicion y nan lo prospera spiritualmente. (Deuteronomio 11:13-15; Proverbionan 3:9, 10; 11:25) Hesus a sigura nos cu esei lo trece felicidad, bisando: “Ta mas bendiciona pa duna cu pa ricibi.”—Echonan 20:35.

Cristiannan cu tin e spirito di duna no ta djis sinta warda te ora tin un necesidad. Mas bien, nan ta busca oportunidadnan pa “haci bon na tur hende, y specialmente na esnan cu ta di [nan] famia di fe.” (Galationan 6:10) Pa stimula generosidad cu ta agrada Dios, Pablo a skirbi: “No laga di haci bon y di comparti cu otro; pasobra sorto di sacrificionan asina ta agrada Dios.” (Hebreonan 13:16) Yehova Dios ta keda masha contento ora nos ta uza nos pocesionnan—nos tempo, forsa y placa—pa yuda otro hende y pa adelanto di adoracion berdadero. Di berdad Yehova stima un spirito generoso.

[Cuadro/Plachi na pagina 28, 29]

Maneranan Cu Algun Hende Ta Scohe pa Duna

CONTRIBUCION PA E OBRA MUNDIAL

Hopi hende ta aparta, of presupuesta, un montante cu nan ta pone den e cahanan di contribucion marca: “Contribucion pa e Obra Mundial—Mateo 24:14.”

Tur luna congregacionnan ta manda e montantenan aki pa e sucursal di Testigonan di Yehova cu ta sirbi nan respectivo pais. Tambe por manda donacion boluntario di placa directamente na Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, of n’e oficina di sucursal cu ta sirbi bo pais. Si manda cheque, nan mester ta na nomber di “Watch Tower.” Tambe por haci donacion di hoya of otro cos di balor. Un carta breve cu ta declara cu esakinan ta un regalo incondicional mester compaña e contribucionnan aki.

AREGLO DI DONACION CONDICIONAL

Por haci donacion di placa via un areglo special den cua, riba peticion di e dunado, lo por debolbe e donacion na dje. Pa mas informacion, por fabor, tuma contacto cu e Office of the Secretary and Treasurer na e adres menciona ariba.

DONACION PLANIA

Ademas di regalo incondicional di placa y donacion condicional di placa, tin otro metodonan di duna na beneficio di e sirbishi di Reino mundial. Esakinan ta inclui:

Seguro: Por nombra Sosiedad Watch Tower como beneficiario di un polisa di seguro di bida of un plan di pension.

Cuenta di Banco: Por duna Sosiedad Watch Tower derecho di uza cuenta di banco, time deposit of cuenta di pension personal, of derecho di cobra nan despues di morto di nan doño, na harmonia cu rekisitonan bancario local.

Accion y Bono: Por haci donacion di accion y bono na Sosiedad Watch Tower como un regalo incondicional.

Propiedad: Por haci donacion na Sosiedad Watch Tower di propiedad cu por ser bendi, sea como regalo incondicional of bou di e condicion cu e dunado por sigui biba den dje te na su morto. Tuma contacto cu e oficina di sucursal di bo pais prome cu traha e acta pa traspasa cualkier propiedad.

Testament y Trust: Por nombra Sosiedad Watch Tower como heredero di propiedad of placa via un testament legal, of por nombra Sosiedad Watch Tower como beneficiario di un areglo di trust. Un trust cu ta beneficia un organisacion religioso por duna cierto bentahanan di belasting.

Pa mas informacion, bo por tuma contacto cu Sosiedad Watch Tower, via carta of telefon, na e adres indica akibou, of na e oficina di Testigonan di Yehova cu ta sirbi bo pais.

Sosiedad Watch Tower

P.O. Box 4708 Seroe Loraweg 142A

Curaçao, N.A.

Telefon: (599-9) 461-7528

[Plachi na pagina 26]

Kico a motiva e cristiannan di prome siglo pa ta generoso?