“Mi A Haya Amistad, Amor y Atencion”

“NA ESAKI tur hende lo sa cu boso ta mi disipel, si boso tin amor un pa otro.” (Huan 13:35) Manera Hesus a bisa, amor a bira e marca di identificacion di e hermandad cristian di prome. Tertuliano, kende a skirbi mas cu shen aña despues di e morto di Cristo, a cita loke observadonan a bisa: ‘Mira con nan ta stima otro y con nan ta asta dispuesto pa muri pa otro.’

Ainda ta posibel pa haya e clase di amor ei den mundo? Si. Tuma por ehempel, un carta cu e oficina di sucursal di Testigonan di Yehova na Brazil a ricibi. Un señora cu yama Marília a skirbi:

“Tempo cu mi mama, cu ta un Testigo di Yehova, tawata biba na Villa Mercedes, Argentina, el a haya artritis degenerativo cu a lag’e keda lam di su heup bai abou. Durante e prome ocho lunanan di su enfermedad, ta e Testigonan na Villa Mercedes a cuid’e cu amor y interes. Tur cos nan a haci p’e. Nan a limpia su cas, cushina p’e, y asta ora e tawata den hospital, Mama semper tawatin un hende cu ne, di dia y anochi.

Entretanto ami cu Mama a bolbe Brazil bek, caminda te ainda e ta recuperando di su malesa. E Testigonan cu tin caminda nos ta biba awor ta haci tur loke nan por pa yuda Mama recupera.”

Marília ta conclui su carta: “Mi tin cu bisa si cu mi mes no ta un Testigo, pero mi a haya amistad, amor y atencion serca e Testigonan.”

Si, ainda tin hende cu ta haci cos motiva pa berdadero amor cristian. Ora nan haci esei nan ta demostra cuanto poder e siñansanan di Hesus por tin riba bida di hende.