Mohenan Cristian Fiel—Adoradonan Precioso di Dios

“Ser atractivo ta engañoso y bunitesa ta banidad, ma un mohe cu ta teme SEÑOR, esei lo wordo elogia.”—PROVERBIONAN 31:30.

1. Kico ta Yehova su punto di bista di beyesa na comparacion cu esun di mundo?

MUNDO ta pone hopi enfasis riba aparencia exterior, specialmente serca hende mohe. Sinembargo, Yehova ta interesa principalmente den e persona interior, cu segun cu su edad ta subi por bira asta mas bunita. (Proverbionan 16:31) Pesei Bijbel ta anima hende mohe: “No laga boso dornamento ta di pafo so—vlechtmento di cabei, bistimento di hoya di oro, of bistimento di paña luhoso; ma lag’e ta e persona scondi di e curason, cu e calidad incoruptibel di un spirito suave y keto, locual ta precioso den bista di Dios.”—1 Pedro 3:3, 4.

2, 3. Con hende mohe a contribui na e adelanto di e bon nobo den prome siglo, y con esaki a ser profetisa?

² Hopi hende mohe menciona den Bijbel a desplega tal spirito digno di elogio. Den prome siglo, algun di nan tawatin e privilegio di sirbi Hesus y su apostelnan. (Lucas 8:1-3) Mas despues, mohenan cristian a bira evangelisadonan celoso; otronan a duna apoyo balioso na hombernan cristian cu tawata hiba delantera, incluso na apostel Pablo; y algun a demostra hospitalidad excepcional, asta poniendo nan cas disponibel pa tene reunionnan di congregacion.

³ E echo cu Yehova lo a uza hende mohe den un manera fenomenal asina pa cumpli cu su proposito a ser profetisa den e Scritura. Por ehempel, Joel 2:28 y 29 a predeci cu tanto homber como mohe, hoben y bieu, lo a ricibi spirito santo y participa den plamamento di e bon nobo di Reino. E profecia ei a cuminsa cumpli na Pentecoste di aña 33 di nos era. (Echonan 2:1-4, 16-18) Algun mohe ungi pa spirito a ricibi donnan milagroso, manera e don di profetisa. (Echonan 21:8, 9) Mediante nan celo den sirbishi, e gran ehersito spiritual aki di rumannan mohe fiel a contribui na e  plamamento rapido di cristianismo den prome siglo. De echo, rond di aña 60, apostel Pablo a skirbi cu e bon nobo a ser “proclama den henter creacion bou di shelo.”—Colosensenan 1:23.

Elogia pa Nan Curashi, Celo y Hospitalidad

4. Dicon Pablo tawatin bon motibo pa elogia varios hende mohe di e congregacion cristian di prome siglo?

⁴ Apostel Pablo mes tawata un persona cu masha aprecio pa e sirbishi cu algun hende mohe en particular a efectua, mescos cu superintendentenan cristian djawe ta duna gran balor na e sirbishi efectua door di rumannan mohe celoso. Entre e mohenan cu Pablo a menciona na nomber tawatin “Trifena y Trifosa, trahadonan den Señor”, y “Persida, e ruman stima, kende a traha duro den Señor.” (Romanonan 16:12) Pablo a skirbi cu Evodia (Euodias) y Sintike a “comparti [su] lucha pa causa di evangelio.” (Filipensenan 4:2, 3) Pricila, hunto cu su esposo Akila, tambe a sirbi hunto cu Pablo. Pricila cu Akila asta “a risca nan bida” pa Pablo, locual a motiv’e pa skirbi: “No solamente ami ta duna gradicimento, ma tambe tur e iglesianan di e paganonan.”—Romanonan 16:3, 4; Echonan 18:2.

5, 6. Den ki maneranan Pricila a pone un bon ehempel pa rumannan mohe awe?

⁵ Kico a contribui na Pricila su celo y curashi? Na Echonan 18:24-26 nos ta haya un relato cu ta indica ta kico a contribui na esei. Einan nos ta lesa cu el a apoya su esposo pa yuda pone Apolos, un gran orado, al dia cu e berdadnan revela. Ta bisto anto cu Pricila tawata un studiante diligente di e Palabra di Dios y di e siñansa di e apostelnan. Como resultado, el a desaroya cualidadnan excelente cu a hacie precioso pa Dios y pa su casa y un miembro balioso di e congregacion di prome. Awe e tantisimo rumannan mohe cristian trahado cu diligentemente ta studia Bijbel y ta tuma di e alimento spiritual cu Yehova ta percura mediante ‘e mayordomo fiel’, tambe ta ser considera precioso.—Lucas 12:42.

⁶ Akila cu Pricila tawata excepcionalmente hospitalario. Pablo a keda den nan cas ora cu e tawata traha hunto cu nan na Corinto den e negoshi di traha tent. (Echonan 18:1-3) Ora cu e pareha a muda bai Efeso y despues Roma, nan a sigui mustra hospitalidad cristian, asta poniendo nan cas disponibel pa tene reunionnan di congregacion. (Echonan 18:18, 19; 1 Corintionan 16:8, 19) Ninfas y Maria, mama di Huan Marco, tambe a habri nan cas pa tene reunionnan di congregacion.—Echonan 12:12; Colosensenan 4:15.

Un Pocesion Precioso Awe

7, 8. Ki registro di sirbishi sagrado digno di elogio hopi mohe cristian tin awe, y di kico nan por ta sigur?

⁷ Mescos cu den prome siglo, mohenan cristian djawe ta hunga un papel clave den e cumplimento di Dios su proposito, specialmente den e obra di evangelisa. Y ki un excelente registro e rumannan mohe aki tin! Considera e ehempel di Gwen, kende a sirbi Yehova fielmente pa mas cu 50 aña te na su morto na 2002. Su esposo a bisa: “Gwen su celo como evangelisado tawata bon conoci den nos stad. P’e, tur hende tawata un posibel candidato pa ricibi Yehova su amor y promesanan. Su lealtad na Dios, na su organisacion y na nos famia—pa no papia mes di su animacion amoroso ora nos tawata desanima—tawata un gran apoyo pa mi cu e muchanan atrabes di nos bida hunto, un bida yen cu a duna nos hopi satisfaccion. E ta haci hopi falta.” Gwen cu su esposo tawatin 61 aña casa.

⁸ Dies di miles di ruman mohe cristian, soltero y casa, ta sirbi como pionero y misionero, kedando satisfecho cu e necesidadnan di bida segun cu nan ta plama e mensahe di Reino den teritorionan cu ta varia di stadnan druk te na regionnan aisla. (Echonan 1:8) Hopi di nan a keda sin haya yiu of sin un cas di nan mes, pa nan por a sirbi Yehova mas plenamente. Tin di  nan ta duna apoyo leal na nan esposo cu ta sirbi como superintendente biahero, mientras cu miles di ruman mohe ta sirbi den casnan di Betel rond mundo. No tin duda cu e mohenan aki cu ta desplega sacrificio propio, ta parti di “e rikesa di tur nacion” cu ta yena e cas di Yehova cu gloria.—Hageo 2:7.

9, 10. Con algun miembro di famia a expresa nan aprecio pa e excelente ehempel cu esposa- y mamanan cristian ta pone?

⁹ Claro cu hopi ruman mohe cristian tin responsabilidadnan di famia cu nan mester atende; y toch nan ta mantene interesnan di Reino na prome luga. (Mateo 6:33) Un ruman mohe pionero soltero a skirbi: “Mi mama, door di su fe firme y excelente ehempel, a hunga un papel clave den e echo cu ami a bira un pionero regular. Eigenlijk e tawata un di mi miho partnernan pionero.” Un esposo a bisa di su casa, cu ta mama di cinco yiu mohe adulto: “Nos cas semper tawata limpi y na ordo. Bonnie a ten’e simpel y sin potoshi ya asina nos famia por a consentra riba actividadnan spiritual. E manera cuidadoso cu el a maneha nos asuntonan financiero a haci posibel cu mi por a traha part time pa 32 aña, y asina dedica mas tempo na nos famia y na asuntonan spiritual. Tambe mi casa a siña e muchanan e balor di traha duro. Palabranan di elogio so mi tin p’e.” Awe Bonnie cu su casa ta sirbi na e sede mundial di Testigonan di Yehova.

¹⁰ Un esposo a skirbi relaciona cu su casa, mama di yiunan grandi caba: “E cualidadnan cu mas mi ta admira den Susan ta su amor intenso pa Dios y pa hende, y tambe su comprension, empatia y honestidad. Semper e tawata di opinion cu Yehova merece lo miho cu nos por dun’e, un principio cu e ta aplica na su mes como sirbido di Dios y tambe como mama.” Cu e apoyo di su casa, e esposo aki por a acepta varios privilegionan spiritual, entre otro, sirbi como anciano, pionero, superintendente di sircuito suplente y miembro di e Comite di Contacto cu Hospital. Mohenan asina ta masha precioso pa nan casa, pa nan rumannan cristian, y mas cu tur, pa Yehova.—Proverbionan 31:28, 30.

Mohenan Precioso sin Casa

11. (a) Con Yehova a revela su precupacion pa mohenan fiel, specialmente pa esnan cu ta biuda? (b) Biuda cristian y otro ruman mohe fiel cu no tin casa por ta sigur di kico?

¹¹ Hopi bes Yehova a expresa su precupacion pa e bienestar di biudanan. (Deuteronomio 27:19; Salmo 68:5; Isaias 10:1, 2) E no a cambia. Te ainda e ta profundamente interesa no solamente den biuda, sino tambe den mama soltero y hende mohe cu ta soltero pasobra nan a scohe esei of pasobra nan no a haya un casa cristian apropiado. (Malakias 3:6; Santiago 1:27) Si bo ta entre e mohenan cu ta sirbi Yehova fielmente sin e apoyo di un casa cristian, bo por ta sigur cu bo ta precioso den bista di Dios.

12. (a) Con algun ruman mohe cristian ta demostra nan fieldad na Yehova? (b) Ki sintimentonan algun di nos rumannan mohe ta lucha cu ne?

¹² Por ehempel, tuma nos rumannan mohe cristian cu no a casa pasobra fielmente nan ta obedece Yehova su conseho pa casa “basta ta den Señor.” (1 Corintionan 7:39; Proverbionan 3:1) E Palabra di Dios ta sigura nan: “[Yehova] ta fiel pa esun cu ta fiel.” (2 Samuel  22:26, Beibel na papiamentu koriente) Sinembargo, pa hopi di nan ta dificil pa keda soltera. Un ruman mohe a bisa: “Mi ta dicidido pa casa solamente den Señor, pero varios biaha mi tawata cu awa na wowo segun cu mi ta mira mi amiganan ta casa cu hombernan cristian maraviyoso, mientras cu ami ta keto bai mi so.” Un otro ruman mohe a remarca: “Mi a sirbi Yehova pa 25 aña. Mi ta determina pa keda fiel na dje, pero hopi bes soledad ta haci mi tristo.” El a agrega: “Rumannan manera mi ta anhela pa haya animacion.” Con nos por yuda rumannan fiel asina?

13. (a) Kico nos ta siña for di e ehempel di esnan cu a bishita e yiu mohe di Jefte? (b) Den ki maneranan mas nos por mustra interes pa rumannan mohe soltero den nos congregacion?

¹³ Un ehempel di pasado ta siña nos un manera cu nos por yuda. Ora cu e yiu mohe di Jefte a renuncia su oportunidad di tin un casa, e pueblo a realisa cu el a haci un sacrificio. Kico nan a haci pa curash’e? “Di aña pa aña e yiu mohenan di Israel tawata bai pa duna encomendacion na e yiu mohe di Jefte e Galadita, cuater dia den e aña.” (Huesnan 11:30-40, NW) Di igual manera, nos mester duna encomendacion sinsero na rumannan mohe soltero cu fielmente ta obedece e lei di Dios. * Cua ta un otro manera cu nos por mustra nos interes? Den nos oracionnan nos mester pidi Yehova apoya e rumannan fiel y stima ei pa nan sigui fielmente den nan sirbishi. Nan ta merece di haya e siguransa cu Yehova y henter e congregacion cristian ta stima nan y aprecia nan masha hopi.—Salmo 37:28.

Con Mayornan Soltera Ta Logra Exito

14, 15. (a) Dicon cristiannan cu ta mama soltero mester acudi na Yehova pa yudansa? (b) Con mayornan soltera por actua na harmonia cu nan oracion?

¹⁴ Mohenan cristian cu ta mama soltero tambe ta confronta hopi dificultad. Sinembargo, nan por acudi na Yehova pa yuda nan lanta nan yiunan na harmonia cu principionan biblico. Ta berdad cu ora bo ta un mayor soltera, bo no por ta mama y tata den tur cos. No obstante, Yehova lo yuda bo atende e tantisimo responsabilidadnan cu bo tin si bo pidi su yudansa cu fe. Pa ilustra esaki: Imagina cu bo tin un saco pisa cu comestibel pa hiba na bo apartamento cu ta keda te ariba den un edificio di varios piso. Lo bo lucha subi trapi si tin un lift den e edificio? Claro cu no! Di igual manera, no purba carga carganan emocional pisa bo so, mientras cu bo por pidi Yehova yuda bo. De echo, e ta invita bo pa acudi na dje. Salmo 68:19 ta bisa: “Bendiciona sea Señor, e Dios di nos salbacion, kende dia tras dia ta carga nos carganan.” Asina tambe 1 Pedro 5:7 ta invita bo pa tira tur bo precupacionnan riba Yehova ‘pasobra e ta percura pa bo.’ Pesei ora problema y precupacion ta un peso  pa bo, tira bo carga riba bo Tata celestial, y haci esei “sin stop.”—1 Tesalonicensenan 5:17; Salmo 18:6; 55:22.

¹⁵ Por ehempel, si bo ta mama, sin duda bo ta precupa pa e influencia cu otro muchanan por tin riba bo yiunan na scol of pa e pruebanan di integridad cu nan kisas tin cu confronta. (1 Corintionan 15:33) Esakinan ta motibonan valido pa precupa. Pero tambe nan ta asunto pa oracion. De echo, pakico bo no ta haci oracion cu bo yiunan tocante e cosnan ei prome cu nan sali pa bai scol, podise despues di a considera e texto di dia hunto? Oracion sinsero y spesifico por haci un impresion profundo riba mente di mucha. Mas cu tur cos, bo ta pone bo mes den fila pa haya e bendicion di Yehova ora cu pacientemente bo ta haci esfuerso pa inculca su Palabra den curason di bo yiunan. (Deuteronomio 6:6, 7; Proverbionan 22:6) Corda cu “e wowonan di SEÑOR ta riba e hustonan, y su horeanan ta atento pa scucha nan oracion.”—1 Pedro 3:12; Filipensenan 4:6, 7.

16, 17. (a) Kico un yiu homber a bisa di e amor cu su mama a demostra? (b) Con e mama su punto di bista spiritual a influencia su yiunan?

¹⁶ Considera e ehempel di Olivia, un mama di seis yiu. Su esposo incredulo a bandona e famia un poco despues cu nan ultimo yiu a nace, pero mesora Olivia a tuma e responsabilidad di educa su yiunan den e caminda di Dios. Olivia su yiu homber Darren, cu awor tin 31 aña y ta sirbi como anciano cristian y pionero, tawatin rond di 5 aña e tempo ei. Pa colmo Darren a haya un problema serio di salu cu te awe ta molesti’e, y cu a duna Olivia mas ansiedad. Reflexionando riba su infancia, Darren a skirbi: “Ainda mi ta corda con mi tawata sinta riba mi cama di hospital sperando ansiosamente riba Mama. Tur dia e tawata bin sinta serca mi y lesa Bijbel pa mi. Caba e ta canta e cantica ‘Danki, Yehova.’ * Te awe, esei ta mi cantica di Reino preferi.”

¹⁷ Olivia su confiansa den Yehova y amor p’e a contribui na su exito como mama soltero. (Proverbionan 3:5, 6) Su actitud excelente a keda refleha den e metanan cu el a anima su yiunan pa pone. Darren a bisa: “Semper Mama a curasha nos pa alcansa e meta di sirbishi di tempo completo. Como resultado, ami y cuater di mi cinco ruman mohenan a drenta den sirbishi di tempo completo. Sinembargo, Mama nunca no a broma tocante e cosnan aki cu otro hende. Mi ta haci mi best pa imita su cualidadnan maraviyoso.” Ta cierto cu no ta tur mucha ta bira sirbido di Dios ora nan bira grandi, manera e yiunan di Olivia. Pero ora un mama haci su best pa biba segun principionan  biblico, e por tin sigur cu e ta haya Yehova su guia y sosten amoroso.—Salmo 32:8.

18. Con nos por demostra cu nos ta aprecia e areglo di e congregacion cristian cu Yehova a percura?

¹⁸ Gran parti di e apoyo cu Dios ta percura ta mediante e congregacion cristian, cu su programa regular di alimentacion spiritual, su hermandad cristian y su ‘donnan den hende’ cu ta spiritualmente maduro. (Efesionan 4:8) Ancianonan fiel ta traha duro pa edifica tur ruman den congregacion, dunando atencion special na e necesidadnan di “werfano y biuda den nan afliccion.” (Santiago 1:27) Pesei keda serca di e pueblo di Dios, y nunca isola bo mes.—Proverbionan 18:1; Romanonan 14:7.

E Bunitesa di Sumision

19. Dicon sumision di esposa no ta nifica cu e ta inferior, y cua ehempel biblico ta apoya esaki?

¹⁹ Yehova a crea e mohe como un complemento di e homber. (Genesis 2:18) Pesei sumision di e esposa di ningun manera ta nifica cu e ta inferior. Mas bien, esei ta duna dignidad na un hende mohe, y ta permitie uza su tantisimo don- y talentonan na harmonia cu e boluntad di Dios. Proverbionan capitulo 31 ta describi e varios actividadnan di un esposa birtuoso of capas den Israel di antiguedad: el a yuda esnan den necesidad, a planta cunucu di wendruif y a cumpra tereno. Si, “curason di su esposo ta confia den dje, y su esposo . . . no [tawatin] falta di ganashi.”—Versiculo 11, 16, 20.

20. (a) Con un mohe cristian mester mira su talento- of donnan cu Dios a dun’e? (b) Ki cualidadnan excelente Ester a desplega, y debi na nan con Yehova por a uz’e?

²⁰ Un mohe modesto, temeroso di Dios, no ta halsa su mes ambiciosamente ni ta competi cu su esposo. (Proverbionan 16:18) E no ta busca realisacion personal primordialmente mediante actividadnan di mundo, sino mas bien e ta uza e donnan cu Dios a dun’e pa principalmente sirbi otro persona: su famia, rumannan cristian, biciña, y mas cu tur, Yehova. (Galationan 6:10; Tito 2:3-5) Considera e ehempel biblico di Reina Ester. Aunke e tawata fisicamente bunita, e tawata modesto y sumiso. (Ester 2:13, 15) Ora el a casa, el a demostra respet profundo pa su casa, Rei Asuero, distinto for di Vasti, e prome esposa di Rei. (Ester 1:10-12; 2:16, 17) Respetuosamente Ester a somete su mes tambe na e opinion di su primo di mas edad, Mardokeo, riba asuntonan apropiado, asta despues cu el a bira reina. Pero Ester no tawata un mohe di caracter debil! Cu curashi el a desenmascara Haman, un homber poderoso y cruel cu a traha complot pa destrui e Hudiunan. Yehova a uza Ester na un manera poderoso pa conserva Su pueblo.—Ester 3:8–4:17; 7:1-10; 9:13.

21. Con un mohe cristian por bira mas y mas precioso pa Yehova?

²¹ Ta bisto anto cu tanto den pasado como awe, mohenan deboto na Dios a demostra nan debocion exclusivo na Yehova y su adoracion. Pesei, mohenan temeroso di Dios ta precioso den bista di Yehova. Rumannan mohe cristian, laga Yehova forma boso progresivamente mediante su spirito den un “instrumento” mas y mas deseabel, uno “prepara pa tur bon obra.” (2 Timoteo 2:21; Romanonan 12:2) E Palabra di Dios ta bisa di e adoradonan precioso aki: “Dun’e di e fruta di su mannan, y laga su mes obranan gab’e den e portanan di stad.” (Proverbionan 31:31) Ohala esei ta e caso cu cada un di boso.

[Nota]

Bo Ta Corda?

• Con algun mohe cristian di prome siglo a resulta di ta precioso den bista di Yehova?

• Con hopi ruman mohe den nos tempo a haci nan mes precioso den bista di Dios?

• Den ki maneranan Yehova ta apoya mamanan soltero y otro ruman mohenan cu no tin un casa?

• Con un mohe por demostra respet sinsero pa e areglo cu su casa ta su cabes?

[Preguntanan di Estudio]

[Cuadro na pagina 17]

EHEMPELNAN PA MEDITA ARIBA

Lo bo tin gana di considera algun ehempel mas di mohenan fiel cu Bijbel ta menciona? Wel, sea asina bon di lesa e textonan biblico cita akibou. Segun cu bo ta medita riba e diferente personanan menciona, purba detecta principionan cu lo bo por aplica mas plenamente den bo bida.—Romanonan 15:4.

◆ Sara: Genesis 12:1, 5; 13:18a; 21:9-12; 1 Pedro 3:5, 6.

◆ Mohenan Israelita generoso: Exodo 35:5, 22, 25, 26; 36:3-7; Lucas 21:1-4.

◆ Debora: Huesnan 4:1–5:31.

◆ Rut: Rut 1:4, 5, 16, 17; 2:2, 3, 11-13; 4:15.

◆ Mohe di Sunem: 2 Reinan 4:8-37.

◆ Mohe Cananeo: Mateo 15:22-28.

◆ Marta cu Maria: Marco 14:3-9; Lucas 10:38-42; Huan 11:17-29; 12:1-8.

◆ Tabita: Echonan 9:36-41.

◆ E cuater yiu mohenan di Felipe: Echonan 21:9.

◆ Febe: Romanonan 16:1, 2.

[Plachi na pagina 15]

Abo ta duna encomendacion na rumannan mohe soltero cu fielmente ta obedece e lei di Dios?

[Plachi na pagina 16]

Ki peticionnan spesifico por ser menciona den oracion prome cu e muchanan sali pa bai scol?