Mohenan Cu A Haci Yehova Su Curason Contento

“Cu SEÑOR recompensa bo obra, y cu bo pago sea completo for di SEÑOR.”—RUT 2:12.

1, 2. Ki beneficio nos por saca door di medita riba e ehempelnan biblico di mohenan cu a haci Yehova su curason contento?

TEMOR di Dios a pone dos mohe resisti un farao. Fe a motiva un prostituta pa risca su bida pa por proteha dos spion Israelita. Desplegando discrecion y humildad den un crisis a yuda un mohe scapa bida di hopi hende y evita cu un ungi di Yehova ta bira culpabel di dramamento di sanger inocente. Fe den Yehova Dios hunto cu un spirito di hospitalidad a impulsa un biuda y mama pa duna su ultimo cuminda na un profeta di Dios. Esakinan ta djis algun di e tantisimo ehempelnan cu tin den Bijbel di mohenan cu a haci Yehova su curason contento.

² Yehova su actitud pa cu e mohenan ei y e bendicionnan cu el a drama riba nan ta demostra cu loke mas ta agrad’e ta cualidadnan spiritual, y cu esakinan ta mas importante cu e persona su sexo. Den e mundo djawe cu ta obsesiona cu asuntonan fisico, manera aparencia y rikesa, ta dificil pa un hende duna prioridad na su spiritualidad. Pero nos por supera e dificultad ei, y awe miyones di hende mohe temeroso di Dios cu ta forma un gran parti di e pueblo di Dios ta demostra cu esei ta posibel. E mohenan cristian ei ta imita e fe, discrecion, hospitalidad y otro excelente cualidadnan cu mohenan temeroso di Dios menciona den Bijbel a demostra. Ta claro cu hombernan cristian tambe kier imita e cualidadnan cu e mohenan ehemplar di pasado a desplega. Pa mira con nos por haci esei mas plenamente, laga nos considera mas a fondo e relatonan biblico tocante e mohenan menciona den e prome paragraf.—Romanonan 15:4; Santiago 4:8.

Mohenan Cu A Resisti un Farao

3, 4. (a) Dicon Sifra y Pua a nenga di obedece Farao ora el a ordena pa mata tur yiu homber Israelita cu nace? (b) Con Yehova a recompensa e dos parteranan pa nan curashi y temor di Dios?

³ Hopi di e personanan condena pa asesinato masal durante e huicionan di Nuremberg, teni na Alemania despues di Segundo Guera Mundial, a purba hustifica e crimennan cu nan a comete door di pretende cu nan simplemente a obedece ordo di nan superiornan. Awor compara e personanan ei cu dos partera Israelita, Sifra y Pua, cu a biba den antiguo Egipto durante reinado di un farao tiranico kende su nomber no ta ser menciona. Farao tawata teme e creciente poblacion Hebreo, y pesei el a ordena e dos parteranan pa haci sigur di mata tur yiu homber Hebreo cu nace. Con e mohenan a reacciona riba e ordo abominabel ei? Nan “no tawata haci manera rei di Egipto a ordena nan, ma a laga e mucha hombernan keda na bida.” Con bin miedo di hende no a pone e mohenan aki entrega? Pasobra nan “tawata teme Dios.”—Exodo 1:15, 17; Genesis 9:6.

⁴ Si, e parteranan a tuma refugio den Yehova, y e na su turno a resulta di ta “un escudo” pa nan, y a proteha nan di e furia di Farao. (2 Samuel 22:31; Exodo 1:18-20) Pero Yehova su bendicion no a caba einan. El a recompensa Sifra y Pua cu un famia di nan mes. El a asta honra e mohenan aki door di laga nan nomber  y loke nan a haci keda registra den su Palabra inspira pa futuro generacionnan por les’e, mientras cu e nomber di e Farao a pasa pa olvido.—Exodo 1:21; 1 Samuel 2:30b; Proverbionan 10:7.

5. Con hopi mohe cristian awe ta demostra e mesun actitud cu Sifra y Pua, y con Yehova lo recompensa nan?

⁵ Tin hende mohe manera Sifra y Pua awe? Claro cu si! Tur aña, miles di mohe asina ta predica cu curashi Bijbel su mensahe salbado di bida den paisnan caminda “e decreto di rei” ta prohibi esei. Asina nan ta risca nan libertad of asta nan bida. (Hebreonan 11:23; Echonan 5:28, 29) Motiva door di amor pa Dios y pa prohimo, e mohenan balente ei no ta laga ningun hende stop nan di comparti e bon nobo di e Reino di Dios cu otro personanan. Consecuentemente, hopi mohe cristian ta lucha cu oposicion y persecucion. (Marco 12:30, 31; 13:9-13) Mescos cu den e caso di Sifra y Pua, Yehova ta plenamente conciente di e accionnan di e excelente mohenan balente ei, y lo e demostra su amor pa nan door di conserva nan nomber den su “buki di bida”, basta cu nan persevera fielmente te na fin.—Filipensenan 4:3; Mateo 24:13.

Un Ex Prostituta Ta Alegra Yehova Su Curason

6, 7. (a) Kico Rahab tawata sa tocante Yehova y su pueblo, y ki efecto e conocemento aki tawatin riba dje? (b) Con e Palabra di Dios ta honra Rahab?

⁶ Na aña 1473 prome cu nos era, tawatin un prostituta cu yama Rahab ta biba den e stad Cananeo Yerico. Rahab aparentemente tawata un mohe bon informa. Ora cu dos spion Israelita a busca refugio den su cas, e por a conta nan detayenan spesifico tocante Israel su Exodo milagroso for di Egipto, apesar cu esei a tuma luga 40 aña prome! Tambe e tawata na haltura di Israel su victorianan mas resien riba e reinan Amoreo Sehon y Og. Tuma nota ki efecto e conocemento ei tawatin riba Rahab. El a bisa e spionnan: “Mi sa cu SEÑOR a duna boso e tera . . . pasobra SEÑOR boso Dios, e ta Dios ariba den shelo y abou na tera.” (Hosue 2:1, 9-11) Si, loke Rahab a siña tocante Yehova y su echonan na fabor di Israel a touch su curason y pon’e eherce fe den Yehova.—Romanonan 10:10.

 ⁷ Rahab su fe a motiv’e pa actua. El a ricibi e spionnan Israelita “den pas”, y a obedece nan instruccionnan salbado di bida ora Israel a ataca Yerico. (Hebreonan 11:31; Hosue 2:18-21) No tin duda cu Rahab su obranan di fe a alegra Yehova su curason, pasobra Yehova a inspira e disipel cristian Santiago pa pone su nomber hunto cu esun di Abraham, e amigo di Dios, como un ehempel pa cristiannan imita. Santiago a skirbi: “Y no ta na e mesun manera e prostituta Rahab a wordo hustifica tambe pa medio di obranan, ora cu el a ricibi e mensaheronan y a manda nan bai pa un otro caminda?”—Santiago 2:25.

8. Con Yehova a bendiciona Rahab pa su fe y obediencia?

⁸ Yehova a recompensa Rahab den varios manera. Pa cuminsa, milagrosamente el a preserva su bida y bida di tur esnan cu a busca refugio den su cas, esta, “e hendenan di cas di su tata y tur loke cu e tawatin.” Caba Yehova a permiti e personanan aki biba “meimei di Israel”, caminda mester a trata nan manera yiu di tera. (Hosue 2:13; 6:22-25; Levitico 19:33, 34) Pero esei no ta tur cos. Tambe Yehova a duna Rahab e honor di bira un antepasado di Hesucristo. Ki un tremendo demostracion di bondad amoroso na un mohe cu un tempo tawata un Cananeo adorado di dios falso! *—Salmo 130:3, 4.

9. Con Yehova su actitud pa cu Rahab y pa cu cierto mohenan cristian den prome siglo por ta un animacion pa algun hende mohe djawe?

⁹ Mescos cu Rahab, tin mohenan cristian—for di prome siglo te cu awe—cu a bandona un estilo di bida inmoral pa asina nan por agrada Dios. (1 Corintionan 6:9-11) Sin duda, algun di nan a lanta den un ambiente igual cu esun di antiguo Canan, caminda inmoralidad tawata reina y asta considera como normal. Sinembargo, fe basa riba un conocemento exacto di e Scritura a motiva nan pa cambia nan bida. (Romanonan 10:17) Pesei, nos lo por bisa di e mohenan ei tambe cu “Dios no tin berguensa di wordo yama nan Dios.” (Hebreonan 11:16) Esta un honor!

Un Mohe Bendiciona pa Su Discrecion

10, 11. Ki circunstancia envolviendo Nabal y David a pone Abigail drenta den accion?

¹⁰ Hopi mohe fiel di pasado a desplega discrecion of discernimento na un manera sobresaliente, y esei a haci nan un parti balioso di e pueblo di Yehova. Un mohe asina tawata Abigail, esposa di Nabal, un Israelita rico doño di tereno. Abigail su discernimento a yuda salba bida di hende y a evita cu David, futuro rei di Israel, a bira culpabel di dramamento di sanger inocente. Nos por lesa tocante Abigail den e relato di 1 Samuel capitulo 25.

¹¹ Na comienso di e relato, David cu su siguidonan tawata campa serca di e tounan di Nabal. Sin cobra nada, nan a proteha e bestianan di dia y anochi como un muestra di bondad na nan ruman Israelita Nabal. Ora cu  David su provisionnan a cuminsa mengua, el a manda dies hoben bai pidi Nabal cuminda. Awor Nabal tawatin chens pa mustra su aprecio na David y honr’e como e ungi di Yehova. Pero Nabal ta haci net lo contrario. E ta rabia masha pisa, ta insulta David y ta manda e hobennan bai man bashi. Ora David tende di esaki, e ta reuni 400 homber arma y ta sali pa bai tuma vengansa. Abigail ta tende di e manera bruto cu su casa a reacciona y prudentemente e ta tuma accion rapido pa calma David door di manda un cargamento generoso di provision. Caba e mes ta bai serca David.—Versiculo 2-20.

12, 13. (a) Con Abigail a demostra di ta discreto y tambe leal na Yehova y na su ungi? (b) Kico Abigail a haci ora el a regresa cas, y con a bai cu ne despues?

¹² Abigail su apelacion humilde pa misericordia ora cu e topa David, ta revela su respet profundo pa e ungi di Yehova. E ta bisa: “Siguramente [Yehova] lo establece un cas permanente pa mi señor, pasobra mi señor ta bringa e batayanan di [Yehova]”, y e ta agrega cu Yehova lo haci David lider di Israel. (Versiculo 28-30) Na mesun tempo, Abigail ta demostra basta curashi door di bisa David cu si e sigui riba e rumbo pa bai tuma vengansa, esaki lo hacie culpabel di dramamento di sanger inocente. (Versiculo 26, 31) Abigail su humildad, respet profundo y manera di pensa cla ta trece David na su sano huicio. David ta contesta: “Bendiciona sea e SEÑOR Dios di Israel, kende a manda bo e dia aki pa contra cu mi, y bendiciona sea bo discernimento, y bendiciona sea abo mes, kende a kita mi awe di drama sanger.”—Versiculo 32, 33.

¹³ Ora Abigail a bai cas, cu curashi el a bai purba informa su casa di e provisionnan cu el a regala David. Sinembargo, el a bin haya su casa, Nabal, “hopi burachi.” Pues e ta warda te ora cu e no ta wayaba mas, anto ta cont’e. Con Nabal ta reacciona? E ta keda asina pasma cu e ta bira manera paralisa. Dies dia despues e ta muri na man di Dios. Ora David ta tende di e morto di Nabal, e ta propone Abigail matrimonio, ya cu evidentemente el a haya gran admiracion y un respet profundo p’e. Anto Abigail ta acepta David su proposicion.—Versiculo 34-42.

Abo Por Ta Manera Abigail?

14. Cua ta e cualidadnan di Abigail cu nos kisas lo kier cultiva mas plenamente?

¹⁴ Bo ta mira algun cualidad den Abigail cu abo—sea homber of mohe—lo tin gana di cultiva mas plenamente? Kisas bo ta desea di actua cu mas prudencia y discrecion ora surgi dificultad. Of podise bo kier papia na un manera calmo y rasonabel ora cu emocion di hende rond di bo ta hopi altera. Si ta asina, pakico bo no ta haci oracion na Yehova tocante e asunto? El a priminti di duna sabiduria, discernimento y habilidad di pensa na tur esnan cu sigui “pidi den fe.”—Santiago 1:5, 6; Proverbionan 2:1-6, 10, 11.

15. Den ki circunstancia ta specialmente importante pa mohenan cristian desplega e cualidadnan cu Abigail a demostra?

¹⁵ E cualidadnan excelente ei ta specialmente importante pa hende mohe cu tin esposo incredulo cu apenas ta haci caso—of ningun tiki mes—di principionan biblico. Podise e esposo ta bebe di mas. Ta di spera cu hombernan asina lo cambia nan bida. Hopi di nan a haci esei, y hopi bes tawata debi na e manera suave, e respet profundo y conducta puro di nan esposa.—1 Pedro 3:1, 2, 4.

16. Sea cual sea su circunstancia na cas, con un ruman mohe cristian ta demostra cu su relacion cu Yehova ta e cos mas balioso p’e?

¹⁶ Sea cual sea e dificultadnan cu bo tin cu soporta na cas, corda cu semper Yehova t’ei pa sostene bo. (1 Pedro 3:12) Pesei haci esfuerso pa fortalece bo mes spiritualmente. Resa pidi Dios pa sabiduria y un curason calmo. Si, hala mas serca di Yehova mediante un studio regular di Bijbel, oracion, meditacion y asociacion cu rumannan cristian. Abigail su amor pa Dios y su actitud pa cu  Yehova su sirbido ungi no a ser influencia door di su casa su manera carnal di pensa. Abigail a actua a base di principionan husto. Asta den un famia caminda e esposo ta un sirbido ehemplar di Dios, e esposa cristian ta realisa cu e tin cu sigui traha duro pa edifica y mantene su propio spiritualidad. Ta berdad cu su esposo tin e obligacion biblico pa percura p’e den sentido spiritual y material, pero na final di cuenta, e esposa mes tin cu ‘traha riba su salbacion cu temor y temblamento.’—Filipensenan 2:12; 1 Timoteo 5:8.

Un Mohe Cu A Ricibi “Recompensa di un Profeta”

17, 18. (a) E biuda di Sarepta a confronta ki test extraordinario di fe? (b) Con e biuda a reacciona riba e peticion di Elias, y con Yehova a recompens’e pa loke el a haci?

¹⁷ E manera cu Yehova a percura pa un biuda pober den tempo di profeta Elias ta mustra cuanto Yehova ta aprecia esnan cu ta apoya adoracion berdadero door di duna nan mes y nan recursonan. Debi na un secura largo den tempo di Elias, hopi hende tawata muriendo di hamber, entre nan tawatin un biuda y su yiu homber chikito bibando na Sarepta. Net ora cu tur loke a resta tawata nan ultimo cuminda, un bishitante a yega: profeta Elias. El a pidi algo extraordinario. Aunke e tawata sa di e señora su situacion penoso, el a pidie uza su ultimo azeta y hariña pa traha “un pan buscuchi chikito” p’e. Anto Elias a agrega: “Pasobra asina e SEÑOR Dios di Israel ta bisa: ‘E conchi di hariña lo no bira bashi, ni e butishi di azeta lo no bira bashi, te dia cu SEÑOR manda awasero riba e superficie di tera.’”—1 Reinan 17:8-14.

¹⁸ Con abo lo a reacciona riba e peticion extraordinario ei? E biuda di Sarepta, reconociendo aparentemente cu Elias tawata e profeta di Yehova, “a haci conforme e palabra di Elias.” Con Yehova a reacciona riba su hospitalidad? Milagrosamente el a percura cuminda pa e mohe, pa su yiu y pa Elias durante e periodo di secura. (1 Reinan 17:15, 16) Si, Yehova a duna e biuda di Sarepta “recompensa di un profeta”, maske e no tawata Israelita. (Mateo 10:41) E Yiu di Dios tambe a honra e biuda aki ora cu el a mencion’e como un ehempel pa e hendenan sin fe di Nazaret, e stad caminda Hesus a lanta.—Lucas 4:24-26.

19. Den ki maneranan hopi ruman mohe cristian awe ta refleha e spirito di e biuda di Sarepta, y kico Yehova ta pensa di nan?

¹⁹ Awe tin hopi hende mohe cristian cu ta refleha e spirito di e biuda di Sarepta. Por  ehempel, tur siman rumannan mohe cristian generoso—di cua hopi ta pober y tin famia pa cria—ta extende hospitalidad na superintendentenan biahero y nan casa. Otro rumannan mohe ta comparti cuminda cu predicadonan local di tempo completo, ta yuda hende den necesidad of den algun otro manera ta duna nan mes of nan recursonan pa apoya e obra di Reino. (Lucas 21:4) Yehova ta tuma nota di e sacrificionan ei? Definitivamente cu si! “Dios no ta inhusto pa lubida boso trabou y e amor cu boso a mustra pa su nomber, door cu boso a sirbi y ainda ta sirbi e santonan.”—Hebreonan 6:10.

20. Kico nos lo considera den e siguiente articulo?

²⁰ Varios mohe temeroso di Dios den prome siglo tawatin e privilegio di sirbi Hesus y su apostelnan. Den e siguiente articulo nos lo trata con e mohenan aki a haci Yehova su curason contento, y nos lo considera e ehempel di mohenan djawe cu ta sirbi Yehova di henter nan curason, asta den circunstancianan dificil.

[Nota]

Como Repaso

• Con e siguiente mohenan a haci Yehova su curason contento?

• Sifra y Pua

• Rahab

• Abigail

• E biuda di Sarepta

• Con nos por wordo yuda personalmente door di medita riba e ehempel cu e mohenan aki a pone? Duna un ehempel.

[Preguntanan di Estudio]

[Plachinan na pagina 9]

Hopi mohe fiel a sirbi Dios apesar di “e decreto di rei”

[Plachi na pagina 10]

Dicon Rahab ta un excelente ehempel di un persona cu fe?

[Plachi na pagina 10]

Cua di e cualidadnan cu Abigail a desplega, lo bo kier imita?

[Plachi na pagina 12]

Hopi mohe cristian awe ta refleha e spirito di e biuda di Sarepta