Tin Hende Confiabel?

DESPUES di e caida di e Muraya di Berlin na 1989, varios secreto cu tawata bon tapa a sali na cla. Por ehempel, Lydia * a descubri cu durante e regimen socialista na Alemania Oriental, Stasi, of Servicio di Siguridad di Estado, a compila un file di su actividadnan priva. Maske Lydia a keda sorprendi ora el a tende di e file, el a keda geshock ora el a haya sa ta ken a duna Stasi informacion; su casa. Net e hende cu supuestamente lo e mester por a confia plenamente a traicion’e.

Robert tawata un cabayero di edad cu tawata considera su docter local como un hende “masha respetabel, admirabel y confiabel”, The Times di Londen ta informa. Nan ta bisa cu e tawata un docter cu tin “bon manera y interes den su pashentnan.” Pero diripiente Robert a muri. Ta un atake di curason el a haya of ta un atake celebral? No. Autoridadnan a conclui cu e docter a bai bishita Robert na su cas y, sin cu Robert y su famia tawata sa, a pas’e un hangua pa mat’e. Aparentemente, e persona cu Robert tawatin pleno confiansa den dje a mat’e.

Net e hendenan cu Lydia cu Robert a confia a traiciona nan di un manera baho, anto cu consecuencianan serio. Den otro casonan e consecuencianan no ta dje serio ei. No obstante, no ta nada straño cu nos ta wordo decepciona door di un persona cu nos ta confia. Un raport cu un organisacion principal di encuesta na Alemania, Allensbacher Jahrbuch der Demoskopie 1998-2002 a publica, ta indica cu 86 porshento di esnan cu a participa den un encuesta a wordo decepciona door di un hende cu nan a confia. Kisas abo tambe tawatin un experencia asina. Pesei nos no mester keda sorprendi cu e corant Suiso Neue Zürcher Zeitung na aña 2002 a informa cu “na paisnan industrialisa di west, relacionnan di confiansa mutuo ta menguando pa decadanan caba.”

Dificil pa Haya, Facil pa Perde

Kico ta confiansa? Tin diccionario ta bisa cu pone confiansa den otro hende ta nifica kere cu nan ta honesto y sinsero y cu nan lo no haci nada deliberadamente pa haci bo daño. Pocopoco un hende ta haya confiansa pero e por perd’e masha lihe mes. Siendo cu asina hopi hende ta sinti cu otronan a abusa di nan confiansa, ta straño cu hende no ta dispuesto pa confia otro mas? Segun un encuesta publica na Alemania na aña 2002, “menos di 1 di cada 3 hoben tin un confiansa basico den otro hende.”

Kisas nos por puntra nos mes: ‘Realmente nos por confia otro hende? Ta bale la pena pa pone nos confiansa den un hende apesar cu e por laga nos na caya?’

[Nota]

[Comentario na pagina 3]

Segun un raport, 86 porshento di esnan cu a participa den un encuesta a wordo decepciona door di un hende cu nan a confia