Storia di Bida

Yehova A Siña Mi For di Mi Hubentud

SEGUN E RELATO DI RICHARD ABRAHAMSON

“O Dios, bo a siña mi for di mi hubentud; y te ainda mi ta declara bo obranan maraviyoso.” Laga mi splica dicon e palabranan ei di Salmo 71:17 tin un nificacion special pa mi.

MI MAMA, Fannie Abrahamson, na aña 1924 a haya bishita di Studiantenan di Bijbel (manera nan tawata yama Testigonan di Yehova e tempo ei). Ami tawatin un aña so. Segun cu e Testigonan tawata siña Mama berdadnan di Bijbel, e tawata bai bishita su biciñanan umbes y conta nan e cosnan cu el a siña, y tambe e tawata siña ami cu mi ruman homber y ruman mohe mas grandi. Prome cu mi por a lesa, el a siña mi memorisa hopi texto biblico cu a papia di e bendicionnan di e Reino di Dios.

Mi a nace y crece na La Grande, den estado di Oregon na Merca. Na final di decada di 1920, nos grupo di Studiantenan di Bijbel den e stad ei tawata consisti di un par di hende mohe y mucha. Aunke nos tawata aisla, toch nos tawata haya bishita un of dos biaha pa aña di predicadonan biahero. Nan a duna discursonan stimulante, a compaña nos den sirbishi di cas pa cas, y a mustra interes bondadoso den e muchanan. Entre e rumannan stima ei tawatin Shield Toutjian, Gene Orrell y John Booth.

Niun hende di nos grupo no por a asisti na e congreso di aña 1931 na Columbus, Ohio, caminda Studiantenan di Bijbel a tuma e nomber Testigonan di Yehova. Pero congregacionnan y gruponan isola cu no tawatin representante na e congreso, a tene un reunion local na augustus di e aña ei pa tuma un resolucion pa acepta e nomber. Nos grupo chikito na La Grande  tambe a haci esaki. Anto na 1933, durante e campaña pa reparti e foyeto chikito E Crisis, mi a memorisa un presentacion di Bijbel y pa prome bes mi a predica mi so di cas pa cas.

Durante decada di 1930, e oposicion contra nos obra a aumenta. Pa trata cu esaki, congregacionnan a wordo agrupa hunto, y nan a tene asambleanan chikito y participa den campañanan di predica un of dos biaha pa aña. Na e asambleanan aki nos a ricibi instruccion con pa predica y con pa trata respetuosamente cu polis cu tawata interferi cu nos obra. Como cu nan tawata hiba e Testigonan cu frecuencia dilanti un hues policial of un corte normal, nos tawata repasa di antemano un papel di instruccion cu tawata yama Procedimentonan di un Huicio. Esaki a prepara nos pa trata cu oposicion.

Principio di Mi Crecemento den e Berdad

Mi tawata haya mas y mas aprecio pa berdadnan biblico y pa e speransa basa riba Bijbel di por biba pa semper riba tera bou di Dios su Reino celestial. Na e tempo ei no tawata pone masha enfasis riba bautismo pa esnan cu no tawatin e speransa di goberna den shelo hunto cu Cristo. (Revelacion 5:10; 14:1, 3) No obstante, nan a bisa mi cu si den mi curason mi a determina pa haci Yehova su boluntad, anto lo ta na su luga pa mi batisa. Y mi a haci esei na augustus 1933.

Ora mi tawatin 12 aña, mi juffrouw di scol a haya cu mi tawata bon den papia dilanti publico, pesei el a urgi Mama pa haci areglo pa mi haya mas entrenamento den esei. Mama a pensa cu esaki lo por a yuda mi sirbi Yehova miho. Pesei el a paga pa mi haya les door di laba paña pa e instructor un aña largo. E entrenamento a resulta util pa mi sirbishi. Pero ora mi tawatin 14 aña, mi a haya acuut reuma, y pa mas cu un aña mi no por a bai scol.

Na 1939 un predicado di tempo completo cu tawata yama Warren Henschel a bin biba den nos area. * Den sentido spiritual, e tawata manera un ruman mayo pa mi, y tawata hiba mi pa traha casi henter dia den sirbishi di veld cu ne. Poco despues el a yuda mi cuminsa den sirbishi di pionero di facansi, un forma temporal di sirbishi di tempo completo. E zomer ei nos grupo a bira un congregacion. Warren a keda nombra como sirbido di congregacion, y ami a wordo nombra como conductor di Studio di Toren di Vigilancia. Anto mi a bira sirbido di congregacion ora cu Warren a bai laga nos pa sirbi na Betel, e sede internacional di Testigonan di Yehova situa na Brooklyn, New York.

Comienso di Sirbishi di Tempo Completo

E mayor responsabilidad di sirbi como sirbido di congregacion a duna mi mas gana di drenta den e sirbishi regular di tempo completo, y mi a haci esei tambe na edad di 17 aña, despues cu mi a caba tres aña di scol secundario. Tata no a comparti nos creencianan religioso, pero el a percura bon pa nos famia y tawata un homber di principionan halto. E tawata kier pa mi bai scol mas avansa. Sinembargo, el a bisa tambe cu lo mi por haci loke mi kier, basta mi no bin serca dje pa busca cuminda y luga di  keda. Pues, mi a cuminsa traha pionero dia 1 di september 1940.

Ora mi tawata bai for di cas, mi mama a laga mi lesa Proverbionan 3:5 y 6: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” Y en berdad, e echo cu semper mi a laga mi bida den man di Yehova tawata un gran yudansa pa mi.

Poco despues mi a join Joe cu Margaret Hart den sirbishi na e parti nort central di Estado di Washington. E teritorio tawata hopi varia: rancho di baca, rancho di carne, reservaat di indjan, y tambe hopi stad chikito y pueblito. Den lente di 1941 mi a ser nombra como sirbido di congregacion na Wenatchee, Washington.

Na un di nos asambleanan na e stad Walla Walla, Washington, mi a sirbi como usher, dunando bonbini na esnan cu tawata drenta den e sala di auditorio. Pero mi a ripara con un hoben tawata lucha cu e sistema di loudspeaker sin por a pon’e traha. Pesei mi a sugeri pa e tuma mi asignacion, y ami lo tuma esun di dje. Ora cu e sirbido regional, Albert Hoffman, a regresa y a mira cu mi a bandona mi asignacion, el a splica mi cu un sonrisa amigabel cu ta hopi importante pa keda den bo asignacion te ora cu bo haya instruccion pa haci otro cos. Semper mi a keda corda e conseho ei.

Na augustus 1941, Testigonan di Yehova a organisa un congreso masha grandi na St. Louis, Missouri. E pareha Hart a pone banki den e baki di nan pickup y un capa riba e baki. Nos nuebe pionero a haci e biahe di 2.400 kilometer pa St. Louis den e pickup ei. A tuma nos mas o menos un siman pa bai y un siman pa bin. Na e congreso, segun calculo di polis, tawatin un maximo di 115.000 hende presente. Aunke probablemente e asistencia tawata menos cu esei, e tawata sigur mas cu e alrededor di 65.000 Testigonan cu tawatin na Merca e tempo ei. E congreso tawata un gran estimulo spiritual.

Sirbishi na Betel di Brooklyn

Despues cu mi a regresa Wenatchee, mi a haya un carta cu a pidi mi bin sirbi na Betel di Brooklyn. Ora mi a yega dia 27 di october 1941, nan a hiba mi na e oficina di Nathan H. Knorr, e superintendente di imprenta. Bondadosamente el a splica mi con bida na Betel tawata y a enfatisa cu pa bida na Betel ta un exito bo mester pega na Yehova. Caba nan a hiba mi na e Departamento di Manda Literatura y mi a cuminsa cu e trabou di mara caha di literatura pa ser manda.

Dia 8 di januari 1942, Joseph Rutherford, kende tawata presidi e obra di Testigonan di Yehova mundialmente, a muri. Cinco dia despues e directornan di e Sosiedad a eligi Ruman Knorr pa ta su susesor. Ora cu Sosiedad su secretario y tesorero di hopi tempo, W. E. Van Amburgh, a anuncia esaki na e famia di Betel, el a bisa: “Mi ta corda tempo cu C. T. Russell a muri [na 1916] y J. F. Rutherford a remplas’e. Señor a sigui dirigi Su obra y hacie prospera. Aworaki tambe mi tin pleno confiansa cu e  obra ta sigui padilanti cu Nathan H. Knorr como presidente pasobra e obra aki ta di Señor, no di hende.”

Na februari 1942, nan a anuncia cu lo cuminsa cu e “Curso Avansa den Ministerio Teocratico.” Nan a prepara e curso pa entrena rumannan na Betel pa nan por mehora nan habilidad di haci investigacion riba temanan biblico, organisa nan informacion bon y present’e eficasmente. Debi na e les cu mi a haya na mucha den papia dilanti publico, mi por a haci progreso rapido den e programa.

No mucho despues mi a ser asigna na e Departamento di Sirbishi cu tawata supervisa e trabou di predica di Testigonan na Merca. Mas laat den e aña ei, e rumannan a dicidi di reinstitui un programa pa ruman hombernan bishita congregacionnan di Testigonan. Cu tempo e rumannan biahero aki, cu nan a yama sirbido di e rumannan, a haya e nomber superintendente di sircuito. Durante e zomer di 1942, tawatin un curso na Betel pa entrena ruman hombernan pa e tipo di sirbishi aki, y mi tawatin e privilegio di ta entre esnan cu a ricibi e entrenamento aki. Mi ta corda specialmente cu Ruman Knorr, un di e instructornan, a enfatisa e punto aki pa nos: “No purba agrada hende. Na final di cuenta lo bo no agrada niun. Agrada Yehova, y lo bo agrada tur esnan cu ta stima Yehova.”

Na october 1942 e trabou biahero di bishita congregacionnan a cuminsa. Algun di nos na Betel a participa den dje durante cierto fin di siman, bishitando congregacionnan cu no tawata keda mas leu cu 400 kilometer for di New York City. Nos tawata repasa e informenan di e congregacion su actividad di predica y su asistencia na reunion, tene un reunion cu esnan cu tawata atende e responsabilidadnan di congregacion, duna un of dos discurso, y traha den sirbishi cu e Testigonan local.

Na 1944 mi tawata un di e rumannan di e Departamento di Sirbishi cu nan a manda haci e trabou biahero pa un periodo di seis luna, y mi a sirbi na Delaware, Maryland, Pennsylvania y Virginia. Despues, pa un par di luna, mi a bishita congregacionnan na Connecticut, Massachusetts y Rhode Island. Ora mi a regresa Betel, mi a traha part time den oficina hunto cu Ruman Knorr y su secretario Milton Henschel, caminda mi a familiarisa mi mes cu nos obra mundial. Tambe mi a sirbi part time den Oficina di Tesorero bou di supervision di W. E. Van Amburgh y su asistent, Grant Suiter. Anto na 1946, mi a bira superintendente di varios departamento na Betel.

Cambionan Grandi den Mi Bida

Durante e tempo cu mi tawata sirbi e congregacionnan na 1945, mi a sera conoci cu Julia Charnauskas na Providence, Rhode Island. Den transcurso di aña 1947 nos a cuminsa plania pa casa. Mi tawata stima mi sirbishi na Betel masha hopi, sinembargo na e tempo ei no tawatin areglo pa bin sirbi einan cu bo casa. Pesei na januari 1948 mi a sali for di Betel, y ami cu Julia (Julie) a casa. Mi a haya trabou part time den un supermarket na Providence, y nos a cuminsa traha pionero hunto.

Na september 1949 mi a haya invitacion pa haci trabou di sircuito den nortwest di Wisconsin. Pa mi cu Julie tawata un cambio grandi pa predica principalmente den pueblitonan y area di cunucu caminda tawatin hopi boerderij cu tawata produci lechi y productonan di lechi. Winter einan tawata largo y friu, y pa hopi siman temperatura sa ta mas abou cu -20° Celsius y hopi sneu. Nos no tawatin auto. Sinembargo, semper nos a haya un hende duna nos un lift pa bai e siguiente congregacion.

Poco despues cu mi a cuminsa den e trabou di sircuito, nos tawatin un asamblea di sircuito. Mi ta corda con mi tawata controla tur cos cu sumo atencion pa wak si e rumannan a haci nan trabou, y esei a haci algun di nan un poco nervioso. Pesei e superintendente di districto, Nicholas Kovalak, bondadosamente a splica mi cu e rumannan local tawatin custumber di atende e cosnan na nan manera y cu mi no mester a purba controla delaster un detaye. E conseho ei a yuda mi trata cu hopi asignacion cu mi a ricibi despues.

 Na 1950 mi a haya un asignacion temporal: supervisa e acomodacion pa delegadonan di e prome di nos tantisimo congresonan grandi na Yankee Stadium na New York City. E congreso tawata emocionante for di cuminsamento te final, tawatin delegado for di 67 pais y un asistencia maximo di 123.707 hende! Despues di e congreso, ami cu Julie a reanuda nos sirbishi biahero. Nos tawata gusta nos trabou di sircuito. Sinembargo, nos a sinti cu nos mester sigui pone nos mes disponibel pa cualkier otro sirbishi di tempo completo. Pesei tur aña nos tawata yena un solicitud tanto pa Betel como pa sirbi como misionero. Na 1952 nos a keda encanta cu e invitacion pa asisti na e di 20 klas di e Scol Biblico di Galad di Watchtower, caminda nos a ricibi entrenamento pa e trabou di misionero.

Sirbishi den Exterior

Ora nos a gradua na 1953, nos a ser asigna na Gran Bretania, caminda mi a sirbi den e trabou di districto den sur di Inglatera. Despues di menos cu un aña den e actividad aki, un actividad cu ami cu Julie a disfruta sin fin di dje, nos a keda sorprendi pa haya e asignacion pa muda pa Dinamarca. Na Dinamarca tawatin mester di supervision nobo na e sucursal. Como cu mi no tawata mucho leu di nan y a ricibi entrenamento den e tipo di trabou ei na Brooklyn, mi a wordo manda pa yuda. Nos a tuma un ferry bai Hulanda, y djei nos a coi un trein pa Kopenhagen, Dinamarca. Nos a yega dia 9 di augustus 1954.

Un di e problemanan cu mester a atende tawata cu un par di ruman den puesto di responsabilidad no kier a acepta instruccion for di nos sede na Brooklyn. Tambe, tres di e cuater personanan cu tawata traduci nos publicacionnan na Danes a bandona Betel y cu tempo a stop di  asocia cu Testigonan di Yehova. Pero Yehova a contesta nos oracionnan. Dos pionero, Jørgen y Anna Larsen, cu a yega di haci algun trabou di traduccion part time, a pone nan mes disponibel pa traha fulltime. Asina traduccion di nos revistanan na Danes a sigui sin cu a salta ningun edicion. E pareha Larsen ainda ta na Betel na Dinamarca, y Jørgen ta cordinado di e Comite di Sucursal.

Un berdadero fuente di animacion den e prome añanan ei tawata bishitanan regular di Ruman Knorr. E tawata tuma tempo pa sinta papia, contando experencianan cu a duna nos un idea con pa trata cu problemanan. Durante un bishita na 1955, decision a cai cu nos mester traha un sucursal nobo cu facilidad di imprenta ya asina nos por a produci revista pa Dinamarca. Nos a haya tereno den un bario den nort di Kopenhagen, y pa zomer di 1957, nos a muda pa nos edificio nobo. Harry Johnson, cu resientemente a yega Dinamarca cu su casa Karin despues di a gradua di e di 26 klas di Galad, a yuda establece nos imprenta y pon’e funciona.

Nos a mehora nos manera di organisa congresonan grandi na Dinamarca, y e experencia cu mi a gana tempo cu mi tawata traha cu congresonan na Merca a resulta util. Na 1961 nos tawatin un congreso internacional grandi na Kopenhagen cu delegadonan for di mas cu 30 pais. Asistencia maximo tawata 33.513 persona. Na 1969, nos tawata anfitrion di loke a resulta e congreso mas grandi cu nan a yega di tene na Scandinavia, tawatin un asistencia maximo di 42.073 persona!

Na 1963 mi a haya invitacion pa asisti na e di 38 klas di Galad. Esaki tawata un curso ahusta di dies luna, prepara specialmente pa entrena personal di sucursal. Tawata un placer pa ta cu e famia di Betel di Brooklyn atrobe y beneficia di e experencia di esnan cu tawatin hopi aña ta haci e trabou na e sede mundial.

Despues di e curso aki mi a regresa Dinamarca pa sigui atende e responsabilidadnan einan. Ademas, mi tawatin e privilegio di sirbi como superintendente di zona, bishitando sucursalnan den west y nort Europa pa duna animacion na nan personal y yuda nan cumpli cu nan responsabilidadnan. Ultimo tempo mi a haci e trabou aki na West Africa y Caribe.

Na final di decada di 1970, e rumannan na Dinamarca a cuminsa busca un sitio caminda nan por a construi un facilidad mas grandi pa nan por haci mas trabou di traduccion y imprenta. Nan a haya un bon tereno cu a keda mas o menos 60 kilometer west di Kopenhagen. Hunto cu otro rumannan, mi a traha riba e plannan y diseño di e facilidad nobo aki, y ami cu Julie tawata ansioso pa bai biba cu e famia di Betel den nan bunita cas nobo. Sinembargo, cos no a bai asina.

Bek na Brooklyn

Na november 1980 ami cu Julie a haya e invitacion pa bai sirbi na Betel na Brooklyn, y nos a yega einan na principio di januari 1981. Nos tawatin casi 60 aña, y despues di a sirbi pa mita di nos bida hunto cu nos rumannan stima na Dinamarca, no tawata facil pa nos bolbe Merca. Sinembargo, nos no a keda pensa riba unda nos lo a prefera di ta, sino mas bien a purba consentra riba nos asignacion di e momento ei y e desafionan cu e tawatin.

Nos a yega Brooklyn y a haci nos mes na cas. Julie a ser asigna na e departamento di boekhouding haciendo casi e mesun tipo di trabou  cu e tawata haci na Dinamarca. Ami a ser asigna na Departamento di Redaccion pa yuda programa e trabou di procesa nos publicacionnan. Principio di decada di 1980 tawata un tempo di cambio pa e trabou na Brooklyn, ya cu nos tawata kitando for di uzo di type mashin y di imprimi cu chumbo cayente, pa bai uza computer y imprenta di offset. Mi no tawata sa nada di computer, pero mi tawata compronde algo di e proceduranan di e organisacion y con pa traha cu hende.

Poco despues, segun cu nos a cuminsa imprimi cu mashin offset na colo y uza plachi- y potretnan di colo, tawatin mester di mas sosten na e Departamento di Arte. Aunke mi no tawatin experencia den arte, mi por a yuda organisa e departamento. Asina mi tawatin e privilegio di supervisa e departamento ei pa nuebe aña.

Na 1992 mi a ser asigna pa yuda e Comite di Publicacion di e Cuerpo Gobernante y a ser traslada pa e Oficina di Tesorero. Aki mi ta sirbi te ainda en conexion cu e actividadnan financiero di Testigonan di Yehova.

Sirbishi for di Mi Hubentud en Adelante

For di tempran den mi hubentud y durante 70 aña di sirbishi dedica, Yehova cu pasenshi a siña mi mediante su Palabra, Bijbel, y mediante rumannan servicial den su organisacion maraviyoso. Mi a disfruta di mas cu 63 aña di sirbishi di tempo completo, di cua 55 aña hunto cu mi fiel casa Julie. Di berdad mi ta sinti cu Yehova a bendiciona mi ricamente.

Na 1940, ora cu mi a bandona cas pa drenta den sirbishi di pionero, mi tata a haci cherche di mi decision y a bisa: “Mi yiu, si bo bai for di cas pa haci e cos ei, no kere cu bo por core bin bek serca mi pa yuda bo cu nada.” Atrabes di añanan, nunca mi no mester a haci esei. Yehova a percura generosamente pa mi necesidadnan, hopi bes mediante rumannan cristian cu tawata cla pa yuda. Despues mi tata a haya respet pa nos trabou, y asta el a haci algun progreso den siña conoce e berdad di Bijbel prome cu el a muri na 1972. Mama, kende tawatin e speransa di bida celestial, a sigui sirbi Yehova fielmente te na su morto na 1985, na edad di 102 aña.

Aunke sa surgi problema den e sirbishi di tempo completo, ami cu Julie nunca no a pensa di bandona nos asignacion. Yehova semper a sostene nos den e determinacion aki. Asta ora cu mi mayornan a cuminsa bira bieu y tawatin mester di yudansa, mi ruman mohe Victoria Marlin a ofrece pa duna un man y bondadosamente a cuida nan. Nos ta masha gradicido pa su aporte amoroso cu a permiti nos sigui den sirbishi di tempo completo.

Julie a apoya mi fielmente den tur nos asignacionnan, mirando esaki como parti di su propio dedicacion na Yehova. Y maske awor mi tin 80 aña y ta sufri di algun problema cu mi salu, mi ta sinti cu Yehova a bendiciona mi ricamente. Mi ta haya hopi animacion for di e salmista cu despues di a proclama cu Dios a siñ’e for di su hubentud en adelante, a roga: ‘Y asta ora mi bira bieu, o Dios, no bandona mi, te ora mi declara bo poder na tur esnan cu ta bini.’—Salmo 71:17, 18.

[Nota]

[Plachi na pagina 20]

Ami cu Mama na 1940, tempo cu mi a cuminsa traha pionero

[Plachi na pagina 21]

Ami cu mi partnernan pionero Joe cu Margaret Hart

[Plachi na pagina 23]

Dia nos a casa na januari 1948

[Plachi na pagina 23]

Na 1953, hunto cu otro compañeronan di scol di Galad. Di robes pa drechi: Don y Virginia Ward, Geertruida Stegenga, Julie y ami

[Plachi na pagina 23]

Ami cu Frederick W. Franz y Nathan H. Knorr na Kopenhagen, Dinamarca, 1961

[Plachi na pagina 25]

Ami cu Julie awe