“Hala Serca Dios y E Lo Hala Serca Boso”

Antes y Awor—Principionan di Bijbel A Yud’e Cambia

TEMPO Adrian tawata hoben e tawata yen di rabia y odio. Pa motibo cu e tawata rabia lihe, e tawata haya atakenan di rabia violento. E tawata bebe, huma y hiba un bida inmoral. Adrian tawata conoci como un punk y e tawatin un tatuahe cu a refleha e spirito di anarkia. Describiendo e añanan ei, el a conta: “Mi tawata corta mi cabei den e forma tradicional di punk, hunt’e cu gel pa e keda spina y tin bes tawata tiñ’e cora of un otro colo.” Tambe Adrian tawata bisti renchi na nanishi.

Adrian a bai biba cu un par di otro hoben rebelde den un cas di choller. Ei, nan tawata bebe y uza droga. Adrian ta corda: “Mi tawata inyecta mi mes cu un droga cu yama speed, cu Valium of cualkier otro cos cu mi por a haya den mi caminda. Ora no tawatin droga of lijm, mi tawata saca gasolin for di auto di hende y tawata droga mi mes cu ne.” Adrian tawata meti profundamente den criminalidad di caya, tawata intimida hende y a bira sumamente violento. Por lo general hende no tawata kier tin nada di aber cu ne. Na mes momento, su reputacion tawata atrae mal amigo na dje.

Pocopoco, Adrian a realisa cu su “amigonan” tawata anda cu ne djis pa nan saca probecho personal. Ademas, el a yega na e conclusion cu “mi no a logra nada cu tur e rabia y violencia cu mi tawatin.” Bashi y frustra, el a bai laga su amigonan. Ora el a haya un ehemplar di E Toren di Vigilancia na un sitio di construccion, el a gusta e mensahe basa riba Bijbel, y a cuminsa studia Bijbel cu Testigonan di Yehova. Cu mucho gusto Adrian a acepta e invitacion: “Hala serca Dios y e lo hala serca boso.” (Santiago 4:8) Como resultado, no a dura masha cu Adrian a compronde cu e tin cu cuminsa aplica e principionan cu tin den e Scritura Santo.

E conocemento di Bijbel cu e tawata haya tawatin un bon efecto riba Adrian su consenshi y esaki a drecha su bida. El haya yudansa pa stop di rabia lihe y a cultiva dominio propio. Gracias na e poder di e Palabra di Dios, Adrian su personalidad a cambia.—Hebreonan 4:12.

Pero con Bijbel por a haci un impacto asina grandi? Conocemento di e Scritura ta yuda nos “bisti e hende nobo.” (Efesionan 4:24) Si, nos personalidad ta cambia ora nos aplica conocemento exacto di Bijbel. Con e conocemento ei ta cambia hende?

Di prome, Bijbel ta mustra kico ta e caracteristicanan malo cu un hende mester laga un banda. (Proverbionan 6:16-19) Di dos, e Scritura ta motiva nos pa desplega e bon cualidadnan cu e spirito santo di Dios ta produci. Nan ta entre otro “amor, goso, pas, pasenshi, cariño, bondad, fieldad, mansedumbre, dominio propio.”—Galationan 5:22, 23.

Conocemento mas profundo di Dios su rekisitonan a yuda Adrian examina su mes y a yud’e mira e cualidadnan cu e mester a cultiva y esnan cu e mester a deshaci di dje. (Santiago 1:22-25) Pero esei tawata djis e comienso. Ademas di conocemento,  Adrian tawatin mester di motivacion tambe, algo cu lo pon’e haya gana di cambia.

Adrian a siña cu e personalidad nobo y atractivo aki mester ser moldea “segun e imagen di Esun cu a cre’e.” (Colosensenan 3:10) Tambe el a realisa cu e personalidad di un cristian mester ta manera e personalidad di Dios. (Efesionan 5:1) Mediante un studio di Bijbel, Adrian a siña con Yehova ta trata cu humanidad y di e forma ei a tuma nota di Yehova su cualidadnan excelente, manera amor, cariño, bondad, misericordia y husticia. E conocemento aki a conmove Adrian pa stima Dios y pa haci esfuerso pa ta e clase di persona cu Yehova ta aproba.—Mateo 22:37.

Cu tempo y cu yudansa di e spirito santo di Dios, Adrian a logra domina su caracter violento. Awor e cu su esposa ta traha duro pa yuda otro hende cambia nan bida mediante conocemento di Bijbel. Adrian ta bisa: “Contrario na hopi di mi examigonan cu awor ta morto, ami si ta na bida y ta disfruta di un bida di famia felis.” E ta un ehempel bibo di e poder cu Bijbel tin pa transforma bida di hende.

[Comentario na pagina 25]

“Mi no a logra nada cu tur e rabia y violencia cu mi tawatin”

[Cuadro na pagina 25]

Principionan di Bijbel den Accion

E siguiente principionan di Bijbel a yuda hopi hende violento y yen di rabia bira pacifico:

“Sea na pas cu tur hende. Nunca no venga boso mes, stimanan, ma laga luga pa e furia di Dios.” (Romanonan 12:18, 19) Laga Dios determina ki ora y contra ken e mester tuma vengansa. Ora e haci esei e ta completamente na haltura di tur e echonan, y cualkier castigo cu e duna lo refleha su husticia perfecto.

“Rabia, ma no haci pica; no laga solo baha riba boso rabia, y no duna Diabel oportunidad.” (Efesionan 4:26, 27) Ta di compronde cu tin bes un hende por rabia. Pero si esei pasa, e no mester keda “rabia.” Dicon no? Pasobra esei por pon’e haci algo malo, y di e manera ei “duna Diabel oportunidad”, y como resultado Yehova Dios lo no keda contento cu e persona ei.

“Stop di rabia y laga furia para; no cunsumi—esei ta conduci na maldad so.” (Salmo 37:8) Si nos no domina nos emocionnan esei por hiba na actonan descontrola. Si un hende laga rabia domin’e, probablemente lo e bisa of haci cosnan cu lo ofende tur hende cu ta envolvi.