“E Palabra di Dios Si Tin Poder!”

“E PALABRA di Dios ta bibo y activo.” (Hebreonan 4:12) Pa confirma e poder iresistibel di e Palabra di Dios, e Kalender 2003 di Testigonan di Yehova a trata seis storia di bida for di tur parti di mundo. Bou di e encabesamento “Antes y Awor”, e kalender a mustra con e trabou educacional di Testigonan di Yehova ta yuda hende drecha nan balornan moral, bandona un estilo di bida dañino, fortalece nan lasonan di famia y cultiva un relacion personal cu Dios.

Varios hende a manda carta pa mustra nan aprecio pa e kalender di 2003. At’aki algun di e comentarionan:

“E kalender aki ta un prueba pa cristiannan berdadero cu tin otro hende mescos cu nan cu mester a haci nan maximo esfuerso pa e fe. Awor nan por wak e potretnan como un recordatorio di e cambionan cu algun ruman a haci.”—Steven, Merca.

“Mi tawatin echt gana di skirbi algun palabra pa laga boso sa con hopi e kalender 2003 a touch mi curason. Nunca un kalender tawatin un impacto asina grandi riba mi. E storianan di bida aki lo bira un parti di e informacion cu mi ta cana rond cu ne den mi tas di sirbishi pa mi duna prueba bibo y conmovedor di e influencia cu Bijbel por tin riba bida di hende.”—Marc, Belgica.

“E kalender a conmove mi masha hopi mes. Mi a keda sumamente emociona ora mi a lesa y mira con Yehova a cambia e hendenan aki. Como resultado, mi a sinti mi motiva pa sigui haci cambio den mi propio bida. Awor mas cu nunca, mi ta sinti cu mi ta parti di nos hermandad internacional.”—Mary, Merca.

“Hesus a sinti compasion pa e hendenan debi na e condicion spiritual deplorabel cu nan tawata aden. Mi kier a gradici boso pa e echo cu boso a imita e ehempel di Cristo door di publica e storianan di bida cu tin den nos kalender 2003. Nunca un kalender no a yega di pone mi yora.”—Cassandra, Merca.

“Ora mi tawatin 11 aña, mi a cuminsa huma; mas despues mi a uza droga. Hopi bes mi a pensa di pone un fin na mi bida. Ora mi a conoce Yehova, mi a haya yudansa pa stop cu e bicionan ei. E kalender aki ta hopi importante pa mi. E ehempelnan di mi rumannan di tur parti di mundo ta fortalece mi. Awor mi sa cu mi no ta mi so den e lucha aki y cu e cos mas importante ta amor pa Yehova y sirbishi di henter curason na dje.”—Margaret, Polonia.

“Holo, e Palabra di Dios si tin poder! Na momento cu mi a haya e kalender di 2003, mi tawatin masha dificultad pa mi no yora. E experencianan aki, hunto cu e potretnan, ta echt fortalece bo fe.”—Darlene, Merca.

“E estilo di bida cu algun di e rumannan aki tawatin ta masha paresido na loke ami a pasa aden. Yehova a duna mi forsa pa vence bicionan cu tawata parce imposibel pa vence. Masha, masha danki pa e storianan di bida aki.”—William, Merca.