‘Maneha e Palabra di Dios na e Manera Corecto’

“Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti e palabra di berdad na un manera corecto.”—2 TIMOTEO 2:15.

1, 2. (a) Dicon trahadonan tin mester di herment? (b) Den ki trabou cristiannan ta participa, y con nan ta demostra cu nan ta busca prome e Reino?

TRAHADONAN tin mester di herment pa yuda nan caba cu nan trabou. Pero no ta basta pa nan tin djis cualkier herment cu ta. Un trahado mester tin e herment corecto, y e mester uz’e den e manera corecto. Por ehempel, si bo ta trahando un keet y bo kier pega dos tabla na otro, lo bo tin mester di mas cu solamente un martiu y clabo. Lo bo mester sa con pa claba un clabo den palo sin dobla e clabo. Lo ta masha dificil, y asta frustrante, pa purba claba un clabo den palo si bo no sa con pa uza un martiu. Pero manehando nos hermentnan corectamente ta yuda nos cumpli cu nos tareanan cu bon resultado.

² Como cristian, nos tin un trabou pa haci. Ta un trabou sumamente importante. Hesucristo a urgi su siguidonan pa “busca prome e reino.” (Mateo 6:33) Con nos por haci esei? Un manera ta door di ta celoso den e trabou di predica e Reino y haci disipel. Un otro manera ta door di laga nos sirbishi ta firmemente basa riba e Palabra di Dios. Un di tres manera ta bon conducta. (Mateo 24:14; 28:19, 20; Echonan 8:25; 1 Pedro 2:12) Pa nos ta efectivo y felis den e asignacion cristian aki, nos tin mester di e hermentnan apropiado y nos mester sa con pa maneha nan corectamente. Apostel Pablo a pone un ehempel sobresaliente den e asunto aki como un cristian trahado, y el a anima su rumannan den fe pa imit’e. (1 Corintionan 11:1; 15:10) Pesei kico nos por siña for di nos colega, Pablo?

Pablo—Un Proclamado Celoso di Reino

3. Dicon nos por bisa cu apostel Pablo tawata un trahado celoso di Reino?

³ Ki clase di trahado Pablo tawata? Un cos cu sigur e tawata, ta celoso. Pablo a haci esfuerso vigoroso, y a plama e bon nobo den un area extenso rond di e region di Mediteraneo. Dunando un motibo pa su proclamacion entusiasma di e Reino, e apostel incansabel aki a bisa: “Pasobra si mi ta predica evangelio, mi no tin nada pa  gaba di dje, pasobra ta mi obligacion; pasobra ai di mi si mi no predica evangelio!” (1 Corintionan 9:16) Pablo tawata interesa den scapa solamente su propio bida? No. E no tawata un persona egoista. Mas bien, e tawata kier pa otro hende tambe beneficia di e bon nobo. El a skirbi: “Mi a bira tur cos pa tur hende, pa di tur manera mi por salba algun.”—1 Corintionan 9:22.

4. Cua ta e herment mas balioso pa trahadonan cristian?

⁴ Apostel Pablo tawata un trahado modesto cu a realisa cu e no por depende solamente di su habilidadnan personal. Mescos cu un carpinte tin mester di un martiu, Pablo tawatin mester di e herment corecto pa inculca e berdad di Dios den curason di su oyentenan. Cua tawata e herment principal cu el a uza? Tawata e Palabra di Dios, e Scritura Santo. Awe tambe e herment principal cu nos ta uza pa yuda nos haci disipel ta e Bijbel completo.

5. Pa nos ta predicadonan efectivo, kico nos tin cu haci fuera di cita textonan biblico?

⁵ Pablo tawata sa cu maneha e Palabra di Dios corectamente a encera mas cu djis cita for di dje. El a uza argumentonan combencente. (Echonan 28:23) Con? Cu exito Pablo a uza Dios su Palabra skirbi pa combence hopi hende pa acepta e berdad di Reino. El a rasona cu nan. Pa tres luna den un sinagoga na Efeso, Pablo “tawata rasona y combence nan tocante di e cosnan di e reino di Dios.” Aunke “algun tawata haci nan curason duro y tawata bira desobedecido”, otronan si a scucha. Como resultado di Pablo su sirbishi den Efeso, “e palabra di Señor tawata crece poderosamente y tawata prevalece.”—Echonan 19:8, 9, 20.

6, 7. Con Pablo a glorifica su ministerio, y con nos por haci mescos?

⁶ Como un proclamado celoso di Reino, Pablo ‘a glorifica su ministerio.’ (Romanonan 11:13, NW) Con asina? E no tawata interesa den promove su mes; ni e no tawatin berguensa di ta conoci publicamente como un di Dios su colaboradonan. Al contrario, el a considera su sirbishi como e honor di mas grandi. Pablo a maneha e Palabra di Dios na un manera habil y efectivo. Su actividad productivo tawata un estimulo pa otro hende, y a yuda motiva nan pa cumpli cu nan sirbishi mas plenamente. Den e manera aki tambe, su ministerio a ser glorifica.

⁷ Nos tambe, mescos cu Pablo, por glorifica nos sirbishi como predicado door di uza e Palabra di Dios cu frecuencia y na un manera efectivo. Den tur rasgo di nos sirbishi di veld, nos meta mester ta pa comparti algo for di e Scritura cu mas tanto hende posibel. Con nos por haci esaki na un manera combencente? Ban considera tres manera importante: (1) Dirigi atencion na e Palabra di Dios den un manera cu ta crea respet pa e Palabra. (2) Uza tacto pa splica y aplica loke Bijbel ta bisa. (3) Rasona for di e Scritura den un manera combencente.

8. Ki hermentnan pa predica e Reino nos tin disponibel awe, y con abo a uza nan?

⁸ Proclamadonan di Reino djawe tin hermentnan cu no tawata disponibel durante Pablo su ministerio. Esakinan ta entre otro, buki, revista, foyeto, panfleta, tratado, y grabacion riba audiocassette y videocassette. Na principio di siglo 20 nan a uza tambe carchi di testimonio, tocadisco, auto cu loudspeaker, y transmision na radio. Claro cu nos miho herment ta Bijbel, y nos tin cu haci bon uzo di e herment indespensabel aki.

Nos Sirbishi Mester Ta Basa Riba e Palabra di Dios

9, 10. Relaciona cu e uzo di e Palabra di Dios, kico nos por siña for di Pablo su conseho na Timoteo?

⁹ Con nos por uza e Palabra di Dios como un herment efectivo? Door di haci caso di e palabranan cu Pablo a dirigi na su colaborado Timoteo: “Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti [“manehando”, NW] e palabra di berdad na un manera corecto.” (2 Timoteo 2:15) Kico ‘maneha e  palabra di berdad na un manera corecto’ ta encera?

¹⁰ E palabra Griego traduci como parti of ‘maneha na un manera corecto’, literalmente ta nifica “cu ta corta stret” of “habri un caminda riba un liña stret.” Ta solamente den e spiertamento di Pablo na Timoteo e palabra ei ta ser uza den e Scritura Griego Cristian. Bo por uza e mesun palabra pa describi e manera cu un cunukero ta ploeg traha un canal den un liña stret. Un canal zigzag sigur lo ta un berguensa pa un cunukero cu experencia. Pa Timoteo por ta “un trahado cu no tin motibo pa tin berguensa”, Pablo a record’e cu e no mester desvia for di e siñansanan berdadero di e Palabra di Dios. Timoteo lo no mester a permiti su punto di bista personal influencia loke e ta siña otronan. E mester a basa su predicacion y siñansa strictamente riba e Scritura. (2 Timoteo 4:2-4) Esaki lo a dirigi personanan di curason honrado pa nan tin Yehova su punto di bista di asuntonan, y no acepta filosofia di mundo. (Colosensenan 2:4, 8) Mescos ta conta pa awendia.

Nos Mester Tin Bon Conducta

11, 12. Kico nos conducta tin di aber cu e echo cu nos ta maneha e Palabra di Dios corectamente?

¹¹ Nos tin cu haci mas cu solamente maneha e Palabra di Dios corectamente door di proclama su berdadnan. Nos conducta mester ta cuadra cu e Palabra. “Nos ta Dios su colaboradonan”, pues nos no mester ta trahado hipocrita. (1 Corintionan 3:9) E Palabra di Dios ta bisa: “Anto abo, cu ta siña un otro, bo no ta siña bo mes? Abo cu ta predica cu hende no mester horta, bo mes ta horta? Abo cu ta bisa cu hende no mester comete adulterio, bo mes ta comete adulterio? Abo cu ta aborece idolo, bo mes ta roba tempel?” (Romanonan 2:21, 22) Pesei, un manera cu nos como trahadonan di Dios di tempo moderno  ta maneha e Palabra di Dios corectamente ta door di haci caso di e spiertamento aki: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.”—Proverbionan 3:5, 6.

¹² Ki resultadonan nos por spera ora nos ta maneha e Palabra di Dios corectamente? Laga nos considera e poder cu e Palabra skirbi di Dios por tin den bida di personanan di curason honrado.

E Palabra di Dios Tin Poder pa Transforma Hende

13. Kico aplicacion di e Palabra di Dios por produci den un persona?

¹³ Ora hende ta acepta e mensahe di e Palabra di Dios como un autoridad, e ta eherce un influencia dinamico cu ta yuda nan haci cambionan remarcabel den nan bida. Pablo a mira e Palabra di Dios den accion y tawata testigo di e bon efecto cu e tawatin riba personanan cu a bira cristian den Tesalonica di antiguedad. Pesei el a bisa nan: “Nos ta gradici Dios constantemente tambe, cu ora boso a ricibi for di nos e palabra di Dios su mensahe, boso a acept’e no como palabra di hende, ma pa loke e ta berdaderamente, e palabra di Dios cu ta obra tambe den boso cu ta kere.” (1 Tesalonicensenan 2:13) Pa e cristiannan ei—de echo pa tur berdadero siguido di Cristo—hende su logica inferior no ta nada na comparacion cu Dios su sabiduria supremo. (Isaias 55:9) E Tesalonicensenan “a ricibi e palabra den hopi tribulacion cu e goso di spirito santo” y a bira un ehempel pa otro creyentenan.—1 Tesalonicensenan 1:5-7.

14, 15. Con poderoso e mensahe di e Palabra di Dios ta, y dicon?

¹⁴ E Palabra di Dios ta dinamico, mescos cu su Fuente, Yehova. E ta bin di “e Dios bibo”, esun mediante ken su palabra “e shelonan a wordo traha”, y e palabra ei semper ‘ta alcansa e proposito pa cual a mand’e.’ (Hebreonan 3:12; Salmo 33:6; Isaias 55:11) Un experto di Bijbel a comenta: “Dios no ta separa su mes for di su Palabra. E no ta neng’e como si fuera e no tin nada di aber cu ne. . . . Pesei nunca e [palabra] ta un asunto morto, insensibel pa loke ta wordo haci cu ne despues cu e ser papia; pasobra e ta un banchi di union cu e Dios bibo.”

¹⁵ Con poderoso e mensahe cu ta sali for di e Palabra di Dios ta? E tin un poder tremendo. Apropiadamente Pablo a skirbi: “E palabra di Dios ta bibo y activo y mas skerpi cu cualkier spada di dos filo, y ta penetra te na e division di alma y spirito, y di scarnir y tuti, y ta capas pa husga e pensamentonan y intencionnan di curason.”—Hebreonan 4:12.

16. Te con leu e Palabra di Dios por cambia un hende?

¹⁶ E mensahe cu tin den Dios su Palabra skirbi ta “mas skerpi cu cualkier spada di dos filo.” Pues, e tin un poder penetrante asina tremendo cu e ta surpasa cualkier otro instrumento of herment humano. E Palabra di Dios ta penetra den e partinan mas profundo di un persona y por cambi’e di paden, influenciando e manera cu e ta pensa y e cosnan cu e ta gusta. E por hacie un trahado aceptabel cu tin e cualidadnan cu Dios ta aproba. Esta un herment potente!

17. Splica e poder di transforma hende cu e Palabra di Dios tin.

¹⁷ E Palabra di Dios ta saca na cla con un persona realmente ta te den fondo di su alma, na comparacion cu loke e ta pensa cu e ta of cu loke e ta laga otro hende mira. (1 Samuel 16:7) Asta un persona malbado tin biaha por camufla su personalidad cu un capa di bondad of cu debocion religioso. Mal hende ta sconde nan personalidad pa motibonan malbado. Hende orguyoso ta pretende di ta humilde, mientras cu nan ta anhela e admiracion di hende. Sinembargo, door di saca na cla loke realmente tin den curason, e Palabra di Dios na un manera poderoso por motiva un persona humilde pa kita e personalidad bieu y “bisti e hende nobo, cu a wordo crea segun Dios den husticia y santidad berdadero.” (Efesionan 4:22-24) Tambe e siñansanan di e Palabra di Dios por transforma hende timido den Testigonan di Yehova yen di curashi y proclamadonan celoso di Reino.—Yeremias 1:6-9.

18, 19. Basa riba e paragrafnan aki of un experencia personal den sirbishi di veld, mustra con e berdad di Bijbel por cambia un persona su actitud.

 ¹⁸ E Palabra di Dios su poder di transforma hende tin un bon efecto riba personanan rond mundo. Por ehempel, proclamadonan di Reino na Phnom Penh, Cambodia, sa predica den e provincia Kompong Cham dos biaha pa luna. Despues di a tende otro pastonan papia contra Testigonan di Yehova, un pasto local a haci areglo pa topa e Testigonan e siguiente biaha cu nan bishita e provincia. E tawatin un cantidad di pregunta tocante celebracion di dianan di fiesta y a scucha atentamente segun cu nan a rasona cu ne for di e Scritura. Caba el a declara: “Awor mi sa cu loke mi coleganan pasto a bisa tocante boso no ta berdad! Nan a pretende cu boso no ta uza Bijbel, pero awemainta ta esei so boso a uza!”

¹⁹ E señora aki a sigui cu su combersacionnan tocante Bijbel cu e Testigonan y no a stop apesar cu nan a menas’e cu lo e perde su puesto como pasto. El a conta un amiga di e combersacionnan biblico ei, anto e amiga a cuminsa studia Bijbel cu e Testigonan. E amiga tawata asina entusiasma cu loke el a siña, cu un dia durante misa na e iglesia cu e ta asisti, el a bisa: “Bin studia Bijbel cu e Testigonan di Yehova!” Poco despues, e expasto, y mas hende tambe a cuminsa studia Bijbel cu Testigonan di Yehova.

20. Con e experencia di un señora na Ghana ta un ehempel di e poder di e Palabra di Dios?

²⁰ Un otro ehempel di e poder di e Palabra di Dios ta e caso di Paulina, un señora na Ghana. Un proclamado di Reino di tempo completo tawatin un studio di Bijbel cu ne den e buki Conocimentu cu Ta Hiba na Bida Eterno. * Paulina tawata envolvi den un matrimonio poligamo y a mira cu e mester haci cambio, pero su casa y tur Paulina su famianan tawata violentamente contra. Paulina su welo, cu tawata un hues di corte supremo y un anciano di iglesia, a purba pon’e cambia di opinion door di asta duna un aplicacion robes di Mateo 19:4-6. E hues a papia cu un siguridad, pero Paulina a realisa rapidamente cu esaki tawata mescos cu ora Satanas a troce e Scritura pa el a tenta Hesus. (Mateo 4:5-7) Paulina a corda riba e declaracion bon cla cu Hesus a haci tocante matrimonio, bisando basicamente cu Dios a crea un homber y un mohe, no un homber y algun mohe, y cu nan dos—no nan tres—mester a bira un solo carni. Paulina a keda para riba su decision y finalmente a haya e diborcio di custumber den casonan di matrimonio poligamo. Poco despues, e tawata un proclamado di Reino felis y batisa.

Sigui Maneha e Palabra di Dios Corectamente

21, 22. (a) Ki determinacion nos kier tin como proclamado di Reino? (b) Kico nos lo considera den e siguiente articulo?

²¹ Dios su Palabra skirbi ta en berdad un herment poderoso cu nos por uza pa yuda otro hende haci cambio den nan bida pa asina nan por hala serca Yehova. (Santiago 4:8) Mescos cu trahadonan habil ta uza herment pa nan por haya bon resultado, laga nos ta determina pa haci esfuerso sinsero pa uza e Palabra di Dios, Bijbel, na un manera habil den e trabou cu Dios a duna nos como proclamado di Reino.

²² Con nos por maneha e Scritura na un manera mas efectivo den nos trabou di haci disipel? Un manera ta door di desaroya nos habilidad como un maestro combencente. Sea asina bon di considera e siguiente articulo, pasobra e ta sugeri maneranan pa siña otro hende e mensahe di Reino y pa yuda nan acept’e.

[Nota]

Bo Ta Corda?

• Cua ta e hermentnan disponibel pa proclamadonan di Reino?

• Den ki maneranan Pablo tawata un ehempel como trahado di Reino?

• Kico maneha e Palabra di Dios corectamente ta encera?

• Como herment, con poderoso e Palabra skirbi di Yehova ta?

[Preguntanan di Estudio]

[Plachinan na pagina 10]

Algun herment cu cristiannan ta uza den e trabou di proclama e Reino