Predica cu e Meta di Haci Disipel

“Ma ora Pricila y Akila a tende [Apolos], nan a hal’e un banda y a splic’e e caminda di Dios na un manera mas exacto.”—ECHONAN 18:26.

1. Aunke Apolos tawata “ferviente den spirito”, kico e tawatin mester?

PRICILA y Akila, un pareha cristian casa di prome siglo, a observa Apolos duna un spich den un sinagoga den e stad di Efeso. Apolos a capta e atencion di su auditorio cu su palabranan elocuente y su manera di papia combencente. E tawata “ferviente den spirito”, y a “siña exactamente e cosnan tocante di Hesus.” Sinembargo, tawata bisto cu Apolos tawata “conoce solamente e bautismo di Huan.” Loke Apolos a predica tocante Hesus tawata berdad, pero limita. E problema tawata cu su conocemento di Cristo no tawata completo. Apolos mester a aumenta su conocemento di e papel cu Hesucristo a hunga den e realisacion di Yehova su proposito.—Echonan 18:24-26.

2. Ki reto Pricila y Akila a acepta?

 ² Sin basila, Pricila y Akila a haci nan mes disponibel pa yuda Apolos bira un persona cu por a cumpli cu “tur loke” Cristo a ordena. (Mateo 28:19, 20) E relato ta bisa cu nan a tuma Apolos den nan compania: nan a “hal’e un banda y a splic’e e caminda di Dios na un manera mas exacto.” Sinembargo, tawatin algun cos di Apolos cu lo a pone cu algun cristian lo no tawata masha dispuesto pa siñ’e. Kico asina? Y kico nos por siña di e esfuerso di Pricila y Akila pa considera e Scritura cu Apolos? Con un repaso di e relato historico aki por yuda nos consentra riba cuminsa studionan di Bijbel?

Presta Atencion na Necesidad di Hende

3. Dicon e background di Apolos no a stroba Pricila y Akila di siñ’e?

³ Apolos ta di desendencia Hudiu, y aparentemente a lanta den e stad di Alehandria. E tempo ei Alehandria tawata capital di Egipto y un centro di educacion avansa, renombra pa su tremendo biblioteca. E stad tawatin un poblacion grandi di Hudiu, incluyendo hopi persona bon siña. Pesei e traduccion Griego di e Scritura Hebreo conoci como Septuaginta, a ser produci einan. No ta straño anto cu Apolos “tawatin hopi bon conocemento di e Scrituranan”! Akila cu Pricila tawata trahado di tent. E echo cu Apolos tawata un bon discursante a spanta nan? No. Motiva pa amor, nan a considera e persona, su necesidadnan, y con nan lo por a yud’e.

4. Na unda y con Apolos a ricibi e yudansa cu e tawatin mester?

⁴ Pa bon discursante cu Apolos tawata, e tawatin mester di instruccion. E yudansa cu e tawatin mester no a ser haya na ningun universidad sino entre e miembronan di e congregacion cristian. Apolos tawata bai beneficia di puntonan cu lo a resulta den un comprondemento mas exacto di Dios su areglo pa salbacion. Pricila y Akila “a hal’e un banda y a splic’e e caminda di Dios na un manera mas exacto.”

5. Kico bo por bisa di e spiritualidad di Pricila y Akila?

⁵ Pricila y Akila tawata spiritualmente fuerte y bon funda den e fe. Muy probablemente nan tawata ‘semper dispuesto pa duna contesta na cada un cu pidi nan pa duna cuenta di nan speransa’, sea cu tawata un persona rico, pober, studia of catibo. (1 Pedro 3:15) Akila cu su esposa tawatin e habilidad di “maneha e palabra di berdad na un manera corecto.” (2 Timoteo 2:15) Evidentemente, nan tawata studiantenan serio di e Scritura. Apolos a keda profundamente conmovi pa e instruccion basa riba e ‘palabra di Dios cu ta bibo y activo’, y cu ta influencia curason.—Hebreonan 4:12.

6. Con nos por sa cu Apolos a aprecia e yudansa cu el a haya?

⁶ Apolos a aprecia e ehempel di su maestronan y a bira asta mas habil den haci disipel. El a haci bon uzo di su conocemento den e trabou di proclama e bon nobo, specialmente entre e poblacion Hudiu. Apolos tawata excepcionalmente util den combence e Hudiunan tocante Cristo. ‘Siendo poderoso den e Scritura’, e por a proba nan cu tur e profetanan di pasado a anticipa e binida di e Cristo. (Echonan 18:24, Kingdom Interlinear Translation) E relato ta agrega cu despues di esei Apolos a bai Acaya, caminda “e tawata di gran ayudo pa esnan cu a kere pa medio di gracia; pasobra e tawata refuta e Hudiunan fuertemente den publico, mustrando pa medio di e Scrituranan cu Hesus tawata e Cristo.”—Echonan 18:27, 28.

Siña for di e Ehempel di Otro Maestronan

7. Con Akila y Pricila a bira maestronan habil?

⁷ Con Akila y Pricila a logra bira maestronan competente di e Palabra di Dios? Fuera di tawata diligente den studio personal y asistencia na reunion, nan asociacion estrecho  cu apostel Pablo sigur a yuda nan hopi. Pa 18 luna Pablo a biba den cas di Pricila y Akila na Corinto. Hunto nan a labora den trahamento y drechamento di tent. (Echonan 18:2, 3) Imagina bo e combersacionnan biblico profundo cu nan lo mester tawatin. Y e asociacion ei cu Pablo siguramente a duna nan spiritualidad un tremendo empuhe! Proverbionan 13:20 ta bisa: “Esun cu anda cu hende sabi lo ta sabi.” Bon compania tawatin un bon efecto riba nan custumbernan spiritual.—1 Corintionan 15:33.

8. Kico Pricila y Akila a siña door di observa Pablo den sirbishi?

⁸ Ora Pricila y Akila a observa Pablo como proclamado di Reino, nan a mira un bon maestro den accion. E relato na Echonan ta declara cu tur dia di sabat Pablo “tawata rasona den snoa [na Corinto] y tawata trata di combence Hudiu y Griego.” Despues, ora cu Silas y Timoteo a join Pablo, el a cuminsa “dedica su mes completamente na predicamento di e palabra, dunando testimonio na e Hudiunan cu Hesus tawata e Cristo.” Pricila y Akila a tuma nota cu ora Pablo a mira cu e miembronan di sinagoga no tawata masha interesa, el a transferi e centro di su actividad di predica pa un sitio mas faborabel, na un cas banda di sinagoga. Einan Pablo a yuda Crispo, “e lider di sinagoga”, pa bira disipel. Muy probablemente Pricila y Akila a ripara cu haciendo e homber ei disipel, tawatin un efecto profundo y productivo riba e teritorio. E relato ta bisa: “Crispo . . . a kere den Señor hunto cu tur e hendenan di su cas, y hopi di e Corintionan, ora nan a tende, a kere y a wordo batisa.”—Echonan 18:4-8.

9. Con Pricila y Akila a reacciona riba e ehempel di Pablo?

⁹ Otro proclamadonan di Reino, manera Pricila y Akila, a imita Pablo su ehempel den sirbishi di veld. E apostel a urgi otro cristiannan: “Sea imitadonan di mi, mescos cu ami tambe ta di Cristo.” (1 Corintionan 11:1) Pricila y Akila, na harmonia cu e ehempel di Pablo, a yuda Apolos compronde siñansanan cristian mas corectamente. Apolos na su turno a yuda otronan. Pricila y Akila sin duda a yuda haci disipel na Roma, Corinto y Efeso.—Echonan 18:1, 2, 18, 19; Romanonan 16:3-5.

10. Kico abo a siña for di Echonan capitulo 18 cu lo yuda bo den e trabou di haci disipel?

¹⁰ Kico nos por siña di nos consideracion di Echonan capitulo 18? Wel, mescos cu Akila y Pricila kisas a siña for di Pablo, nos por mehora nos habilidad di haci disipel door di sigui e ehempel di bon maestronan di e Palabra di Dios. Nos por asocia cu esnan cu ta ‘dedica nan mes completamente na predicamento di e palabra’ y cu ta “dunando testimonio cabal” na otro hende. (Echonan 18:5, Kingdom Interlinear Translation) Nos por observa con  nan ta yega na curason di hende door di uza metodonan combencente pa siña hende. E metodonan ei por yuda nos haci disipel. Ora un persona ta studia Bijbel cu nos, nos lo por sugeri pa e invita otro miembronan di su famia of biciña pa join den e studio. Of nos lo por pidie pa laga nos sa di otro hende cu nos lo por ofrece un studio di Bijbel.—Echonan 18:6-8.

Crea Oportunidadnan pa Haci Disipel

11. Unda nos por haya disipel nobo?

¹¹ Pablo cu su compañeronan cristian a purba haci disipel door di predica di cas pa cas, na plasa y mientras nan tawata biaha, de echo, tur caminda. Como un trahado celoso di Reino cu ta purba haci disipel, abo lo por expande bo actividadnan di sirbishi di veld? Lo bo por probecha di oportunidadnan pa busca hende digno y predica na nan? Cua ta algun manera cu nos rumannan publicado di e bon nobo a haya disipel? Laga nos analisa prome e campo di predicacion via telefon.

12-14. Pa ilustra e beneficionan di predicacion via telefon, conta un experencia personal of un di esnan den e paragrafnan aki.

¹² Un ruman cristian cu nos lo yama Maria, predicando di cas pa cas na Brazil, a entrega un tratado na un señora hoben cu tawata saliendo for di un edificio di apartamento. Uzando e tema di e tratado como introduccion, Maria a puntr’e: “Lo bo kier sa mas tocante Bijbel?” E señora a contesta: “Si, cu mil amor. E problema ta cu mi ta juffrouw di scol, y dunamento di les ta tuma tur mi tempo.” Maria a splic’e cu nan lo por considera topiconan biblico via telefon. E señora a duna Maria su number di telefon, y e anochi ei mes el a cuminsa un studio via telefon uzando e foyeto Kico Dios Ta Rekerí di Nos? *

¹³ Un predicado di tempo completo na Etiopia a spanta ora cu segun cu e tawata predica via telefon na un hende homber, el a tende un bochincha den fondo. E homber a pidie yama bek despues. Ora el a haci esei, e homber a pidie despensa y a bisa cu na momento di su prome yamada, e cu su casa tawata den un discusion fuerte. E ruman mohe a probecha di e comentario ei pa mustra riba e guia sabi cu Bijbel ta duna pa trata problemanan familiar. El a bisa e homber cu e buki E Secreto pa Felicidad den Famia, publica door di Testigonan di Yehova, a yuda hopi famia. Un par di dia despues cu el a entrega e buki, e ruman mohe a bolbe bel e homber. E homber a declara entusiasma: “E buki aki a salba mi matrimonio!” De echo, el a tene un reunion cu su famia pa comparti e bon puntonan cu el a lesa den e buki. Esaki a resulta den un studio di Bijbel, y poco despues e homber a cuminsa asisti regularmente na reunionnan cristian.

¹⁴ Un proclamado di Reino na Dinamarca cu a cuminsa un studio di Bijbel door di predica via telefon a bisa: “E superintendente di sirbishi a anima mi pa participa den  predicacion via telefon. Na principio mi a basila, bisando: ‘E cos ei no ta pa mi.’ Sinembargo, un dia mi a tuma un curashi y a bel e prome doño di cas. Sonja a contesta, y despues di un combersacion cortico, el a bai di acuerdo pa ricibi literatura basa riba Bijbel. Un anochi nos a combersa riba e topico di creacion, y e tawata kier a lesa e buki Bida—Con El A Presenta? Door di Evolucion of Creacion? * Mi a bis’e cu lo ta bon si nos por a topa personalmente y trata e topico. El a bai eens. Sonja tawata cla pa e studio ora mi a yega, y for di e dia ei nos ta studia tur siman.” Nos ruman mohe cristian a conclui bisando: “Pa hopi aña mi tawata pidi un studio di Bijbel den oracion, pero mi no a spera di haya uno door di predica via telefon.”

15, 16. Ki experencianan bo por conta pa mustra e beneficio di ta alerta pa diferente manera di cuminsa studio di Bijbel?

¹⁵ Hopi publicado tin exito door cu nan ta aplica e sugerencia pa predica na hende na unda cu nan ta. Un ruman mohe cristian na Merca a parker su auto banda di un ven riba un parkeerplaats. Ora e señora den e ven a mir’e, e ruman a cuminsa splic’e e caracter di nos obra biblico educativo. E señora a scucha, sali for di su van y a bin na auto di e ruman. E di cu e ruman: “Mi ta masha contento cu bo a para pa papia cu mi. Mi tin basta tempo sin haya boso literatura. Ademas, mi kier studia Bijbel atrobe. Bo por studia cu mi?” Nos ruman pues a crea un situacion faborabel pa comparti e bon nobo.

¹⁶ Un ruman mohe na Merca tawatin e siguiente experencia ora el a bishita un cas di cuido pa anciano: El a bai serca un empleado encarga cu actividadnan den e luga, y a bis’e cu lo e tin gana di duna un man como boluntario pa yuda satisface e necesidadnan spiritual di e habitantenan. Nos ruman a agrega cu gustosamente lo e conduci semanalmente un studio di Bijbel gratis cu ken cu kier asisti. E empleado a dun’e permit pa bishita e cuartonan di diferente habitante. Poco despues e tawata conduci un studio di Bijbel tres biaha pa siman cu un total di 26 habitante, di cua uno ta den condicion pa asisti na nos reunionnan regularmente.

17. Ki metodo hopi bes ta efectivo den cuminsa studio di Bijbel?

¹⁷ Algun proclamado di Reino tin bon resultado door di ofrece e hendenan directamente un studio di Bijbel. Un mainta, un congregacion di 105 publicado a haci un esfuerso special pa ofrece un studio di Bijbel na tur doño di cas cu nan topa. Ochentiseis publicado a participa den sirbishi di veld, y despues di dos ora den e trabou di predica, nan a descubri cu nan a logra cuminsa por lo menos 15 studio di Bijbel nobo.

Sigui Busca Hende Digno

18, 19. Ki instruccion importante di Hesus nos mester tene na mente, y pa logra esei kico nos mester ta determina pa haci?

¹⁸ Como un proclamado di Reino, kisas bo ta desea di purba e sugerencianan menciona den a articulo aki. Claro cu lo ta sabi pa tene cuenta cu custumbernan local ora cu nos ta pensa riba metodonan pa duna testimonio. Mas cu tur cos, laga nos tene na mente e instruccion  cu Hesus a duna pa busca hende digno y yuda e personanan ei bira disipel.—Mateo 10:11; 28:19.

¹⁹ Pa logra esei, laga nos maneha “e palabra di berdad na un manera corecto.” Nos por haci esei door di uza argumentonan combencente solidamente basa riba e Scritura. Esaki lo yuda nos touch curason di hende interesa y motiva nan pa actua. Segun cu nos ta depende riba Yehova, compaña pa oracion, nos por yuda algun bira disipel di Hesucristo. Anto e trabou aki ta algo cu ta duna gran satisfaccion! Pesei laga nos ‘haci tur nos esfuerso pa presenta nos mes aproba dilanti di Dios’, semper honrando Yehova como proclamadonan celoso cu ta predica cu e meta di haci disipel.—2 Timoteo 2:15.

[Nota]

Bo Ta Corda?

• Dicon mester a splica Apolos e caminda di Dios mas completamente?

• Den ki maneranan Pricila y Akila a siña for di apostel Pablo?

• Kico abo a siña tocante e trabou di haci disipel for di Echonan capitulo 18?

• Con bo por crea oportunidad pa haci disipel?

[Preguntanan di Estudio]

[Plachi na pagina 18]

Pricila y Akila ‘a splica Apolos e caminda di Dios na un manera mas exacto’

[Plachi na pagina 20]

Apolos a bira habil den haci disipel

[Plachi na pagina 21]

Pablo a predica na unda cu el a bai

[Plachinan na pagina 23]

Crea oportunidad pa predica