Pronto un Mundo sin Crimen

DJIS purba imagina bo un mundo den cua no tin criminal! Polis, prizon ni un sistema hudicial complica y costoso lo no ta necesario mas. Tur hende lo tin respet pa bida y propiedad di otro hende. Esei ta parce imposibel? Kisas bo ta pensa asina, pero e cambionan asombroso aki ta exactamente loke Bijbel ta priminti. Ban wak kico e Scritura ta predeci tocante crimen y otro cosnan malo cu ta sosode riba e tera aki.

Den e buki di Salmo, nos ta lesa: “No cunsumi pa motibo di malbadonan, ni sea envidioso di e hacidonan di inikidad. Pasobra pronto nan lo wordo corta manera yerba, y nan lo marchita manera yerba berde. Ma e humildenan lo hereda e tera, y lo deleita nan mes den pas abundante.” (Salmo 37:1, 2, 11) En realidad, ningun hende no por stroba Dios di cumpli cu e promesanan aki ni ningun di su otro promesanan alentador.

E manera cu Dios lo trece e bendicionnan aki ta mediante su Reino. Den e Oracion di Nos Tata, Hesucristo a siña su siguidonan pa resa y pidi pa e Reino aki bin y pa Dios su boluntad sosode “na tera mescos cu den shelo.” (Mateo 6:9, 10) Pronto, bou di e Reino aki, ningun hende riba tera lo no sinti nan motiva pa comete crimen pa motibo di pobresa, opresion ni egoismo. Na luga di esei, e Palabra di Dios ta bisa: “Lo tin abundancia di maishi den e tera, riba cabes di e seronan.” (Salmo 72:16) Si, Yehova Dios lo provee un abundancia interminabel di cosnan bon pa tur hende riba tera. Mas importante ainda, hende lo haci cos motiva door di amor pa Dios y nan prohimo, y nunca mas mundo lo wordo aflihi pa crimen.