Ta Rasonabel pa Kere den un Paradijs Riba Tera?

MASHA poco hende ta kere cu un dia tera lo bira un paradijs. Hopi hende ta pensa cu tera lo no sigui existi mes. Segun e buki The Sacred Earth (Tera Sagrado), di Brian Leigh Molyneaux, e planeta aki ta existi pa motibo di ‘un gran explosion cosmico’ cu a tuma luga miyones di aña pasa. Anto si hende mes no destrui tera, hopi hende ta kere cu tera y henter universo finalmente lo por “cai den otro y bolbe bira un bola di candela bek.”

John Milton, poeta Ingles di siglo 17, no tawatin e pensamentonan pesimista ei. Den su poesia Paradijs Perdi, el a conta cu Dios a crea tera pa e bira un paradijs pa henter e famia humano por biba aden. E Paradijs original ei a bai perdi. Pero Milton a kere cu lo e wordo restaura, cu Hesucristo como e rescatador un dia lo “recompensa esnan fiel na dje, y ricibi nan pa nan haya felicidad completo . . . den Shelo of riba Tera.” Cu confiansa Milton a declara: “Pasobra pa e tempo ei henter e Tera lo ta un Paradijs.”

Unda Paradijs Lo Ta —Den Shelo of Riba Tera?

Hopi hende religioso tin e mesun pensamento cu Milton, esta cu finalmente nan lo bin haya un tipo di recompensa pa e sufrimentonan cu nan mester a pasa aden riba tera. Pero unda nan lo disfruta di e recompensa ei? “Den Shelo of Riba Tera”? Tin hende no ta pensa mes cu lo ta aki riba tera. Nan ta bisa cu hende lo disfruta di “felicidad completo” solamente despues cu nan bandona tera y biba den e region di spirito den shelo.

Den e buki Heaven—A History (Historia di Shelo), autornan C. McDannell y B. Lang ta bisa cu Ireneo, teologo di siglo 2, a kere cu bida den un paradijs restaura “lo no tuma luga den un region leu aya den shelo, sino riba tera.” Segun e buki ei, maske lidernan religioso manera Johannes Calvijn y Martin Luther tawatin speransa pa bai shelo, nan a kere tambe cu “Dios lo renoba tera.” Hende di otro religion tawatin e mesun creencianan. Tambe McDannell y Lang ta bisa cu algun Hudiu a kere cu na Dios su debido tempo, tur sufrimento humano “lo ser kita y hende lo hiba un bida yen di satisfaccion riba tera.” Segun e antiguo creencia Perso, “e condicion original cu tawatin riba tera lo wordo restaura y un biaha mas hende lo biba na pas”, The Encyclopaedia of Middle Eastern Mythology and Religion ta bisa.

Kico a pasa cu e speransa di un paradijs riba tera? Tawata e intencion pa nos biba djis un temporada riba tera? Filo, un filosofo Hudiu di prome siglo, tawata di opinion cu bida riba tera ta djis “un episodio cortico y hopi bes miserabel” den un biahe pa un region di spirito. Esei ta e caso? Of Dios tawatin algo otro na mente ora el a crea tera y a pone hende biba den paradijs? Hende por haya berdadero satisfaccion spiritual y felicidad completo aki riba tera mes? Pakico no examina loke Bijbel ta bisa tocante e topico aki? Kisas abo tambe lo yega na e mesun conclusion cu miyones di hende a yega caba, esta cu e speransa pa un paradijs restaura riba tera sin duda ta rasonabel.

[Plachi na pagina 3]

E poeta John Milton a kere cu Paradijs lo ser recobra

 [Reconocemento pa Potret na pagina 2]

COVER: Earth: U.S. Fish & Wildlife Service, Washington, D.C./NASA

[Reconocemento pa Potret na pagina 3]

Tera: U.S. Fish & Wildlife Service, Washington, D.C./NASA; John Milton: Leslie’s