Yuda Otro Hende Acepta e Mensahe di Reino

“Agripa a contesta Pablo: ‘Casi bo ta combence mi pa bira cristian.’”—ECHONAN 26:28.

1, 2. Con bin Pablo a aparece dilanti Gobernado Festo y Rei Herodes Agripa II?

NA AÑA 58 di nos era, na Cesarea, Gobernado Romano Porcio Festo a haya bishita di Rei Herodes Agripa II cu su ruman mohe Berenise. Riba invitacion di Gobernado Festo, nan a bin “tur rondona di luho y grandesa, y a drenta e sala di audiencia, acompaña pa e comandantenan y e hombernan prominente di stad.” Riba ordo di Festo, apostel cristian Pablo a wordo treci den nan presencia. Con bin e siguido aki di Hesucristo ta dilanti e tribunal di Gobernado Festo?—Echonan 25:13-23.

² Loke Festo a conta su invitadonan ta duna un contesta riba e pregunta ei. El a bisa: “Rei Agripa y boso tur, cabayeronan aki presente cu nos, boso ta mira e homber aki tocante di kende henter e pueblo Hudiu a apela na mi, tanto na Herusalem como aki, declarando na bos halto cu e no mester keda biba mas. Ma ami a haya cu e no a haci nada cu merece morto; y como cu e mes a apela na Emperado, mi a dicidi di mand’e. Sinembargo, mi no tin nada definitivo tocante di dje pa skirbi mi señor. Pesei mi a trec’e boso dilanti, y specialmente dilanti di abo, Rei Agripa, pa despues cu e investigacion a tuma luga, mi por tin algo di skirbi. Pasobra ta parce mi absurdo pa manda un preso sin skirbi tambe e acusacionnan cu tin contra dje.”—Echonan 25:24-27.

3. Dicon e lidernan religioso a presenta acusacion contra Pablo?

³ E palabranan di Festo ta indica cu Pablo a ser acusa falsamente di ta causa lantamento, un crimen cu tawatin como castigo pena di morto. (Echonan 25:11) Sinembargo, Pablo tawata inocente. E acusacionnan a origina di e lidernan religioso yalurs den Herusalem. Nan tawata contra di Pablo su trabou como proclamado di Reino y nan tawatin masha rabia cu el a yuda otro hende bira siguido di Hesucristo. Compaña pa bewakernan bon arma, nan a trece Pablo for di Herusalem na e stad portuario di Cesarea, caminda el a apela na Cesar. Djeinan nan lo a hib’e Roma.

4. Ki declaracion sorprendente Rei Agripa ta haci?

 ⁴ Imagina Pablo den palacio di gobernado dilanti di un grupo cu ta inclui e gobernante di un parti importante di e Imperio Romano. Rei Agripa ta bira cara pa Pablo y bisa: “Bo tin mag di papia.” Segun cu Pablo ta papia, algo extraordinario ta sosode. Loke Pablo ta bisa ta cuminsa influencia e rei. De echo, Rei Agripa ta bisa: “Casi bo ta combence mi pa bira cristian.”—Echonan 26:1-28.

5. Dicon Pablo su palabranan na Agripa tawata asina efectivo?

⁵ Djis pensa! Debi na Pablo su defensa habil, un gobernante a ser influencia door di e poder penetrante di e Palabra di Dios. (Hebreonan 4:12) Ta kico a haci Pablo su defensa asina efectivo? Y kico nos por siña for di Pablo cu por yuda nos den nos trabou di haci disipel? Ora nos analisa su defensa, nos ta mira bon cla dos punto cu ta destaca: (1) Pablo tawatin argumentonan combencente den su presentacion. (2) El a uza su conocemento di e Palabra di Dios na un manera habil, mescos cu un artesano ta uza un herment na un manera efectivo.

Uza Argumentonan Combencente

6, 7. (a) Segun e manera cu Bijbel ta uza e palabra “combence”, kico e ta nifica? (b) Ora nos ta yuda hende acepta un siñansa di Bijbel, pakico ta importante pa “combence” nan?

⁶ Den e buki di Echonan, palabranan Griego cu ta nifica “combence” ta ser uza varios bes relaciona cu Pablo su predicacion. Kico esei ta nifica pa nos trabou di haci disipel?

⁷ Den e idioma original di e Scritura Griego Cristian, “combence” ta nifica “gana na bo banda” of pone un persona “cambia di pensamento mediante rasonamento of consideracionnan moral”, segun e Expository Dictionary of New Testament Words di Vine. Si nos analisa e nificacion basico di e palabra nos ta haya mas clarificacion. E ta transmiti e idea di confiansa. Pesei si bo combence un persona pa acepta un siñansa di Bijbel, bo a gana su confiansa, di manera cu e ta pone fe den e berdad di e siñansa ei. Ta bisto anto cu no ta basta pa djis conta un persona loke Bijbel ta bisa, pa asina e por kere esei y actua a base di dje. Bo oyente mester ta combenci cu loke bo ta bisa ta berdad, sea cu e ta un mucha, un biciña, un colega di trabou of un compañero di scol, of un famia.—2 Timoteo 3:14, 15.

8. Kico combence un persona di un berdad biblico ta encera?

⁸ Con bo por combence un persona cu loke bo ta proclama for di e Palabra di Dios ta e berdad? Door di uza rasonamento logico, argumentonan solido y apelacion sinsero, Pablo a purba cambia e pensamento of mentalidad di e hendenan cu el a papia cu ne. * Pesei en bes di djis declara cu algo ta berdad, bo tin cu presenta evidencia satisfactorio pa respalda bo declaracion. Con bo por haci esaki? Haci sigur cu bo declaracion ta basa firmemente riba e Palabra di Dios y no riba opinion personal. Tambe, uza evidencia adicional pa apoya bo declaracionnan biblico sinsero. (Proverbionan 16:23, Beibel na papiamentu koriente) Por ehempel, si bo declara cu humanidad obediente lo disfruta di bida den un paradijs riba tera, apoya e declaracion ei cu un texto biblico, manera por ehempel Lucas 23:43 of Isaias 65:21-25. Con bo por presenta mas evidencia pa apoya bo punto biblico? Podise bo por uza ehempelnan cu bo oyente mes a experencia. Lo bo por record’e di e placernan simpel y gratis cu hende por disfruta dje, manera un bunita bahada di solo, e dushi aroma di un flor, e sabor suculento di un fruta, of e goso di mira un parha alimenta su yiunan. Yuda e persona mira cu e placernan ei ta prueba cu e Creador kier pa nos disfruta di bida riba tera.—Eclesiastes 3:11, 12.

9. Con nos por demostra den nos trabou di predica cu nos ta rasonabel?

⁹ Ora bo ta purba combence un persona pa  acepta un cierto siñansa di Bijbel, tene cuidou pa bo entusiasmo no pone bo zona irasonabel, y di e manera ei sera mente y curason di bo oyente. E buki Scol di Ministerio ta duna e palabra aki di advertencia: “Si nos bisa un persona na un manera bot un berdad cu ta mustra cu un creencia cu ta precioso pa e ta falso, lo no ta facil pa e acepta esei cu gusto, ni maske nos tin un lista largo di textonan biblico como prueba. Por ehempel, si nos djis condena celebracionnan popular bisando cu nan ta di origen pagano, esaki probablemente lo no cambia loke hende ta pensa di nan. Pero si bo ta rasonabel, normalmente lo bo tin mas exito.” Pakico nos tin cu haci un esfuerso determina pa ta rasonabel? E buki ta sigui bisa: “Si bo rasona cu hende esei ta stimula nan pa analisa un asunto na un manera habri y obhetivo. Tambe esei ta duna nan cos pa pensa ariba despues y ta laga porta habri pa mas combersacion den futuro. Esei por ta masha combencente.”—Colosensenan 4:6.

Argumentonan Combencente Cu Ta Motiva Curason

10. Den ki manera Pablo a introduci su defensa dilanti Agripa?

¹⁰ Laga nos analisa awor Pablo su palabranan di defensa na Echonan capitulo 26. Tuma nota con el a cuminsa su discurso. Pa introduci su topico, Pablo a haya un base legitimo pa elogia Agripa, aunke cu e Rei tawatin un relacion escandaloso cu su ruman mohe Berenise. Pablo a bisa: “Mi ta considera mi mes dichoso, o Rei Agripa, cu mi por defende mi mes bo dilanti awe contra tur loke e Hudiunan ta acusa mi di dje; specialmente pasobra bo ta un experto den tur custumber y cuestion cu tin den e Hudiunan; pesei mi ta roga bo pa scucha mi cu pasenshi.”—Echonan 26:2, 3.

11. Con e palabranan di Pablo na Agripa a demostra respet, y esei a resulta den ki beneficio?

¹¹ Bo a ripara cu Pablo a reconoce Agripa su posicion di autoridad door di papia cu ne uzando su titulo, Rei? Esaki a demostra respet,  y door di scohe su palabranan na un manera sabi, Pablo a mustra honor na Agripa. (1 Pedro 2:17) E apostel a reconoce cu Agripa tawata un experto di e custumber- y leinan complica di su subditonan Hudiu. Tambe el a bisa cu e ta contento cu e por a haci su defensa dilanti un gobernante asina bon informa. Pablo, un cristian, no a actua como si fuera el a sinti su mes superior na Agripa, kende no tawata cristian. (Filipensenan 2:3) Mas bien Pablo a roga e Rei pa scuch’e cu pasenshi. Asina Pablo a crea un ambiente den cua Agripa, y tambe e otro oyentenan, lo tawata mas dispuesto pa acepta loke e ta bai presenta. Pablo tawata poniendo un fundeshi, un tereno comun pa e por a sigui desaroya su argumentonan.

12. Den e trabou di proclama e Reino, con nos por touch curason di nos oyentenan?

¹² Laga nos tambe, mescos cu Pablo dilanti Agripa, touch curason di nos oyentenan for di e introduccion te na e conclusion di nos presentacion di e mensahe di Reino. Nos por haci esaki door di mustra respet sinsero pa e persona na ken nos ta predica y tambe berdadero interes den su background y mentalidad.—1 Corintionan 9:20-23.

Uza e Palabra di Dios na un Manera Habil

13. Con abo por motiva bo oyentenan, mescos cu Pablo a haci esei?

¹³ Pablo kier a motiva su oyentenan pa actua riba e bon nobo. (1 Tesalonicensenan 1:5-7) Pa logra esei, el a touch nan curason, e centro di motivacion. Segun cu nos ta sigui considera Pablo su defensa dilanti Agripa, tuma nota con Pablo a ‘maneha e palabra di Dios corectamente’ door di referi na cosnan cu Moises y e profetanan a declara.—2 Timoteo 2:15.

14. Splica con Pablo a uza argumentonan combencente ora e tawata dilanti Agripa.

¹⁴ Pablo tawata sa cu Agripa tawata un Hudiu pa nomber so. Probechando di Agripa su conocemento di hudaismo, Pablo a rasona cu su predicacion realmente a encera pa no “bisa  nada mas sino loke e Profetanan y Moises a bisa cu lo a bai sosode” relaciona cu morto y resureccion di e Mesias. (Echonan 26:22, 23) Dirigiendo su mes directamente na Agripa, Pablo a puntra: “Rei Agripa, bo ta kere e Profetanan?” Agripa tawata den un dilema. Si el a bisa cu e ta rechasa e profetanan, esei lo a daña su reputacion di ta un Hudiu creyente. Pero si el a bai eens cu e rasonamento di Pablo, lo el a demostra publicamente di ta di acuerdo cu e apostel y lo a core e riesgo di ser yama un cristian. Sabiamente Pablo mes a contesta su pregunta, bisando: “Mi sa cu bo ta kere.” Con Agripa su curason a motiv’e pa contesta? El a bisa: “Casi bo ta combence mi pa bira cristian.” (Echonan 26:27, 28) Aunke Agripa no a bira un cristian, Pablo evidentemente a touch su curason te na cierto grado cu su mensahe.—Hebreonan 4:12.

15. Con Pablo a logra cuminsa un congregacion na Tesalonica?

¹⁵ Bo a ripara cu Pablo su presentacion di e bon nobo a consisti di haci proclamacion y tambe uza argumentonan combencente? Como cu Pablo a uza e metodo ei segun cu el a ‘maneha e palabra di Dios corectamente’, algun hende cu a tend’e no a keda simplemente oyente sino a bira creyente. Esaki tawata e caso na Tesalonica, caminda Pablo a bai den sinagoga pa busca Hudiu y hende temeroso di Dios cu no tawata Hudiu. E relato na Echonan 17:2-4 ta bisa: “Segun Pablo su custumber, el a bai serca nan, y tres sabat sigui el a rasona cu nan for di e Scrituranan, splicando y mustrando cu e Cristo mester a sufri y lanta for di e mortonan . . . Y algun di nan a wordo combenci.” Pablo a uza argumentonan combencente. El a rasona, splica y proba mediante e Scrituranan cu Hesus tawata e Mesias priminti for di hopi tempo. E resultado? El a establece un congregacion di creyente.

16. Con bo por haya mas goso den e proclamacion di Reino?

¹⁶ Abo por bira mas habil den uza argumentonan combencente ora di splica e Palabra di Dios? Si ta asina, lo bo haya mas satisfaccion personal y goso den bo trabou di predica y siña hende tocante e Reino di Dios. Esaki tawata e experencia di publicadonan di e bon nobo cu a aplica e sugerencia pa uza Bijbel mas tanto den e trabou di predica.

17. Relata un experencia personal of duna e punto principal di esun den e paragraf aki, pa mustra cu ta probechoso pa nos uza Bijbel den nos sirbishi.

¹⁷ Por ehempel, un superintendente biahero di Testigonan di Yehova a skirbi: “Un cantidad basta grandi di ruman awor ta cana cu un Bijbel den man ora nan ta duna testimonio di cas pa cas. Esaki a yuda e publicadonan lesa un texto pa hopi di e hendenan cu nan ta topa. Esei a yuda tanto e doñonan di cas como e publicadonan pa conecta nos sirbishi cu Bijbel, y no simplemente cu revista y buki.” Claro cu ta depende di varios factor, incluso di custumbernan local, si nos ta cana cu Bijbel den man ora nos ta participa den e actividad di predica. No obstante, nos kier tin e reputacion di ta uza e Palabra di Dios na un manera habil pa combence otro hende pa acepta e mensahe di Reino.

Mantene Dios Su Punto di Bista di Sirbishi

18, 19. (a) Con Dios ta mira nos sirbishi, y dicon nos mester cultiva su punto di bista? (b) Kico lo yuda nos haci rebishitanan exitoso? (Wak e cuadro titula “Con pa Tin Exito den Haci Rebishita”, na pagina 16.)

¹⁸ Un otro manera pa yega na curason di nos  oyentenan ta encera mira sirbishi for di e punto di bista di Dios y tene pasenshi. Dios su boluntad ta pa tur clase di hende “yega na conocemento di e berdad.” (1 Timoteo 2:3, 4) Acaso esei no ta nos deseo? Tambe Yehova ta tene pasenshi, y su pasenshi ta duna hopi hende oportunidad di bin na repentimento. (2 Pedro 3:9) Pesei, ora nos topa un hende cu ta dispuesto pa scucha e mensahe di Reino, kisas lo ta necesario pa nos bishit’e varios biaha pa por cultiva e interes ei. Ta tuma tempo y pasenshi pa mira e simiñanan di e berdad crece. (1 Corintionan 3:6) E cuadro adhunto titula “Con pa Tin Exito den Haci Rebishita” ta duna algun sugerencia pa cultiva e interes ei. Corda cu e hendenan su bida—nan problemanan y situacionnan—ta cambia constantemente. Podise nos tin cu purba hopi biaha prome cu nos haya nan na cas, pero ta bale la pena. Nos kier duna nan un chens di tende Dios su mensahe di salbacion. Pesei pidi Yehova Dios duna bo e sabiduria pa desaroya bo habilidad di uza argumentonan combencente den bo trabou di yuda hende acepta e mensahe di Reino.

19 Unabes nos haya un persona cu ta desea di tende mas di e mensahe di Reino, kico otro nos como trahadonan cristian por haci? Nos siguiente articulo ta ofrece yudansa.

[Nota]

Bo Ta Corda?

• Kico a haci Pablo su defensa dilanti Rei Agripa efectivo?

• Con nos mensahe por touch curason di hende?

• Kico lo yuda nos uza e Palabra di Dios efectivamente pa yega na curason di hende?

• Con nos por tin Dios su punto di bista di sirbishi?

[Preguntanan di Estudio]

[Cuadro/Plachinan na pagina 16]

Con pa Tin Exito den Haci Rebishita

• Mustra un interes personal sinsero den hende.

• Scohe un topico interesante di Bijbel pa considera.

• Pone e fundeshi pa cada bishita cu lo sigui.

• Keda pensa riba e persona despues cu bo bai.

• Bolbe bek pronto, podise den un of dos dia, pa cultiva e interes.

• Tene na mente cu bo meta ta pa cuminsa un studio di Bijbel.

• Pidi Yehova den oracion pa laga e interes di e persona crece.

[Plachi na pagina 15]

Pablo a uza argumentonan combencente ora e tawata dilanti Gobernado Festo y Rei Agripa