‘Deleita Bo Mes den Yehova’

“Deleita bo mes den SEÑOR, y e lo duna bo e deseonan di bo curason.”—SALMO 37:4.

1, 2. Ken ta e Fuente di berdadero felicidad, y con Rei David a hala atencion na e echo aki?

“FELIS ta esnan cu ta conciente di nan necesidad spiritual, . . . felis ta esnan misericordioso, . . . felis ta e hacidonan di pas.” Hunto cu seis descripcion mas di esnan cu ta felis, e declaracionnan aki ta forma e introduccion remarcabel di Hesus su famoso Sermon Riba Sero, segun e Evangelio cu Mateo a skirbi. (Mateo 5:3-11, NW) Hesus su palabranan ta duna nos e siguransa cu felicidad ta na nos alcanse.

² Un cantica sagrado compone door di Rei David di antiguo Israel ta hala atencion na e Fuente di berdadero felicidad, Yehova. David a bisa: “Deleita bo mes den SEÑOR, y e lo duna bo e deseonan di bo curason.” (Salmo 37:4) Pero con e echo cu nos conoce Yehova y e tantisimo fasetanan di su personalidad, por “deleita” nos? Anto con un consideracion di loke el a haci caba y lo haci ainda pa cumpli cu su proposito ta duna bo e speransa di haya “e deseonan di bo curason”? Un analisis cuidadoso di Salmo 37, versiculo 1 pa 11, ta contesta e preguntanan ei.

‘No Sea Envidioso’

3, 4. Manera ta para skirbi na Salmo 37:1, ki conseho David ta duna, y dicon ta bon pa nos haci caso di dje awe?

³ Nos ta bibando den “temponan trabahoso”, y maldad ta abunda. Nos a mira cumplimento di e palabranan di apostel Pablo: “Hendenan malbado y gañadonan lo bai di malo pa peor, gañando y siendo gaña.” (2 Timoteo 3:1, 13) E aparente exito y prosperidad di hendenan malbado por afecta nos facilmente. Tur esei por distrai nos, y pone nos perde nos vision spiritual. Tuma nota con e palabranan di introduccion di Salmo 37 ta spierta nos pa e posibel peliger aki: “No cunsumi pa motibo di malbadonan, ni sea envidioso di e hacidonan di inikidad.”

⁴ Medionan di comunicacion di mundo ta bombardia nos diariamente cu un lista di actonan inhusto. Comerciantenan deshonesto ta comete fraude sin wordo castiga. Criminalnan ta probecha egoistamente di hende vulnerable. Asesinonan no ta ser gara of ta keda sin haya castigo. Tur e tipo di ehempelnan ei di inhusticia por proboca rabia y perturba nos pas mental. E aparente exito di hacidonan di maldad por asta lanta sintimentonan di envidia. Pero e echo cu nos ta rabia pa e cosnan ei, ta drecha e situacion? Si nos sinti envidia pa e aparente bentahanan cu e malbadonan ta gosa di dje, ta cambia e resultado pa nan? Definitivamente cu no! Y eigenlijk, nos no tin motibo pa “cunsumi.” Dicon no?

5. Dicon hacidonan di maldad ta ser compara cu yerba?

 ⁵ E salmista ta contesta: “Pasobra pronto nan lo wordo corta manera yerba, y nan lo marchita manera yerba berde.” (Salmo 37:2) Yerba berde por parce bunita, pero djis despues su blachinan ta marchita y muri. Mescos ta pasa cu hacidonan di maldad. Nan aparente prosperidad no ta permanente. Ora nan muri, nan ganashinan adkiri ilegalmente no por yuda nan mas. Na final di cuenta, tur hende ta haya loke husticia ta dicta. Pablo a skirbi: “E pago di pica ta morto.” (Romanonan 6:23) Hacidonan di maldad y tur hende inhusto finalmente lo ricibi nan “pago” y nada mas. Ki un bida vano y sin sentido!—Salmo 37:35, 36; 49:16, 17.

6. Ki les nos por saca for di Salmo 37:1 y 2?

⁶ Pues anto, nos mester permiti e prosperidad pasahero di hacidonan di maldad perturba nos? E les cu nos ta saca for di e prome dos versiculonan di Salmo 37 ta esaki: No laga nan exito desvia bo for di e caminda cu bo a scohe pa sirbi Yehova. Al contrario, sigui enfoca riba bendicion- y metanan spiritual.—Proverbionan 23:17.

“Confia den SEÑOR y Haci Loke Ta Bon”

7. Dicon nos mester confia den Yehova?

⁷ E salmista ta anima nos pa “confia den SEÑOR y haci loke ta bon.” (Salmo 37:3a) Ora nos ta yen di precupacion of asta duda, nos mester pone nos confiansa firmemente den Yehova. E ta Esun cu ta ofrece pleno siguridad spiritual. Moises a skirbi: “Esun cu ta biba bou di e proteccion di e Haltisimo lo permanece den e sombra di e Todopoderoso.” (Salmo 91:1) Ora cu aumento di maldad den e mundo aki ta kita nos trankilidad, nos tin cu len mas tanto ainda riba Yehova. Si nos versuek nos enkel, nos ta keda contento ora nos por len riba brasa di un amigo. Asina tambe, ora nos ta haci esfuerso pa cana den fieldad, nos tin mester di Yehova su sosten.—Isaias 50:10.

8. Con door di participa den sirbishi cristian nos ta evita cu e prosperidad di e malbadonan ta molestia nos demasiado?

⁸ Ora e prosperidad di e malbadonan ta molestia nos, tin un cos cu nos por haci pa combatie: ocupa nos mes den e trabou di busca y yuda hende semehante na carne pa yega na un conocemento exacto di Yehova su proposito. En bista di e aumento di maldad, nos mester ta plenamente ocupa yudando otro hende. Apostel Pablo a bisa: “No laga di haci bon y di comparti cu otro; pasobra sorto di sacrificionan asina ta agrada Dios.” E “bon” di mas grandi cu nos por haci ta di comparti e glorioso bon nobo di e Reino di Dios cu otro hende. Nos predicacion publico ta realmente “un sacrificio di alabansa.”—Hebreonan 13:15, 16; Galationan 6:10.

9. Splica David su apelacion pa “biba den e tera.”

⁹ David a bisa: “Biba den e tera y alimenta bo mes cu Su fieldad.” (Salmo 37:3b) Den tempo di David “e tera” tawata e teritorio cu Yehova a duna Israel: e Tera Priminti. Durante e reinado di Salomon, e tera su limitenan a core for di Dan den nort te na Beerseba den suit. Esaki tawata e luga di biba di Israel. (1 Reinan 4:25) Awe, na unda cu nos ta biba riba tera, nos ta spera cu anhelo e tempo ora cu  henter e planeta lo bira un paradijs den e mundo nobo di husticia. Pero tanten, nos ta biba den siguridad spiritual.—Isaias 65:13, 14.

10. Kico ta e resultado ora nos ta “trata cu fieldad”?

¹⁰ Kico lo ta e resultado ora nos ta ‘alimenta nos mes cu fieldad’, es decir, “trata cu fieldad” [NW]? E proverbio inspira ta recorda nos: “Un hende fiel lo ta yen di bendicion.” (Proverbionan 28:20) Ora cu fielmente nos ta persevera den predica e bon nobo na unda cu nos ta biba y na ken cu nos por papia cu ne, esei siguramente ta trece bendicion di Yehova. Por ehempel, 40 aña pasa Frank cu su casa Rose, a acepta un asignacion di pionero den un stad den parti nort di Escocia. Anteriormente tawatin un par di hende interesa den e stad, pero nan interes a fria. Sin laga esaki stroba nan, e pareha pionero a cuminsa cu e trabou di predica y haci disipel. Awor tin un congregacion prospero den e stad ei. E fieldad di e pareha aki realmente tawatin Yehova su bendicion. Frank ta splica humildemente: “E bendicion di mas grandi simplemente ta cu nos ta den e berdad ainda y ta util pa Yehova.” Si, ora nos ta “trata cu fieldad”, nos ta ricibi hopi bendicion y ta aprecia nan.

“Deleita Bo Mes” den Yehova

11, 12. (a) Con nos por “deleita” den Yehova? (b) Ki meta bo por pone relaciona cu studio personal, y kico lo por ta e resultado?

¹¹ Pa fortalece nos relacion cu Yehova y mantene nos confiansa den dje, nos tin cu ‘deleita nos mes den Yehova.’ (Salmo 37:4a) Con nos ta haci esei? En bes di ta precupa cu nos propio situacion, pa dificil cu e situacion por ta, nos ta consentra riba Yehova. Un manera pa haci esaki ta door di tuma tempo pa lesa su Palabra. (Salmo 1:1, 2) Bo lesamento di Bijbel ta deleita bo, duna bo goso? Esei lo ta e caso si bo ta lesa cu e meta di siña mas tocante Yehova. Pakico bo no ta pausa despues di lesa un porcion y puntra bo mes: ‘Kico e pasashi aki ta siña mi tocante Yehova?’ Podise ta bon pa bo tin un buki di nota of un pida papel na man ora bo ta lesa Bijbel. Cada biaha cu bo stop pa reflexiona riba e nificacion di loke bo a lesa, skirbi un frase cu ta recorda bo di un di Dios su cualidadnan atractivo. Den un otro salmo, David a canta: “Mare palabranan for di mi boca y pensamentonan di mi curason por ta agradabel na bo, SEÑOR, mi Baranca y Salbador.” (Salmo 19:14, Beibel na papiamentu koriente) Ora nos ta consentra asina riba e Palabra di Dios, esei ta “agradabel” pa Yehova y ta duna nos goso.

¹² Con nos por haya felicidad for di nos studio y meditacion? Nos por pone e meta pa siña mas tanto posibel tocante Yehova y su camindanan. Publicacionnan manera E homber mas importante cu hamás a biba y Hala Serca Yehova * ta duna nos hopi cos pa reflexiona cu aprecio riba dje. David ta sigura hende husto cu Yehova na su turno, “lo duna bo e deseonan di bo curason.” (Salmo 37:4b) Ta e confiansa aki lo mester a motiva apostel Huan pa skirbi e palabranan: “Esaki ta e confiansa cu nos tin su dilanti, cu si nos pidi cualkier cos conforme su boluntad, e ta tende nos. Y si nos sa cu e ta tende nos den tur loke nos pidi, nos sa cu nos tin e peticionnan cu nos a pidi di dje.”—1 Huan 5:14, 15.

13. Den añanan resien, ki expansion den e trabou di predica e Reino a ser observa den hopi pais?

 ¹³ Como personanan cu ta warda integridad, nos deleite di mas grandi ta pa mira Yehova su derecho di goberna como Soberano ser vindica. (Proverbionan 27:11) Nos curason no ta abunda cu goso ora nos tende di e tremendo trabou di predica cu nos rumannan ta efectua den paisnan cu anteriormente tawata totalitario of dictatorial? Ansiosamente nos ta spera pa mira cuanto libertad mas nan lo haya prome cu fin di e sistema aki yega. Hopi sirbido di Yehova cu ta biba den paisnan caminda actividadnan cristian por tuma luga libremente ta predica cu entusiasmo na studiantenan, refugiadonan y otro hendenan cu temporalmente ta biba den e paisnan aki, y na unda nan ta disfruta di libertad di adoracion. Nos ta desea sinseramente cu ora e personanan aki regresa nan pais, nan ta sigui laga e lus di e berdad briya asta caminda e trabou ta prohibi y caminda tin un scuridad aparentemente impenetrabel.—Mateo 5:14-16.

“Encomenda Bo Caminda na SEÑOR”

14. Ki prueba tin cu nos por confia den Yehova?

¹⁴ Ta un gran alivio pa sa cu nos precupacionnan y loke por parce di ta pesonan opresivo, por kita for di nos lomba! Con? David a bisa: “Encomenda bo caminda na SEÑOR, confia tambe den dje, y e lo hacie.” (Salmo 37:5) Den nos congregacionnan, nos tin hopi evidencia cu Yehova ta un sosten confiabel. (Salmo 55:22) E rumannan den sirbishi di tempo completo, sea ta pionero, superintendente biahero, misionero of boluntario cu ta sirbi na Betel, tur por testifica cu Yehova su cuido ta confiabel. Pakico bo no ta papia cu esnan cu bo conoce y puntra nan con Yehova a yuda nan? Sin duda lo bo tende hopi experencia cu ta mustra cu asta ora tempo ta dificil, Yehova su man nunca no ta cortico. Semper e ta percura pa e necesidadnan di bida.—Salmo 37:25; Mateo 6:25-34.

15. Den ki manera e husticia di e pueblo di Dios ta briya?

¹⁵ Ora nos ta haci Yehova nos confiansa y ta depende riba dje completamente, nos por experencia e siguiente palabranan di e salmista: “E lo laga bo husticia briya manera lus, y bo derecho manera merdia.” (Salmo 37:6) Como Testigonan di Yehova, hende hopi bes ta papia malo di nos. Pero Yehova ta habri wowo di esnan di curason honrado pa yuda nan realisa cu nos sirbishi publico ta ser motiva door di amor  pa Yehova y pa prohimo. Na mesun tempo, maske hende ta papia malo di nos, nos conducta recto no por keda scondi. Yehova ta sostene nos den tur tipo di oposicion y persecucion. Como resultado, e husticia di e pueblo di Dios ta briya manera solo di merdia.—1 Pedro 2:12.

“Warda cu Pasenshi”

16, 17. Na harmonia cu Salmo 37:7, awor ta tempo pa kico, y dicon?

¹⁶ E siguiente palabranan di e salmista ta: “Sosega den SEÑOR, y warda cu pasenshi riba dje; no cunsumi pa motibo di esun cu ta prospera den su caminda, pa motibo di e hende cu ta ehecuta plan di maldad.” (Salmo 37:7) Aki David ta enfatisa cu ta necesario pa nos warda cu pasenshi riba Yehova pa e actua. Aunke fin di e sistema aki no a yega ainda, esaki no mester ta un motibo pa nos keha. Acaso nos no a mira cu Yehova su misericordia y pasenshi ta mas grandi cu loke nos a pensa na principio? Nos lo por mustra awor di nos parti cu nos tambe ta warda cu pasenshi segun cu nos ta keda ocupa predicando e bon nobo prome cu e fin yega? (Marco 13:10) Awor ta tempo pa evita actonan descabeya cu por horta nos di nos goso y siguridad spiritual. Awor ta tempo pa resisti mas cu nunca e mal influencia di e mundo di Satanas. Y awor ta tempo pa mantene puresa moral y nunca peligra e posicion husto cu nos tin dilanti Yehova. Laga nos sigui deshaci di pensamentonan inmoral y evita actonan indecente pa cu personanan di e sexo opuesto of asta pa cu personanan di e mesun sexo.—Colosensenan 3:5.

¹⁷ David ta conseha nos: “Stop di rabia y laga furia para; no cunsumi—esei ta conduci na maldad so. Pasobra hacidonan di maldad lo wordo corta kita afo; ma esnan cu spera riba SEÑOR lo hereda e tera.” (Salmo 37:8, 9) Si, cu confiansa nos por anticipa e tempo—cu awor ta asina serca—ora cu Yehova lo elimina tur corupcion for di riba tera y tambe esnan cu ta responsabel p’e.

“Aki Poco Tempo”

18, 19. Ki animacion bo ta saca for di Salmo 37:10?

¹⁸ “Pasobra aki poco tempo e malbado lo no t’ei mas; maske cuanto bo busca su luga, e lo no t’ei.” (Salmo 37:10) E palabranan aki ta un gran animacion pa nos segun cu nos ta acerca fin di e sistema aki y culminacion di hende su independencia desastroso for di Yehova! Tur clase di gobierno of autoridad cu hende a bin cu ne a fracasa miserablemente. Y awor nos ta acercando e tempo pa hende bolbe bek na Dios su gobernacion—berdadero teocracia—cu ta e Reino di Yehova den man di Hesucristo. E gobierno ei lo tuma control completo riba asuntonan di mundo y elimina tur opositor di e Reino di Dios.—Daniel 2:44.

¹⁹ Maske cuanto bo busca den e mundo nobo bou di e Reino di Dios, lo bo no por haya un “malbado.” Si, ken cu rebela e tempo ei contra Yehova lo ser elimina rapidamente. Einan lo no tin ningun persona cu ta ataca Yehova su derecho di goberna como Soberano ni cu ta nenga di somete nan mes na Dios su autoridad. Tur bo biciñanan lo tin e mesun deseo di agrada Yehova. Esei lo trece un gran siguridad: lo no tin lok ni hekwerk, nada cu lo daña confiansa y felicidad!—Isaias 65:20; Mikeas 4:4; 2 Pedro 3:13.

20, 21. (a) Ken ta “e humildenan” cu Salmo 37:11 ta referi na dje, y na unda nan ta haya “pas abundante”? (b) Ki bendicionnan nos lo haya si nos imita e David Mayor?

²⁰ E ora ei “e humildenan lo hereda e tera.” (Salmo 37:11a) Si, “e humildenan” ta esnan cu humildemente ta warda riba Yehova pa e  corigi tur e inhusticianan cu a ser cometi contra nan. Nan “lo deleita nan mes den pas abundante.” (Salmo 37:11b) For di aworaki mes nos ta haya pas abundante den e paradijs spiritual cu ta liga cu e berdadero congregacion cristian.

²¹ Aunke ainda nos no a haya alivio di sufrimento, nos ta sostene otro y ta consola esnan cu ta deprimi. Como resultado, esei ta promove un berdadero sintimento di satisfaccion den e pueblo di Yehova. Amorosamente rumannan nombra como wardado ta atende nos necesidadnan spiritual—i tin biaha asta necesidadnan fisico—y asina nan ta yuda nos soporta sufrimento pa causa di husticia. (1 Tesalonicensenan 2:7, 11; 1 Pedro 5:2, 3) E pas aki ta un pocesion sumamente balioso! Tambe nos tin e speransa di bida eterno den e benidero Paradijs caminda pas lo reina. Pesei laga nos imita e David Mayor, Cristo Hesus, kende su celo pa Yehova a motiv’e pa sirbi fielmente te na fin. (1 Pedro 2:21) Haciendo esei, nos lo sigui ta felis, alabando nos Dios, Yehova, esun den ken nos ta deleita nos mes.

[Nota]

Bo Por Contesta?

• Ki lesnan bo a siña for di Salmo 37:1 y 2?

• Con bo por “deleita bo mes” den Yehova?

• Ki prueba tin cu nos por confia den Yehova?

[Preguntanan di Estudio]

[Plachi na pagina 9]

Cristiannan ‘no ta envidioso di esnan cu ta haci maldad’

[Plachi na pagina 10]

‘Confia den Yehova y haci loke ta bon’

[Plachi na pagina 11]

Deleita bo mes den Yehova door di siña mas tanto posibel tocante dje

[Plachi na pagina 12]

“E humildenan lo hereda e tera”