“Dispuesto pa  Haci Tur Bon Obra”

“RECORDA nan pa ta sumiso na gobernantenan y na autoridadnan, pa ta obedecido, y dispuesto pa haci tur bon obra.” (Tito 3:1) Ta cua bon obra apostel Pablo tawatin na mente ora el a skirbi e palabranan ei na su rumannan den fe? E experto di Bijbel E. F. Scott a señala na un tipo di bon obra, bisando: “Cristiannan no solamente mester a obedece autoridad, sino tambe nan mester tawata cla pa haci cualke bon obra. . . . Ki ora cu e situacion a exigi esei, cristiannan lo mester tawata entre e promenan pa demostra interes pa comunidad. Constantemente lo tawatin candela, epidemia y varios tipo di calamidad, y tur bon ciudadano lo a desea di yuda nan prohimo.”

Cristiannan ta participa den cierto obranan cu ta na bienestar di comunidad te asina leu cu e obranan ei no ta na conflicto cu e leinan di Dios. (Echonan 5:29) Por ehempel, e sucursal di Testigonan di Yehova na Hapon, situa na Ebina, cumpliendo cu instruccion di e departamento local di bombero ta tene tur aña un training con pa paga candela y kico pa haci den caso di candela. Na ocasionnan asina, tur miembro di e famia di Betel ta bin hunto pa scucha e instruccionnan cu ta ser duna door di un representante di e departamento local di bombero.

Ademas, pa mas cu un decada, e sucursal ei ta coopera cu autoridadnan local den un exhibicion cu ta ser patrocina pa haci hende mas conciente di prevencion di candela. Na e exhibicion ei, compania- y empresanan di e stad ta demostra con bon prepara nan ta pa combati candela y manten’e bou di control. Hopi bes e sucursal a ricibi reconocemento pa e habilidad y cooperacion di su personal. Na aña 2001 nan a haya e prome premio den e exhibicion. Pues, nan ta prepara y dispuesto pa haci bon obra cu por salba bida den caso di candela.

Un Servicio Balioso

Sinembargo, Testigonan di Yehova ta interesa den un tipo di bon obra cu ta hopi mas importante, y cu tambe ta salba bida. Regularmente nan ta bishita nan prohimo pa comparti cu nan e evangelio of bon noticia di e Reino di Dios. (Mateo 24:14) E Testigonan ta curasha hende pa siña principionan biblico y aplica nan den nan bida. Esei por yuda nan mehora e calidad di nan bida awor y tambe duna nan e speransa di bida eterno den un mundo caminda lo reina berdadero pas y siguridad.

Tin hende cu kisas no ta compronde e balor di e servicio cu Testigonan di Yehova ta rindi, y ta considera nan un molester. Sinembargo, Hues Jean Crepeau di Corte Superior di Quebec na Canada si no a pensa asina. Testigonan di Yehova den e pais ei a presenta obhecion contra un decreto municipal di e stad Blainville, na Quebec, cu a exigi un permit pa nan por haci nan bishitanan di cas pa cas. Den e decision di corte, Hues Crepeau a declara: “E bishitanan di e Testigonan di Yehova ta un servicio cristian na comunidad y . . . e publicacionnan cu e Testigonan ta ofrece na ciudadanonan cu ta interesa ta literatura serio cu ta trata cu topiconan manera religion, Bijbel, droga, alcoholismo, educacion di hubentud, problemanan matrimonial y diborcio.” E veredicto a sigui bisa: “E unico conclusion cu corte por yega na dje ta cu comparando Testigonan di Yehova cu bendedo riba caya, ta un insulto, un degradacion, algo ofensivo y difamatorio.”

Testigonan di Yehova ta contribui na e bienestar di e comunidad caminda nan ta biba door di yuda hende vence problema den nan bida diario y door di duna nan un speransa pa futuro. Bijbel ta prepara nan pa cumpli cu e trabou ei. “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia, pa e hende di Dios por ta perfecto, ekipa pa tur bon obra.”—2 Timoteo 3:16, 17.

Abo lo tin gana di sa con Testigonan di Yehova ta haci nan mes “dispuesto pa tur bon obra”? Nos ta invita bo pa acepta nan yudansa pa siña mas tocante Bijbel y asina probecha di e servicio vital aki na comunidad cu nan ta rindi den bo area y tambe rond mundo.

[Plachinan na pagina 30, 31]

Testigonan di Yehova ta trata na coopera cu autoridadnan

[Plachi na pagina 31]

Testigonan ta conoci pa e echo cu nan ta yuda nan prohimo