E Motibo Corecto pa Kere den Dios

E BUKI Coreano 31 Reasons Why Young People Leave the Church (31 Motibo Pakico Hobennan Ta Bandona Misa) ta bisa cu hopi hoben ta stop di bai misa door cu nan no ta haya contesta satisfactorio pa nan preguntanan. Por ehempel, nan sa puntra: ‘Dicon hende cu ta kere den Dios ta sufri?’ y ‘Dicon nos mester acepta tur loke nos ta siña na misa siendo cu hopi di e siñansanan aki ta confuso y contradictorio?’

Decepciona pa e contestanan cu nan ta haya for di nan pastonan, hopi di nan ta saca conclusion cu Bijbel no tin un contesta. Ora un pasto ta duna un splicacion cu ta basa unicamente riba su propio opinion, hopi bes e resultado ta cu hende ta haya un idea robes di Dios y di Bijbel, anto asta ta rechasa nan.

Esei ta loke a sosode cu Abel, kende a lanta como luterano na Sur Africa. E ta corda: “Iglesia ta siña bo cu Dios ta ‘tuma’ tur hende cu muri. Pero mi no por a compronde dicon un Dios di amor lo a ‘tuma’ mayornan for di nan yiunan. Den cunucu caminda mi a lanta, nos tawata mata un galiña solamente si su puyitonan a bira grandi. Ora nos a haya sa cu un baca ta dik, nos no tawata mat’e, sino tawata warda te ora e bishe nace y stop di bebe lechi. Mi no tawata compronde dicon un Dios di amor no a mustra e mesun consideracion pa hende.”

Aram, un Canades, tawatin dudanan similar. E ta conta: “Tempo mi tawatin 13 aña, mi tata a muri. Durante e acto di entiero, un pasto prominente a splica cu Dios tawata kier pa mi tata muri  pa e por ta mas serca Dios den shelo. E pasto a bisa: ‘Dios ta tuma bon hende door cu e ta stima hende husto.’ Mi no por a compronde con Dios por ta asina egoista.”

Cu tempo, tanto Abel como Aram a drenta den contacto cu Testigonan di Yehova, ambos a cuminsa studia Bijbel cu nan y finalmente a haya contesta pa nan preguntanan. Nan a cultiva amor pa Dios y un fe fuerte den dje. Anto finalmente nan a dedica nan bida na Yehova y a bira sirbidonan leal di dje.

Conocemento Exacto—Un Factor Importante pa Kere den Dios

Kico nos por siña for di e experencianan aki? Nan ta siña nos cu pa loke ta trata keremento den Dios, conocemento exacto di Bijbel ta esencial. Apostel Pablo a bisa cristiannan di e stad antiguo di Filipos: “Esaki ta mi oracion, cu boso amor por abunda mas y mas ainda den conocemento berdadero y tur discernimento.” (Filipensenan 1:9) Aki Pablo ta relaciona amor pa Dios y pa rumannan den fe cu conocemento berdadero of conocemento exacto di Dios, y comprondemento encuanto kico ta su boluntad.

Esei ta rasonabel, ya cu e prome cos cu por yuda nos confia den un hende ta si nos conoc’e; mas miho nos conoc’e, mas nos lo por confi’e. Di igual manera, conocemento exacto ta necesario pa bo por sinti bo motiva pa kere den Dios. Pablo a bisa: “Fe ta e siguransa di cosnan cu hende ta spera, e conviccion di cosnan cu hende no ta mira.” (Hebreonan 11:1) Kere den Dios sin conocemento exacto di Bijbel ta mescos cu construi un cas riba santo. E por basha den otro facilmente.

Un studio di Bijbel por yuda bo haya contesta pa preguntanan manera esun cu a confundi Abel y Aram pa hopi tempo: Dicon hende ta muri? Bijbel ta splica cu “door di un hende pica a drenta den mundo, y morto door di pica, y asina morto a pasa pa tur hende, pasobra tur a peca.” (Romanonan 5:12) Hende ta bira bieu y muri, no pasobra Dios ta tuma nan pa nan ta hunto cu ne, sino pasobra Adam a peca. (Genesis 2:16, 17; 3:6, 17-19) Ademas, Bijbel ta revela kico ta e berdadero speransa cu Yehova Dios ta ofrece. Mediante su Yiu, Hesucristo, e ta provee e speransa di un resureccion pa humanidad pecaminoso.—Huan 5:28, 29; Echonan 24:15.

Pa yuda nos compronde e berdad tocante resureccion, Bijbel ta menciona varios ehempel den cua Hesus a lanta hende for di morto. (Lucas 7:11-17; 8:40-56; Huan 11:17-45) Ora bo lesa e relatonan biblico aki, mira cuanto goso y alegria e amigo- y famianan di esnan resusita a sinti. Ripara tambe cu nan a sinti nan conmovi pa alaba Dios y pone fe den Hesus.

Conocemento exacto tocante Dios y su propositonan por tin e mesun efecto riba hende awe. Hopi hende tawata confundi, carga y asta a trompica pa motibo cu nan no por a haya contesta satisfactorio pa preguntanan importante. Pero segun cu nan a studia Bijbel nan a haya contesta pa e preguntanan aki, y esei a cambia nan bida completamente.

Amor pa Dios Ta e Motibo Principal pa Sirbie

Conocemento exacto ta esencial pa un hende por eherce fe den Dios, pero mas cu esei ta necesario pa un hende sintie motiva pa obedec’e y sirbie. Ora nan a puntra Hesus cua ta e mandamento di mas grandi, el a bisa: “Stima SEÑOR bo Dios cu henter bo curason, y cu henter bo alma, y cu henter bo mente, y cu tur bo forsa.” (Marco 12:30) Si un hende ta stima Dios na e moda cu Hesus a indica, lo e ta mucho mas dispuesto pa obedec’e y sirbie. Den bo caso ta asina?

Rachel, kende tawata un misionero pa algun decada na Corea, ta duna e siguiente motibo pakico e tin fe den Dios: “Mi ta pensa riba e generosidad cu Yehova a mustra na su criaturanan, e manera cu el a pordona su pueblo ora el a trata cu nan y riba e deseo cu e tin pa nos prospera door di laga nos sa kico e kier di  nos. Tur e cosnan aki ta pone mi amor pa Dios crece. Y e amor aki ta pone mi sinti un deseo pa sirbie.”

Martha, un biuda na Alemania, a sirbi Yehova pa 48 aña. E ta bisa: “Dicon mi ta sirbi Yehova? Pasobra mi stim’e. Tur anochi mi ta papia cu Yehova den oracion y ta bis’e con gradicido mi ta pa tur e bendicionnan cu el a drama riba mi, specialmente pa e sacrificio di rescate.”

Si, amor pa Dios ta pone nos haya un deseo di curason pa sirbie. Pero con un hende por cultiva e amor ei? E motivacion mas fuerte pa cultiva amor pa Dios ta aprecio profundo pa e amor cu el a demostra na nos. Tuma nota di e siguiente recordatorio conmovedor cu Bijbel ta duna: “Esun cu no ta stima no conoce Dios, pasobra Dios ta amor. Pa medio di esaki e amor di Dios a wordo manifesta den nos, cu Dios a manda su Yiu unigenito den mundo pa nos por a biba pa medio di dje. Den esaki amor ta consisti, no cu ta nos a stima Dios, ma cu ta el a stima nos y a manda su Yiu pa ta e propiciacion pa nos picanan.”—1 Huan 4:8-10.

Bo ta realisa con grandi e amor aki ta? Imagina bo cu bo ta hogando den un coriente di awa fuerte y un homber ta risca su bida pa scapa bo. Lo bo lubid’e, of lo bo keda sumamente gradicido na dje? Lo bo no ta dispuesto pa haci tur loke bo por p’e? E amor cu Dios a mustra ora el a provee su Yiu Hesucristo como e sacrificio di rescate, ta hopi mas grandi na comparacion. (Huan 3:16; Romanonan 8:38, 39) Ora Dios su amor touch bo curason, lo bo sinti bo motiva pa stim’e y sirbie cu henter bo curason.

Bendicionnan Awor y den Futuro

Maske nos amor pa Dios mester ta e motibo principal pakico nos ta haci su boluntad, ta dushi pa sa cu Dios ta recompensa esnan cu ta sirbie. Apostel Pablo a indica: “Sin fe ta imposibel pa agrad’e, pasobra esun cu bini serca Dios mester kere cu e ta, y cu e ta esun cu ta  recompensa esnan cu ta busc’e.”—Hebreonan 11:6.

Dios realmente ta bendiciona esnan cu ta stim’e y obedec’e. Hopi di nan tin un miho salu debi cu nan ta sigui e principionan di Bijbel. (Proverbionan 23:20, 21; 2 Corintionan 7:1) Esnan cu aplica principionan di Bijbel relaciona cu honestidad y diligencia, por lo general ta ser confia door di nan doño di trabou y como resultado nan ta disfruta di mas tanto siguridad economico. (Colosensenan 3:23) Door di pone confiansa den Yehova, sirbidonan di Dios ta bendiciona cu pas mental asta bou di circunstancianan hopi dificil. (Proverbionan 28:25; Filipensenan 4:6, 7) Y sobre todo, nan ta anticipa cu confiansa e bendicion di bida eterno den e benidero Paradijs riba tera.—Salmo 37:11, 29.

Kico esnan cu ta disfruta di tal bendicionnan for di Yehova ta sinti p’e? Jacqueline, un cristian na Canada, ta expresa su aprecio pa Dios di e siguiente manera: “Semper e ta duna nos regalonan asina maraviyoso, y e ta provee e speransa sigur di bida eterno.” Abel, kende a ser menciona na principio di e articulo, ta describi su sintimentonan asin’aki: “E speransa di biba pa semper den paradijs riba tera tawata algo nobo pa mi, y mi ta spera ansiosamente riba dje. Sinembargo, asta si no tawatin Paradijs, toch lo ta un placer pa mi mustra mi amor na Dios door di sirbie.”

Abo Tambe Por Haya Berdadero Fe

Bijbel ta bisa: “SEÑOR di ehersitonan, kende ta husga cu husticia, y ta scudriña e sintimentonan y e curason.” (Yeremias 11:20) Si, Yehova ta examina loke tin scondi te den fondo di nos alma. Cada hende tin cu examina e motibo pakico personalmente e ta kere den Dios. Creencia- y conceptonan robes tocante Dios por a pone un hende haci cosnan robes den pasado. Pero conocemento di Bijbel por yuda un hende desaroya un bon relacion cu e Creador, Yehova Dios.—1 Timoteo 2:3, 4.

Mediante nan areglo di studio di Bijbel gratis na cas, Testigonan di Yehova ta yuda hende haya conocemento exacto di Dios. (Mateo 28:20) Hopi hende cu a acepta tal yudansa a siña stima Yehova y a cultiva berdadero fe den dje. Door di un studio di Bijbel, nan a haya “sabiduria practico y capasidad di pensa”, cu ta yuda nan “cana den siguridad” den e tempo insigur aki. (Proverbionan 3:21-23, NW) Y mas importante ainda, awor nan tin un “speransa sigur y firme” pa futuro. (Hebreonan 6:19) Abo tambe por haya berdadero fe y disfruta di e bendicionnan aki.

[Cuadro na pagina 6]

Preguntanan Inkietante Cu Mester A Wordo Contesta

“Mientras mi tawata core stage na un hospital pa mi bira docter, mi a mira bon hende sufri pa motibo di malesa of desaster. Si tin un Dios, dicon e cosnan aki ta sosode? Religion ta simplemente un medio pa un hende por haya pas mental?”—Un expresbiteriano na Corea.

“Hopi bes mi tawata puntra mi mes si mi tata alcoholico a bai fierno of shelo. Mi tawatin hopi miedo di hende morto y di fierno di candela. Mi no por a compronde con un Dios di amor por a manda un hende bai sufri pa semper den fierno.”—Un excatolico na Brazil.

“Kico ta bai pasa den futuro cu planeta tera y cu hende? Con hende lo por biba pa semper den futuro? Con hende por haya berdadero pas?”—Un excatolico na Alemania.

“E siñansa di reencarnacion no a parce mi logico. Bestia no por adora, pues si pa x motibo bo reencarna den un bestia pa bo paga pa e picanan cu bo a comete, con lo bo por drecha bo bida y progresa?”—Un exhindu na Sur Africa.

“Mi a lanta den un famia cu a practica confucianismo, y tawatin custumber di participa den e ceremonia pa descanso di nos antepasadonan. Mientras mi tawata yuda drecha e mesa di sacrificio y tawata buig, mi tawata puntra mi mes si e antepasadonan lo a bin pa come y mira nos ta buig pa nan.”—Un exmiembro di confucianismo na Corea.

Tur e hendenan aki a haya contesta pa nan preguntanan ora nan a studia Bijbel cu Testigonan di Yehova.