E Motibo Pakico Nan Ta Bai Misa

“REPUBLICA di Corea awor tin casi cuater bes mas tanto presbiteriano cu Merca.” E declaracion ei den e revista Newsweek kisas a sorprende hopi lesado, ya cu mayoria hende ta pensa cu Corea ta un pais caminda budismo y confucianismo ta predomina. Awendia, un bishitante lo haya un cantidad considerabel di misa “cristian” einan, hopi bes identifica mediante un crus di lus di neon colo cora. Riba diadomingo, ta normal pa mira dos of tres hende ta cana hunto, cu Bijbel den man, pa bai misa. Segun un encuesta cu nan a haci na aña 1998, casi 30 porshento di Coreano tawata bai sea un misa catolico of protestant, y na comparacion esei ta mas cu esnan cu a bisa cu nan ta budista.

Awendia, ta straño pa mira un porsentahe asina halto di hende na cualke parti di mundo bai misa regularmente. Toch, esaki ta net loke ta sosodiendo no solamente na Corea sino tambe na otro paisnan Asiatico, Africa y Latino America. Dicon asina hopi hende ainda ta bisa cu nan ta kere den Dios siendo cu na tur parti di mundo tin indiferencia religioso? Dicon nan ta bai misa?

Un encuesta di Gallup ta indica cu mas cu mita di e baidonan di misa na Corea ta en busca di pas mental; mas o menos un tercera parti tin speransa di haya bida eterno despues di morto; y 1 di cada 10 ta en busca di salu, rikesa y exito.

Hopi hende na China ta basha bai misa cu e speransa di haya algo cu lo yena e bashi spiritual cu a surgi debi na e echo cu metanan capitalista gradualmente a remplasa ideologia comunista. Tur aña, China ta imprimi y distribui miyones di Bijbel, y ta parce cu hende ta les’e cu e mesun celo cu nan tawata lesa e buki cora chikito di Mao.

Algun catolico na Brazil, specialmente esnan di e generacion mas jong, no ta satisfecho cu e promesa di felicidad den e bida cu ta bin, nan kier felicidad awor. E revista di noticia Tudo ta remarca: “Si ta teologia di liberacion ta loke a motiva hende durante  añanan ’70, awe ta teologia di prosperidad ta motiva hende.” Durante un encuesta na Gran Bretania nan a puntra baidonan di misa pa menciona kico nan ta gusta di nan misa. Mayoria di nan a menciona cu ta asociacion cu nan compañeronan di fe.

Tur esaki ta un indicacion cu maske un gran cantidad di hende ainda ta kere den Dios, mayoria di hende ta mas interesa den loke nan por haya awor cu den loke lo bin den futuro, of asta mas cu den Dios mes. Kico bo ta pensa cu ta e motibo corecto pa kere den Dios? Kico Bijbel tin di bisa tocante e asunto aki? E contesta ta den e siguiente articulo.