Storia di Bida

‘Kico Lo Mi Duna Yehova?’

SEGUN E RELATO DI MARIA KERASINIS

Na edad di 18 aña, mi tawata un decepcion grandi pa mi mayornan, rechasa door di mi famianan, y co’i hari di e pueblo unda mi tawata biba. Nan a roga, presiona y menasa, den un intento pa kibra mi integridad na Dios, pero sin exito. Mi tawatin sigur cu door di pega fielmente na e berdadnan di Bijbel esei lo a trece beneficionan spiritual. Mirando atras riba mas cu 50 aña sirbiendo Yehova, mi por solamente ripiti e palabranan di e salmista: “Kico lo mi duna SEÑOR pa tur su beneficionan na mi?”—Salmo 116:12.

MI A nace na 1930, na Aggelokastro, un pueblito cu ta keda mas o menos 20 kilometer for di e haf di Sencrea, na banda oost di e Istmo di Corinto, caminda tawatin un congregacion di cristiannan berdadero den prome siglo.—Echonan 18:18; Romanonan 16:1.

Mi famia a hiba un bida trankil. Tata tawata lider di e comunidad y un persona altamente respeta. Nos tawata cinco ruman, y ami tawata di tres. Mi mayornan a lanta nos como miembronan deboto di Iglesia Griego Ortodox. Tur diadomingo mi tawata asisti na santo sacrificio di misa. Mi tawata haci penitencia dilanti prenchi, sende bela den capianan di e pueblitonan, y a yuna fielmente. Hopi bes mi a pensa pa bira soeur. Pero cu tempo, mi a bira e prome den mi famia cu a decepciona mi mayornan.

Entusiasma cu Berdadnan Biblico

Tempo cu mi tawatin rond di 18 aña, mi a tende cu Katina, ruman mohe di un di mi suanan, y kende tawata biba den un pueblito biciña,  a cuminsa lesa publicacionnan di Testigonan di Yehova y cu e no tawata bai misa mas. Esaki a traha riba mi masha hopi, y pesei mi a dicidi di yud’e bin bek na loke ami a considera e caminda corecto. Pues, ora el a bin bishita nos, mi a haci areglo pa nos dos bai dal un keiro, pero cu e intencion di pasa na cas di pasto. Pasto a cuminsa e combersacion cu un avalancha di insulto contra Testigonan di Yehova, yamando nan e herehenan (ketters) cu a engaña Katina. E discusion a sigui tres anochi tras di otro. Katina a refuta tur su alegacionnan cu argumentonan biblico bon prepara. Finalmente, pasto a bis’e cu ya cu e ta un mucha mohe asina atractivo y inteligente, e mester gosa di su hubentud mientras cu e por, y busca pa sa tocante Dios ora e bira bieu.

Mi no a bisa mi mayornan nada tocante e discusion ei, pero su siguiente diadomingo mi no a bai misa. Merdia, pasto a bin derechito nos tienda. Mi a inventa un excuse bisando cu mi mester a keda den tienda pa yuda Tata.

“Esei ta realmente e motibo, of ta e mucha mohe ei a influencia bo?” pasto a puntra mi.

“E hendenan aki su creencianan ta miho cu di nos”, mi a bis’e francamente.

Pasto a bira bisa mi tata: “Señor Economos, core cu e famia di bo ei mesora; el a pega bo cas na candela.”

Mi Famia Ta Bira Contra Mi

E tempo ei tawata na final di decada di 1940 ora cu Grecia tawata pasando door di e horornan violento di guera civil. Temiendo cu gueriyeronan lo por secuestra mi, Tata a haci areglo pa mi bai cas di mi ruman mohe cu ta biba den e pueblito caminda Katina tawata biba. Durante e dos lunanan cu mi a keda einan, mi a wordo yuda pa compronde loke Bijbel ta bisa tocante varios asunto. Mi a keda decepciona ora mi a mira cu hopi di e doctrinanan di Iglesia Ortodox no tawata cuadra cu Bijbel. Mi a realisa cu Dios no ta acepta adoracion mediante prenchi, y tambe cu varios tradicion religioso—manera e veneracion di crus—no ta di origen cristian, y cu hende mester adora Dios “den spirito y berdad” pa nan agrad’e. (Huan 4:23; Exodo 20:4, 5) Mas cu tur cos, mi a siña cu Bijbel ta ofrece e speransa briyante di bida eterno riba tera! E berdadnan precioso ei di Bijbel tawata entre e prome beneficionan personal cu mi a ricibi di Yehova.

Mientrastanto, mi ruman mohe cu su casa a ripara cu mi no tawata haci nomber di tata na ora di come, ni mi no tawata resa dilanti prenchinan religioso. Un anochi nan tur dos a bati mi. E siguiente dia mi a dicidi di bai for di nan cas, y mi a bai na cas di mi tanta. Mi sua a notifica mi tata. Poco despues Tata a bin, awa na wowo, y a purba pone mi cambia di opinion. Mi sua a hinca rudia mi dilanti, y roga mi pa pordon’e, locual mi a haci. Pa termina e asunto, nan a pidi mi bolbe bek na iglesia, pero mi a para firme.

Ora mi a regresa na e pueblito di Tata, nan a sigui pone presion. Mi no tawatin ningun manera pa comunica cu Katina, y mi no tawatin ningun literatura pa lesa, ni sikiera un Bijbel. Mi a keda hopi contento ora un di mi primanan a purba yuda mi. Ora el a bai Corinto, el a topa un Testigo y a bin bek cu e buki “Laga Dios Sea Haya Berdadero” y un ehemplar di e Scritura Griego Cristian, cu mi a cuminsa lesa den secreto.

Un Cambio Inespera den Mi Bida

E oposicion feros a sigui pa tres aña. Mi no tawatin contacto cu ningun Testigo di Yehova, ni mi no por a ricibi ningun literatura. Sinembargo, sin cu mi sa, cosnan grandi relaciona cu mi bida tawata a punto di tuma luga.

Tata a bisa mi cu mi mester a bai serca mi omo na Tesalonica. Prome cu mi a sali pa Tesalonica, mi a bai serca un cosedo na Corinto pa lag’e cose un bachi pa mi. Esta un gran sorpresa ora mi a haya sa cu Katina tawata traha einan! Nos tawata masha contento di mira otro despues di asina hopi tempo. Net ora nos dos tawata saliendo for di e pacus, nos a topa un yoncuman masha agradabel cu  tawata bayendo cas for di trabou riba bais. Su nomber tawata Charalambos. Despues cu nos a siña conoce otro, nos a dicidi cu nos lo casa. Tawata rond di e tempo aki tambe cu, dia 9 di januari 1952, mi a simbolisa mi dedicacion na Yehova door di batisa.

Charalambos a batisa mas prome. E tambe tawata haya oposicion for di su famia. Charalambos tawata masha celoso. El a sirbi como asistent di e sirbido di congregacion y a conduci hopi studio di Bijbel. No a tarda hopi cu su ruman hombernan a acepta e berdad, y awe mayoria miembro di nan famia tambe ta sirbi Yehova.

Mi tata a echt gusta Charalambos, pesei el a bai di acuerdo pa nos casa, pero no tawata facil pa combence Mama. Apesar di tur esaki, ami cu Charalambos a casa dia 29 di maart 1952. Ta mi ruman homber mayo y un di mi primonan so a bin casamento. Mi no tawata sa e tempo ei ki un bendicion incomparabel—un berdadero regalo di Yehova—Charalambos lo a resulta di ta! Como su compañera, mi a logra hiba un bida cu a consentra riba e sirbishi di Yehova.

Fortaleciendo Nos Rumannan

Na 1953, ami cu Charalambos a dicidi di muda pa Atenas. Como cu Charalambos kier a haci mas den e trabou di predica, el a kita for di e negoshi di su famia y a busca trabou part time. Nos tawata pasa tur atardi hunto den sirbishi cristian y a conduci hopi studio di Bijbel.

Como cu nos sirbishi tawata bou di restriccion oficial, nos mester tawata hopi inventivo. Por ehempel, nos a dicidi di pone un ehemplar di e revista Toren di Vigilancia den bentana di un kiosco den centro di Atenas, caminda mi casa tawata traha part time. Un funcionario halto di polis a bisa nos cu e revista ta prohibi. Sinembargo, el a puntra si e por a haya un di e revistanan pa e por aberigua mas aleu na e departamento di siguridad. Ora nan a sigur’e cu e revista tawata legal, el a bin bek y bisa nos. Asina cu e otro rumannan cu tawatin kiosco a tende esaki, nan tambe a cuminsa pone ehemplarnan di E Toren di Vigilancia den bentana di nan kiosco. Un homber cu a haya E Toren di Vigilancia na nos kiosco, a bira un Testigo y awor ta sirbi como anciano.

Tambe nos tawatin e goso di mira mi ruman homber mas chikito siña e berdad. El a bin Atenas pa bai studia na e colegio di marina comercial, y nos a hib’e un congreso hunto cu nos. Nos congresonan tawata ser teni secretamente den mondi. El a gusta loke el a tende, pero poco despues el a cuminsa nabega. Durante un di su biahenan, el a yega na un haf na Argentina. Einan, un misionero a subi abordo di e barco pa predica, y mi ruman a pidie pa nos revistanan. Nos a keda masha contento mes ora nos a haya su carta cu tawata bisa: “Mi a haya e berdad. Haci mi un abonado di boso revistanan.” Awe, e cu su famia ta sirbiendo Yehova fielmente.

Na 1958 mi casa a haya e invitacion pa sirbi como un superintendente biahero. Siendo cu nos obra tawata prohibi y situacion tawata hopi dificil, superintendentenan biahero normalmente tawata sirbi sin nan esposa. Na october 1959, nos a pidi e rumannan responsabel na sucursal si lo mi por a compañ’e. Nan a bai di acuerdo. Nos mester a bishita y fortalece e  congregacionnan den parti central y nort di Grecia.

E biahenan ei no tawata facil. Tawatin masha tiki caminda asfalta. Como cu nos no tawatin auto, nos tawata biaha normalmente cu transporte publico of den baki di pickup, hunto cu galiña y otro mercancia. Nos tawata bisti boots di rubber pa asina nos por a pasa door di e camindanan di lodo. Como cu den tur pueblito tawatin un milicia civil, nos tawata drenta e pueblitonan ora bira scur, pa evita interogacion.

E rumannan tawata aprecia e bishitanan aki masha hopi. Aunke mayoria di nan tawata traha duro den nan cunucu, nan a haci tur esfuerso pa asisti na e reunionnan cu a ser teni anochi laat den varios cas. Tambe e rumannan tawata masha hospitalario y tawata ofrece nos lo miho cu nan tin, aunke nan tawatin masha tiki. Tawatin biaha cu nos a drumi hunto cu henter e famia den e mesun cuarto. E rumannan su fe, perseverancia y celo a resulta di ta un otro beneficio precioso pa nos.

Expandiendo Nos Sirbishi

Na februari 1961, durante un bishita na sucursal na Atenas, nan a puntra nos si nos lo ta dispuesto pa sirbi na Betel. Nos a contesta cu e palabranan di Isaias: “At’ami aki! Manda ami!” (Isaias 6:8) Dos luna despues, nos a haya un carta cu a bisa nos pa bin Betel mas pronto posibel. Pues, dia 27 di mei 1961, nos a cuminsa sirbi na Betel.

Nos a stima nos asignacion nobo, y nos a sinti nos na cas mesora. Mi casa tawata traha den e departamentonan di Sirbishi y di Abonament, y despues el a sirbi pa un tempo den e Comite di Sucursal. Ami tawatin varios asignacion den e cas. E tempo ei e famia di Betel tawata consisti di 18 miembro, pero durante casi cinco aña, tawatin alrededor di 40 hende debi cu nan tawata tene un scol pa anciano na Betel. Parti mainta, mi tawata laba tayo, yuda e coki, drecha 12 cama, y drecha mesa pa merdia. Treimerdia, mi tawata strica paña y limpia baño y camber. Un biaha pa siman mi tawata traha tambe den labanderia. Tawatin hopi trabou, pero mi tawata contento cu mi por a yuda.

Nos tawata hopi ocupa den nos asignacionnan di Betel y tambe den sirbishi di veld. Hopi bes nos tawata conduci te cu shete studio di Bijbel. Den fin di siman, mi tawata compaña Charalambos ora e bai duna discurso den varios congregacion. Nos tawata inseparabel.

Nos a conduci un studio di Bijbel cu un pareha cu tawatin lasonan estrecho cu Iglesia Griego Ortodox y cu tawata amigonan personal di e pasto di iglesia cu tawata encabesa e agencia cu ta busca pa sa ken ta herehe. Den nan cas, nan tawatin un cuarto yen di prenchi, caminda sencia tawata kima continuamente y caminda henter dia tawata toca canticanan di alabansa di iglesia Griego tradicional. Pa un periodo, nos tawata bishita nan riba diahuebs pa studia Bijbel, y nan amigo pasto tawata bishita nan riba diabierna. Un dia, nan a pidi nos pa no keda sin bin pasobra nan tawatin un sorpresa pa nos. E prome cos cu nan a mustra nos tawata e cuarto ei. Nan a deshaci di tur nan prenchinan y a renoba e cuarto. E pareha aki a sigui haci progreso y a batisa. En total, nos tawatin e goso di mira alrededor di 50 hende cu nos a studia Bijbel cu ne dedica nan bida na Yehova y batisa.

 Un beneficio special cu mi a disfruta di dje ta e asociacion cu rumannan ungi. Bishitanan di miembronan di Cuerpo Gobernante, manera Rumannan Knorr, Franz y Henschel, tawata un tremendo animacion. Despues di mas cu 40 aña, ainda mi ta haya cu sirbi na Betel ta un gran honor y privilegio.

Luchando cu Malesa y Perdida

Na 1982 mi casa a cuminsa haña sintomanan di malesa di Alzheimer. Pa 1990 su salu a bai hopi atras, y cu tempo e tawatin mester di cuido constante. Durante e ultimo ocho añanan di su bida, mi no por a sali mes for di Betel. Hopi ruman stima di e famia di Betel, y tambe superintendentenan responsabel, a haci areglo pa yuda nos. Sinembargo, apesar di nan yudansa bondadoso, mi mester a dedica gran parti di dia y anochi na cuid’e. Tawatin biaha cu e situacion tawata sumamente dificil, y mi a pasa hopi anochi sin drumi.

Na juli 1998 mi kerido esposo a fayece. Aunke mi ta sinti su falta masha hopi mes, mi ta consola mi mes cu e echo cu e ta den e memoria di Yehova, y mi sa cu Yehova lo cord’e hunto cu miyones di otro hende den e resureccion.—Huan 5:28, 29.

Gradicido pa e Beneficionan di Yehova

Aunke mi a perde mi casa, mi no a keda mi so. Ainda mi tin e privilegio di sirbi na Betel, y mi ta disfruta di e amor y cuido di henter e famia di Betel. Mi famia extenso ta inclui tambe rumannan spiritual di tur parti di Grecia. Aunke awor mi tin riba 70 aña, ainda mi por traha henter dia den cushina y den comedor.

Na 1999 un soño di mi a bira realidad ora cu mi a bishita e sede mundial di Testigonan di Yehova na New York. Mi no por describi con mi a sinti. E tawata un experencia edificante y inolvidabel.

Ora mi mira atras, mi ta kere sinseramente cu mi no por a uza mi bida mas miho cu asin’aki. E miho carera cu cualke hende por tin ta di sirbi Yehova tempo completo. Cu confiansa mi por bisa cu nunca mi no a falta nada. Amorosamente Yehova a percura pa mi cu mi casa, tanto spiritualmente como fisicamente. Di experencia personal mi ta compronde dicon e salmista a puntra: “Kico lo mi duna SEÑOR pa tur su beneficionan na mi?”—Salmo 116:12.

[Plachi na pagina 26]

Ami cu Charalambos tawata inseparabel

[Plachi na pagina 27]

Mi casa den su oficina na sucursal

[Plachi na pagina 28]

Mi ta haya cu sirbishi di Betel ta un gran honor