Pregunta di Lector

Den ki sentido Ezekiel a bira “mudo” durante e periodo cu soldanan a rondona Herusalem y despues destru’e?

Basicamente, den e sentido cu e no tawatin nada di agrega na Yehova su mensahe profetico cu ya el a proclama caba.

Profeta Ezekiel a cuminsa sirbi como un fiel vigilante pa e exiliadonan Israelita na Babilonia den “e di cinco aña di exilio di Rei Joakin”, esta, na aña 613 prome cu nos era. (Ezekiel 1:2, 3) Riba e di dies dia den e di dies luna di aña 609, Ezekiel a ser notifica pa medio di inspiracion dibino cu e Babilonionan a rondona Herusalem y tawatin e stad sitia. (Ezekiel 24:1, 2) Kico lo tawata e resultado di e sitiamento? Herusalem y su habitantenan infiel lo a scapa? Como vigilante, Ezekiel a proclama Yehova su mensahe inekibocabel di destruccion caba, y no tawata necesario pa Ezekiel agrega nada mas, como si fuera pa haci e mensahe mas combencente. Ezekiel a bira mudo den e sentido cu e no tawatin nada mas di bisa di e sitiamento di Herusalem.—Ezekiel 24:25-27.

Un seis luna despues di Herusalem su destruccion na aña 607, un hende cu a scapa a bin trece e noticia di e desolacion di e stad santo pa Ezekiel na Babilonia. E anochi prome cu e hende ei a yega, Yehova ‘a habri Ezekiel su boca, y e no tawata mudo mas.’ (Ezekiel 33:22, NW) Esei a pone fin na su periodo di silencio.

Pero Ezekiel tawata literalmente mudo durante e periodo ei? Ta bisto cu no, pasobra asta despues cu el a bira “mudo”, el a expresa profecianan dirigi principalmente na e nacionnan biciña cu a alegra riba e caida di Herusalem. (Ezekiel, capitulo 25-32) Mas na principio di su carera como profeta y vigilante, Yehova a bis’e: “Lo mi haci bo lenga pega na bo shel’i boca, asina cu lo bo keda mudo y no por ta e hende pa reprende nan, pasobra nan ta un cas rebelde. Ma ora mi papia cu bo, lo mi habri bo boca.” (Ezekiel 3:26, 27) Ora Yehova no tawatin ningun mensahe pa Israel, Ezekiel no mester a bisa nada relaciona cu e nacion ei. Ezekiel tawatin cu papia loke Yehova tawata kier pa e papia, na e momento cu Yehova tawata kier pa e papia. Bisando cu Ezekiel tawata mudo a indica cu e no tawatin ningun palabra profetico pa bisa e Israelitanan.

E vigilante di nos tempo actual, cristiannan ungi, a bin ta spierta tocante e destruccion di cristiandad, Herusalem antitipico. Ora cu e “gran tribulacion” dal aden y destrosa “e Gran Babilonia”—e imperio mundial di religion falso—e clase di Ezekiel lo no tin nodi bisa nada mas tocante e fin di cristiandad, cu ta forma un parti principal di e imperio ei.—Mateo 24:21; Revelacion 17:1, 2, 5.

Si, lo yega un dia ora cu e resto ungi y nan compañeronan lo bira mudo, ya cu nan lo no tin nada mas di bisa cristiandad. Esei lo ta ora “e dies cachonan” y “e bestia” haci Babilonia e Grandi desola y sunu. (Revelacion 17:16) Claro cu esaki no kiermen cu cristiannan lo ta mudo den un sentido literal. Mescos cu nan ta haci awor, nan lo alaba Yehova y haci mencion di dje tur dia y “den tur generacion” pa semper.—Salmo 45:17; 145:2.