“Sea Gradicido”

“Laga e pas di Cristo goberna den boso curason, . . . y sea gradicido.”—COLOSENSENAN 3:15.

1. Ki contraste nos ta observa entre e congregacion cristian y e mundo bou di control di Satanas?

DEN e 94.600 congregacionnan di Testigonan di Yehova rond mundo, ta existi un spirito gradicido. Cada reunion ta cuminsa y caba cu un oracion cu ta inclui palabranan di gradicimento na Yehova. Cu frecuencia nos ta tende “danki”, “na bo ordo”, of expresionnan similar for di boca di hoben y bieu y tambe for di Testigonan nobo y esnan di hopi tempo, segun cu nan ta join otro den adoracion y dushi asociacion. (Salmo 133:1) Esaki ta un contraste grandi cu e egoismo cu ta reina entre hopi di ‘esnan cu no conoce Yehova y cu no ta obedece e bon nobo’! (2 Tesalonicensenan 1:8) Nos ta biba den un mundo malagradicido. Y esei no ta nada straño ora nos corda ta ken ta e dios di e mundo aki: Satanas e Diabel, e promotor mas grandi di egoismo, kende su orguyo y spirito rebelde ta den tur skina di sosiedad humano!—Huan 8:44; 2 Corintionan 4:4; 1 Huan 5:19.

2. Ki spiertamento nos tin cu tuma na pecho, y ki preguntanan nos lo bai considera?

² Siendo cu nos ta rondona pa e mundo di Satanas, nos tin cu tene cuidou pa mundo su actitudnan no corumpi nos. Den prome siglo, apostel Pablo a recorda e cristiannan di Efeso: “Boso tawata cana antes segun e curso di e mundo aki, segun e prins di e poder di laira, di e spirito cu ta obra awor den e yiunan di desobediencia. Nos tur tambe tawata biba antes meimei di nan, den e pasionnan di nos carni, cumpliendo cu e deseonan di carni y di mente, y tawata di naturalesa yiunan di furia, mescos cu e otronan.” (Efesionan 2:2, 3) Esei ta e caso tambe cu hopi hende awe. Pues anto, con nos por mantene un spirito gradicido? Ki yudansa Yehova ta percura? Den ki maneranan practico nos por demostra cu di berdad nos ta gradicido?

 Motibonan pa Ta Gradicido

3. Kico ta e cosnan cu nos ta gradicido na Yehova p’e?

³ Ta na Yehova Dios, nos Creador y Dunador di Bida, nos mester ta gradicido, specialmente ora nos considera algun di e tantisimo regalonan cu el a duna nos generosamente. (Santiago 1:17) Tur dia nos ta gradici Yehova cu nos ta na bida. (Salmo 36:9) Nos ta mira tur caminda rond di nos masha hopi prueba di cosnan cu Yehova a traha, manera solo, luna y streyanan. Nos planeta su mangasina rico di mineralnan cu ta sostene bida, e atmosfer su mescla di gasnan vital sumamente bon balansa, y e ciclonan complica cu tin den naturalesa, tur ta duna testimonio di cuanto nos debe nos amoroso Tata celestial. Rei David a canta: “O SEÑOR mi Dios, hopi ta e maraviyanan cu bo a haci, y bo pensamentonan pa cu nos; no tin ningun cu ta di compara cu bo; si mi lo kier a conta y papia di nan, nan lo tawata mucho hopi pa conta.”—Salmo 40:5.

4. Dicon nos mester gradici Yehova pa e asociacion felis cu nos ta disfruta di dje den nos congregacionnan?

⁴ Aunke Yehova su sirbidonan djawe no ta den un paradijs literal, nan ta masha contento cu nan ta biba den un paradijs spiritual. Den nos Salonnan di Reino y na nos congreso- y asambleanan, nos ta mira con e fruta di Dios su spirito ta obra den nos rumannan den fe. De echo, ora algun Testigo di Yehova ta predica na hende cu no ta masha religioso of cu no a lanta den un ambiente religioso, nan ta referi na loke Pablo a describi den su carta na e Galationan. Prome nan ta hala atencion na “e obranan di carni” y ta puntra nan oyentenan kico nan a observa. (Galationan 5:19-23) Mayoria hende ta bai di acuerdo umbes cu e obranan aki ta caracterisa sosiedad humano awe. Anto ora mustra nan e descripcion di e fruta di Dios su spirito y invita nan na e Salon di Reino local pa wak prueba di esaki pa nan mes, hopi hende ta reconoce mesora: “Sigur-sigur Dios ta meimei di boso.” (1 Corintionan 14:25) Y bo no ta haya esaki solamente na e Salon di Reino local. Na cua parti di mundo cu bo bai, si bo topa cualkier un di e mas cu seis miyon Testigonan di Yehova cu tin, bo ta haya e mesun spirito felis y contento. Eigenlijk, nos tin motibo pa gradici Yehova pa e asociacion  edificante aki, pasobra e ta esun cu ta suministra su spirito pa haci esei posibel.—Sofonias 3:9; Efesionan 3:20, 21.

5, 6. Con nos por demostra nos gratitud pa Dios su regalo di mas grandi, e rescate?

⁵ E regalo di mas grandi, e don di mas perfecto cu Yehova a duna, ta su Yiu, Hesus, mediante ken e sacrificio di rescate a ser percura. Apostel Huan a skirbi: “Si Dios a stima nos asina tanto, nos tambe mester stima otro.” (1 Huan 4:11) Si, nos ta demostra nos gratitud pa e rescate no solamente door di expresa amor y gradicimento na Yehova, sino tambe door di hiba nos bida den un manera cu ta desplega amor pa otro hende.—Mateo 22:37-39.

⁶ Nos por siña mas tocante con pa mustra gratitud door di considera e manera cu Yehova a trata cu Israel di pasado. Mediante e Lei cu el a duna e nacion via Moises, Yehova a siña e pueblo hopi les. Nos tambe por siña hopi for di ‘e forma di conocemento y berdad cu tin den e Lei’, y esei lo yuda nos aplica Pablo su conseho: “Sea gradicido.”—Romanonan 2:20; Colosensenan 3:15.

Tres Les for di e Lei di Moises

7. Con e areglo di diesmo a duna e Israelitanan e oportunidad pa demostra nan gratitud na Yehova?

⁷ Den e Lei di Moises, Yehova a indica tres manera cu e Israelitanan por a demostra cu sinseramente nan tawata aprecia Yehova su bondad. Na prome luga, tawatin e diesmo. Un decimo parti di e producto di e tera, hunto cu “cada dies parti di e cria di baca of di e cria di bestia chikito” mester a bira algo “santo” pa Yehova. (Levitico 27:30-32) Ora e Israelitanan a obedece, Yehova a bendiciona nan abundantemente. “‘Trece henter e diesmo den mangasina, pa por tin cuminda den mi cas, y pone mi na prueba awor den esaki’, e SEÑOR di ehersitonan ta bisa, ‘si mi lo no habri pa boso e bentananan di shelo, y basha asina tanto bendicion, cu boso lo no tin suficiente luga pa conten’e.’”—Malakias 3:10.

8. Kico a distingui ofrenda boluntario for di diesmo?

⁸ Na di dos luga, fuera di e rekisito di diesmo, Yehova a haci areglo pa e Israelitanan duna contribucion boluntario. El a instrui Moises pa bisa e Israelitanan: “Ora boso drenta e tera caminda mi ta hiba boso, e ora ei lo t’asina, cu ora boso come di e cuminda di e tera, boso mester ofrece un ofrenda di halsamento na SEÑOR [of, “un contribucion na Yehova”, NW].” Atrabes di tur nan generacionnan, nan mester a presenta un “pan buscuchi” traha di nan prome hariña como un “contribucion na Yehova.” Tuma nota cu e Lei no a spesifica cuanto di e prome hariña aki nan mester a duna. (Numbernan 15:18-21) Pero ora e Israelitanan a ofrece un contribucion cu gradicimento, nan por tawatin sigur cu nan lo a haya un bendicion for di Yehova. Den e vision  di Ezekiel nos ta mira un areglo similar relaciona cu e tempel. Nos ta lesa: “E prome di tur prome fruta di tur sorto y tur contribucion di tur sorto, for di tur boso contribucionnan, mester ta pa e sacerdotenan; tambe boso mester duna e sacerdote e prome porcion di boso mansa, pa por tin bendicion riba boso cas.”—Ezekiel 44:30.

9. Kico Yehova a siña e pueblo di Israel mediante e areglo pa laga resto di cosecha keda atras pa pobernan piki?

⁹ Na di tres luga, Yehova a haci areglo pa laga un resto di cosecha keda atras pa pobernan por a piki. Dios a instrui: “Ora bo cosecha e cosecha di bo tera, no cosecha te den e skinanan di bo cunucu, ni recohe loke a resta di bo cosecha. Tampoco no piki loke a resta di bo cunucu di wendruif, ni recohe e fruta cu a cai den bo cunucu di wendruif; laga nan pa esun den necesidad y pa e stranhero. Ami ta SEÑOR boso Dios.” (Levitico 19:9, 10) Atrobe, e Lei no a rekeri un cantidad spesifico. A keda na cada Israelita pa dicidi cuanto e ta laga pa esnan den necesidad. Rei sabi Salomon aptamente a splica: “Esun cu tene misericordia di un hende pober ta fia SEÑOR, y E lo pag’e bek pa su bon obra.” (Proverbionan 19:17) Asina Yehova a siña nan tene compasion y consideracion cu esnan di menos recurso.

10. Kico tawata e consecuencianan pa e pueblo di Israel ora nan no a demostra gratitud?

¹⁰ Yehova a bendiciona e Israelitanan ora nan obedientemente a trece nan diesmo, duna contribucion boluntario y duna algo na e pobernan. Pero ora cu e pueblo di Israel no a mustra cu nan tawata gradicido, nan a perde e aprobacion di Yehova. Esaki a hiba na desaster y cu tempo na exilio. (2 Cronicanan 36:17-21) Ki lesnan nos por saca for di esei?

Nos Expresionnan di Gratitud

11. Cua ta e manera principal cu nos por demostra nos gratitud na Yehova?

¹¹ E manera principal cu nos por rindi alabansa na Yehova y expresa nos gratitud tambe ta encera un “ofrenda.” Ta berdad cu como cristian nos no ta bou di e Lei di Moises, obliga na ofrece sacrificio di bestia of di cosecha. (Colosensenan 2:14) No obstante, apostel Pablo a urgi e cristiannan Hebreo: “Laga nos ofrece continuamente un sacrificio di alabansa na Dios, esta, e fruta di lipnan cu ta duna gradicimento na su nomber.” (Hebreonan 13:15) Door di uza nos habilidad- y recursonan pa ofrece un sacrificio di alabansa na Yehova, sea den e trabou di predica of den ‘e congregacion’ di compañeronan cristian, nos por expresa gradicimento sinsero na nos amoroso Tata celestial, Yehova Dios. (Salmo 26:12) Ora nos ta haci esei, kico nos por siña for di e maneranan cu e pueblo di Israel mester a expresa nan gratitud na Yehova?

12. Pa loke ta nos responsabilidad cristian, kico nos por siña for di e areglo di diesmo?

¹² Na prome luga, manera nos a mira, e areglo di diesmo no tawata un opcion; cada Israelita tawatin e obligacion di haci esaki. Como cristian, nos tin e responsabilidad di participa den e trabou di predica y di asisti na reunionnan cristian. E actividadnan aki no ta un opcion. Den Hesus su gran profecia relaciona cu e tempo di fin, el a declara bon cla: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14; 28:19, 20) Relaciona cu reunionnan cristian, apostel Pablo a ser inspira pa skirbi: “Laga nos considera con pa stimula otro pa stima y haci bon obra, y no laga di asisti na nos mes reunionnan, manera ta custumber di algun, ma curasha otro; y mucho mas ainda, ora boso ta mira cu e dia ta yegando serca.” (Hebreonan 10:24, 25) Nos ta demostra nos gratitud na Yehova ora cu gososamente nos ta acepta nos responsabilidad di predica, di siña hende y tambe di asocia cu nos rumannan regularmente na reunionnan di congregacion, considerando e cosnan ei un privilegio y un honor.

13. Ki lesnan nos ta saca for di e areglo di contribucion boluntario y di laga un resto di cosecha keda atras pa pobernan piki?

 ¹³ Ademas, tin beneficio cu nos por saca door di considera e otro dos areglonan mediante cua e Israelitanan por a demostra nan aprecio: contribucion boluntario y laga un resto di cosecha keda atras pa pobernan piki. Na contraste cu e diesmo—cu tawata un rekisito cu un cantidad claramente defini—contribucionnan boluntario y laga un resto di cosecha atras no a rekeri un cantidad fiho. Mas bien, ta e profundidad di aprecio cu un sirbido di Yehova tawatin den su curason lo a motiv’e pa actua. Den un manera similar, aunke nos ta compronde cu participacion den sirbishi y asistencia na reunionnan cristian ta un responsabilidad fundamental di tur sirbido di Yehova, nos ta participa den nan di henter nos curason y di buena gana? Nos ta considera nan como un oportunidad pa expresa nos aprecio sinsero pa tur loke Yehova a haci pa nos? Nos ta participa cu frecuencia den e actividadnan aki, te caminda e circunstancia di cada un di nos ta permiti? Of nos ta considera tur e cosnan aki djis como un obligacion cu nos tin cu cumpli cu ne? Claro cu nos mester contesta e preguntanan aki personalmente. Apostel Pablo a expres’e asin’aki: “Laga cada un duna prueba di loke su mes trabou ta, y e ora ei lo e tin motibo pa alegra encuanto su mes so, y no den comparacion cu e otro persona.”—Galationan 6:4, NW.

14. Kico Yehova ta spera di nos den nos sirbishi na dje?

¹⁴ Yehova Dios conoce nos circunstancianan bon bon. E sa nos limitacionnan. E ta aprecia e sacrificionan—grandi of chikito—cu su sirbidonan ta ofrece di buena gana. E no ta spera cu nos tur lo duna mes tanto, y nos no por tampoco. Ora apostel Pablo tawata papia tocante dunamento di cos material, el a bisa e cristiannan di Corinto: “Pasobra si e boluntad t’ei, e ta aceptabel segun loke un hende tin, no segun loke e no tin.” (2 Corintionan 8:12) E principio aki ta aplica bon tambe na nos sirbishi na Dios. Loke ta haci nos sirbishi aceptabel pa Yehova no ta ser determina pa e cantidad cu nos ta haci, sino e manera cu nos ta hacie: cu goso y di henter nos curason.—Salmo 100:1-5; Colosensenan 3:23.

 Cultiva y Mantene e Spirito di Pionero

15, 16. (a) Ki conexion tin entre e sirbishi di pionero y gratitud? (b) Con esnan cu no por traha pionero por desplega e spirito di pionero?

¹⁵ Un manera recompensador cu nos por demostra nos gratitud na Yehova ta door di drenta den sirbishi di tempo completo. Hopi sirbido dedica—motiva door di amor pa Yehova y gradicido pa su bondad inmereci—a haci cambionan grandi den nan bida pa asina nan por haya mas tempo pa sirbi Yehova. Algun di nan awor ta sirbi como pionero regular, dedicando un promedio di 70 ora tur luna na predicacion di e bon nobo y na siña hende e berdad. Otro rumannan, cu kisas ta ser limita door di varios circunstancia, de bes en cuando ta haci areglo pa dedica 50 ora pa luna na e trabou di predica como pionero ausiliar.

¹⁶ Pero kico di e tantisimo sirbidonan di Yehova cu no por sirbi como pionero regular ni ausiliar? Nan por demostra nan gratitud door di cultiva y mantene un spirito di pionero. Con? Door di anima esnan cu por traha pionero, door di inculca den nan yiunan e deseo pa sigui un carera den sirbishi di tempo completo, y door di participa diligentemente den e predicacion segun nan circunstancia. Loke nos ta duna den sirbishi ta depende hopi di cuanto aprecio nos tin den nos curason pa loke Yehova a haci, ta haciendo y lo bai haci ainda pa nos.

Demostrando Gratitud cu Nos “Rikesa”

17, 18. (a) Con nos por demostra nos gratitud cu nos “rikesa”? (b) Kico Hesus a pensa di e contribucion cu e biuda a haci, y dicon?

¹⁷ “Honra SEÑOR cu bo rikesa, y cu e prome fruta di tur bo productonan”, Proverbionan 3:9 ta bisa. Sirbidonan di Yehova no tin nodi duna diesmo mas. Mas bien, Pablo a skirbi na e congregacion di Corinto: “Laga cada un haci manera el a propone den su curason; no contra su gusto of obliga; pasobra Dios ta stima esun cu ta duna cu alegria.” (2 Corintionan 9:7) Duna contribucion boluntario pa sostene e trabou mundial di predica e Reino, tambe ta demostra nos gratitud. Aprecio sinsero ta motiva nos pa haci esaki regularmente, kisas door di pone algo un banda tur siman, manera e cristiannan di prome siglo a haci.—1 Corintionan 16:1, 2.

¹⁸ No ta e cantidad cu nos ta contribui ta indica con gradicido nos ta na Yehova. Mas bien, ta e motivacion cu tin tras di loke nos ta duna. Esaki ta loke Hesus a observa ora e tawata wak hende tira nan ofrendanan den e caha di ofrenda den e tempel. Ora Hesus a mira un biuda pober tira “dos placa di coper”, el a bisa: “Di berdad mi ta bisa boso, e biuda pober aki a tira mas tanto aden cu nan tur; pasobra nan tur a tira pa e ofrenda for di nan abundancia, ma el a tir’aden for di su pobresa tur loke cu e tawatin pa biba di dje.”—Lucas 21:1-4.

19. Pakico ta bon pa nos reexamina e maneranan cu nos ta demostra nos gratitud?

¹⁹ Nos ta spera cu e studio aki cu a mustra con nos por ta gradicido, lo motiva nos pa reexamina e maneranan cu nos ta desplega nos gratitud. Ta posibel cu nos por aumenta nos sacrificio di alabansa na Yehova y tambe e sosten material cu nos ta duna na e obra mundial? Te na e grado cu nos haci esei, nos por tin sigur cu nos Tata amoroso y generoso, Yehova, lo keda contento cu nos ta mustra cu nos ta gradicido.

Bo Ta Corda?

• Pa ki motibonan nos mester ta gradicido na Yehova?

• Ki lesnan nos ta saca for di e areglo di diesmo, di contribucion boluntario y di laga resto di cosecha keda atras pa pobernan piki?

• Con nos por cultiva e spirito di pionero?

• Con nos por uza nos “rikesa” pa gradici Yehova?

[Preguntanan di Estudio]

[Plachinan na pagina 15]

“Tur bon regalo y tur don perfecto ta for di ariba”

[Plachinan na pagina 16]

Cua ta e tres lesnan for di e Lei cu nos ta mira aki?

[Plachinan na pagina 18]

Ki sacrificionan nos por haci?