Informe di Proclamadonan di Reino

Un Programa di Television A Habri Caminda p’e Glorifica Dios

APOSTEL Pablo a bisa cu “algun, di berdad, ta predica Cristo pa motibo di envidia y pleito, ma algun tambe for di bon boluntad.” (Filipensenan 1:15) Tin bes, asta hende cu ta purba difama Yehova su pueblo inconcientemente a pone hende di curason sinsero sinti nan mes atrai na e berdad.

Na november 1998, e canal di television nacional Frances a pasa un documentario tocante Betel, e compleho di sucursal di Testigonan di Yehova na Louviers, Francia. Apesar cu e programa a causa diferente reaccion, el a produci bon resultado di maneranan inespera.

Un di e hendenan cu a wak e programa tawata Anna-Paula, kende ta biba solamente 60 kilometer for di Betel. Anna-Paula, un señora diborcia cu tin dos yiu, tawata busca trabou. Pesei e siguiente mainta, el a yama Betel y a puntra si e por a haya un trabou einan. E ta bisa: “Mi a haya e impresion cu e tawata un luga sano y cu e trabou cu nan ta haci einan ta util.” El a keda masha sorprendi ora el a haya sa cu tur esnan na Betel ta trahadonan boluntario! Despues di un combersacion cortico relaciona cu e actividad di Testigonan di Yehova, el a bai di acuerdo pa un Testigo bishit’e.

Ora cu Léna, un predicado di tempo completo di e congregacion local a bishit’e, nan tawatin un combersacion largo, y Anna-Paula a acepta e buki Conocimentu cu Ta Hiba na Bida Eterno. * Ya pa e siguiente bishita, Anna-Paula a lesa henter e buki y tawatin masha hopi pregunta. Cu mucho gusto el a acepta un studio di Bijbel. Anna-Paula a bisa: “Pa prome bes mi a haya sa kico e Palabra di Dios ta bisa. Nunca mi no a yega di tin un Bijbel den mi man.”

Na januari Anna-Paula a bishita Betel, y e siguiente siman el a bai su prome reunion cristian. Un poco despues, el a cuminsa studia Bijbel cu su yiunan y papia di e berdad cu su amigonan. E ta bisa: “Mi no por a tene loke mi a siña pa mi mes, mi kier a comparti e berdadnan di Bijbel cu otro hende y consola nan.” Despues cu el a lucha y vence varios problema personal, Anna-Paula a cuminsa asisti regularmente na e reunionnan. El a progresa hopi lihe y dia 5 di mei 2002, el a batisa.

Ademas, debi na Anna-Paula su bon ehempel y predicacion celoso, su mama a cuminsa studia y a batisa no mucho tempo despues. Anna-Paula ta bisa: “No tin palabra pa expresa con contento mi ta. Mi ta gradici Yehova tur dia cu el a laga mi conoc’e y sirbie, y pa tur e bendicionnan cu el a drama riba mi.”

[Nota]

[Plachinan na pagina 8]

Ariba: Anna-Paula

Abou: Entrada di e oficina di sucursal di Francia