Awor Ta Mas Urgente pa Nos Ta Alerta

“Sea alerta anto, pasobra boso no sa ki dia boso Señor ta bini.”—MATEO 24:42.

1, 2. Kico ta mustra cu nos ta biba den e conclusion di e sistema actual?

COS cu mas a influencia siglo 20 ta guera”, segun autor Bill Emmott. Aunke el a admiti cu tur periodo di historia humano a sinti e peso di guera y violencia, el a agrega: “Siglo 20 no tawata distinto di otro siglonan den su naturalesa, e tawata distinto den severidad. E tawata e prome siglo cu tawatin un conflicto cu realmente a abarca henter mundo . . . Y, como si fuera pa enfatisa esei, e tawatin no un di e conflictonan mundial ei so, sino dos.”

² Hesucristo a profetisa cu lo tin guera cu ta envolve ‘nacion contra nacion y reino contra reino.’ Sinembargo, nan ta un solo aspecto di ‘e señal di Cristo su binida y di e fin di tempo.’ Den Hesus su profecia remarcabel el a menciona tambe hamber, pestilencia y temblor. (Mateo 24:3, 7, 8; Lucas 21:6, 7, 10, 11) Den hopi manera, e calamidadnan ei a aumenta na magnitud y severidad. E maldad di hende ta abunda, manera nos por mira na nan actitud pa cu Dios y prohimo. Deterioro moral y aumento di criminalidad y violencia ta bisto. Hende a bira stimado di placa mas bien cu stimado di Dios, y nan ta obsesiona cu placer. Tur esaki ta duna prueba cu nos ta biba den “temponan trabahoso.”—2 Timoteo 3:1-5.

3. Ki efecto “e señalnan di e temponan” mester tin riba nos?

³ Kico abo ta pensa di e echo cu asuntonan humano ta birando piyo? Hopi hende no tin cu nes, y asta a perde heful, pa e susesonan angustioso di actualidad. Mundo su hendenan intelectual y esnan cu tin influencia no ta compronde e nificacion di “e señalnan di e temponan”; y lidernan religioso tampoco no a duna e guia corecto den e asunto aki. (Mateo 16:1-3) Pero Hesus a spierta su siguidonan: “Sea alerta anto, pasobra boso no sa ki dia boso Señor ta bini.” (Mateo 24:42) Aki Hesus ta curasha nos pa ta alerta no djis pa un tempo cortico, sino mas bien pa sigui ta alerta. Pa keda alerta nos mester ta atento y vigilante. Esaki ta rekeri mas cu djis reconoce cu nos ta biba den e ultimo dianan y cu tempo ta dificil. Nos mester tin e conviccion firme cu “fin di tur cos ta serca.” (1 Pedro 4:7) Ta asina so nos lo ta alerta cu un sentido di urgencia. Pues, e pregunta cu nos mester reflexiona riba dje ta: ‘Kico lo yuda nos fortalece nos conviccion cu e fin ta serca?’

4, 5. (a) Kico lo fortalece nos conviccion cu fin di e sistema malbado aki ta serca, y dicon? (b) Menciona un similaridad entre e tempo di Noe y e binida di e Yiu di hende.

⁴ Considera e condicionnan cu tawata reina djis prome cu un suseso unico den historia humano: e gran Dilubio di tempo di Noe. Hende tawata asina malbado cu nan a ‘haci Yehova su curason tristo.’ El a declara: “Lo mi destrui hende cu mi a crea for di riba superficie di tera.” (Genesis 6:6, 7) Y esei ta precis loke el a haci tambe. Comentando riba e ­similaridadnan entre e tempo di Noe y nos tempo, Hesus a bisa: “E binida di e Yiu di hende lo ta mescos cu e dianan di Noe.”—Mateo 24:37.

⁵ Ta rasonabel pa asumi cu Yehova ta sinti  mescos pa e mundo actual cu loke el a sinti pa e mundo prome cu Dilubio. Siendo cu el a caba cu e mundo malbado di tempo di Noe, siguramente lo e destrui e mundo malbado djawe. Si nos tin un comprondemento cla di e similaridadnan entre e tempo ei y nos tempo, nos conviccion cu e fin di e mundo actual ta serca lo bira mas firme. Kico ta e similaridadnan anto? Tin por lo menos cinco. E prome ta cu un spiertamento bon cla ta wordo duna di e benidero destruccion.

Spierta Tocante “Cosnan Cu No A Wordo Mira Ainda”

6. Kico Yehova a determina pa haci den tempo di Noe?

⁶ Den tempo di Noe, Yehova a declara: “Mi spirito lo no lucha cu hende pa semper, pasobra di berdad ta carni e ta; sinembargo, su dianan lo ta shentibinti aña.” (Genesis 6:3) Declaracion di e decreto dibino aki na aña 2490 prome cu nos era, a marca comienso di e fin di e mundo malbado ei. Djis pensa kico esei a nifica pa e hendenan na bida e tempo ei! Solamente 120 aña mas y Yehova lo a trece “un dilubio di awa riba tera, pa destrui tur carni, cu tin e rosea di bida, for di bou di shelo.”—Genesis 6:17.

7. (a) Con Noe a reacciona ora Dios a spiert’e di e Dilubio? (b) Con nos mester reacciona riba spiertamentonan tocante fin di e sistema aki?

⁷ Varios decada di antemano Noe a ricibi spiertamento di e benidero catastrofe, y el a haci uzo sabi di e tempo pa prepara pa sobrevivi. Apostel Pablo a bisa: “Noe, siendo spierta pa Dios tocante di cosnan cu no a wordo mira ainda, cu temor di Dios a prepara un arca pa salbacion di e hendenan di su cas.” (Hebreonan 11:7) Ke tal di nos? Rond di 90 aña a pasa for di tempo cu e ultimo dianan di e sistema aki a cuminsa na 1914. No tin duda cu nos ta den “e tempo di e fin.” (Daniel 12:4) Con nos mester reacciona riba e spiertamentonan cu nos a haya? “Esun cu haci e boluntad di Dios ta permanece pa semper”, Bijbel ta declara. (1 Huan 2:17) Pesei awor ta tempo pa haci e boluntad di Yehova cu un sentido fuerte di urgencia.

8, 9. Ki spiertamentonan a ser duna den tempo moderno, y con nan ta ser proclama?

⁸ Den tempo moderno, studiantenan sinsero di Bijbel a siña for di e Scritura inspira cu e sistema aki ta condena na destruccion. Nos di berdad ta kere esaki? Tuma nota di loke Hesucristo a declara bon cla: “Lo tin un gran tribulacion, manera nunca tawatin for di principio di mundo te aworaki, y cu lo no tin nunca mas tampoco.” (Mateo 24:21) Tambe Hesus a bisa cu lo e bini como Dios su Hues nombra y lo e separa hende manera un wardado ta separa carne for di cabrito. Esnan cu ser haya indigno lo “bai den castigo eterno, ma e hustonan den bida eterno.”—Mateo 25:31-33, 46.

⁹ Yehova a dirigi atencion di su pueblo na e spiertamentonan aki mediante recordatorionan oportuno cu ta forma parti di e alimento spiritual percura door di “e esclabo fiel y prudente.” (Mateo 24:45-47) Ademas, tur nacion, tribu, lenga y pueblo ta haya e yamada pa  “teme Dios y dun’e gloria, pasobra e ora di su huicio a yega.” (Revelacion 14:6, 7) Un parti esencial di e mensahe di Reino cu ta ser predica rond mundo door di Testigonan di Yehova ta e spiertamento cu e Reino di Dios pronto lo elimina gobernacion humano. (Daniel 2:44) Nos no mester mira e spiertamento aki como algo di menos importancia. Dios Todopoderoso semper ta cumpli cu su palabra. (Isaias 55:10, 11) El a cumpli cu su palabra den tempo di Noe, y lo e cumpli cu ne den nos tempo.—2 Pedro 3:3-7.

Perversidad Sexual Ta Plama Tur Caminda

10. Con extenso perversidad sexual tawata den tempo di Noe?

¹⁰ Nos tempo ta coresponde cu tempo di Noe den un segundo aspecto. Yehova, kende a crea e facultadnan sexual di e prome homber y mohe, a duna nan e mandamento pa “yena e tera” cu hende uzando e facultadnan ei honorablemente den e areglo di matrimonio. (Genesis 1:28) Den tempo di Noe, angelnan desobediente a contamina humanidad cu relacion sexual innatural. Nan a baha bin na tera, bisti curpa carnal, biba cu mohenan bunita y produci yiu cu tawata mitar hende mitar demoño, yiunan gigante. (Genesis 6:2, 4) E pica di e angelnan yen di pasion aki ta ser compara cu e perversidad sexual (practicanan sexual contra naturalesa) di Sodoma y Gomora. (Hudas 6, 7) Consecuentemente, perversidad sexual tawata tur caminda den e tempo ei.

11. Kico ta tumando luga den nos ambiente moral awe cu ta haci nos tempo similar na esun di Noe?

¹¹ Con ta para cu e ambiente moral djawe? Den e dianan final aki, bida di hopi hende ta drei rond di sex. Pablo detayadamente a describi personanan asina como hende cu a ‘perde tur heful’; hopi di nan a “entrega nan mes na sensualidad pa, cu golosidad, nan practica tur clase di impuresa.” (Efesionan 4:19) Pornografia, sex prome cu matrimonio, abuso sexual di mucha y homosexualidad ta cos di tur dia. Tin hende cu ya caba “ta ricibi den nan mes persona e castigo mereci” den forma di malesanan transmiti sexualmente, bida di famia kibra y otro problemanan social.—­Romanonan 1:26, 27.

12. Dicon nos mester cultiva odio pa loke ta malo?

¹² Den tempo di Noe, Yehova a manda un gran Dilubio y a pone fin na e mundo ei cu tawata loco pa sex. Nos no mester lubida nunca cu e tempo cu nos ta biba aden di berdad ta mescos cu den tempo di Noe. E benidero “gran tribulacion” lo elimina ‘fornicado, adultero, sodomita y homosexual’ for di riba tera. (Mateo 24:21; 1 Corintionan 6:9, 10; Revelacion 21:8) Pesei ta masha urgente pa nos cultiva odio pa loke ta malo y keda leu for di situacionnan cu lo por hiba na inmoralidad!—Salmo 97:10; 1 Corintionan 6:18.

Tera Ta “Yen di Violencia”

13. Dicon e tera tawata “yen di violencia” den tempo di Noe?

¹³ Señalando un di tres caracteristica di tempo di Noe, Bijbel ta declara: “Tera tawata corumpi den bista di Dios y tera tawata yen di violencia.” (Genesis 6:11) Pero eigenlijk violencia no tawata algo nobo. Adam su yiu Cain  a asesina su ruman homber husto. (Genesis 4:8) Reflehando e spirito violento di su tempo, Lamek a compone un poema den cua e ta gaba tocante con el a mata un mucha homber, supuestamente den defensa propio. (Genesis 4:23, 24) Loke tawata nobo den tempo di Noe, tawata e grado di violencia. Segun cu yiunan di Dios cu tawata angel desobediente, a casa cu mohe riba tera y a produci yiu—gigante—violencia a aumenta na un nivel sin precedente. Segun Traduccion di Mundo Nobo e palabra Hebreo original cu ta referi na e gigantenan violento aki ta nifica “e Tumbadonan”, “esnan cu ta pone otronan cai.” (Genesis 6:4) Como resultado, tera tawata “yen di violencia.” (Genesis 6:13) Imagina bo cuanto problema Noe lo mester a confronta pa lanta su famia den un ambiente asina! Sinembargo, Noe a resulta di ta ‘husto dilanti di Yehova’ meimei di e generacion ei.—Genesis 7:1.

14. Te na ki grado e mundo djawe ta “yen di violencia”?

¹⁴ Violencia a existi den transcurso di henter historia di humanidad. Pero mescos cu tawata e caso den tempo di Noe, nos tempo tambe a experenci’e riba un escala sin precedente. Cu regularidad nos ta tende tocante violencia domestico, actonan di terorismo, campañanan di genocidio y di pistoleronan cu ta basha bala riba multitud di hende casi sin un motibo bisto. Agrega na tur esaki e dramamento di sanger causa door di guera. Anto atrobe tera ta yen di violencia. Dicon? Kico a contribui na e aumento? E contesta ta revela un otro similaridad cu e tempo di Noe.

15. (a) Kico a contribui na e aumento di violencia den e ultimo dianan? (b) Kico nos por tin sigur cu lo bai tuma luga?

¹⁵ Ora cu Dios su Reino Mesianico a keda estableci den shelo na 1914, e Rei entronisa Hesucristo, a tuma un accion historico. El a saca Satanas e Diabel y su demoñonan for di shelo y benta nan den bicindario di tera. (Revelacion 12:9-12) Prome cu Dilubio, angelnan desobediente a bandona nan posicion celestial boluntariamente; sinembargo, den tempo moderno nan a wordo saca a la ­fuersa. Ademas, awor nan no por bisti curpa humano riba tera pa gosa di placernan carnal ilegal. Pesei debi na frustracion, rabia y miedo di e benidero huicio, e angelnan aki ta influencia hende y organisacion pa comete actonan inhumano di crimen y violencia na un escala asta mas grandi cu den tempo di Noe. Yehova a destrui e mundo prome cu Dilubio, despues cu angelnan desobediente y nan yiunan a yen’e cu maldad. Bo por tin sigur cu lo e haci mescos den nos tempo! (Salmo  37:10) Sinembargo, esnan cu keda alerta awe sa cu nan liberacion ta serca.

E Mensahe Ta Wordo Predica

16, 17. Cua ta e di cuater similaridad entre e tempo di Noe y nos tempo?

¹⁶ E di cuater similaridad entre e tempo actual y e mundo prome cu Dilubio ta ser mira den e trabou cu Noe a ser encarga pa haci. Noe a traha un arca inmenso. Tambe e tawata “un predicado.” (2 Pedro 2:5) Ki mensahe el a predica? Noe su predicacion evidentemente a inclui un yamada pa repenti y un spiertamento di e benidero destruccion. Hesus a bisa cu e hendenan den tempo di Noe “no a haci caso te cu e dilubio a bini y a bari nan tur.”—Mateo 24:38, 39, NW.

¹⁷ Asina tambe, segun cu Testigonan di Yehova ta cumpli diligentemente cu nan encargo pa predica, e mensahe di e Reino di Dios ta ser proclama mundialmente. Den casi tur parti di e planeta, hende por tende y lesa e mensahe di Reino den nan mes idioma. E revista Toren di Vigilancia, anunciando e Reino di Yehova Dios, tin un circulacion di mas cu 25.000.000 ehemplar y ta ser imprimi den mas cu 140 idioma. Si, e bon nobo di e Reino di Dios ta ser predica “den henter mundo como un testimonio na tur nacion.” Ora e trabou ei ser completa na Dios su satisfaccion, e fin lo bin sigur.—Mateo 24:14.

18. Con e reaccion di hopi hende riba nos actividad di predica ta compara cu e reaccion di mayoria hende den tempo di Noe?

¹⁸ En bista di e falta total di interes den cosnan spiritual y e falta di moralidad den e dianan prome cu e Dilubio, nos por compronde dicon e biciñanan di e famia di Noe constantemente tawata hari nan, haci bofon di nan y papia palabranan ofensivo cu nan. Pero e fin a bin. Di igual manera, tin masha hopi ‘bofonado cu nan bofon’ den e ultimo dianan. “Ma e dia di Señor lo bini manera un ladron”, Bijbel ta declara. (2 Pedro 3:3, 4, 10) Y lo e bin sigur na e tempo señala. Lo e no ta laat. (Habacuk 2:3) Ta sabi di nos parti pa keda alerta!

Poco Hende So Ta Sobrevivi

19, 20. Ki paralelo nos por mira entre e Dilubio y e destruccion di e sistema actual?

¹⁹ E paralelo entre e tempo di Noe y nos tempo no ta solamente relaciona cu maldad di e hendenan y nan destruccion. Mescos cu tawatin hende cu a sobrevivi e Dilubio, asina tambe lo tin esnan cu ta sobrevivi fin di e sistema actual. E sobrevivientenan di e Dilubio tawata esnan manso cu no a biba manera mayoria hende a biba. Nan a haci caso di e spiertamento dibino y a keda separa for di e mundo malbado di e tempo ei. Bijbel ta bisa: “Noe a haya gracia den bista di SEÑOR.” E tawata un homber ireprochabel meimei di su generacion. (Genesis 6:8, 9) For di henter humanidad, un solo famia, algun hende, “esta, ocho persona, a wordo hiba sano y salvo door di e awa.” (1 Pedro 3:20) Y Yehova Dios a duna nan un mandato bisando: “Sea fructifero y multiplica, y yena tera.”—Genesis 9:1.

²⁰ E Palabra di Dios ta sigura nos cu “un multitud grandi” lo “sali for di e gran tribulacion.” (Revelacion 7:9, 14) Cuanto hende lo tin den e multitud grandi? Hesus mes a bisa: “Chikito ta e porta y smal e caminda cu ta hiba na bida, y poco ta esnan cu ta hay’e.” (Mateo 7:13, 14) E sobrevivientenan di e benidero gran tribulacion lo ta poco na comparacion cu e 6 mil miyon hendenan cu ta biba riba tera awor. Pero por ta masha bon cu nan lo haya e mesun privilegio cu Dios a duna e sobrevivientenan di e Dilubio. E sobrevivientenan kisas pa un tempo lo por haya yiu siendo  parti di e sosiedad nobo riba tera.—Isaias 65:23.

“Sea Alerta”

21, 22. (a) Con e consideracion di e relato di Dilubio aki a beneficia bo? (b) Kico ta e texto di aña pa 2004, y dicon nos mester haci caso di e conseho cu e ta duna?

²¹ Aunke e Dilubio por parce di no tin nada di aber cu nos tempo ya cu el a tuma luga asina tanto tempo pasa, ta bisto cu e ta duna nos un spiertamento cu nos no mester pasa por halto. (Romanonan 15:4) E similaridadnan entre e tempo di Noe y nos tempo mester haci nos mas y mas conciente di e nificacion di loke ta tumando luga. Tambe esei mester alerta nos pa Hesus su binida inespera pa ehecuta huicio riba e malbadonan.

²² Awe, Hesucristo ta dirigiendo un tremendo trabou di construccion spiritual. Pa e siguridad y sobrevivencia di adoradonan berdadero, ta existi un paradijs spiritual semehante un arca. (2 Corintionan 12:3, 4) Pa nos pasa bibo door di e gran tribulacion, nos tin cu keda den e paradijs ei. Pafo di e paradijs spiritual tin e mundo di Satanas, cla pa traga ken cu cabisha spiritualmente. Ta sumamente importante pa nos sigui ta “alerta” y prepara pa e dia di Yehova.—Mateo 24:42, 44.

Bo Ta Corda?

• Ki spiertamento Hesus a duna relaciona cu su binida?

• Cu kico Hesus a compara e tempo di su presencia?

• Den ki maneranan nos tempo ta similar na e tempo di Noe?

• Reflexionando riba e similaridadnan entre e tempo di Noe y nos tempo, mester tin ki efecto riba nos sentido di urgencia?

[Preguntanan di Estudio]

[Comentario na pagina 18]

E texto di aña pa 2004 lo ta: “Sea alerta . . . Sea prepara.”—Mateo 24:42, 44.

[Plachi na pagina 15]

Noe a haci caso di spiertamento dibino. Nos tambe ta haci mescos?

[Plachi na pagina 16, 17]

“E binida di e Yiu di hende lo ta mescos cu e dianan di Noe”